تمام يا أفندم

ياريتني زي أغانيها... غويشة و ماسكة ف ايديها... و دمعة بكيتها بعينيها... ف ليل محموم... ياريتني كنت بسمتها.. و ضحكة تدوب ف شفتها ملاك باحرس..و أسكتها... يلاقي الحزن موتها... ينادي..تقوم!!! ف مرة حزنت و نسيتها... و جتلي...هربت و طويتها... و أغيب كام يوم... أتوه و أضيع ف سكتها.... برائتي...هي برائتها... و دمعي..غيوم... أنادي...و الهموم همي... و تسري مشاعري من دمي.. و أروح ف النوم... و أرجع و أبتسم ليها.... دي بتهون الحياة بيها..... ف وسط الكون... أقولك ف الكلام كلمة.... و وسط الناس.... أكون أمة.. يا أمي أكون... و لو هارجع و هاحبطها.... هاعيش محتاج لدعوتها.... و عمري يهون.... و لو تبعد.. أنا فيها.... ياريتني زي أغانيها... غويشة و ماسكة ف ايديها.. و دمعة بكيتها بعنيها... ف ليل محموم... 26 سبتمبر 2011

ربك يدبرها... هو اللي كسرها.. و قادر يجبرها.. و الكسر ليه حكمة.. وحده يفسرها.. خصلات تطير ف الهوا و مسيرها ترجع سوا.. و ساعات كتير بتتوه.. و أفزع لمنظرها.. الشعر هاش.. و كنيش.. و اتكتلو الدراويش.. و عملو حلقة زار.. و نسيت أصورها... و ساقو ف الأوليا.. و دبّحو الخرفان... و نامو ع الاعتاب.. فاتجمعو الندمان... و انا شعري لسه كنيش.. هايش..مالوش معني... كل الأحبة التقو.. و فشلنا وزعنا... و نمت متنكدة.. و الشعرتين هايشين.. و بان عليه الغضب.. خصلاته متخانقين.. ده لأنهم ف الأصل... ف الأصل مختلفين.. و رفعت راسي لفوق.. و شفت أبعد سما.... مشكلتي ملهاش حل.. باين ف منظرها... فقلتها لنفسي... كنيشي ليه حكمة... و ربك يفسرها.. و اللي نكشها ف يوم... و النكش دام لسنين... قادر ف غمضة عين... يرجع يضفرها... و باقولها أهو لنفسي... ربك يدبرها... 17 يوليو 2011

هاقوهالك... و انا ماشي... انا قلبي.. ميرضاشي.. يكون تاني.. يكون تالت... يا أكون اول... يا مبقاشي... راضيتك.. قومي و ارضيني.. هاكسّر قلبك الصيني.. و أحط بداله قلب حرير... فتنسي النازي.. و الفاشي... و فوق راسك تحطيني.. و أكون تاجك.. و محتاجك... و وقت الشدة تلاقيني.. دراعك.. عقلك الواعي... و أحيانا.. ضمير واشي... لكن ف الزحمة و التوهة.. أقوم بالثورة.. ترميني؟؟ و أشيل عنك.. و أشيل تاني... تحطي الحمل.. تنسيني؟؟ و أرجع تاني.. و أفتكرك... و أقول يا أمه انا..ابنك... تبصي بعين مغمية.. و يخلص فيكي.. بنزيني؟؟ و أقع مكسور علي بابك.. و دمعي يغرق أعتابك... و لا باقدر علي عتابك... دنا طالب.. تحبيني... و أذاكر.. و أدخل اللجنة...   و بالأستيكة... تمحيني؟؟ و تاخدي الورقة دي فاضية... و اجاباتك.. ف تكويني..؟؟ تقولي عليا انا ساقط... و قلبي معاكي.. و مرابط... و كل الدنيا إلا انتي.. بتيجي البيت.. تهنيني؟؟؟ بجد فقدتي تمييزك... أكون أستاذ لكل الناس.. تقولي عليا.. تلميذك...؟؟!! أظن ده عيب....

صباح الصباح... النهاردة انا باتكلم و انا مبسوطة...مبسوطة أخر حاجة..لاني باتكلم عن شخص باحبو...و من زماااااااااااااااااااااان... مروان خوري.... مروان خوري اللي جايز كتير من الولاد..أو كل الولاد مش بيستلطفوه..أو مش بيستنضفوه....دي حاجة بتاعتهم بقي...انا باحبو موت.... بدأت علاقتي بصوته...من حوالي....تالتة اعدادي...يعني من أيام ما كان الواحد شعرو اسود... كانت "كل القصايد" و قناة النيل للمنوعات و الجو بتاع توب تن اللي كان الواحد بيستناه بفارغ صبره عشان يشوف الدنيا ماشية ازاي...وقتها مكانش الواحد عارف ان الفضائيات بتعرض...و بعد كدة تخزن الأغاني شوية بعد كدة ترمي لتوب تن. القصد....الكليب....الشعر...البدلة...البيانو....و كلمات و ألحان "مروان خوري"..هوستني.....كان حاجة جديدة...كان بجد حاجة جديدة وسط اللي كان موجود ساعتها..أوائل محمد حماقي..و جبروت عمرو دياب و تلزيق تامر حسني أول ما طلع.... برغم اني مكنتش فاهمة تلات ترباع الكلام ف الأغنية..و كنت باغنيها غلط...لكن بردو كنت باحبها..و علي الرغم من اني عرفت الكلام الصح بس من مروان نفسو من بتاع سنتين كد...