حب ما تعمل وكدة....

كابتن محمد صبحي ليه مقولة مشهورة بتقولك "حب ما تعمل حتي تعمل ما تحب"
والعلامة القدير الفاضل الكوميديان المنتشر انتشار الفشخ ف البتنجان أحمد حلمي هو راخر قال "حب ما تعمل عشان محدش لاقي شغل"

المقولتين في الحالتين باطلة...باطلة باطلة.....
انا ضيعت أربع سنين في حياتي أو بمعني أصح درست كومبيوتر ساينس، معرفش ليه، بس الكبر والغتاتة اللي جوايا دخلوني علمي رياضة وانا مبعرفش اكامل معادلة فيها رمزين علي بعض!

صفر في الرياضة، وبالتالي صفر في البرمجة...صحيح حبيت حاجات تانية درستها زي البرمجة الخطية ودعم القرار، بس بردو كنت أبيض ف تلات تربع اللي درسته، م الاخر انا خلصت الكلية بأعجوبة عشان مبقاش عالة ع البيت أكتر من كدة، وانطلقت إلي عالم المرح وسفن أب...

اشتغلت حاجات كتير من ساعة ما اتخرجت، لقيت عندي ملكة الترجمة واعادة الصياغة من انجليزي لعربي، وملكة الكتابة ف مواضيع كتير اوي من مقالة واحدة، واشتغلت فري لانس بس اتخنقت، فلوسها قليلة وبتاخد وقت كتير بردو والموضوع ميعجبش المجلة فتشوف واحد تاني وموال بقي، بس هي كانت حلوة ساعتها...

للصدفة الغريبة اشتغلت مع راجل ظريف كدة اداني مرتب ظريف وخلاني اشرح حاجات انا نفسي مكنتش اعرف عنها حاجة إلا ساعة ما شرحتها، أو قبل ما اشرحها، فكنت بذاكر وأشرح، كانت قلش عموما، وفالاخر سبتها عشان معرفتش اعمل الي طلبه هو في الآخر، لأني حاولت فيه كتير وفشلت، وسبت الشغل معاه كله، لأن ساعتها جالي شغل تاني ف كول سنتر في شركة مالتي ناشونال...

بمنتهي الغرابة اتقبلنا في الشركة دي من غير اي امتحانات صعبة، كان انترفيو وفيه اتش ار وسوبر فايزور الكول سنتر، وانجليزي وسألني علي IP وفتيت وطلع صح، وهوب لقيت نفسي اتقبلت ونجحت وكدة، وهوبا بقينا ف تريننج، وهوبا بنشدور...

مكنتش مقتنعة بأي ابن تيت حاصل، وكان كل ما حد يعرف اني متخرجة من كومبيوتر ساينس يقولي بالحرف "انتي ايه اللي جابك هنا؟" محدش كان خريج الكلية خالص وكنت حاسة بأمانة اني لوحدي في ال Shark Tank ولا ليا صاحب ولا سند وبتخبط، وكنت قاعدة بقي مع شوية عيال أجاركم الله، بنات خريجات هندسة والله ما هزيد حرف علي كدة....

المهم يعني، بعد أقل من تلات شهور، حلفت طلاق تلاتة مانا لابسة سماعة تاني، وكنت حاسة بالذل بقي وازاي انا الترينر أبقي كدة ونسيت اني ترينر كفتة وورق واني ولا حاجة،رحت اشتغلت ف شركة تانية، وكنت متخلفة عقليا أو جبانة، أو متفهمش ايه حصلي بالظبط.....

سبت الشغل هناك بعد شهر واحد عشان اتأكدت مليار في المية اني مش متخلفة وبطيخة وقدامي مليون سنة عشان اتعلم ومش هتعلم، ومستحملتش نقرزة ده واهانة ده واستعجال ده، والحقيقة مشفتش نفسي في المجال ده هبقي اي ابن ستين كلب، مع كامل احترامي للمبرمجين يعني، الي انا عمري ما اشتقت ابقي منهم....

أجزت ف بيتنا رمضان والعيد ونزلت اشتغل سماعةتاني في شهر تسعة.....
وكارهة نفسي بقي ومرتب ملاليم غير أول مرتب من المالتي ناشونال....
ونازلة اشتغل متضررة، وهوبا وانا ف الشغل التاني، اللي كان فيه صحابي، وكنت مبسوطة بيهم فشخ، وحاسة اني وسط عيلتي التانية، حسيت اني هبقي علي كف عفريت، يعني رضينا بالهم والهم مش راضي بميتين أمنا، وخناقات مع التيم ليدر بتاعي، ومشاكل معاه، ونمسك ف بعض....ونشد ف شعور بعض، هو تقريبا كان فاضله زلطة ويرميني برة.....

قوم يا مؤمن سبحان الله الواحد حاله يتقلب من حال لحال، ويتغير وانا ومديري مش نبقي سمنة علي عسل، احنا بقينا عسل علي عسل وبقيت من المقربين ليه ومش من الAss Kissing لأ، ده بقي صاحبي فعلا!!!

سبحان الله....!

ما محبة إلا بعد غباوة...بس الديباجة الطويلة دي ليه بقي؟
الديباجة الطويلة دي علشان انا ولغرابة شديدة انا نفسي مستغرباها انا حبيت السماعة وبقيت أحب أبقي أحسن ف شغلي ده، وحسيت ان الشركة دي بيتي التاني، واني ممكن أبقي حاجة، رغم شبح اليأس اللي بيراودني فيها وف بالي طول الوقت....

لكن حسيت بجد ان دي الحاجة الوحيدة اللي باعرف اعملها بمزاج وضمير، وباتمتع فيها أغلب الوقت، وحبيت جوها وعشقته، ولميت معلوماته بسرعة وبستوعب تغيرها وباتأقلم معاه...زائد انها وببساطة شديدة....مش هتشغلك برة باب الشركة دقيقة....

أمي عاوزاني استقيل عشان لما "اتجوز" اشتغل بردو، وابويا عايزني استقيل عشان امي عاوزة كدة....

رغم قرف الشفتات، وبواخة المواعيد، لكن في الحقيقة لما لقيت تشجيع، ب أدي أكتر، ولما بلاقي حد بيحمسني باعرف اشتغل بمزاج أكتر، وببقي رقيب علي نفسي اكتر ما هو بيبقي رقيب عليا، وبييجي يكلمني ف حاجة ومبعارضش.....يمين يبقي يمين لأنك الأدري بالمصلحة....

لأول مرة اتعاطف مع شخص وأحس ان شغلي هيشيل شغله ولازم أبقي أحسن عشان دي سمعة تيم، واني ابقي Guru لحد جديد مش عارف حاجة ويبقي تحت ضلي لحد ما يبقي أحسن ويطلع لقدام، وان شالله يبقي أحسن مني كمان!

انا ومديري كنا قافشين علي بعض الأول لسبب اكتشفته بعد كدة اني انا وهو نفس البرج ومواليد نفس اليوم، وكلانا برج ناري حميري خنزيري هو برج الحمل :D
انا باخد مميزات محدش بياخدها ف التيم، معرفش ليه، عمري ما طلبت أي ميزة، بس لما تلاقي حد بيعاملك معاملة مميزة لازم تردله الميزات دي شغل من نار!
انا بقي بردو معرفش انا لابدة في الشغل عشان حبيت الشغل، ولا حبيت المدير نفسه...!

الظاهر ان طبيعة شخصيتي راكبة فشخ مع شغلي فعلا!

وانا مش هستقيل....

تعليقات

المشاركات الشائعة