الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

23 مارس 2016

ندمانة - سوما: قراءة نقدية.

أسماء سعيد، أو كما يطلق عليها أصدقاؤها "سوما" تأتي اليوم في ألبومهاا الثالث "ندمانة" بعد ألبومين ناجحين، هما "عيب عليك" و "ده حبيبي"، ألبوم لطيف، 11 أغنية، وتعاونات مع "محمد يحيي" و "عزيز الشافعي" مثمرة.



"سوما" هي أحد أحب المطربات الشابات لقلبي، موبايلي دائما يحتوي علي "هتروح" و "عيب عليك" و "تلات تيام" و"مقدرش أقول" سوما من أرق الأصوات المصرية مؤخرا، لكن عيبها الشديد أنها مع "نصر محروس" الذي سيطر بشكل كبير علي الألبوم، تطبيقا لمبدأ الريس "مزاجنجي" (أنا اللي هعبي الشريط بصوتي) فأتت تدخلات "نصر" فجة، وشلت حركة صوت سوما إلي حد كبير، وإلي تفاصيل الألبوم.



1- عم الروش.
كلمات نصر محروس - ألحان محمد يحيي

توزيع ألفيناتي، اللحن أهدي بكتير من الكلمات، الكلمات نفسها كانت محتاجة لحن زاعق عن كدة، ومش مناسب عامة لصوت سوما، كان أولي ب "دياب" إنه يغني حاجة زي كدة، أغنية افيه متلقش بصوت بنوتة رقيق زي "سوما" غنت حاجات تقطع القلب م العياط.



التوزيع الإلكترو، المعتمد ع الجيتار الإلكترك مش متناسب اطلاقا مع صوت سوما، بل ان الموسيقي أعلي من صوتها أحيانا، استخدام الصوت التوناليتي كان مناسب إلي حد ما لتدعيم صوت سوما ال"Low Pitch" ومش عيب ان الواحد يكون صوته ضعيف، بس العيب اننا نغني أغنيات متوزعة غلط مش لصوتنا خالص، الأغنية فعلا مش معمولة لصوت ست، بهاء سلطان أو دياب، او حتي منعم كانت هتبقي أظرف، بعدين هو لسه فيه حد بيقول لحد "ياروش" دلوقتي؟ مش قلتلكو ألفينات :D

صولو جيتار ألكترك، يتبعه ايقاع راقص بعض الشئ، يتهادي لصوت سوما:

"بالذمة في حد بيحب حد..
يفضل يلاعبه ويقول بجد...
وتملي تاعبه وطريقه سد..
قولي انتا قصدك ايه..
بالذمة في حد ف حياته حد..
عايش بقلبه، مخلص بجد..
والتاني عامله زي أي حد..
قولي انتا عايز ايه؟"

صوت سوما في الكوبليه مقبول بعض الشئ، لكن الكلمات بصراحة اتكتبت ف "خمس دقايق" لا قافية مظبوطة، ولا فايدة نهائي، أي كلام ف أي كلام..!

ثم لازمة الأغنية، كلمات أغنية لمطربة رقيقة تقول "طفش"!
نسمع في توزيع اللازمة موسيقي 8Bit أشبه بموسيقي Super Mario لطيفة بعض الشئ، تضيف شقاوة لجو الأغنية.

"جرى ايه يا عم الروش جرى ايه
انا قلبي منك قفش كده ليه
والحب منك طفش، جرى ايه يا عم الروش

جرى ايه يا عم العسل جرى ايه
في ملاوعة ملكش مثل كده ليه
قسّتني وده اللي حصل، راجع بتعيط ليه!"

واستطرادا:
" طيب روق بس و اهدى، خد منديل نشف دموعك
انا عارفة انك هترجع، مش هيفيد تاني رجوعك"

عزيزي المستمع "خد منديل" حدادا علي كارثة موسيقية في ألبوم جميل لمطربة جميلة، ويلا بينا نسمع الكوبليه الثاني:

"قال ايه راجعلي وجايبلي ورد، وفاكرني هضعف و ادوخ بجد
يا روحي لا دي حيطة سد، انت هتضحك على مين!


