فريق...يتفرق...تفرقا....

اتمنيت طول عمري ألاقي بحث أو موقع بيتكلم عن الفرق الموسيقية المصرية من أول السبعينيات ولحد دلوقت، ليه من أول السبعينيات، لأن البيتلز ظهرو في منتصف الستينيات وبالتالي، الثقافة انعكست علي المجتمع المصري بشكل كبير في نهايات الستينيات وبدايات السبعينيات وحتي الآن.

هحاول في المقال اني ألخص علي قد ما أقدر عدد من الباندات المصرية المهمة واللي هحاول بردو أرتبهم من الأقدم للأحدث: أولا....

1- البلاك كوتس Black Coats- المعاطف السودااااء.

فرقة أسسها "اسماعيل الحكيم" ابن توفيق الحكيم سنة 1963، من أشهر الناس اللي خرجو من الفرقة دي: طلعت زين - مجدي الحسيني.

للأسف ملقتش تراكات مزيكا ليهم ولا أي فيديوهات، الفرقة نفسها اتفككت بعد وفاة اسماعيل الحكيم سنة 1978. -مات صغير ياعيني :( -

طلعت زين وهو يغني مع بلاك كوتس

2- لي بتي شا  Les Petits Chats - القطط الصغيرة.

الاسم غريب، بس عموما أعضاء الفرقة دي كلهم كانو من أولاد الذوات والطبقة البورجوازية في السبعينيات، الفرقة اتأسست سنة 1968، وكان من ضمن أعضاءها، عمر خيرت، عزت أبو عوف، عمر خورشيد وهاني شنودة.

مؤسس الفرقة دي هو: وجدي فرانسيس، مفيش معلومات متوفرة عنه كتير غير في اللينك ده: هنا.

فرقة Les Petits Chats

فريق القطط الصغننة، لسه عامل حفلة من قريب في مكتبة اسكندرية، ومن وقت للتاني بيتجمعو وبيتقابلو، واللي جاي بعد كدة مجموعة من أشهر أغانيهم في اخر حفلة ليهم من مكتبة اسكندرية.

شاهد آخر حفلة ليهم في مكتبة الاسكندرية:

3- الجيتس - The Jets.

اتأسس فريق الجيتس في سنة 1975، علي يد الملحن "سمير حبيب"، اعتمدو بشكل أساسي علي اعادة غنا الأغاني التراثية زي "سالمة يا سلامة" و"الحلوة دي" و"شد الحزام" بشكل حديث، طبعا الحداثة دي كانت الأورج طبعا :D بردو كان ليهم أغاني خاصة بيهم زي "ليندا ليندا" اللي أعاد ادوارد الممثل غناها في بداياته الفنية.

غلاف ألبوم لفريق الجيتس

فريق الجيتس اتفكك، وسمير حبيب فضل التركيز في كاريره ويلحن للأعلانات التجارية، اللي كانت وقتها انتشرت بفضل الأستاذ "طارق نور".

شاهد أغنية لفريق الجيتس من هنا:

4- فريق النهار.

محمد نوح بتجربته الموسيقية الرائدة، في سنة 1974، أسس فرقة النهار، كانت فرقة عائلية من الطراز الأول، كان بيغني معاه ولاده: سحر وهاشم، وتقريبا فيه بنت تالتة مقدرتش أفتكر اسمها او ألاقيه.

محمد نوح

محمد نوح مكانش صوت جميل قد ما كان ملحن حماسي، حماسه وهو بيغني يولع استاد بحاله، بدأت الفرقة تغني في معرض الكتاب أيام ما كان مكانه ف أرض الجزيرة "الأوبرا"، وبعد كدة بدأت تبقي ليهم حفلات، وآخر ما أفتكر ليهم حفلاتهم في ليالي التليفزيون وأضواء المدينة، وسف "محمود عزب" عليهم.

