عمره ما يغيب "محمد حماقي" - قراءة نقدية
دائما ما أتناول الأغنيات التي أنتقدها بعدم حياد، فإما أكون أحب الفنان حبا شديدا فلا يكون انتقادي له شديدا، أو شديدا علي حسب درجة محبتي، أو أكون لا أحبه من البداية، فلا أهتم به مطلقا، لكن "محمد حماقي"، دوما يصيبني بالارتباك.
بدايتي مع حماقي كانت مع أول أغنياته، وألبوم "خلينا نعيش"، وطارق مدكور، أحببته في "بتضحك"، لكن شيئا ما ظل عقبة بيني وبينه، ولم يكن مطربي الأول، أو المفضل، بل اتهمته باتهامات عديدة، منها "الحزق"، و"التكرار" و"الغرور" وغيرها.
الحقيقة أن اتهامي له كان نابعا من كوني أفضل عنه تامر، تامر أخف دما، سواء لحنا او في افيهاته الغنائية، أو كممثل عامة، فازداد الحاجز الفاصل بيني وبين "حماقي"، خصوصا بعد ألبوم تامر قبل الأخير "بحبك انتا".
دوما ما كنت أجد حماقي كرجل ناضج، بينما أضع تامر في خانة الطفل الساذج، تامر إلي حد كبير يتعامل باستهانة مع ألحانه، لكني أحبه علي أية حال، علي عكس حماقي، لكن هذه المرة الأمر مختلف....
مقدمتي طالت لأنني بصراحة "مبهورة" من مستوي حماقي الفني في الألبوم الأخير، بكل أريحية يمكنني أن أعلنها أن حماقي ولأول مرة منذ انطلاقته الفنية قد تفوق علي نفسه، وأبهر الجميع بمستوي فني مختلف، وأغنيات منتقاة بعناية.
إليكم التقرير التالي من داخل ألبوم حماقي، يلا ناخد غطسة سوا!
1- أجمل يوم "عندك استني دقيقة".
كلمات أيمن بهجت قمر - ألحان عمرو مصطفي - توزيع تميم.
أول أغنية في ألبوم حماقي، والتي وقع اختيار ادارته وهو عليها لتصويرها فيديو كليب، بعيدا عن جمال صورة الفيديو كليب، والمخرج الذي استطاع ادارة حركة حماقي -الثقيلة نسبيا- في الكليب، ووظفها بشكل ملائم، ومزجها وسط رقص المجاميع، فجاء الكليب لطيف وغير مبتذل، ومناسب لايقاع الأغنية.
الأغنية بالأساس أقرب لروح عمرو مصطفي، حماقي عامة -ساب نفسه- لعمرو خالص في الألبوم ده، مما يؤكد لينا ان عمرو مصطفي لسه عنده أكتر عامة، حتي لو بينحت، بس لسه بنحبه.
ايقاع الأغنية مزج بين ال"جاز" وال"ريجي" في لازمة الأغنية، الريجي طبعا لمسة من تميم، الأغنية عامة جت مميزة جدا لعدة عوامل منها:
1- التوزيع الخفيف، غير المزعج، مفيش دوشة، الاعتماد علي الصقفة والصوت البشري عامة.
2- ألتراس حماقي اللي أضافو للأغنية اضافة كبيرة الحقيقة، وصوتهم كأولتراس كان أفضل من الكورس العادي، وأفضل من اننا نسمع صوت حماقي "توناليتي".
3- اعتماد الأغنية علي "الافيه" وطبعا دي لمسة "أيمن بهجت قمر" ولحن عمرو مصطفي اللي رسم الكلام، ممطش ف ولا جملة، وعرف امتي تميم يدخل الكورس في النص، ويوظف الصقفة بشكل فشيخ طبعا..!
مسمعناش في الأغنية غنا تقيل من حماقي، اللحن نفسه مش مستعدي، الأغنية جوها فكرني ب"بحبك كل يوم أكتر" نفس الستايل الديناميكي واللي يرقصك.
الأغنية عامة لطيفة ممكن نديها 8/10
2- ما بلاش.
كلمات أمير طعيمة - ألحان تامر علي - توزيع تميم.