ما تفكك مني خلاص بجد، حركاتك دي على اي حد
دانا واحدة يابني غير اي حد، مين انت تطلع مين!"




تقييمي لها 2/10

2- حب من غير أمل.
كلمات خالد الشيباني - ألحان: وائل عقيد - توزيع طارق عبد الجابر.

عودة لزمن "مقدرش أقول" الجميل،  توزيع إلكترو حالم بعض الشئ، كأنك داخل علي غنوة لإليسا، ثم تقسيم قانون وناي شرقي، تمهيدا لدخول صوت سوما الناعم، ملعب سوما ومنطقتها القوية في المنطقة الصوتية دي، مفيش أي لزوم نطلع منها وهي بيطلع منها  حاجات رائعة في منتهي الجمال، ايقاع في منتهي الدقة،

يقول المطلع:
"قلبي...
كان بيداري عنك..
إني سهرت ليلك..
عارفة..
أيوة انا عارفة انك..
مش هتحس بيه...
ياما...
ياما هربت منك..
وألقاني بديلك..
خايفة أرمي نفسي ف حضنك..
وألقي غيري فيه..!"

 متعوب في التوزيع مع صوت سوما، مصحوب بالكمنجات الي بدأت تقسم تمهيدا لانعطاف لحني حاد للازمة الأغنية الجميلة، الحادة بالطبع:

 "وده حب من غير أمل،
 ايه العمل،
 ونهايته ايه،
 قلبك بعيد مش هنا،
 وقلبي أنا، ياما هان عليه،
 شوقك ف قلبي ابتدا،
 وعارفة كدة، 
عمرك ما هتبقي ليه..!"

لازمة جميلة أيضا يتم توظيف فيها صوت سوما المستعار، صولو رائع بعدها من الكمان، بصحبة الرق والكولة، لا أعرف لم ذكرتني هذه اللازمة بأغنية "فنجان النسيان" لأنغام من ألبومها الأخير، وعلي نفس المقام يدخل الكوبليه الثاني:

"جايلي جاي تلعب بقلبي..
جاي ترضي غرورك...
ولا عايز تبقي جنبي..
عشان بصعب عليك..!
امشي يللي عينيك حبايبي..
متمثلش دورك..
هفضل أداري الشوق وأخبي..
أنا مش لعبة ف ايديك..."

ويستمر الفيضان الموسيقي، الكرم الزائد في التوزيع علي ما أظن أضر بالأغنية، لكن اللمحة الشرقية فيها تغفر كل شئ، خصوصا في صولو الكولة الأخير، بصحبة الرق، ثم تكرار للازمة اللحنية مرة أخري.

يعيب هذه الأغنية تقليدية الكلمات واللزمات الموسيقية، لكنها أغنية متقنة الصنع، صوت سوما هو أجمل ما فيها.

تقييمي لها 8/10


3- خلصت.
كلمات: نصر محروس - ألحان: عزيز الشافعي - توزيع: جيزو.

عودة مرة أخري لنصر محروس "أنا اللي هعبي الشريط  بصوتي"، علي ذكر أنه يمنح مطربيه أغنيات يكتبها بنفسه -الله أعلم يعني- الأغنية تندرج تحت بند الإفيه، بالنسبة لصوت سوما، دائما هناك فرق ما بين الHigh Pitch في الصوت والسرسعة، المشكلة أنها أحيانا تفقد هذا الخط، هذا ما حدث في أغنيتنا.

بعد مقدمة موسيقية قصيرة تجمع ما بين الدربوكة والقانون والكولة، تدخل سوما للمطلع بصحبة ال"دربوكة" أو ايقاع، الايقاع راقص بعض الشئ لا يتناسب وطبيعة الكلمات:

"عايز كل ما تعرف واحدة..
تقرب منها..
هو انتا اللي تحبك..
لازم، يطلع عينها..!
ولا انتا الواد الشخصية..
اللي مفيش منها..
علي ايه قولي..
انتا بتعمل كل ده فيا...
من كتر الحب اللي انا خدته
- Guess what -
والحنية..
بعدك عني خلاص..
مبقاش بيأثر فيا..!"

