مديوكر...


انتا شخص مديوكر، متوسط....متوسط الطول، متوسط العمر، متوسط الوزن،و اللون والبشرة....

في كليتك مكنتش بتجيب مقبول، ومكنتش بتجيب جيد جدا....دخلت قسم متوسط عشان الأقسام التانية صعبة عليك....

اتخرجت بتقدير متوسط، اشتغلت ف مكان متوسط....وخدت مرتب متوسط...وحلمت بأبسط الأحلام...المتوسطة.....

لما بتسمع اوكا واورتيجا بتحس بهبوط..ولما بتسمع بيتهوفن بتحس بالغباء...ولما بتسمع أم كلثوم بتنبسط.....

بتحب الفضايح الفنية عشان تثبت لنفسك ان الشهرة والفلوس وحشين، وبتشوف مسلسلات "غادة عبد الرازق" عشان رجليها حلوة...
ومبتتدخرش وسعا انك تشتم "نجلاء بدر" كل فترة والتانية، عشان تثبت لنفسك ان الستات الحلوين دايما شراميط وشمال....

بتشوف برنامج "رامز جلال" عشان تشبع السادية اللي جواك، لما بتشوفه بيعمل مقالب وخوازيق ف زمايله، عشان يعمل فيهم اللي انتا مش قادر تعمله فيهم، ونفس الفنان اللي بتضحك عليه وهو بيصرخ لو شفته ف الشارع هتحضنه وتبوسه وتتصور معاه...

بتحط صور الفريق السيسي علي فيسبوك، وبتشتم ف حكم العسكر ف تويتر، ولو لقيت مظاهرة موقفة الشارع بتسبلهم الدين عادي جدا...

وانتا ف الاوتوبيس بتحاول تهرب م الكومساري، وبترمي شنط زبالة شقتك ف الشارع، وعيالك بيروحو مدارس حكومةلا ادمية، وانتا بتضربهم عشان بيجيبو درجات وحشة..المدرسين بيحطوهالهم عشان "ياخدو دروس"...

مشغل القرآن طول اليوم لكن لا بتسمعه ولا بتعمل بيه، وبتحلف بالطلاق ع الفاضية والمليانة، وبتكدب بكل أريحية...

انتا مديوكر..اتحكم عليك تكون مديوكر طول عمرك..لا ليك عم من البرازيل هتورثه فجأة، ولا اتولدت ف جاردن سيتي....
هتعيش وتموت متوسط...وأحلامك كلها...مقاسها....صغير.....

تعليقات

  1. اول اربع سطور , الباقي دخلت ف شيزوفرينيا. المديوكر لو عنده طموح او حلم اكبر من قدراته تنتفي الصفة من وجهة نظرك ؟ واللا المديوكرز انواع ؟

    ردحذف

إرسال تعليق

تعليقك يسعدني..يا أفندم!

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!