أروع ما في الأغنية مقدمتها الموسيقية، مصطفي أصلان عامل توزيع وتريات هايل خصوصا في الانترو، والجيتار بتاعه، دقته فكرتني بأغنيات "تيلور سويفت" الأغنية عامة جوها كانتري جدا، تحسسك من دخلتها ان افريل لافين أو سويفت هيغنو، لكن حماقي بيدخل عليك دخلة هادية عامة.
تامر علي عامة ألحانه هادية، الأغنية لحنها يحزنك، زائد كلام امير طعيمة
"لما يومها حضنتتني وبعدين مشينا...ليه مقلتش ان ده الحضن الأخير؟"
الأغنية أجمل ما فيها أنها ابتعدت تماما عن جو النواح الأزلي والفراق واتموسفير هاني شاكر ده، الجيتار عامة، مسابلكش فرصة تفكر ف أي حاجة، لو سرحت من الكلام، هيجيبك هو تاني، وكان لازم عشان حماقي صوته يتوازن مع الجيتار الجبار، كان لازم يغني لازمة الأغنية كلها توناليتيه، ودي حاجة كانت ف صالح الأغنية عامة.
العمل مش جديد أوي علي حماقي، حماقي متعود دايما يغني مع جيتار في معظم ألبوماته، من اول "بتضحك" وانتا طالع، لكن الأغنية وكلماتها حملت تجديد ف حاجة، صوت حماقي حاسس الكلام أوي، احساسه بالغنا عالي، ودي حاجة انا عن نفسي كنت مفتقداها جدا، خلجات صوته، قفلاته وفتحاته، كلها بمسطرة...بالمقاس....
حسيت في التوزيع بردو ان استخدام "الصقفة" من تميم بهوأ معاه شوية، يعني كان محتاج يدخل في التوزيع كولة مثلا علي خفيف، الأغنية عامة تشبه لأغاني تامر عاشور، لكنها مع حماقي بردو مش بطالة.
الأغنية جميلة لعدة عوامل منها:
1- الكلام، الكلام جميل جدا ورقيق جدا.
2- مصطفي أصلان نفسه.
أدي للأغنية تقييم 8/10
3- مايني.
كلمات أيمن بهجت قمر - ألحان عمرو مصطفي - توزيع توما.
عودة للأغنية الافيه، ايقاع مقسوم، ايقاع متكرر وسمعته ف ستة مليون أغنية قبل كدة منهم علي سبيل المثال لا الحصر:
مستبيع - تامر عاشور
وتتر مسلسل "قلقاسة في وكالة ناسا" -مسلسل قديم-
بس عامة الافيه جديد محدش قبل كدة غني لحبيبته وقالها "مايني" بس ده عامة مش جديد علي حماقي، حماقي قالها قبل كدة "انا مش سهل سماوي والله"، عادي عديها يا ماو!
الأغنية تعد خفيفة جدا، ايقاع مستهلك جدا، سمعت الأغنية كذا مرة وخرجت باستنتاج مهم، ان كل ما هي تبدأ اجري للأغنية اللي بعديها لأنها أحسن منها.
انترو الأغنية وتوزيعها قريب فشخ من "ناويها" ان مكانش مطابق ليها في نفس الروح، الصقفة، وطريقة الغنا.
تقييمها 4/10
4- كانت هناك.
كلمات أمير طعيمة - ألحان حسام حبيب وايهاب عبد الواحد - توزيع تميم.
الله يخربيت الجيتار اللي مبوظ الدنيا، صباح الفصلان، الأغنية اولها كدة "وافتكرت"، الأغنيتين لو لعبت التراكين جنب بعض فيه احتمال كبير متقدرش تميزهم عامة، اللحن جميل جدا، بس التوزيع تيبيكال افتكرت، مفيش أي تجديد خالص كدة!!
اسمع وافتكرت من هنا:
بالاضافة لأن توزيع الأغنية بردو تيبيكال من "حاجة مستخبية" بتاع "أحمد ابراهيم" !!
انا مش فاهمة ده تشابه جيتارات ولا ده توارد خواطر ولا ايه بالظبط!!