ثم للازمة الأغنية، التي لم أحبها مطلقا:

"وخلصت..
بالنسبة لي خلصت..
مهما انتا هتعمل..
مش فارقة معايا..
ماهي خلصت...
يامعلم خلصت..
دي حكاية وعدت..
مبقاش جوايا..."

سوما في اللازمة تمط الكلمات بشكل زائد عن اللزوم، "خيييييييييييلصت، ماهي بالنسبة لي خيييييييييييييييييييلصت"، أغلب الظن أن نطق الكلمات غير واضح بسبب انها ترددها ككورس مستعار، أغلب الظن أيضا أنها لم تبد كذلك كلحن لعزيز الشافعي، لكن سوما مطت حروفها وكلماتها وأضفت عليها رتابة.

توزيع الأغنية أتي رتيبا، لم يقدم جديد هو الآخر، مجرد "مقسوم" و"طبل"، في ملل شديد تنتظر الكوبليه الثاني:

"اييييييييييييييه
هو انتا فاكر ايه..
وعاوزني أسكت ليه؟
هو اللي خلقك قولي..
مخلقش غيرك يعني..
قولي بأمارة ايه؟
واييييييييييييييه
شايف نفسك علي ايه..؟
ومصدق اوي كدة ليه؟
انتا اللي زيك يابني..
بغرورك اللي تاعبني..
ميتبكيش عليه..."

اللحن ماهو إلا "لت" و"عجن" و"تهزيق" من سوما لحبيبها، ومحاولة فاشلة من "نصر محروس" لصنع "اه يا ليل" جديدة، لكن صدقني يا صديقي، "اه يا ليل" لن تتكرر...!

الأغنية تستحق 3/10.

4- طبعي صعب.
كلمات: محمد مصطفي مالك - ألحان: محمد أنور - توزيع: وسام عبد المنعم.

أغنية جميلة، أجمل ما فيها هو هدوء التوزيع مقارنة بصوت "سوما"، الذي دائما ما تظهر عيوبه في ارتفاع صوت المزيكا مقابلها، 

مقدمة مصحوبة بصوت سوما يدندن مع جيتار، ومؤثرات صوتية "تامر عاشورية".

" انا قلبي طول عمره جامد مش ضعيف
ومهما حب عمره يوم ما يبان خفيف
أنا طبعي صعب، في حتى ناس بيسمّوه سخيف "فيه كسرة في الوزن هنا" 
لحد ما قابلتك حبيبي حصلي ايه
عشان ابقى جنبك أي وضع انا هرضى بيه
كل الحاجات اللي في قلبي مكانتش فيه"

تستمر الموسيقي مزيجا ما بين الكمان والجيتار والجرس، بهدوء وتناعم شديد للازمة الأغنية الرقيقة:

"يعني ايه مش عايزني وماسكة فيك
قلبي ده رامياه عليك، شكلي ايه قدام عينيك!
لا و ايه، مستعدة معاك أعيش
حتى لو متحبنيش، كل ده ميهمنيش"

صولو جيتار لطيف في الأغنية، تراجع للالات الموسيقية الأخري، لكننا نسمع معه بعض لحظة "كيبورد" أنيقة، ثم تراجع للجميع ليدخل صوت "سوما" الناعم مرة أخري:

"انا كبريائي بسببه ياما اتضايقوا ناس
عايشة حياتي ماشية بدماغي وخلاص
أنانية، والطيبة ده شيء ملهوش أساس

معرفش ازاي كل ده اتغير بسرعة
بقيت واحدة عايشة مابينها و مابين موتها شعرة
و ده كله علشان سبتها وبعدت مرّة" "مين دي الي سبتيها؟"

ثم لازمة الأغنية مرة أخري:

"يعني ايه مش عايزني وماسكة فيك
قلبي ده رامياه عليك، شكلي ايه قدام عينيك!
لا و ايه، مستعدة معاك أعيش
حتى لو متحبنيش، كل ده ميهمنيش"

فيه شئ غريب عامة في كلمات الأغنية، أظنني لم أفهم الغرض العام من الأغنية، هل هي عتاب؟ هل هي ندم؟ هل هي تحب شخص لايحبها، لم أفهم شئ، ولم أفهم لماذا "طبعي صعب" من الأساس، الكلمات يعتريها بعض الكسور في الأوزان، وحقيقة بعد أن سمعت الأغنية ثلاث أو أربعة مرات لم أفهم ماذا تريد بالظبط..!

