تمام يا أفندم

غريبة حياتنا.. تشبكنا... وتملكنا... ووسط حكاية منسية... بتشغلنا وتحبكنا... تسك علينا بالمفتاح... نهاية وجاية.. مش ناسية... ومش قاسية... شافتنا بنبكي  حضنتنا... وهمستلي: كفاية جراح... رياح الصبر دوارة.. وست الحسن  غدارة... ضفايرها تشيلك يوم... ويوم تاني... بتبقي سلاح... ولما القصة  تتحول وتبقي حياتنا.. م الأول.. نقع ونقوم.. وبنهول.. ونديها نحيب ونواح... وتيجي حياتنا... تدفننا... تسك علينا بالمفتاح...

عن نفسي.. انا باكره نفسي.. وباكره أشوفني.. ف عين الناس... وبحاول..أيوة بحاول.. أخلص...وأمشي.. كفاية خلاص... وكرهت حياتي وعيشتي.. الدنيا تبرد..تشتي... ولا مرة ف يوم بقششتي... واتمنعتي علي الناس... انا باكره حتي ملامحي.. وباكره أشوفها ف عين الناس... جوايا الحقد مأصل... متستف..طبقات طبقات... الشعر معادش يحصل... جوايا اتحنط مات.. بلبعت الدوا قراطيس.. وشربت سجاير لف... ف شوفولي بجد قميص.. العقل زنقني وخف... انا عاوزة أتكوم جنب الحيطة.. يادوب أنفع أتباس... انا باكره حتي ملامحي.. وباكره أشوفها ف عين الناس...

وهبتك حتة من قلبي... سكنت ف ضلعك الاعوج... ومن تحت الايدين دية... لا عاوزة أقوم..ولا أخرج... انا المفتونة ف سكونك.. وانا المجنونة ف غيابك.. اتاري الصدفة جامعاني.. رمت قلبي علي بابك... يا سيد روحي...وسيد نفسي... قالولي البعد بينسي... وكله كلام.... أنا الأيام... تمر عليا ف بعادك... سنين قدام.... كفاية الدمعة ف حضورك... تخاف وتروح... كفاية البسمة ف وجودك... ترد الروح.... بحبك حتة من ذاتي... بحبك حبي لإخواتي... فداك ايامي، وساعاتي... عشان تعمل بقي حسابك.... انا المفتونة ف سكونك.. وانا المجنونة ف غيابك.. شونج 18/10/2015

يمكن صباح الخير؟ يمكن صباح النور... الضلمة مش أوبشن... والعتمة دي هتغور... انا من هناك يابني... قلبي هنا جايبني... دورت علي ضلي.. ورجعت ليه مكسور... مش فارقة مش جايبة... الدنيا مش سايبة... انا بنت ناس، دايبة... في حبال هوا...بتدور... وبقول أهو لنفسي... يمكن...صباح النور..!

افضل انكش ف جرحك.. لحد ما يتفتح... وافضل احرن وزن.. لحد ما تندبح... عاوز سكينة تلمة... تخلص يوم عليك... عايش ف أوضة ضلمة... ماشي اتكعبلت فيك... بكره نفسك لكني... انا بردو نفسي فيك... امسك ايدي وراضيني.. وامسحلي دمع عيني... حسس علي راسي أكتر... البطحة تتفضح... وافضل انكش ف جرحي... لحد ما ينفتح...

كل حاجة مش ف صالحك.. حتي جرحك.. ان نزف دمك هتتعب.. مش هتلقي حد جنبك.. وقتي عدا... النهاردة... اتفتح جرحي القديم.. شوف قلبي.. دمي نازف.. يبقي جرحي..هو جرحك.. وقتي مر ومش ف صالحك... انتظر واتعب وكاكي... العرق...نازل سيول... بس بالله..ما انتا حاكي.. كل أسباب النزول... واجتهد...تفسير واية... بس ملغية الحكاية.. الامتحان جاي ف ساعتها.. فجأة يهجم زي غول... يللي سهران زي ليلتك.. سودة زي عيون عزول.. كما تدين تدان... فاكر أيام زمان؟ كنت بتعرج..وخايف... تخوض بحر طين... حاسس لسه بأنين؟ حاسس لسه بألم؟ لسه بتقول ياريت... ايدين تفتح ف جرحك؟ صدقني يا صديقي.. الوقت مش ف صالحك!!