اسمع "حاجة مستخبية" من هنا:
لاحظ عزيزي اننا بنتكلم عن التوزيع مش عن الكلام واللحن، لأن الاتنين أجمل من بعض، حماقي اختلف تماما في الأغنية من حيث الأداء، والاحساس بالكلمات، أمير طعيمة غير بردو ملوش حل.
رغم تكرار توزيع الأغنية إلا أنه ودود وشجي، لحن هادي يتسرسب لروحك، مع صوت حماقي يعمل سيمفونية، القصة اللي بتحكيها الأغنية رقيقة جدا، فكرتني بأغنية دنيا سمير غانم "قصة شتا".
الكلام عامة سهل وظريف، اللحن بتاع حسام حبيب وايهاب عبد الواحد لحن رائع، ما يعيبه هو "أسبنته" بالعافية، بس الكرو الأجنبي اللي اشتغل ع الأغنية طلع شوية فوكالز حلوين ينفع يتعملو مقطوعة لوحدهم أصلا.
الأغنية جميلة بسبب:
1- كلماتها الرقيقة، قصة محكية من أمير طعيمة بكلمات ناعمة وجميلة، بعيدة عن الابتذال.
2- احساس حماقي بالأغنية، كفيل بأنه ينسيك التوزيع المكرر، ظابط الأغنية علي صوته حاجة يعني تتاقل بالألماظ..!
الأغنية تقييمها 9/10 (رغم النحت)
5- نسيت.
كلمات أيمن بهجت قمر - ألحان عمرو مصطفي - توزيع توما.
في الأغنية دي حماقي بيغني من الطبقة اللي بكرهها بصوته "طبقة الحزق" بس هو بادئ منها الأغنية، بعد كدة بيغني توناليتي، فالموضوع تحت السيطرة شوية.
صوت حماقي في بداية الأغنية مش واضح هو بيقول "جديد" ولا "نسيت" ولا ايه بالظبط، ياريت نبطل نحزق شوية يا حماقي انتا كويس والله.
الأغنية "بوب" استخدام البوب فيها ظريف، البركشنز، الكيبورد، مفيهاش وتريات واضحة عامة، جو الأغنية صيفي خفيف كدة، تتلعب علي الشط، وانتا بتلف بالعربية بالليل ف العربية، ولازمة الأغنية ظريفة جدا
"فيه سلام بيمر بسلام،
وفيه اوقات سلام...
ده بيجيب كلام...
بينسينا الزمان والناس والمكان
ومعاك انتا السلام يعني استسلام..!"
في نهاية الأغنية وفي منتصفها بنسمع صوت حماقي مجرد ومعاه البركشنز، ثم صولو موسيقي لطيف جدا، هادي، أغنية مفيهاش تجويد كتير، ومناسبة ولحنها ع القد.
التوزيع فيه ريحة ريجي، ماشي لطيف، بس تحسها كانت معمولة لعمرو دياب وهو مخدهاش، اللحن كان هينور أكتر مع صوت عمرو عامة.
الأغنية 5/10
6- صابر علي حالي.
كلمات أمير طعيمة - ألحان ايهاب عبد الواحد - توزيع تميم.
الأغنية الوحيدة في الألبوم اللي فيها ريحة الشرقي عامة، لو ان فيها أوكورديون في الباكجروند مديها تاتش فرنساوي، لحن رتيب جدا، الكلمات لطيفة جدا، لكن الأغنية تحسها أغنية قديمة ومتوزعة توزيع جديد شوية، هادية بزيادة، كانت عاوزة حاجة تولعها شوية.
مفيش أي تجديد علي الصعيد الموسيقي في الأغنية عامة، الكلمات كأنها "رص" وخلاص، محستش فيها بأي حاجة، أمير طعيمة عامة مستواه مش واحد، طالع نازل، حاجات حلوة أوي، وحاجات عادية زي الأغنية دي بالظبط، لو مكانتش موجودة في الألبوم ممكنتش هتحس بأي فرق.
الأغنية 4/10
7- نسمة شوق
كلمات أمير طعيمة - ألحان ايهاب عبد الواحد - توزيع تميم.