بغض النظر عن غموض الكلمات، الأغنية تستحق 6/10.

5- في ظروف أحسن من كدة.
كلمات: نصر محروس - ألحان: محمد يحيي - توزيع: أمير محروس.

مقدمة موسيقية رائعة..! المعلم أمير محروس يضرب من جديد، توزيع معتمد علي الايقاع والكمان، والرق، ينسحب الجميع لصالح صوت سوما الذي يدخل رائعا متألقا بصحبة الجيتار والكمان.

"و انا ليه أوجع في قلبي انا ليه
مع حد مبصش إلا ليه
و اعمل كده ليه يا أناني ليه؟
تعمل كده ليه يا أناني ليه!"

ثم التفاتة لحنية رائعة من "محمد يحيي"، مع لازمة الأغنية:
"و اشوفك في ظروف أحسن من كده
ميبانش عليك كل ده، وماكُنش بالشكل ده
انا همشي علشان متزعلنيش
علشان مقدرش أعيش مع قاسي بالشكل ده"

توظيف أمير محروس للأغنية واللازمة والأخذ والرد ما بين صوت سوما وصوتها ككورس اضاف الكثير.

فاصل موسيقي لطيف يستمر مع الكوبليه الثاني:

"خاين قاسي غدار، و سبتلي قلبي في النار
عملت فيك انا ايه؟ تعمل كده فيّا!
من جوه قلبي أديك، تديني ليه قسيّة!"
و انا ليه أوجع في قلبي انا ليه
مع حد مبصش إلا ليه
و اعمل كده ليه، يا أناني ليه؟
تعمل كده ليه يا أناني ليه!"

ثم عودة للازمة الموسيقية مرة أخري:
"و اشوفك في ظروف أحسن من كده
ميبانش عليك كل ده، وماكُنش بالشكل ده
انا همشي علشان متزعلنيش
علشان مقدرش أعيش مع قاسي بالشكل ده"

النظرية الموسيقية القائلة بأن اللحن والتوزيع الجيدان يجعلانا نغض الطرف عن الكلمات الرديئة أصابت هذه المرة، كلمات الأغنية غاية في الرداءة والسطحية والتكرار، الأغنية فعلا جميلة، واختيار الأكورديون في توزيعها منحها الثراء الموسيقي اللازم.

الأغنية تستحق 7/10 لحنا وتوزيعا فقط.


6- ليا مين غيرك.
كلمات: نصر محروس - ألحان: محمد يحيي - توزيع: يحيي يوسف.

اللعب في التوزيع واللحن المضمون هذه المرة، جيتارات لطيفة، همهمات من "سوما" لطيفة، وايقاعات هادئة لتدخل السيدة:

"كان ليا مين غيرك، و خونت كتّر خيرك
ضيعت عمري عشانك، موّتت ليه ضميرك!

كانت لطيفة إلي حد ما حتي حدث انعطاف غير مبرر في اللحن، جملة لحنية راقصة علي كلمات بتقول "منك لله"...!
لدرجة انني تمايلت وطبلت علي اللحن دون أن أشعر.! ماهذا الهراء..! جملة غير مناسبة اطلاقا لطبيعة الكلمات الحزينة..!

المقطع الصدمة علي الكلمات: 

"ضلمت الدنيا في عنيّا مررت الحلو اللي فيّا
غدار و ملكش حنية منك لله
بكرة الأيام آهي جاية و هترجع برضو تاني ليّا
تقول مش لاقي حنية أقولك لا"

الموزع -ربنا يخليه" حاول قدر الإمكان اضفاء لمسة حزن علي الكوبليه عن طريق الكمانجات الحزينة، والجيتار الذي سمعته بوضوع يلعب في الخلفية، لكن استخدام البركشن أضفي لمحة راقصة غير مبررة علي الكوبليه..!