باعيش ف دايرة مقفولة.. عالم وهمي من صنعي.. بلعن ف سجني والسجان.. ولا له ف حبسي ولا ف منعي.. مفتاحي ورميته بنفسي... ف بير غويط وملهش قرار.. سميت سكوني وخضوعي.. دفا وأمان...كدة استقرار.. قبضت قرشين من شغلي.. ورايحة جاية وانا باغلي.. كتبت شعر وقطعته.. وشعر راسي قطعته... الضحك مسموع ومنعته... يمكن ياخدني وانا باعدي.. باعيش ف دايرة مقفولة.. عالم وهمي من صنعي 28 يونيو 2015 النهاردة عيد ميلاد سمر...أكتر انسانة كشفتني قدام نفسي وعرفتني انا قد ايه مستحقش ابقي موجودة اساسا...اخر رابط ليا بالعالم البشري...

أواب يا وقت الندم.. وقت الندم...تواب... سرسب سنين العدم... تاري الألم..دحلاب.. يابنتي مهما اتوجع.. قلبك مسيره يقوم... فوق وقوم يا جدع.. وقولي صحي النوم... غطيت بحلم كبير.. لا نهاية ولا مبدأ... غطيت وخم النوم.. سابني وانا بغرق.. في بحر دمي باعوم.. لا بقيت خلاص نافعة.. لا طبلة ولا طارة.. ولا حاجة هنا شافعة.. ولا حتي زمارة.. بقليلة يا حليلة... وعملنا هليلة.. تقيلة ليه الشيلة.. وكتير يا سيدي الهم.. وقت الندم أواب.. سرسب سنين الدم... 23 يونيو 2015

نجيني من علوقيتي.. نجيني م الشرير... بطلني أكدب كل يوم... امنعني م التحوير.. طلع لحوم الناس... من بيتي وعيالي... وكرامتي احفظها.. هي اللي باقيالي.. وفقني للأصحاب.. وفقني من غيرهم... متغمينيش ف النور.. دي الضلمة باقيالي... متقسيليش قلبي.. حكمني علي غضبي... نولني بقي طلبي.. وكفاية بقي تصبير.. علمني اني اختار.. ارحمني م التفكير.. نجيني من علوقيتي.. نجيني م الشرير...!

أتمني ساعات الضلمة تفوت... أو أسهل...أموت... الموت مش سهل يكونله ملاك... وانا نفسي أشوف.. حبة بروزاك... علي طرف الخفة... هلف اللفة.... هشوف الدنيا ف غمضة عين... وهضرب الفرحة ف اتنين... حشيش ومولع ع الجنبين.. وجوب شمال...وجوب يمين... !

أفيونتي الأغاني.. أفيونتي اني بعاني.. بشم الحب شم... واستعذب الألم... مليش ف الدنيا أم.. تشيل الهم مني.. فببكي من سكات.. ولما أزهق بغني... لايقلي الحزن لايق... وشكله زيي...سني.. يا دبابير المحبة.. بلاش تنعي.. تزني... الصدق بالتمني.. صداقتي متساويش.. متوولة ماشية طايرة.. اصلي انتشيت بفني... فببكي من سكات.. ولما أزهق بغني... وحيدة يا شونج لكن.. زحام ما بين ضلوعك.. نابض قلبك بحب.. مزود من خضوعك.. العرش فوق دماغي.. ضله مضلم سمايا.. ناجيت العرش لكن.. هو مقصر معايا... وشافني ناكره خيره.. فسلسلني وحبسني... وأفينت بغباوة... ف أفيوني هوسني... رقصت وانتشيت.. أصلي انتشيت بفني... وببكي من سكات... ولما أزهق...هغني.. شونج  13 يونيو 205

مسا مسا...يا شونج بيه... مسا يلا، إلعب باليه.. ولد بلا أهل وبلد... لكن ولد... صايع ومالي الكون ضجيج... راح الخليج.. راجع بخف حنين ف ايده.... علشان عند... نشف دماغه واتكل... جر الشكل غية... وغاية للولد... تقوله ليه، ويرد ايه... إلعب باليه... يا شونج بيه... مخلوق غلط... مخلوق بتركيبة عجب... طب ليه بقي، وايه السبب؟ انا مش حمار.. انا مش غبي... انا نفسي يحصل مطلبي.. وأهدي بقي... نفسي استكانت للشقا.... حتي الكلام الي ف عيوني... بطل كلام... والدوشة مبقتش ف وداني من الزحام... الدنيا تيه... تقوله ليه ويرد إيه... إلعب باليه..!

قول باللذي غواني.. خلاني أحب تاني.... سمعني شئ جديد... عارفة كل الأغاني... قول باللذي فطرني... وم العياط فطرني... الحزن ليه قطرني.. ومن فرحي ناداني... قول باللذي رحمني... ده كلام الناس رجمني... والدمع اللي فطمني... والنور اللي عماني.. قول باللذي غواني...

