موضوع تعبير...

هاقوهالك...

و انا ماشي...

انا قلبي..

ميرضاشي..

يكون تاني..

يكون تالت...

يا أكون اول...

يا مبقاشي...

راضيتك..

قومي و ارضيني..

هاكسّر قلبك الصيني..

و أحط بداله قلب حرير...

فتنسي النازي..

و الفاشي...

و فوق راسك تحطيني..

و أكون تاجك..

و محتاجك...

و وقت الشدة تلاقيني..

دراعك..

عقلك الواعي...

و أحيانا..

ضمير واشي...

لكن ف الزحمة و التوهة..

أقوم بالثورة..

ترميني؟؟

و أشيل عنك..

و أشيل تاني...

تحطي الحمل..

تنسيني؟؟

و أرجع تاني..

و أفتكرك...

و أقول يا أمه

انا..ابنك...

تبصي بعين مغمية..

و يخلص فيكي..

بنزيني؟؟

و أقع مكسور علي بابك..

و دمعي يغرق

أعتابك...

و لا باقدر علي عتابك...

دنا طالب..

تحبيني...

و أذاكر..

و أدخل اللجنة...

 و بالأستيكة...

تمحيني؟؟

و تاخدي الورقة دي فاضية...

و اجاباتك..

ف تكويني..؟؟

تقولي عليا انا ساقط...

و قلبي معاكي..

و مرابط...

و كل الدنيا إلا انتي..

بتيجي البيت..

تهنيني؟؟؟

بجد فقدتي تمييزك...

أكون أستاذ لكل الناس..

تقولي عليا..

تلميذك...؟؟!!

أظن ده عيب..

و أكبر عيب...

و مهما تسيبي

موش راح أسيب...

و هاطلع أول الترتيب...

مكاني هناك ف أول صف...

لا انا التاني..

و لا التالت..

يا أكون ألفا...

يا مبقاشي...

و أديني باقول..

و انا ماشي...

16-6-2011