ريجي، أول أغنية لحماقي علي نسق أغاني الريجي، بحر، وهوا، ومصيف، وواحد واقف لابس هاواي شيرت وماسك قزازة هاينكن علي الشط في الساحل.
عاجبني في الأغنية كلماتها:
"يا فرحه في وقتها جاتلي..
يابكرا ياالي مادتلي اديك...
يا احلي حاجه حصلتلي ...
ياحب سنين حلمت انا بيه..اااه حبيبتي
وانتي حواليابعيش دنيا من الاحلام..مليت الدنيا حنيه..
وشلت الخوف من الاياام.. يانسمه شوق فين المحبه..
ياغنوه تحلي حبه حبه ...ياحلم جميييييل مابيعديش..
بشوفك تحضنك عنيا يسلم قلبي مش اديا .. وروحي تروووووح ماترجعليش ...
حبيبتي افهمي ان انتي ..
بقيتي في حته تانيه خلاص ..
بتوحشي عيني لو نمتي ..
بشووفك غير عيون الناس ...
اااه وجوا القلب انا رسمك ..
ومن روحي عليكي بغير .. وبفرح لما
اقول اسمك .. وعرفت انا لييه بقوله كتيير "
الأغنية بأجوائها تسعيناتي في الكلام، ترجعك لأيام ما مصطفي قمر كان بيغني علي البحر، لكن بتاتش جديد، لطيف، مفيش أداء أوفر من حماقي، الكلام بيرجعك عامة لجو علاء عبد الخالق، بس معرفش ليه حاجة غريبة، سمعت ف الأغنية دي تون كدة من أغنية "بحبك" بتاعة امال ماهر -الحان وليد سعد-
اسمع "بحبك" من هنا:
بس الأغنية لطيفة واديها 7/10
8- يللي زعلان
كلمات وألحان: محمد رحيم - توزيع توما.
من قبل ما أشوف الشاعر والملحن عرفت لوحدي كدة انه محمد رحيم، باين جدا سبحان الله.!
محمد حماقي في هذه الأغنية تخلي تماما عن طريقته التقليدية في الغناء واتبع طريقة محمد رحيم الجميلة، طريقة الكلمات في الأغنية فكرتني عامة بأغنية "وحشاني" لرحيم، في الروح ليس اللحن ولا الكلمات، لكن رحيم عامة ملحن متمكن.
توزيع الأغنية أتي رتيبا بعض الشئ، كان بحاجة لبعض الوتريات أكتر من كدة، البيز الالكتريك، لطيف، لكن قدم متهيألي، جو حميد الشاعري ده خلص من زمان يعني، بس عامة الأغنية عجبتني، عجبتني تتابع الكلمات، واللحن لطيف، الأغنية من الحاجات اللي هتعيش رغم بساطتها وهدوئها.
بنلاحظ في الأغنية ظهور اسم رحيم ككاتب لأغنياته، الموضوع ده اتكرر بكثرة بعد وفاة والدته الشاعرة الكبيرة "اكرام العاصي" الله يرحمها، وتطور اداء رحيم كشاعر عامة شئ مذهل، وينم عن موهبة عالية نادر تتكرر عامة.
الأغنية تاخد 7/10
9- أنا سرها.
كلمات حسين مصطفي محرم - ألحان محمد يحيي - توزيع تميم.
"انا سرها" مش أغنية بالمعني التقليدي، هي زي حاجة كدة ف الألبوم، مش أغنية، فكرتني اوي ب"رسالة"، مجرد موسيقي جميلة شغالة في الخلفية، ثم حماقي بيقسم، حماقي صوته يقسم ويجيب والله بس هو اللي بيحب يحزق عامة :D
للأسف التقسيم اللي ف أول الأغنية بالجيتار شبه صولو الجيتار الي ف أول "وافتكرت"، يووووه بقي، هو تميم بيحب الصولو ده اوي كدة..!!
أظن انها كانت هتبقي أفضل لو دخلنا بعود وكولة أحسن من الجيتار اللي اتهري بدنه ده، الأغنية لطيفة جدا، بسبب كاريزما صوت حماقي وجمال الكلمات وحميميتها.
