المقالة المتحولة...من أطلال العيد...لبليغ حمدي!

كان من باب أولي بدلا من تكريم الفنان حسن يوسف، وهو فنان محترم –مشيها محترم- أن يتم تكريم الراحلين عن عالمنا في هذا العام: أحمد فؤاد نجم أولهم، عاش مطاردا، ولم يتم تكريمه من الدولة من قبل، كان مفترض يتم تكريم الشيخ إمام، مفروض يتكرم واحد زي صلاح السقا، واحد زي شكوكو، واحد زي بليغ حمدي....

انا شايفة تجاهل واضح وبين وعلني وصريح من كل أجهزة الدولة تجاه بليغ حمدي، بداية من الطابع التذكاري اللي قيل انه سيصدر عند وفاته، وحتي الآن في التعنت الشديد والواضح من أهم جهاز انتاج في الدولة تجاه انتاج المسلسل اليتيم الوحيد اللي مفروض يحكي قصة حياته وكان هيبقي بطولة عمرو واكد –ازاي الله اعلم بس قشطة-، بليغ حمدي عبقري، لا ولم ولن يطلب التكريم، رحمه الله، مات مغتربا، وعاش محاربا بفتح الراء، من كل الجبهات، تصور هذا الشخص الضعيف الضئيل الحجم العظيم القدر أمام كل هذه الجبهات من الحروب، والشللية والتربيطات والمؤامرات، فكر معي يا سيد..!

المقالة كانت في الأساس للدفاع عن مسمي عيد الفن، لكنها تحولت للدفاع عن عبقري منسي، مش كتير عليه اني أكتب كام كلمة وانا عايشة معاه كل يوم وكل ليلة من أول سنة 2012 لحد دلوقت...مش كفاية أبدا....

بليغ حمدي، قدم للموسيقي فوق اللي قدمه عبد الوهاب وزيادة، لكن للأسف، بليغ مكانش مطرب الملوك والأمراء، ولا كان اللواء الدكتور عبد الوهاب، ولا اتعمله جنازة عسكرية لما مات، ولا خد ميت ألف جنيه من التليفزيون لما سجل قصة حياته مع سعد الدين وهبة في التسعينيات، ولا أي حاجة من دول، بليغ كان فرد ضد مؤسسة، والنقد مش موجه لعبد الوهاب بشخصه، النقد موجه لمؤسسة الدولة، اللي بتقف قدام كل عبقري، وتسحق كل شئ جميل، بدعوي الأخلاق والتقاليد...لكن مين قال ان الفنان لازم يكون عنده معايير زي معايير المجتمع؟

وان شاء الله في عيد الفن القادم سيتم تكريم الفنانة شمس البارودي، والفنانة ناهد يسري، وروح الفنانة ناهد شريف، بما إنها بقت كدة بقي، وبتوع الثقافي بيتكرمو عيني عينك، بدلا من تكريم المغني، كرّم الملحن، كرّم الشخص اللي بث الروح في الكلمات الرقيقة، بدل المغني كرم الشاعر، كرّم الشخص اللي لولاه كان زمان صوت المغني همهمات بنوتة من غير روح، كرّم الشخصين اللي هما سر وجود الأغنية، مش تكرم المغني، كرّم الشخص اللي عمل المغني الأول.

بليغ فكرة، بليغ عايش، عايش طول ما ولاد أخوه عايشين، وطول ما انا عايشة، بليغ قضية، واحنا هنفضل وراه، لأن الناس كلها، لازم تعرف قدر الشخص اللي شكل وعيها في اخر خمسين سنة.....غيرالدكتوراللواءالمهندس عبد الوهاب اللي مسخ نشيدبلادي بلادي، ولطش ألحان من بيتهوفن والطويل والموجي، وبليغ نفسه!!