The Boys...

مما لا شك فيه إني مش حابة أبدأ الموضوع ده بمقدمة موضوع تعبير كنت بستخدمه وانا ف ابتدائي، لكن بديهيا، امبارح مارست هوايتي المفضلة في البينجي ووتشنج، وشفت مسلسل جديد من انتاج Amazon Prime  وحبيت أكتب عنه.

Image result for the boys

بداية أحب أنوه ان ما بين كل ست مسلسلات بتنتجها النتفلكس، أمازون بتعمل مسلسل واحد "بيدوس" حرفيا علي وش كل مسلسلات النتفلكس اللي بقت معمولة للمشاهد الأصمر الأمريكي، مسلسلات النتفلكس بقت كلها طفولية وتطفح بالصوابية السياسية، ناقص يعملو تنويهات ف نص الأحداث "احنا جايبين ممثلين أسيوين ومثليين وأفارقة أهو، احنا بنشجع كل الناس أهو" وهكذا، الأمر الي نفرني بشدة من الفرجة علي كل مسلسلات النتفلكس، وخلاني بس استخدمه للفرجة علي الوثائقيات، والأفلام القديمة، مع إن المكتبة الخاصة بالشرق الأوسط "صفر" بالنسبة للمحتوي العالمي الخاص بالنتفلكس.

Image result for the boys

مشاهدة مسلسل The Boys كانت تجربة ممتعة، وحلوة، ممثلين طازة، وشوش غير مألوفة، والشئ الجميل إن المسلسل +18، مش عشان المشاهد الساخنة، لكن لأن القصة مش موجهه للأطفال أو المراهقين، القصة خاصة بالمتفرجين الواقعيين، والكونسبت بسيط جدا: "هيحصل ايه لو العالم كان فيه سوبر هيروز، والسوبرهيروز دول مش طيبيبن؟".

الانتاج سخي جدا، وتصميم الأزياء والديكورات أكتر من موفق، مش هتكلم عليه كتير، لكن فكرة المسلسل باختصار بتقوم علي محاكاة واقعية لعالم فيه سوبر هيروز، أطياف مختلفة من البشر، ومليون درجة ما بين الأبيض والأسود، بتشوف السوبرهيرو المجنون، المحبط، المكتأب، اللي هويته ضايعة منه، المدمن، العاطل، وغيرهم من أطياف البشر المختلفة.

المسلسل لعب بذكاء شديد، خصوصا في تصميم الأزياء علي التخبيط ف كل السوبرهيروز اللي معروفين والناس كلها بتحبهم، واللي شركات الكومكس الكبري بتطلعهم كأنهم ملايكة بجناحات، ف مثلا بتشوف:

1- هوم لاندر:
Image result for the boys homelander
وهو اسقاط مباشر علي "كابتن أمريكا" و "سوبرمان" مع بعض، بيجمع بين صفات الاتنين الجسمانية، ولابس علم أمريكا ف بدلته، وهو أكبر سوبر هيرو لشركة "فوت" اللي عاملة بيزنس كامل من وراه.

2- كوين ماييف:
Image result for the boys maeve
وهي سوبرهيرو ست، لبسها بالظبط منحوت من وندروومان، لكن مع احباطاتها، وضياع هويتها الجنسية واكتئابها وشعورها الشديد بالذنب من تصرفات هوم لاندر.

3- زا ديب:
Image result for the boys deep
وهو بشكل مباشر بيجمع ما بين "أكوا مان" و "نامور"، بس هو نسخة أقل تأديبا، وأكثر اكتئابا.

غيرهم وغيرهم من السوبر هيروز، اللي عملو فظايع كتير ف حياتهم، وعايشين حياتهم وبيخترقو القانون، ووراهم شركة ضخمة بتحميهم.

4- أي-ترين:
Image result for the boys a train
وهو طبعا اسقاط علي "فلاش"

في المقابل فيه فريق من الجنود السابقين، معاهم شاب صغير اتعرض لحادثة بسبب واحد من السوبر هيروز دول، أكيد مش هحرق، لكن الحادثة دي هتكون السبب ف تورط الشاب ده ف حرب كبيرة، وبتشوف الفارق ما بين قدرات الشخص العادي، وقدرات السوبرهيروز.


المسلسل مكون من 8 حلقات، كل حلقة حوالي 45 دقيقة، مليان أحداث، مبيقفش ومش بيهدي، خيوط درامية كتيرة اتفتحت، وانتهي بنهاية صادمة كبيرة، ولسه فيه أحداث كتيرة محتاجة تتربط وتتقفل.

أتمني إن المسلسل ده ميفقدش بوصلته الدرامية، ومينتهيش زي مسلسل The man in the high Castle اللي اتعمل منه 3 مواسم، وخلصت تقريبا موسمين ونص منهم، وأنا بقول "أيوة يعني انت كمؤلف عاوز توصل لإيه؟"

لفت انتباهي بردو موسيقي المسلسل، واختيار التراكات المناسبة لكل مشهد، وقطع المونتاج الممتاز، والجرافكس الفوق ممتازة، كل دي عوامل تخليك تتفرج وانت مغمض وانت عارف انك هتشوف مسلسل جميل.


تعليقات

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!