من أشهر أغاني الفرقة دي: مدد مدد مدد - شيلي طرح الأحزان - الصبر طيب.

5- فرقة طيبة.

الأخوين مودي وحسين الإمام في 1984، بدأو بصفتهم مغنيين هواة، كانو بيغنو حاجة كأنها مزيج بين الروك والبوب والجاز، اعتمدت بشكل أساسي علي البيز، والبركشنز، فريق طيبة مسابوش أثر ملموس علي الغنا، لكنهم كانو اعتماد لخط مودي وحسين الامام الموسيقي اللي ظهر بعد كدة في موسييقي مودي، وفي ألحان حسين الإمام القليلة اللي قدمها لمنير وغيره.

اشتهر فريق طيبة بشكل كبير بعد ثورة 25 يناير 2011، بعد ظهور فيديو لأغنية "انا باحب الشمس" واللي كان أحمد عز "بتاع الحديد" طالع فيها بصفته درامر الفرقة، عادي الموضة أياميها كانت اللي يسافر اوروبا، ويغسل صحون في الصيف، او لو ربنا كارمه بيشتغل درامر، عادي، مش عيب انك تشتغل كدة وانتا صغير، العيب انك تستغفل دولة بحالها.

شاهد أغنية: "انا باحب الشمس" من هنا:

6- فريق المصريين.

هاني شنودة، علامة مضيئة في تاريخ مصر الغنائي عامة، اللي قدمه هاني شنودة يفوق ما قدمه حميد الشاعري، لكن فين الناس اللي تفهم، ماسكين ف حميد حميد، أيوة فين الابداع؟ فين المزيكا؟ فين الصوت؟ مفيش، المهم، فريق المصريين اتكون سنة 1977، أعضائها الأساسيين كانو: مني عزيز - ايمان يونس "أخت اسعاد يونس" - تحسين يلمظ - ممدوح قاسم - عمر فتحي "بتاع علي ايدك".

صورة حديثة لفريق المصريين - ايمان يونس جنب هاني شنودة

الفرقة بدأت عملاقة، وهاني شنودة عمل محمد منير في بداياته، كان صاحب أول ألبوم ليه "علموني عينيكي"، الألبوم منجحش أوي، لكن نجاح "بنتولد" خلي الألبوم الأولاني ينجح، والتاني والتالت بقي محمد منير.

المهم فريق المصريين كان بيكتبله "صلاح جاهين"، الشوارع حواديت، حوداية فيها الحب، وحوداية عفاريت، ومتحسبوش يا بنات، وماشية السنيورة، لحسن الحظ فريق المصريين يعتبر أكتر فريق قديم ليه تراث مرئي ومسموع.

شاهد من هنا أشهر أغنيات فريق المصرييين:

* الشوارع حواديت:

* ماشية السنيورة

* بنات كتير

7- الفور إم - 4M

فرقة عائلية أخري، اتأسست بعد تفكك فرقة بلاك كوتس سنة 1977، مؤسسها هو "د.عزت أبو عوف" واللي كان بيلحن ويوزع مع اخواته "مها - منال - مريم - ميرفت" وبيغنو كلهم.

الفرقة زي فرقة الجيتس كدة اعتمدو بشكل أساسي علي اعادة توزيع الأغاني القديمة، مع غناء بعض التراكات الخاصة بيهم، لمسة عزت أبو عوف في المزيكا واضحة طبعا، مثلا في أغنية: لا عاجبه كدة ولا كدة.

الفور إم كانو ماشيين مع موضة العصر، الغنا، وكانو بيتدربو في بدروم فليتهم في الزمالك.

الفور إم كفرقة وعزت أبو عوف كشخص ساهمو في ظهور "محمد فؤاد" اللي غني لأول مرة معاهم، وفؤاد منسيش الجميل وقال الحوار ده ف فيلم "اسماعيلية رايح جاي" واللي عزت أبو عوف طلع فيه بنفسه :D

شاهد أغنية "دبدوبة التخينة" للفور من هنا:

الفرقة نفسها اتفككت لعوامل الزمن، ومفضلتش منهم غير عزت، كموسيقي وممثل، ومها كممثلة وباقي الأخوات اختفو لدواعي الزواج أو الهجرة.

