لسه فاكر..؟

"لسه فاكر...
لسه فاكر قلبي يدي لك أمان
ولا فاكر كلمه ح تعيد اللي كان
والا نظره توصل الشوق بالحنان
لسه فاكر كان زمان .. كان زمان"

كلمات رقيقة كتبها شاعر اسمه "عبد الفتاح مصطفي" كتب العديد من الأعمال الجميلة، منها اغنية لسه فاكر، وأغنية طوف وشوف، وبعض أدعية النقشبندي، وعبد الحليم حافظ....



الأغنية من ألحان رياض السنباطي، أعظم من وضع ريشة علي عود، ملحن الحاجات الفخمة والجميلة والحلوة...السنباطي اللي سبق عصره بميت سنة ضوئية، ويمكن أكترمن عبد الوهاب كمان، لأن ابداع السنباطي ابداع مجرد وخالص....مش زي ناس...
مقدمة الأغنية الموسيقية وترية، كمنجات وحاجات، تحسسك بالرقة والعذوبة، الكمنجات مش مبسوطة وهي بتغني، فيها نبرة عتاب، أو شجن، يمهدلك الطريق للايقاع اللي بعديه، واللي بردو في منتهي الرقة، يدخل القانون بين الاتنين، يوتر الجو شوية، بعد كدة يبدأ رتم الاغنية في البدء...


القانون بيلعب دور الجوكر في الاغنية، ودور مهم، بعد كدة يدخل الايقاع، والقانون والكمنجات، وأهات أم كلثوم تحسسك بالوجع، كأنها دايسة علي طرف روحك...
عن نفسي باعتبر الاغنية من أدفأ وأرق ما غنت الست أم كلثوم في تاريخها، برغم انها بتتكلم عن الهجر، لكن مثلا مش بعنف أغنية "اسأل روحك"  أو قسوة أغنية "فات المعاد"...



تدخل السيدة أم كلثوم بنبرة هادية وهي بتسأل حبيبها: لسه فاكر قلبي يديلك امان؟ وترد عليها الكمنجات "لأ" وتزيد ع السؤال "ولا فاكر كلمة هتعيد اللي كان؟" وتلاقي ورا الكمنجات بتسب الدين للحبيب، وتلاقيها سخنت أكتر وهي بتقوله "ولا نظرة توصل الشوق والحنان؟" بعد كدة مش بتسيب فرصة للمزيكا بقي، وتروح رامياه بالتقيلة "لسه فاكر كان زمان...كان زمان"، مع نبرة سخرية واضحة في اللحن وهي بتقوله تاني "لسه فاكر كان زمان" كأن صوتها بيضحك استهزاءا بالحبيب الحمار اللي جاي يجر ناعم...

"كانت الأيام في قلبي دموع بتجري
وانت تحلالك دموعي وهي عمري
ياما هانت لك وكانت كل مره
تمحي كلمة من أماني فيك وصبري
كلمة لما راح الهوى ويا الجراح
واللي قاسيته في ليلي اتنسى ويا الصباح
والنهار ده الحب والشوق والحنان
لما تسألني أقولك كان زمان
لسه فاكر كان زمان .."

خلص المطلع؟ تدخلك بقي ف اللي كان بيحصلها عشان توصل للحالة الوحشة دي، الكوبليه عبارة عن عريضة شكوي، لما بتقول " كانت الأيام في قلبي دموع بتجري...وانت تحلالك دموعي وهي عمري"..مسم...معلش، عيطي يا ختي L
وتستمر الست في الشكوي، وهي بتوصفله ازاي كانت بتحس بالذل، لما بتقوله "كلمة كلمة...لما راح...الهوي ويا الجراح"، والرق شغال وراها عشان يوريه ازاي هو نفخ الست معاه، منك لله بقي يا اللي عملت فيها كدة...



حميمية اللحن بتقل مع اخركلمة، وبعد كدة تحس انها سخنت تاني وفاقت، لما قالت "اللي قاسيته ف ليلي، اتنسي ويا الصباح"، ويرجع اللحن لنفس اللهجة الساخرة الحارقة لما تقوله "والنهاردة الحب والشوق والحنان، لما تسألني اقولك كان زمان" بالبلدي "كان فيه وخلص أروح أمك"...

كفاية لحد كدة بقي...أسمع الاغنية بنفسك وتخيل اني باعلق ع الباقي J

جدير بالذكر اني مكنتش باسمع الاغنية من أم كلثوم، كنت بسمع تسجيل لآمال ماهر 
والفيديو اهو :



المصادر:

تعليقات

المشاركات الشائعة