اهداء لكل البردانين السهرانين اللي ف اول خلقنا... م الأصل: طين... واللي هيتشلّو  من النت البطئ... واللي كمان ملّو.... واللي بيتسلّو... بضحكة وكلمتين.... اهداء لكل السهرانين.... 14 يناير 2015

يا دفيانين شدو الغطا... ما رسي العطا... والبرد بان... لاكت سيرتنا الألسنة... وبقت خلاص... مضغة ولبان... وفقدنا حتي حقنا... لو يوم هنحضن بعضنا... البرد مش هيهزنا.... وتهدنا عيون الجيران! يا دفيانين شدو الغطا... ما خلاص بقي... فات الأوان...! 10 يناير 2015

التوكتوك تايه... مش لازم يلقاله طريق... وحواري المنطقة بتنوح... انا قاعد جوة التوكتوك بردان... ومطب...مخليني اتطوح... انا كنت بافكر لو أروح... وأفرد رجلي...واسند ضهري.. وأسمع أبويا يزعق حبه... وأتجاهله....وأسيبه كمان يهري... وأخلي اختي تعشيني كمان... وتجيبلي ف مية...وتسقيني... فكرت كتير قبل ما أروح... فكرت اني أقطع شراييني... سلالم بيتنا بتترقص... شمتانة ف طلوعي بهمة... انا خايف أكون ماشي براحتي... وأطب...سكاتي يكون حكمة... أقعد...ألعب هنا ع البسطة... لا...ولا بلاش....تيجي القطة.. وتخضني....وانا كدة كدة مش ناقصة....  مش حاسة اني خلاص بردانة... ومجرد مرهقة...نعسانة... يوم الشغل طويل...ومنيل... وعليه بردو خلاص...هتصبح.... وانا جوة التوكتوك بتمرجح.... 5 ديسمبر 2014

من واقع تفليسة اخر الشهر... وقبل النوم... مستني الميل... والواقع بيقول مش قابض... العرق ف رقابينا النابض... الدم بيكدب...وبيجري... بيزوغ من اسئلة بالكوم.... انا مش موجود.. واللي بيسأل...احسن ينسي... واللي بيغرفلي...يتوصي... سلاطين الليل....بعمايم سود... وبليغ ف الركن...بيحضن عود... بسكاليا بتلعب....ف وداني... والبن ده من عبد المعبود.... وحياة النوم...اللي منمتوش... وحياة القبض اللي مخدتوش... والابن اللي بضمه لصدري... وبشده...وبيسبني ويجري... بيزوغ من اسئلة بالكوم.... مش عارفة اتكلم...ولا أعبر.... ولا اقوله انه عاجبني...وعاوزاه... انا راجل...ف الروح والمنظر... والراجل مش هيعوزني معاه.... يتجوز صاحبه الأنتيم ليه؟ والله ماهعرف..ولا اجاوب... وبحاول ابقي رقيقة يجوز... كل ما بفتح بقي...بحارب.... بضحك زي تشارلي ف سري... وباخدني وعلي سهوة...تحري.... وما بين اسلام...وأحمد...فكري.... شفتك يا هشام..... حكم الاعدام...مش شنق وبس... ده كلام جواك...مات..ومقلتوش.... ومشيت ف طريقك....مش سائل... بتبيع نفسك...مش فاهم ليه.... مع...

بعد أيام حافلة من الاحتفالات الفشيخة، لأن السيد المغني الأعظم زار بلوجتي...حاولت أكتب اي حاجة فنية لكن فشلت....لأن ببساطة اللي انا ميالة ليه...واحشني... واحشني ونفسي اشوفك فشخ يا بني ادم....ياريتك كنت بتحبني ربع مانا باحبك...او ربع نستو حتي...مش هتفرق :( عينيك بتطارد أيامي... وتكسرلي كل كلامي.. وبتلمح ف الضلمة دموعي... ومع الأيام باخد وأدي... واديني بعيدة...ومكسوفة... وعيوني تدمع مطروفة... هتشيل الرمش اللي ف ايدي... والحزن مسلم علي خدي؟! عينيك الخضرا العسلية... وكلامك كله زمان ليا... وحاجات وحاجات.... تنهيد واهات.... ف عز الخوف..والعصبية... والحب محايلة ومدادية... وانا كلي حنين... طب هشكي لمين؟! وياريتك لحظة تكون عندي... والدمع مسلم علي خدي.... :(