رد سجون...من أرشيفي القديم


نهار أمك

مهوش فايت

يا حلم في قلب

رد سجون

يا حلم واخدله تأبيدة

و سجنه بديع

ورق كرتون

نهار أمك

لا هيعدي

و لا يهدي

في أي كمين

لا ينفع لما هتعيط

و تعمل فيها ميت مسكين

يشدك عسكري بنجمة

يسيبلك

فوق قفاك

بصمة

و تخرج تهتف

أهي قسمة

تلف تدور كما المجنون

يقولو الناس

بلا احساس

ده عاش مجنون

و مات ملعون

و تخلص

.....

بس كدة و خلاص

و تفتح عين

و تقفل عين

تنط ف جبة المأذون

و تأذن للأمل يهرب

فتسكن أي بيت مسكون

تعيش مطرود من الجنة

سجين سجنك ورق كرتون

تلاحقك لعنة طول عمرك

تقول يا قرد

يا ميمون

عشان زعّقت وسط الكون

و قلبك قلب

رد سجون



 خمستاشر مايو ألفين و تسعة


تعليقات

  1. وتأذن للامل يهرب
    وتسكن اى بيت مسكون

    صورة تحفة :)

    ردحذف
  2. جميلة جميلة و معبرة جدا !!
    تسلم إيدك :)

    ردحذف
  3. @Mohamed

    Thnq...nice to see you around here :)

    ردحذف
  4. @Radwa

    شكرا..يا أفندم لوجودك معانا ف البلوج :)

    ردحذف
  5. مميزة كلماتك يا ريم..

    نقلت لنا صورة حية عما كان فى ذاك الوقت..

    أبدعت..

    ردحذف
  6. @Hadeer

    عندك حق...احنا كنا ف دولة بوليسية...و ان شاء الله الظروف الراهنة إلي زوال...

    ردحذف
  7. هههههههههههههههه
    جميله اوى يا ريمو :)

    ردحذف
  8. @rona
    ميرسي يا رونا و انا ف انتظار جديدك دائما :)

    ريم

    ردحذف
  9. تحففففففففففففففففففففففففففففففففففففففففة موووووووووووووووووووووت

    ردحذف
  10. هههههههههههه جميله

    :)

    ردحذف
  11. حلوة اوى اوى اوى والله يا ريم ودمها خفيف لزيزة كده وتتحب

    بجد عجبتنى جدا تحياتى ليكى ومستنيه الجديده

    ردحذف
  12. جامد جدا .. الي الامام .. الي الامام

    ردحذف

إرسال تعليق

تعليقك يسعدني..يا أفندم!

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!