شاطر ومشطور وبينهما دويتو..!

هذا البوست مهدي لكل ملحن طيب وكل مؤلف محترم كتب عمل لاتنين مغنيين أو أكتر، عمل ليه قيمة ومحترم، مش رص كلام وخلاص، ونخص بالذكر طيب الذكر الشاعر الكبير الله يرحمه "فتحي قورة".

عن أجمل الدويتوهات اللي اتعملت وعلقت معاك، عن الأغاني الجميلة اللي ظهرت وفضلت تدندنها كدة كتير وطول الوقت، ولما بتحاول تفتكر حاجة جميلة بتطلع ف دماغك، إلي "الدويتو".

منعرفش بالظبط امتي بدأ النوع ده م الغنا، لكن المرجح انه بدأ ف حفلة واحدة لما اتنين مغنيين كان مفروض يطلعو مكانش فيه غير مكروفون واحد ومن هنا انطلقت الشرارة، انا وزمايلي ف تويتر فكرنا وطلعنا بقائمة من 10 أغنيات، باعتبرها من وجهة نظري أجمل الدويتوهات اللي تم غنائها منذ ظهور الغنا أصلا، وإليكم التفاصيل!

** الترتيب لا هو زمني ولا بالأفضل والأسوأ، كلهم حلوين، هو مجرد ترتيب أفكار ليس إلا...

1- ياسلام علي حبي وحبك - فريد الأطرش وشادية.

كلمات فتحي قورة - ألحان فريد الأطرش
ياسلام علي حبي وحبك اتغني ضمنا في أحداث فيلم "انتا حبيبي" اللي أخرجه يوسف شاهين، كان بيجسد علاقة القط والفار بين شادية وفريد اللي شفناها طول الفيلم، الدويتو فيه خفة دم في الكلمات، حركها فريد بالألحان، وكملها يوسف شاهين بأخراجه وتحريكه ليهم كممثلين والسيناريست، الحقيقة مش حاضرني اسمه.

ياسلام علي حبي وحبك من كتر انتشاره هتلاقيه محفوظ من كل الأجيال كبارا وصغارا، وبلغت بيه الشهرة ان هيفا وهبي وهشام عباس حاولو يبوظوه لكن الحمد لله الناس نسيت ومحدش خد باله م الجريمة دي!

2- لو كنت نسيت - تامر حسني وشيرين عبد الوهاب.

كلمات نصر محروس - ألحان رياض الهمشري

صدر دويتو لو كنت نسيت من ضمن ألبوم فري ميكس سنة 2002 - الألبوم الذي شهد انطلاقة تامر وشيرين الفنية، الألبوم أيضا كان فيه أغنية دويتو تانية مع شيرين "لو خايفة" لكن لو كنت نسيت هو الأكثر لمعانا وانطلاقا وكانت الأكثر شهرة وقتها أيضا، الله يرحمها أيام بقي، كنا أطفال أبرياء :))

لو كنت نسيت كان دويتو بسيط مكانش فيه استعراض لقدرات المغنيين الصوتيه، تامر قام فيه بدور كورس عن دور المغني، اكتفي بس بجملة "لو كنت نسيت أفكرك حبيبي، منا كنت نسيت، أفكرك حبيبي" شيرين اللي قامت بدور الغنا كله، في كوبليهين توسطهم صولو شرقي لطبلة وناي، كانت حاجة فخيمة الصراحة.

3- تتر مسلسل مباراة زوجية - دنيا سمير غانم ومحمد محي.

كلمات عنتر هلال - ألحان محمود طلعت.

مسلسل اتعمل في سنة 2005 تقريبا، من زمان جدا، كان بطولة نادية رشاد وأحمد راتب والوجه الجديد هنا شيحة وأحمد شاكر، والمسلسل كان من اخراج "انعام محمد علي"، المسلسل كان اجتماعي رومانسي، المسلسل طواه النسيان لكن التتر بتاعه أبدا...

دنيا سمير غانم وقتها كانت لسه خارجة من تجربة مسلسل "للعدالة وجوه كثيرة"، مكانش كتير يعرف انها بتغني، كانت حسبة 20 سنة تقريبا أو أصغر، لكن صوتها حمل تفاؤل وأمل، هي نفسها معرفتش تستغله بشكل ممتاز لحد دلوقت.

كلمات الأغنية غريبة ومميزة، علي انك تعرف انها من كلمات شاعر "بابا فين" اللي كانت ليه مقوله مشهورة لما سألوه في حوار صحفي: تفتكر الأغاني اللي بتكتبها دي هتعيش؟ رد علي اللي بيسأله قاله: المهم انا أعيش!

يكفي مثلا انك تشوف الكلام بيقول ايه:

"من منطلق الحب، والحدوتة الأزلية..
من اول قصة حب، ولحد القصص الجاية..
واللعبة هي هي...اللعبة هي هي...
من يوم ما آدم وحوا...
كانو ف الجنة وحديهم...
واللعبة دايرة ما بين اتنين..بيحبو بعضيهم...

بمنتهي الأنانية...بمنتهي الأنانية..!"

