كنوز مدفونة: غمضت عينيك - شمس
أغنيتنا النهاردة أغنية ممكن تكون غير معروفة للجميع، الأغنية لمغنية كويتية اتعودنا منسمعش أخبارها غير في صفحات الحوادث، ومواقع الأخبار الفنية النص لبة، ومشاكلها مع أحلام كنطاكي وصلت للقضاء والاتنين ضربو بعض مرة، المغنية المشكلة دي هي "شمس الكويتية".
شمس الكويتية من كام سنة كدة، مضت عقد مع شركة أمريكية، يونيفرسال، والكلام ده كان ف 2007، عملت ألبومين واحد اسمه شمس مصري، والتاني شمس كويتي، عملت 22 أغنية تقريبا، حاجة كدة الله أكبر دستتين تقريبا، الألبوم ده صورت منه أغنية اسمها "اهلا ازيك" طلعت فيها تقلش علي جورج بوش، والتانية هي "غمضت عينيك".
الأغنية من كلمات بهاء الدين محمد وألحان محمد ضياء.
 |
| محمد ضيا الملحن |
المهم أغنيتنا "غمضت عينيك" أغنية تقيلة، بدايتها عبارة عن جيش هادر من الفايولاينات، ثم تدخل الطبلة بإيقاعها الهادي، وصوت شمس بيكمل المنظومة، بداية اللحن عبارة عن جملة مكررة أخرها "بلاش تعملها تاني علشان تعبتني"، ثم صولو فيه بركشنز ظريفة، وكمنجات بردو، ثم صوت شمس المختنق الموجوع.
"مكانوش ثواني اه، دول كانو كام سنة، خلتني أقول يارتني، غمضت معاك انا" ثم تكرار لجملة البداية "يعني انتا وانتا جنبي، ودتني وجبتني، غمضت عينيك ثواني، صدقني وحشتني، حسيت بالغربة تاني، وكأنك سبتني."
الأغنية عامة ماشية علي نفس المنوال، الكوبليه التاني تكرار وكوبي بيست من الأولاني مفيش اي ابداع او تغيير، لكن كلمات الكوبليه التاني مؤثرة عن الأولاني "الخوف عليك بقي، ف البعد وف اللقا، يرضيك أشوف عينينا، عيون متفرقة"
ثم نهاية مؤثرة بموت الأخ المدمن في الكليب.
الأغنية عامة عندي مرتبطة ارتباط وثيق بالفيديو كليب بتاعها، الموضوع نفسه مؤثر، الأغنية ف وقتها كانت نادرة ف طرحها، اتكلمت عن المخدرات وتدميرها للبشر، ومحدش اتكلم عن الموضوع ده غير أحمد مكي في "قطر الحياة"، ف دخلت كلها في جنبات الذاكرة، ودخلت صندوق الكنوز المدفونة.
ممكن تشوف الأغنية أو تسمعها من هنا:
تعليقات
إرسال تعليق
تعليقك يسعدني..يا أفندم!