8- فرقة الأصدقاء.عمار الشريعي، حب يحط الطاطش بتاعه، كون فريق من تلات موظفين علي الدرجة التالتة، مني عبد الغني - علاء عبد الخالق - حنان.

الفريق عمل خمس ألبومات بعد كدة بردو اتفكك، وكل واحد مشي في طريق.

* أغنية مطلوب موظف

الأصدقاء كفريق كان فريق لطيف، وأغانيه نجحت ولسه الناس القديمة -أمي وأمك كدة- بيغنو أغانيهم، لكن الفريق من وجهة نظري كان متواضع الإمكانيات، عمار حبسهم في القالب الشرقي التقليدي، أغانيهم مكانتش معمولة لفريق، كان ممكن يغنيها مغني ومعاه كورس عادي جدا، الفريق مكانش فيه روح حيوية، وحتي أعضاءه نفسهم اختفو بعد فترة:

مني عبد الغني نفسها اعتزلت واتحجبت - كذلك حنان - علاء عبد الخالق نفسه فضل يغني بعد كدة لحد أول الألفينات وبعد كدة انزوي بفعل الزمن وتغير الذوق العام نفسه.

شاهد أشهر أغنيات فريق الأصدقاء من هنا:

* أغنية مع الأيام

* أغنية الموضات

* أغنية الحدود

9- وسط البلد.

فريق وسط البلد اتكون سنة 1999، عشرين سنة مرت علي مصر من غير موضة الباندات، الفرقة بتقدم روك عربي والسولويست بتاعها هو: هاني عادل.

الفريق نفسه ككيان لسه مستمر لحد دلوقت، وهاني عادل لسه مستمر لحد دلوقت كمغني، وكملحن وكممثل "للأسف"، وبيقدم حفلات باستمرار في الأوبرا.

وسط البلد قدم أربع ألبومات لحد دلوقت، ومسيرتهم لسه مستمرة، وفي رأيي انهم أكثر الفرق مصرية وأصالة، وبيقدمو موسيقي جميلة قبل الكلمات الجميلة.

شاهد أشهر أغنيات "وسط البلد" من هنا:

*تسمحيلي

*كل يوم

*عانقيني

*عم مينا

*يمكن

10- فريق واما.

فريق واما باختصار هو نحت ل Back Street Boys، بدأ الفريق سنة 1998، وأعضاءه كلهم مغنيين: أحمد الشامي - أحمد فهمي - نادر حمدي ومحمد نور، الفريق قدم مع بعضه تلات ألبومات، متفككوش بس بطلو يشتغلو مع بعض، وأعضاءه مستمرين علي الساحة الفنية لكن بشكل فردي، ما عدا أحمد الشامي اللي مهتم بالجانب الأكاديمي أكتر، لأنه دكتور في كلية تربية موسيقية.

فريق واما تجربته مختلفة شوية، هو وفريق وسط البلد، محدش فيهم قدم أغنيات لحد غيره، ولا ريمكس، واما كانت تجربته تجارية إلي حد ما، قدم أغنيات ظريفة، لكنهم مستمروش، لكن وسط البلد فيهم حس المغامرة، كلهم بيشتغلو مزيكا بروح الهواة، عامة....

شاهد أشهر أغنيات فريق واما من هنا:

* يا ليل

*ليل وشوق

*ده كلام

المقال خلص....لكن لسه في ناس محطيناش أساميهم هنا زي: مسار اجباري - بساطة - وغيرهم...إما لعدم اتضاح تجربتهم الفنية، أو لحداثتهم علي الساحة الفنية بشكل عام، ودول لينا معاهم لقاء تاني.

شكرا :)