عيد الفن....من أوله..!

عيد الفن...من أوله...!

عيد الفن في ثوبه الجديد، بعد ما توقف في التمانينات لما السادات عمل حفلة وبعتلهم ساعتها لافاش كيري - مبارك - اللي الفنانين محدش منهم استعناه، وساعتها مبارك حلف بالطلاق من سوزان ماهو معبرهم تاني...

ماذا أقول بعد كل ما قد شاهدت...مهزلة واسمها حفلة عيد الفن، حضرها عدلي منصور، والسيسي اللي الكاميرا مجتش عليه ولا مرة إلا لما كانت بتجيب الصف الأول توتالة، قال يعني دولة مدنية -تيت- وقال عدلي منصور فيها خطبة مغلطش فيها ولا غلطة نحوية واحدة، علي اعتبار ان ده استثناء دلوقت، لأن المصريين مبيعرفوش يتكلمو غير عربي، ومكسر، وانجلو آراب، وشوية شوية يبدلو الحروف العربي بالانجليزي، ويكتبو فرانكو.

عيد الفن، عيد الفن من أوله واشطب علي كل الناس المريبة اللي حضرت الحفلة دي، مصر كلها مفيهاش غير ممثلين، ممثلين، ممثلين..مصر مفيهاش نحاتين، رسامين، مطربين، موزعين، ملحنين، أي حاجةغير التمثيل وماسورة النيل للدراما وياريتهم ممثلين عدلين، ممثلين أكل عليهم الدهر وشرب، بالإضافة لشنب الفنان "فاروق الفيشاوي" اللي ملوش أي محل من الاعراب!

الحفلة كانت سيئة التنظيم، كنت سامعة ع الهوا توجيهات المخرج وهو بيحرك الممثلين (المعاشات) ع المسرح، وسمعته وهو بيقول لحسين فهمي "ارجع بضهرك ارجع بضهرك" كأن حسين بيركن مثلا، وسمعت بيقول لجمال بخيت "اطلع قدام"، مخرج ده ولاسايس..!!

وايه حوار هاني رمزي ده؟ ولاهو علي سبيل الوحدة الوطنية وخلاص بقي مقرر؟ وايه حوار ليلي علوي ده؟ ملل! إلقاء باهت، وأداء ممسوخ، وجمال بخيت مطلقة وراشقة ف اي مصلحة، مش باقي مني تلاقي، ام الدنيا قد الدنيا تلاقي، عيد الفن تلاقي، وف الاخر راح داخل واحد غريب جدا كدة وغني لسيد درويش، وفجأة وبلا سابق انذار لقينا كل الممثلين ع المسرح –بينشزو معاه- ممتفهمش ليه ولا فين ولا ازاي! وصوت المخرج فضل باين وهو بيحركهم ع المسرح!

استراحة قصيرة، وعرض لقائمة المكرمين، القائمة طويلة ومليانة ناس عمالقة، لكن علي اي أساس اختاروهم؟ علي اي اساس اختارو عز الدين ذوالفقار مثلا؟ وعلي أي أساس اختارو فاتن حمامة وهي شبعت تكريم برة وجوة؟ ناس كتير فاتهم قطار التكريم، والموضوع اسمه "عيد الفن" مش عيد السينما، يعني الحوار مش حوار ممثلين ومصورين ومخرجين! وبعدين تكريم حسن يوسف بناءا علي ايه؟ علي مسلسل الحاجة زهرة؟ ولاعلي أفلامه اللي طلع فيها شعر صدره برة؟

عندي اعتراض كمان: ليه عيد الفن يبقي مع عيد ميلاد عبد الوهاب؟ ليه؟ هو صحيح كويس وبرنس وعمل كتير بس ليه!!! وليه مش سيد درويش؟ ليه عبد الوهاب؟ وليه مش بليغ حمدي!! أسئلة وعلامات استفهام كتير الحقيقة...!

بعد كدة بقي، السبب الرئيسي لقعدتي قدام المهزلة دي: أنغام، قلت أنغام هتغني بقي ست سبع ساعات، طلعت غنت تلات أغاني منهم واحدة غنتها مرتين! وأغنية لعبد الوهاب (أخي جاوز الظالمون المدي) وانا مش عارفة هي موجهة لمهاويس السيسي ولا السيسي نفسه ولالمين بالظبط!

جريت أنغام، ودخلو وراها الأستاذ هاني شاكر (حسبي الله ونعم الوكيل) لابس تكسيدو كأنه ف فرح –عديها عديها- غني حاجات ظريفة، حليم، وليه، وأغنية وطنية معمولة ف ربع ساعة بردو، وقفل بأحلف بسماها وبترابها، ياخي اححححححححححلف زي ما انتا عايز بعيد عن نافوخي، كفاية صداع...

عندي تعليقات ع النص التاني من الحفلة:

1-     ليه أنغام ف كل حفلة رسمية؟ هل علاقتها فشيخة للدرجة دي؟ هل هي فعلا مطربة مصر الأولي؟ وفين شيرين وآمال ماهر ومي فاروق وريهام عبد الحكيم وغيرهن من الليلة دي؟

2-     هاني فرحات كان شامم شرابين قبل الحفلة، كان بيconduct وهو بيتطوح، أو بيقتدي بسليم سحاب.

3-     ليه هاني شاكر؟ هي الأصوات الرجالي الحلوة خلصت م البلد!!

4- ايه جو الأضواء الملونة دي؟ ده فرح ولا عيد ميلاد؟ كان ناقص مكنة دخان واغنية خدني بين ايديك بتاعة حميد!

تنظيم الحفلة صفر علي عشرة، والمذيعات بتوع النيل للدراما لابسين سواريه عريان ومفتح، مع ان فيه حاجة اسمها نشرة جوية وسواريه مقفل وفرو والله، وكفاية ام هاني رمزي وليلي علوي، دول بقو يطلعو ف كل حتة ولا كيم كارداشيان....

كلمة أخيرة.: الله يرحمك يا عمار انتا وعبد السلام أمين....وينجينا من مهالك وليد سعد وجمال بخيت!

علي الهامش: أغنية "الفن" اللي كانت الtheme الرئيسي للعيد، عبد الوهاب كان عاملها تملقا في الملك فاروق، اللي ساعتها معبرهوش وكدة باعتباره كان لامم مزز البلد تحت رجليه...يعني النشيد القومي للعيد كان معمول من Ass Kisser لملك كان ضارب الدنيا بالشلوت...