صعيدي بالكريم بروليه..!

المقادير: عدد تسعة مطاريد + عدد واحد عمدة ظالم – كبير القرية – عميد عيلة كبيرة ف القرية (المهم انه راس كبيرة وخلاص) + عدد تلات ستات لابسين ملس أسود وعلي وشهم طن بوية للقيام بدور (أم – أخت - حبيبة) للعمدة + عدد واحد زوجة للراس الكبيرة دي، ويفضل تكون مبيحبهاش + عدد اتنين ليهم تار عند العمدة + عدد خمسة بدقون للقيام بدور جماعة اسلامية متطرفة + عدد واحد قسيس واتنين 

جواهرجية للقيام بدور الوحدة الوطنية + عدد واحد غازية بفرقتها + عدد واحد يقف ف وش الظلم ده كله = مسلسل صعيدي مصري..

الطريقة: الفكرة كلها بأن الكاتب بيحاول يطبق كل اللي درسه في السيناريو ف مسلسلات الصعيد، فتبدأ الأحداث مثلا بكبير القريةالظالم (مندور أبو الدهب – حدائق الشيطان) أو كبير العائلة العاقل (رفيع بيه العزايزي – الضوء الشارد )، (زكريا ابو العمدة - الفرار من الحب)بأنه مسيطر علي كل حتة في البلد، البلد كلها تحت ايده، ليه كلب خدام ليه من اللي حواليه (صلاح عبد الله - الضو) أو أي غفير عادي، بيبقي كاتم أسراره، وعادة بيبقي عازب (متفهمش ليه!) أو ليه مغامرات نسائية مع راقصات من عينة (ميسرة) وليه شنب مهول، وحساس لكن مشاعره مكتومة فشخ.

بعد الفرشة العظيمة عن سيطرة وفشاخة البطل، بنبدأ نشوف المليحة بتاعة المسلسل، المزة، الحتة الطرية اللي هتقع تحت نظر الجبار بعد كدة عشان يسيطر عليها (مني زكي – الضوء الشارد) و (آثارالحكيم – الفرار من الحب) و (سمية الخشاب – حدائق الشيطان)، واللي طبعا ياما مطلقة، يا ارملة، يا عانس، وعادة بتبقي أرملة أو عانس، لأن المزة دي مينفعش تكون مطلقة لأنها ملاك  لا ينطق عن الهوي، إلهه مجردة فوق كل البشرية وكدة.

طبعا فيه زيليون عائق بين البطل والبطلة، كان يكون أخو البطل الصغير متجوزها (الضوء الشارد)، أو يكون فيه بينهم نزاع علي أرض (الفرار من الحب)، أو يكون بينهم تار وهو قتل جوزها وهي مش عايزاه م الأساس (حدائق الشيطان)، والعائق ده بينتهي إما بأن البطلة بتخلع زي آثار الحكيم، أو بترضخ له بالعافية زي سمية الخشاب، أو محمد رياض بيموت ونخلص منه ويتجوزو بعض!

بطلنا همام، مغوار، بيلعب في الآثار / المخدرات / مجلس الشعب، وليه دايما عائلات في الصعيد دايما ماسكها الفنان يوسف شعبان ومجنن عليه عيشته، وبيضرب عليه نار من وقت للتاني كنوع من التسالي، ودايما بينتصر عليه ف النهاية، عادة بردو البطل بيعذب من ست لسبع خدامات وخدامين في المسلسل وتلت العدد ده بيموت كنوع من العقاب للخدامين اللي بينقلو الكلام بين اسيادهم وكدة، بالإضافة لأن فيه ظابط وست أمناء شرطة مخصصين طول المسلسل للتخديم علي البطل وتقديم الشاي والقهوة ليه في القسم، ونصرته علي اعداءه، بالإضافة لعضو مجلس شعب ويفضل يكون (محيي الدين عبد المحسن) وده طبعا في حالة ان البطل مش عضو ف المجلس أصلا.

الجو نشف؟ انزل يابني بالمولد والغازية ام بدلة رقص سودا وفيها ترتر ومفتوحة م الجنبين وداقة وشم ف دقنها وجنب عينها، واقتل الرقاصة ف الاخر لما الناس تزهق منها/ تحمل / تفتن علي البطل، كفاية عليها كدة.

مرحلة الصراع جت، البطل خد البطلة بعد صراع رهيب مع الأي حاجة، الخاين بيموت، البطل بيتعرض لمحاولة اغتيال ع الزراعي، بيطلع منها، بيضرب فراخ وشوربة من ايدين أمه / المربية بتاعته، بيتعافي، بينتقم، بياخد المزة، بيقتل شركائه، بيسلم المطاريد، بياخد باب المسلسل ف ايده وبيروح وبينزل بتتر النهاية.

عزيزي المتفرج: متنساش تضيف علي كل الخلطة دي عدد واحد تتر من غناء الحجار وتأليف الأبنودي وتلحين عمار الشريعي.

النتيجة: يقلب جيدا ويشرب علي غيار الريق.