فاصل موسيقي ذكرني للغاية بأغنية "حب امتلاك" لجنات، لا أعلم لماذا، لكنه مقبول، الموزع أجاد استخدام كل ما لديه لاخراج أغنية لطيفة مقبولة نسبيا.

"كان حبي ليك مكانش في صالحي
كنت بحب بكل جوارحي
غيرت فيّا شكل ملامحي
حسيت معاك ان انا كبرت يجي ميت سنة
عمري ما كنت متطمنة في يوم معاك"

طبعا لن نتحدث عن الكلمات التقليدية - بزيادة - كلنا جميعا نتفهم مبدأ "انا اللي هعبي الشريط بصوتي" الذي يتبعه نصر محروس مع كل مطربيه من أول "بهاء سلطان" حتي "سوما".

الأغنية عادية، سأمنحها 3/10 بسبب الكوبليه اياه..!

7- لما واحدة.
كلمات: عزيز الشافعي - ألحان: عزيز الرسام - توزيع: أميرمحروس.


بداية حالمة لصولو كمان، يعقبه "دربوكة" وتقسيم أكورديون عظيم، استخدام للقانون، ثم دخول مفاجئ لصوت سوما:

"شوف لما واحدة تفضلك على نفسها

وعلى حياتها وأحلى وقت في عمرها
عن أغلي اصحابها وأقرب أهلها
ويبقى صعب عليك قوي تخلصلها!"


ويستمر التوسل:
"شوف لما تبقى انت في كفة والعالم في كفة
وتبقى هي القلب الأبيض والحضن اللي دفّا

وتبقى أقرب واحدة في الدنيا دي ليك



تجمّلك و تكمّلك تنقّص انت فيها
و كل ما تتحملك تدوس أكتر عليها
و كل ما تحبك تكرّها انت فيك!"


توزيع جميل للأغنية لكنه مزعج بعض الشئ، لكن مع صولو الكيبورد في الفاصل الموسيقي كل شئ يهون، جميل اختيار "أمير محروس" لهذه الآلة.

ما يعيب سوما بشدة ويهدد بقائها علي الساحة عامة هي طريقة غنائها التي لا تكرر، يتعدد ملحنيها، وتتغير الكلمات، وهي لا تزال تغني بنفس الطريقة التي اعتادت ان تغني بها، لا أعلم لما لا تجدد هل لمحدودية قدراتها الصوتيه أو لقلة المساحات التي يمكنها أن تتحرك فيها، أو لأن نصر محروس يجبرها علي نفس الطريقة، لكنني فعلا وجدت أن طريقة غنائها لا تزال هي هي منذ ألبوم "عيب عليك" والسنجلز التي طرحتها..!

عودة للكوبليه الثاني مرة أخري:

"اللي في ايديك بكره بايديك هتضيعه

كلام كتير اتقال ولا انت بتسمعه
القسوة و الإهمال بجد بيوجعوا
والحب لما يروح منين هترجعه!



شوف لما تبقى انت في كفة والعالم في كفة
وتبقى هي القلب الأبيض والحضن اللي دفّا
وتبقى أقرب واحدة في الدنيا دي ليك"


الأغنية علي صعيد التلحين والتوزيع لم تقدم إلا أقل القليل، الكلمات جيدة كعادة عزيز الشافعي، وتستحق علي أقصي تقدير 5/10.




8- مع السلامة.
كلمات وألحان: عزيز الشافعي - توزيع: وسام عبد المنعم.

توزيع أسباني مع الجيتار الأسباني وكلمات مقبولة نسبيا، أتت أغنية "مع السلامة" في منتصف الألبوم لتمسح عني ملل سابقتها، أداء صوتي معتاد من "سوما" راكز ومتمكن، وهذا أجمل ما أحبه فيها، أنني لا أسمعها إلا هادئة، كعادتها تمثيلا وغناءا.