كلمات غاية في القوة والرقة، الكلمات زي السهم بترشق ف القلب علي سهوة كدة، المكس الرائع اللي محمود طلعت عمله ما بين صوت دنيا ومحي، مش هيتكرر...

محمود طلعت أصلا عبقري، عمل تترات كسرت زي تتر "يتربي ف عزو" كدة، لو دورت وراه اكتر هتنبهر..!

4- شحات الغرام - محمد فوزي وليلي مراد.

كلمات بديع خيري - ألحان محمد فوزي

من ضمن أحداث فيلم "ورد الغرام" ان محمد فوزي بيحاول يشنكل ليلي مراد في غرامه، مع انه لو كان بصلها كدة من فوق لتحت كانت وقعت مكانش فيه لازم تشحت يعني، بياخد فرع شجرة ويروح تحت بلكونتها في مشهد مستوحي من "روميو وجولييت" بلحن بديع، مزج بين صوتين من اعظم أصوات مصر.

فوزي في الدويتو ده لحن بمقام أظنه قريب لمقام قراءة القرآن، واستخدم مساحات صوته عشان يتنقل بين المقامات بسلاسة، وخلي ليلي مراد تستخدم أقل مجهود في صوتها ومع ذلك طلع بأغنية عظيمة زي دي، و"اسرح..لله لله..روح..لله لله...يا محسنين الغرام...علي الله..."

وفي النهاية بينجح الشحات انه يخطف معاد منها، الساعة 5، و"انا وانا وانا باستمرار، حوالين حوالين الباب"

الأغنية دي من اختيار صديقتي: الحيزبون السوداء علي تويتر.

5- بتغيب بتروح - إليسا وراغب علامة.

الأغنية دي كانت فاتحة خير علي إليسا وبداية عسل ان شاء الله * بصوت حزلئوم *
وبعديها اتشهرت، وقت ما الأغنية دي طلعت اتشهرت بأنها أغنية منحلة وكدة، راغب علامة أصلا كان فنان منحل وأهالينا كانو بيخبو كليباته مننا بصفتها +18 وكدة:))
لو مش مصدقني راجع كليب "طب ليه".

باقي لينا نعرف ان الأغنية دي ياعيني نقلوها مسطرة من أغنية تركية كدة مش مهم نعرف هي مين ده مش حوارنا.

الأغنية كانت مناسبة لصوت راغب الرجالي الحنين وصوت إليسا المبحوح وقتها، ولسه مبحوح، لكنها كانت كويسة، انتا نفسك مش هتفتكر من الأغنية غير "غني مني عني وجني احلي ااااااااااه، قلبي طالع نازل واكل صوت الااااااااااااه"
انا معرفتش ومش عارفة احفظ كلمات الدويتو لحد دلوقت، لكن حبيته منهم، وده قطعا دليل نجاح مبهر..!

الدويتو صدر من ضمن ألبوم "سهروني الليل" لراغب علامة، ايوة كليب الفار :D

سنة 2002 .

6- عبد القادر - خالد وفضيل ورشيد طه.

هو مش دويتو بالمعني المعتاد، هو تريو، بين تلاتة، الأغنية الحقيقة انا مش عارفة هي تراث جزائري ولا تأليف حد فعلا، ياريت المتعمقين في الراي يقولولنا الحوار ده.

عبد القادر أغنية جميلة، ومبهجة، وحماسية هتشعل الرغبة في التنطيط جواك، خصوصا لما رشيد يدخل بمطلع الغنوة هو بصوته، الميزة اللي ف صوت رشيد انه وحش بشكل يحببك فيه، عمرك شفت صوت وحش وتحب تسمعه غير صوت رشيد؟ مفيش!

تجميعة الأصوات والمزيكا وحماس المسرح نفسهم كفيلة بوضع أغنية زي دي علي رأس قائمة أفضل الأغنيات في العالم العربي كله مش الدويتوهات بس.

7- خدني معك - فضل شاكر ويارا.

كلمات إلياس ناصر - ألحان طارق أبو جودة.

الشهيد فضل شاكر يعتبر من أكثر الناس اللي غنو دويتوهات في تاريخهم، قدم دويتو مع إليسا، وشيرين، ويارا، ولو عمره الفني كان أطول سنة كان غني مع أي حد تاني، غني مع مروان خوري في حفلة أغنيته "معقول"، لكن "خدني معك" هي قمة أعماله مع مغنية تانية، الدويتو اللي اتصور في حقل، غيط جميل الحقيقة، يارا شعرها منكوش وفضل بيجري وقميصه أول زورارين فيه مفتوحين، الشمس اللي عاملة زي الدهب.

الكليب كفيل بأنه يخليك تتمني تطلع بRBJ علي لبنان وتحطه ف راس فضل شاكر وتخليه يغني بالعافية تاني، يللا، محدش بياخد أكتر من نصيبه بقي، الله يرحمك أ فضل...

الكليب مكانش فيه موسيقيا حاجة مميزة، هو عبارة عن جملة مكررة، وكام كلمة مرصوصة، لكن الحالة اللي بتوصلك من الكليب، أقوي من المشاعر اللي طالعة من الغنوة، باختصار مجد هذه الأغنية في مخرج كليبها وليس في شئ تاني.

