لقد هلكنا يا أمي..

لقد كبرنا يا أمي ورمينا كل طموحاتنا وأحلامنا ف الزبالة وتخيلنا عن أحلام الطفولة الجميلة وموهبتنا الكبيرة وشغفنا العظيم وتحولنا إلي كلاب لقمة العيش وعبيد المرتب نهاية الشهر...

امبارح في حد زعقلي ف الشغل، زعقلي علي حاجة انا معملتهاش، معرفش ليه زعلت، أو مزعلتش، انا تنحت ومردتش، واستأذنت م الميتنج اللي اتهزقت فيه ودخلت الحمام...

بعدها قمت أنضف وأروق وأكنس وأعمل حلويات، تقريبا نشاط آخر غير الشغل والمذاكرة عشان مضربش حد، أو يمكن وأنا بنضف حافظات السجاجيد تخيلت اني بضربه، بس انا مش عاوزة أضرب حد، انا عاملة زي الهامستر، بلف ف عجلة ملهاش نهاية فعليا مستنية اللحظة اللي نفسي يتقطع فيها وأقع ميتة..

متفائلة عامة لأن وزني وحالتي الصحية ومعدل استهلاكي للكافيين والنيكوتين كفيلين بتعجيل النهاية، النهاية اللي لازم تقرب عشان انا زهقت...

من كتر حبي ف المذاكرة بحضر ماسترز، من كتر حبي ف الشغل بشتغل أوفر تايم، أنا كدابة، ولا بحب الناس ولا بحب نفسي، انا عاوزة أفضل نايمة كتير، بقالي كتير مباخدش الانتيدبرسنت بتاعي عشان مفلسة معييش فلوس أجيبه، بس الحقيقة انه كان بيجيب معايا وبيحركني...

انتهت حلول الأرض الأمر متروك لعروسة فرعونية صغنونة تغير مستقبلي ومستقبل القطط بتوعي، زهقوني وفلسوني من عددهم ومن زن أمي، وكل شوية تقولي مشيهم مشيهم، حضرتك عاوزة تمشيهم مشيهم انتي انا قلبي مش هيجيبني أمشي أي حد فيهم، مش هعرف...

كنت بقلب ف الهارد بتاعي لقيت شوية حلقات سبريكر قديمة منشورة، حملتها زمان عشان جالي انذار بتحميل الحلقات قبل ما السايت كله يقفل، من سنين، بحس اني عجوزة لما ببص ف المراية بشوف شكلي، وشعري اللي ابيض بدري بدري، عيد ميلادي ال33 بعد بكرة، انا ريم عبد العاطي ودي حلقة من حلقات جلد الذات السنوية مع كامل احترامي..

مليش نفس اكتب عشان مش لاقية شئ أقوله بشكل عام، امبارح جالي ايميل من أحد متابعيني القلائل علي المدونة اليتيمة دي، بيسألني انتي كويسة...الحقيقة انا اتفاجئت ووقفت قصاد الايميل شوية، انا مش كويسة أيها المتابع المجهول، بس بنقول الحمد لله وخلاص...

بس عندي شوية ثقة، شوية ثقة اني داخلة سنة جديدة ف عمري وانا ف بوزيشن كنت بتسول عشان أوصله، وشهادة مكنتش أحلم اني أبدأ فيها رغم انها فلست اللي خلفوني، وقشت كل الفلوث اللي كنت محوشاها، وهما شوية فكة يعني مش حاجة...

الشئ الوحيد اللي انا محتاجاه بس هو اني أرتاح، لأني مش برتاح، محدش بيعملي حاجة ولا بيقولي عنك، شيل شيلتك الرحلة فردية يابنميتينلكلب، وشوف حد ينيكك بالمرة وانت ماشي...

سلام..

26 مارس 2024

الجيزة