10- الغالي ناسيني
كلمات أمير طعيمة - ألحان عمرو مصطفي - توزيع شريف مكاوي
دي الأغنية الأصلية Stromae - tous le memes:
ودي الأغنية المنحوتة:
ولا تعليق أكتر من كدة....! 1/10
11- كان وكان
كلمات أيمن بهجت قمر - ألحان عمرو مصطفي - توزيع توما.
بشكل شخصي بكيت لما سمعت الغنوة دي، خصوصا اني من أنصار البكاء علي الأطلال والعياط ع الديار.....
خصوصا بسبب لازمة الأغنية الكئيبة:
خصوصا بسبب لازمة الأغنية الكئيبة:
"وانا اللي حلمت وفاجئني في نص الحلم...
نهاية غريبة ومتنفعش حتي لفيلم
ده مفيش حدوتة حب تعيش
بطلها طلع جبان...
وده كان...وكان...وكان..."
وده كان...وكان...وكان..."
الاحساس الي في صوت محمد حماقي في الأغنية تقريبا، يعادل تقريبا احساسه في كل أغنياته السابقة، بعيدا عن الحزق، بعيدا عن الجيتار المبالغ فيه، بعيدا عن الأغنية الأفيه....
أغنية برع فيها أيمن بهجت قمر في توصيل مشاعر الندم لنا، ووصف نفسه بالجبان، واتسم بالقسوة علي نفسه، هو من ترك الحب يضيع منه.
التوزيع بقي يشبه لتوزيع "قلبي ملك ليك" لرامي جمال ومن ألحانه:
بس الأغنية كتوتال تاخد 9/10 احساس وأداء من حماقي، ولحن لعمرو مصطفي وكلام :)
12- عمره ما يغيب.
كلمات خالد تاج الدين - ألحان عمرو مصطفي - توزيع طارق مدكور
حمدلله ع السلامة يا طارق :)، عودة حماقي لطارق مدكور عودة مجيدة علي فكرة، الحمد لله، سمعت حاجة مختلفة في التوزيعات قبل ما اموت، طارق مدكور معلم، عامل توزيع للأغنية بالجيتارات اداته المفضلة، بس ف نفس الوقت لا تعرف تلقط نغمة قديمة، ولا توزيعة متكرره، معلم والله طارق مدكور.
أداء حماقي في الأغنية كان ظريف جدا، صوته كان ناعم وقوي، وصولو الجيتارات اللي ف وسط الأغنية مميز جدا، غنا حماقي ورده علي نفسه ككورس كان منظم جدا، حماقي كان بعيد تماما عن طريقة عمرو مصطفي في الغنا، كان بيأدي مرتاح جدا وبطريقته بشكل كبير وده اللي ادا الغنوة طابع مميز وخلاها تبقي من الأغنيات المهمة عامة.
اسمع الغنوة بصوت "عمرو مصطفي" من هنا:
أداء عمرو مصطفي كان قوي جدا ومليان بالحيوية، اداء حماقي عامة كان مميز جدا، ومختلف عن اداء عمرو.
الأغنية تاخد 7/10
13- بعدنا ليه.
كلمات عصام حسني - ألحان محمدي - توزيع توما.
أغنية هادئة لا تستخدم الجيتار في مفرداتها -حمدا للآلهة- لكن بدايتها فكرتني كتير بأغنية "حكايات الدني" لنانسي عجرم.
اسمع حكايات الدني من هنا:
الاتنين غالبا مشتركين في نفس المقام، لكن ده ميمنعش ان أغنية حماقي مميزة جدا، لحنها هادي وجميل، وكلمات عصام حسني رقيقة ولطيفة، حماقي ركز ولعب علي الاحساس في الأغنية دي، الأغنية بردو ميمنعش انها أليق بتامر حسني منه، تامر اصلا صوته حنين اكتر من حماقي.
انا عن نفسي في انتظار تعاونات مقبلة مع محمد محمدي وحماقي، لتجديد جلد حماقي، ألحان زي دي بتزود من رصيده وتتقله عند السميعة.