8- يارب - مروان خوري وكارول سماحة.

كلمات وألحان مروان خوري.

مينفعش نعدي القايمة دي من غير ما نعدي علي حبيبي كدة، مروان خوري فنان صايع وطبعا كلنا مجمعين علي حاجة زي كدة، بيعرف يكتب أغنيات علي لسان اتنين، ولو أفسحناله المجال هيكتب مسرحيات غنائية مش دويتوهات، الدويتو عن اتنين اتقابلو صدفة ف حفلة، ومتفهمش حصل ايه كانو بيحبو بعض وفركشهم بس ربنا كرمهم ورجعو تاني.

الدويتو مبهر لغويا وموسيقيا الاتنين، من أول جملة
"مشي نتذكر ع دروب،
ويمرجحنا الغرام، ليش بعدنا وكيف قدرنا،
ننسي هاك الأيام"

ولحد لازمة الديوتو نفسه، المهم، مروان خوري عمل دويتوهات كتير، مع إلين لحود، ومع مطربة مغربية اسمها "كريمة"، ومع نيهال نبيل، فيهم كلهم قدر يوظف صوته وصوت المغنية اللي كانت معاه بامتياز، مش صايع من فراغ والله..!

9-  ليه يا دنيا - محمد منير وخالد عجاج.

كلمات كوثر مصطفي - ألحان أحمد شاهين والعهدة علي صديقي Political Alshvist

صدرت الأغنية دي في ألبوم فري ميكس بردو، العصر الذهبي لل"نصر محروس"، الأغنية كانت متصورة في الاستوديو ما بين منير وعجاج، الاتنين كانو في قمة شهرتهم، وعجاج كان بيعمل حفلات التليفزيون ساعتها وبيغني "فيه ناس ف الدنيا بتاخد كل حاجة مع انها مش محتاجة" و"ساندرا نشأت" كانت لسه عاملاله كليب "أصعب حب" وحاجة نيلة، ربنا كرم الاتنين وعملو مع بعض أغنية بقت شعار لينا.

"أول ما بنكبر، بنهرب من ماضينا...
أول ما بنقدر...ندوس أقرب ما لينا..
وبعد كدة كله نعيب ع الدنيا،
وبردو العيب علينا"

في تلخيص لشعر الامام الشافعي "نعيب زماننا والعيب فينا، وما لزماننا عيب سوانا"، الأغنية POP علي شرقي، متوزعة بصياعة وغالبا توزيع أشرف محروس، فيها صولو ناي كدة رائع، وBase يجنن.

الأغنية مكانش فيها عبقرية صوتية كبيرة، منير قام فيها بدور الكورس بردو، عجاج كان بيطرب ومنير كان بيقول اللازمة.

10- هو وهي - سعاد حسني وأحمد زكي.

كلمات صلاح جاهين - ألحان عمار الشريعي بالاشتراك مع كمال الطويل.

تتر لمسلسل تاني في قايمتنا النهاردة، بس تتر تاريخي لمسلسل تاريخي "هو وهي" المسلسل الوحيد اللي عملته سعاد حسني للتليفزيون المصري، المسلسل كان لايت وكان فيه أكتر من أغنية لسعاد حسني وأغنيتين لزكي منهم التتر.

مقدمة الأغنية تحسسك بالفخامة وتشد انتباهك، التتر فيه استعراض للبطلين وتبادل أساميهم بما يناسب نجوميتهم، ثم استعراضات حسن عفيفي اللطيفة اللي تشوف حسه الفني فيها في كل التتر سواء في حركة سعاد أو زكي أو المجموعة اللي معاهم، الموسيقي ف الجزء ده بالذات تمهدلك دخول زكي وسعاد.

أو انتا ممكن أصلا تكمل بالمزيكا للآخر، لأن عمار الشريعي صايع وكدة، دخل عليك بالكورس الأول، عملك بخ.....

يدخل زكي، بصوته الأجش الجميل، ثم سعاد بصوتها المشاكس، اللحن حمل طراوة وزاد الكلمات مرح.

نقلة جوة اللحن وصوت "خضرة محمد خضر" ودفوف، ثم ظهور لطيف لأحمد زكي، ولمسات مميزة من المجموعة الغنائية، اللي متميزين ف الجزء بتاع "ادبحلها القطة في ليلة عرسها" أكتر من زكي نفسه.

في اخر جزء من اللحن، بيمهدلك عمار بالحتة بتاعة "اقصر طريق إلي قلب جوزك معدته".

ونقلة حريرية موسيقية حتي آخر اللحن بقي، شئ بديع مش هيتكرر تاني اصلا، الله يرحمك يا موسيقي بقي....

زكي نفسه غني في أكثر من عمل، غني في البيضة والحجر، وغني في الفيلم بتاع "بحبك يا زين" اللي شريف منير كان بيعمل فيه ست، وغني في مواضع كتير، كانت دي أكثرهم تميزا....

شكرا :)