صباح الصباح.... - عن مروان خوري..!
صباح الصباح...
النهاردة انا باتكلم و انا مبسوطة...مبسوطة أخر حاجة..لاني باتكلم عن شخص باحبو...و من زماااااااااااااااااااااان...
مروان خوري....
مروان خوري اللي جايز كتير من الولاد..أو كل الولاد مش بيستلطفوه..أو مش بيستنضفوه....دي حاجة بتاعتهم بقي...انا باحبو موت....
بدأت علاقتي بصوته...من حوالي....تالتة اعدادي...يعني من أيام ما كان الواحد شعرو اسود...
كانت "كل القصايد" و قناة النيل للمنوعات و الجو بتاع توب تن اللي كان الواحد بيستناه بفارغ صبره عشان يشوف الدنيا ماشية ازاي...وقتها مكانش الواحد عارف ان الفضائيات بتعرض...و بعد كدة تخزن الأغاني شوية بعد كدة ترمي لتوب تن.
القصد....الكليب....الشعر...البدلة...البيانو....و كلمات و ألحان "مروان خوري"..هوستني.....كان حاجة جديدة...كان بجد حاجة جديدة وسط اللي كان موجود ساعتها..أوائل محمد حماقي..و جبروت عمرو دياب و تلزيق تامر حسني أول ما طلع....
برغم اني مكنتش فاهمة تلات ترباع الكلام ف الأغنية..و كنت باغنيها غلط...لكن بردو كنت باحبها..و علي الرغم من اني عرفت الكلام الصح بس من مروان نفسو من بتاع سنتين كدة و لا حاجة..إلا أن ده مهزنيش....
في الوقت ده بدأت أعرف صابر الرباعي....اللي سمعت شريطو بعد ما نزل بتلات شهور..و كنت فاكراه جديد..
ابتديت أعرف مروان أكتر من كلامو..خصوصا ان انا لمحت اسمو علي شريط صابر "خلص تارك"(كان باتنين جنيه و نص) في أغنية من أجمل أغانيه "نادم" اللي صابر متبري منها..بعد كدة لما اشتريت شريط "سيدي منصور" (كان بعشرة جنيه) لمحت اسم مروان بردو علي أغنية من أجمل أغاني صابر "أعز الحبايب" بس الحمد لله..صابر معترف بالأغنية دي..
:D:D
بعد كدة لما ربنا كرمنا و انفتحنا علي العالم الخارجي و جبنا الدش "الحمد لله" بدأت ألاقي عالم وردي من مروان خوري..و أغاني لمغنيين عمري ما سمعت عنهم..و كل ما أبص علي أغنية حلوة..ألاقي مروان راشق....
يوووه....الراجل ده شغال ايه بالظبط....خنقني.....طب بص كدة....أنا ف الثانوي...بوستر كبير متعلق لألبوم قصر الشوق علي بعد محطتين من المدرسة...و البنت دي "أنا متستغباش" كل يوم مشي لحد البوستر و أتفرج و أتنهد بعمق و أمشي لحال سبيلي....
فن مختلف بردو....الراجل هوسني..و عوج لساني...و خلاني أحب باللبناني...و ياسلام بقي..ياسلام...لما غني أغنية أوقات فراغ...وقتها...سمعت..."ياربي مين اللي بيغني...ياربي مين اللي بيغني...الصوت مش غريب عليا....انا عارفاه بس.." ثم صوت واحدة مجنونة بتصرخ "ده مروان خوري"..بغض النظر ان الأغنية محملة بكمية يأس لا بأس بها...بس كفاية ان عليها توقيع عبد الرحمن الأبنودي...ياسلام ياسلام....
(معلش يا جماعة انا شخصية بصرية بحتة و الأصوات عندي صعبة)
طبعا الواحد في الفترة من أولي لتالتة ثانوي...كان معاه أحدث جهازين في عالم الصوت "شرايط و راديو" كنت باعمل بيهم احلي شغل و الله....و شرايط شرايط..."هو انا هاروح النار من فراغ"....
لحد ما ربنا كرمنا لتاني مرة و الكومبيوتر البي سي..."الكبير ده" دخل بيتنا...يالهوي...و توصلت لاختراع مهول...اسمو الفلاش ميموري...اللي الحمد لله..مكنتش باروح بيه فاضي ف يوم....كنت و الشهادة لله...داخلة خارجة محملة أغاني...و أغاني تجر أغاني..و اكتشفت عالم مروان السحري....و اكتشتفت ان أجمل أغانيه مش اللي اتصورت..."خصوصا بعد الخناقات الهلامية بينه و بين روتانا علي الكليبات" و ان أجمل أغانيه بردو..مش هو اللي غناها...اكتشفت هو قد ايه كتب حاجات رقيقة ل"كارول سماحة – اليسا – ريدا بطرس – نجوي كرم – رضا " و غيرهم...دول اللي انا فاكراهم بصراحة...
انا مبكتبش أنقد شغل مروان..أنا أصغر من كدة...أو بمعني أصح..أضعف من إني أنتقد واحد علمني قد ايه الكلمة ممكن تكون رقيقة و ازاي تشتم و انتا رقيق...و ازاي تفكك م اللي قدامك برقة...يخرب بيت الرقة... :-x
حاجة كمان بقي....انا باحب أتفرج علي مروان و هو بيتكلم...شقي أوي...شقي جدا...و شكلو زير نساء محترف....بس سهن..و قصير و مش بيبان عليه..:)) واثق ف نفسو لدرجة الجنون.....و عارف ان أي أغنية بيحط عليها توقيعه بتبقي ناجحة....حتي لو محدش عرفها....لأن بجد الراجل ده موهوب....موهوب بجد...ربنا يحفظه...
حاجة أخيرة:
انا موش باحب أدون بالعامية.....بس أعمل ايه....مش عارفة ايه اللي حصلي..محدش يتدايق من كل البوست اللي جايز يقول بعد ما يقراه "ان قراه يعني :D:D:D" انا مال أمي بالبت المجنونة دي....جتها نيلة اللي عايزة خلف...اقفل التاب و امشي...بدل ما أشتم بقي...سيبني عايشة مع الجو بتاعي..مع ميرو.....ااااااااااااه....
دمه يلطش هههههه .
ردحذفI'm Marwan's biggest fan in the world...I love him till death and I like what u said and wrote...happy to hear this from u ... u relly made me sooooooooooo happy ...thanks thanks thanks for every word u wrote ....Balboula Khoury From Tunisia :) :)
ردحذف