ست أغنيات ستذكرك ب "مصطفي قمر"..!

أصحابي وصحباتي هنا ومحلك سر، بعد غياب عدد لا بأس به من الأسابيع لانشغالي بالشغل والانترفيوهات والفسح، ربنا كرمني واتجبست تلات أسابيع ف البيت، يدوبك لسه فايقة من صدمة الجبس قريب، بقالي تمن أيام متجبسة تقريبا، هانت فاضل 13 يوم، قررت النهاردة أكتب بوست بيحمل طابع الحنين للماضي لأننا بنتكلم عن مغني كلنا بنحبه لخفة دمه الشديدة ولعظمة الأفلام اللي مثل فيها، ضيفنا النهاردة هو الفنان "مصطفي قمر"..!



مصطفي قمر ظهر في بدايات التسعينيات، مسيرته الفنية عامة كفنان مشهور وليه فانز وأغنيات وكدة وقفت تقريبا عند سنة 2006، مع صدور ألبوم "لسه حبايب" تقريبا دي اخر هيت معلمة مع الناس لحد دلوقتي، أما عن الأغنيات القديمة فحدث ولا حرج، الناس فاكراها كلها.

مصطفي قمر فنان اسكندراني، يعني غني للبحر وعن البحر وصور أغنيات عن البحر، من قايمة مفضلاتي الشخصية اخترتلكم ست أغنيات النهاردة مع انه له أكتر ولو تحب تقرا اكتر ممكن تدخل علي لينك بلاي ليست ليه من هنا ولو تحب تعملي فولو علي ساوندكلاود بردو ممكن يكون من هنا

نبدأ بالأغنيات:

1- مبحبكيش "من ألبوم لسه حبايب"
كلمات: نبيل خلف- ألحان: عمرو مصطفي- توزيع طارق مدكور.
اخترت الأغنية دي بالذات لأني باحبها جدا، مناسبة لصوت مصطفي قمر، وكلماتها مميزة جدا، توزيعها كمان توزيع مميز جدا من أسطي شاطر زي "مدكور"، كلمات مطلعها بتقول

"مبحبكيش وهنفترق...
ودنيتي غير دنيتك....
وما بينا كان قصاقيص ورق..
طابع بريد في غربتك.."

ثم يستمر تصاعد الموسيقي ليمهد لتصاعد درامي في الكلمات:
"لكني ليه دايما حزين 
باحلم تملي بجنتك..
ومهما بتمر السنين
مسمعش ليه غير غنوتك.."

إلي آخرالأغنية، يمكنك أن تشاهد الكليب من هنا:



2- السود عيونه - من ألبوم نار الحب.
كلمات: سامح العجمي - ألحان: حمدي صديق - توزيع حميد الشاعري.
مظنش كان فيه حد ف الفترة دي مش حافظ الغنوة دي، لأنها كانت تعد شقية في التصوير، ورشيقة اللحن والكلمات، انتاج وتعاون رائع ما بين الشاعر والمنتج سامح العجمي وملحن "خلص تارك" العظيم "حمدي صديق" وتوزيع فوق العادة لحميد، الأغنية دي كانت بتتذاع كل يوم بعد المغرب ع القناة التانية كل يوم، تفتح مجلة الأغاني تلاقيها، ف اليوم المفتوح تلاقيها، يعني كانت منتشرة، وكل الناس الي فوق العشرين أكيد حافظاها.

الأغنية باختصار نظام "طقطوقة" مطلع:
"لاانا قد شوقه ولا قد جرحه..
ولا قد ناره..
الله يسامحه"

ثم سكته لندخل في الكوبليه:
"والسود عيونه..
يا ولا...
السود عيونه...
جننتني..
وف ليل غرامه توبتني.."

إلي اخره...