توزيع الأغنية جه معقول، شبه باقي أغاني تميم، اللحن مميز، والكلمات رائعة
تستحق بجدارة 7/10
14- انتا حبيبي.
كلمات امير طعيمة - ألحان حسام حبيب وايهاب سمير - توزيع تميم.
لعنة "انا جرالي ايه، جرالي ايه، جرالي ايه، جرالي ايه"، تكرار ممل للكلمات يا جماعة مش معقول..!
الكلمات ملهاش دور كبير في الأغنية، اللحن عامة معمول ديسكو ستايل ودب ستب يناسب الرقص، الراجل محبش يعمل ألبوم من غير حاجة علي شاكلة "من قلبي باغني"، ولو اني أفضل "من قلبي باغني" لاحساسي الداخلي بأن "انت حبيبي" مجرد نسخة بهتانة منها.
صوت حماقي في الغنوة دي كان بعيد، كأنه بيعمل فويس اوفر مثلا، أو عنصر ثانوي في الأغنية، يعني ممكن تفصل الغنوة وتبقي instrumental وتسمعها من غير صوت حماقي، مفيش فيها غنا كتير، مش محتاجة اي صوت واو، اللهم إلا بعض العرب اللطيفة كدة من حماقي علي ما قسم، كأنه بيتكسف يقسم بصوته.
التوزيع لطيف وجديد، اللحن لم يحمل أي جديد وكذلك الكلمات مليانة بالتكرار، تكرار كلمة حبيبي أكتر من تلات مرات ف نفس الجملة حاجة مملة وضعيفة جدا...
الأغنية تستحق مع الرأفة 4/10
15- اللي اختاره قلبي.
كلمات ايمن بهجت قمر - ألحان عمرو مصطفي - توزيع تميم.
الصراحة مش عارفة انا باظلم عمرو مصطفي ولا اللحن بتاع الغنوة دي شبه لحن As long as you love me بتاعة BSB
اسمع الغنوة من هنا:
المطلع بتاعهم متشابه شويتين تلاتة، بس أغنية حماقي علي تيمبو أسرع، مش متأكدة، بس عامة الأغنية خفيفة وظريفة ولطيفة وايقاعها سبعيناتي فكرني بأغنيتي المفضلة "متعقد"، ايقاعات الأغنية متوازنة، صوت حماقي مدموج كويس جوة التوزيع، تميم مطلع أغنية ممتازة جدا.
تاخد 7/10 وكويس عليها كدة
اختصارا للوقت بقي:
1- توزيعات تميم مكررة جدا، وأي حد غير خبير هياخد باله.
2- كلمات أمير طعيمة مش ثابتة علي مستوي واحد، وشايفة انه أخد أكتر من حقه في الألبوم ده.
3- أيمن بهجت قمر كان أحسن من العادي بتاعه، الأغنية الافيه بتاعته "مايني" كانت عادية لكن الباقي ممتاز.
4- أجمل أغنية كتبها أمير كانت "ما بلاش" وأجمل أغنية كتبها أيمن كانت "كان وكان".
5- أجمل أغنية في الألبوم عامة في وجهة نظري هي "كان وكان" وراها "مابلاش" ثم تالتهم "نسمة شوق".
6- حماقي ماشي كويس أوي في الألبوم ده، وركز علي الاحساس في كل الأغاني، ودي حاجة تستحق التحية.
7- اختيارات حماقي كانت معقولة إلي حد ما، ولو كمل ف نفس التراك هنشوف اداء اعلي في الألبوم الجاي، لو دي نتيجة شغل تلات سنين فده مجهود يستحق التحية عامة.
8- بلاش عمرو مصطفي...بلاش عمرو مصطفي...بلاش عمرو مصطفي الله يخليكو
9- بلاش تميم وتوما، مصر مليانة موزعين، عندك أحمد ابراهيم مثلا،عندك طارق عبد الجابر، جربهم يا اخي :D
10- Good Job يا حماقي بجد...الألبوم كله 6/10 ودي حاجة نادر لما بتحصل عامة :D
نقدك هايل اول مرة اقرالك مش عارف اتابعك فين واذاى
ردحذف