متلبسة بالشعر...

انا فجأة باكتب شعر...

ألاقيني...باتدبس...

و كأنها جريمة..

و الشعر متلبس...

و أكتب أخاطب وطن..

مع إني باخاطبني...

بارسم ملامح زمن...

مش عاجبو..

و عاجبني...

و اقضي السنين مؤمنة...

بالصبر..و كفاية...

و أكفر ف أول سنة...

و أخد علي قفايا...

باحبي ف عالم وقح...

مفيهوش مكان للشعر...

و لا مكان للهوي...

مليان بذور من شعر...

و أسحف علي أشواك..

و أتهجي ف كلامي...

و حروف كتير من نور...

ماتت ف أيامي...

انا كنت طفلة زمان...

و أنا لسه أهوه...طفلة...

باتحلي ببرائتي...

و الدنيا مش سهلة...

متلبسة بالشعر..

لأنو كجريمة

عاقب عليها القانون...

و بتمنعه الدولة...

و انو مجرد كلام...

و لغو فاضي...و حديت...

و جم كمان يشتمو..

يا تيت يا بنت التيت...

متلبسة بالشعر..

ملفوفة بملايته...

شدوني بيه ع البوكس..

و حكيت انا حكايتو...

من يوم ما نبهني..

للجوهر الفاتن..

و لون سما زرقا...

و لسحرنا الساكن...

انا و انتا يا شعري..

عشان الهموم..توأم....

و كتبنا بايدينا..

وزيادة..راح نبصم...

و سمعنا ف أغاني...

و سرحنا ف الملكوت...

أي إننا..فاضيين...

انا و انتا خرج بيوت...

انا عمري ما هسيبك..

و ما بينا خيط مربوط...

و شعارنا ف المرحلة...

هنعيش سوا

و نموت!!!!

"القصيدة دي كتبت نفسها...انا مكتبتش حاجة و النعمة!!!"

ريم

22 مايو2011