ممكن تشوف الكليب من هنا:


3- بنلف - من ألبوم "نار الحب".
كلمات وألحان: بليغ حمدي.
الأغنية مش معمولة مخصوص لمصطفي قمر، الأغنية أصلا ل"سميرة سعيد" و"وردة" غنتها من منطلق "انا عاجي معاكو كدة"، الحقيقة مقدرتش أوصل للشخص اللي عملها التوزيع اللطيف، توزيع جاز، هادي، زي الأغنية الأصلية، مجرد بركشنز وتروميت وكيبورد.

مصطفي قمر أدي الأغنية بشطارة عامة، لأنها يمكن مش محتاجة شئ أكتر من الاحساس اللي مصطفي بيغني بيه كعادته، لا زعيق ولا امكانيات جريندايزر في الغنا، مجرد احساس ومزيكا هادية.

ممكن تسمع بنلف بصوت "قمر"  من هنا:



4- البحر - من ألبوم طال الليل
كلمات: أيمن بهجت قمر - ألحان: حسن دنيا - كلمات: طارق مدكور.
قلما الواحد بيسمع أغنية مفيهاش إفيه للأستاذ "أيمن بهجت قمر" ف الأغنية دي قديمة بس جميلة، يمكن لبناءها الدرامي ولأنها بتحكي حكاية جميلة، ويمكن لأن صوت مصطفي اداها بعد تاني رقيق، او يمكن لمجرد انها قديمة.
عنصر التوزيع في الأغنية دي مهم جدا، وتريات وايقاعات طارق مدكور خلت الموضوع له طعم تاني عامة، انا عن نفسي مبزهقش من أغنية زي دي، وياريت لو متعرفوهاش تسمعوها معايا من هنا:


5- سكة العاشقين - من ألبوم سكة العاشقين.

من اكتر الأغنيات اللي كسرت الدنيا لمصطفي قمر، وخلتنا نبلعله كوارث زي "دباديبو" و"الليلة دوب"، أغنية فخمة التوزيع، طويلة إلي حد ما، لها مطلع وكوبليهات، ولها كليب جميل، أطلت فيه الفنانة "فرح-فيدرا" للمرة الأولي، وكان ده سبب انها دخلت عالم التمثيل في فيلم "أرض الخوف" قدام أحمد زكي.

مش قادرة أتخيل حد غير "مصطفي قمر" وهو بيقول:
"عاشق بقول حواديت..
باحلم بحضن وبيت...
ياخدني...
أغلي الحبايب يا حبيبي...
يا حبيبي..." إلي آخره...

الأغنية عامة من أكتر الأغنيات اللي باحبها ل"قمر" واللي دايما ف بلاي ليست موبايلي باستمرار.
ممكن تسمعها أو تتفرج عليها من هنا:


6- لا بد نتفارق - من ألبوم "حياتي"
كلمات: رضا زايد - ألحان: مصطفي قمر - توزيع: محمد مصطفي
الأغنية دي من أجمل أغنيات مصطفي قمر، كانت ف ضمن أحداث فيلم "أصحاب ولا بيزنس" اللي بالمناسبة مليان أغنيات روعة منها: "أصحاب" و "جت تصالحني" ودي، الأغنية دي بتكشف باستحياء عن الملحن "مصطفي قمر" اللي قدم ألحان كتير لكن للأسف جوجل مش ساعفنا لقلة توثيق الأغنيات العربية اللي بيطلع عيني علي بال ما أجمع المؤلف والملحن والموزع.

توزيع الأغنية الشبه ميتال، بالاضافة لاستخدام ايقاعات حادة بيأكد علي جو الأغنية الحزين، دول ناس بتتفارق، الايقاع لازم يكون زي الهدد فوق راسنا كمستمعين، بالاضافة للكلمات نفسها، حزينة لشكل كبير "ولا عادش شئ فارق، لابد نتفارق"..

ممكن تسمع الأغنية دي من هنا، وشكرا لفريق شركة "عالم الفن" اللي وفر عليا تدوير كتير:





تعليقات

المشاركات الشائعة