مقدمة الأغنية جيتار، ولا شئ غيره، فرشة معتادة وقيمة لصوت سوما، لكنها بدأت الأغنية عالية بعض الشئ، سببت لي بعض الازعاج الطفيف، لكنها نزلت بالطبقة تدريجيا لقرار صوتها الرائع:


"عمري ماهنتك طول عمري عارفة بجد قيمتك
ومقدراك وحافظة غيبتك، وأديك بتشكرني بطريقتك

في القلب صورتك وجوه عيني شيلت صورتك
ولا في خيالي حتي خونتك، وآهي الخيانة بتيجي منك"

لازمة الأغنية تغنيها بصوتها المستعار، وهي لازمة رائعة:

"مع السلامة، من غير دموع بودعك بالإبتسامة
مع السلامة، مبقاش يفيد كتر العتاب ولا الملامة
وكفاية دقت المر واتعذبت ياما"

الجملة اللحنية المناسبة في المكان المناسب، مظبوطة وملعوبة من عزيز الشافعي.

في الفاصل الموسيقي يعتمد "وسام عبد المنعم" علي "الكولة" وهمهمات من صوت "سوما" وهي أجمل ما نسمعه في الأغنية:

"غلطت أنا جداً وعارفة غلطتي
لغيت حياتي وقولت هو قضيتي
سنين طويلة في الهوا ضيعتها
دانا كنت عايشة في وهم والوهم انتهى
وفي النهاية اخدت ايه غير عذابي وكسرتي"

كوبليه في منتهي الروعة من كتابة وتلحين عزيز، الذي تزيده الأيام نضجا فنيا، واعتماد الأغنية علي قرار صوت سوما أكثر من جوابه جعلها أكثر روعة، بالاضافة لل"كولة" المصاحبة والتي أضافت مسحة حزن ومرار.

ثم تكرار للازمة:

"مع السلامة، من غير دموع بودعك بالإبتسامة
مع السلامة، مبقاش يفيد كتر العتاب ولا الملامة
وكفاية دقت المر واتعذبت ياما"

الأغنية جميلة، تستحق بكل تأكيد توزيعا وغناءا ولحنا 8/10.



9- ندمانة.
كلمات: نصر محروس - ألحان: عزيز الشافعي - توزيع: أمير محروس.

أغنية "ديسكو" كعادة كل المطربين المصريين، حيث جري العرف أن الشمس تشرق من الشرق، وتغرب للغرب، والألبوم يجب أن يحتوي علي أغنية "ديسكو".

الشئ الغريب في هذه الأغنية انها "ديسكو" لكنها "مكتومة" قليلا، ممكن لتناسب صوت سوما الحاد؟ ايقاع الديسكو يحتاج صوت عريض إلي حد ما، راجع أغنية "متعقد" ل"حماقي" وأغنية "أعيش معاك" ل"أنغام" لتفهم ما أقصد.

المهم، بدايتنا الموسيقية إلكترو كالعادة، كمنجات لكنها لطيفة، مع همهمات من سوما، والمطلع يقول:

"انا في حياتك مش أي واحدة والسلام
انا حبي ليك يا حبيبي عمره ما كان كلام
لو هتنسى، قول على الدنيا السلام

انا لما حبيتك بجد حبيت قوي
معرفش ان الحب ده عندك رخيص قوي
دا كان مكانك في قلبي عالي، نزل قوي"

كالعادة نصر محروس يكتب "أي حاجة"، ثم انتقالا للازمة الموسيقية:

"ندمانة ان انا حبيت بأمانة
زعلانة ع اللي بقيت فيه زعلانة
تعبانة، منك لله بأمانة!"

استسهال رهيب في الكلمات، اللحن رتيب بعض الشئ في اللازمة الموسيقية، الكمان المصاحب لصوت سوما يهون علينا الرتابة بعض الشئ، ثم الكوبليه الثاني:

"أنا الغلطانة م الأول
غمضت عيني و سبتلك نفسي
وبدِّيتك على نفسي
ضعفي معاك قواك
خلاك تشوف قلبي مالوش قيمة
عشان عاشقاك"

وتكرارا للازمة الموسيقية الرتيبة، شعرت أن سوما في الكوبليه بعض الشئ قد "أكلت" الحروف، فلم تظهر الكلمات بشكل صحيح واضطررت لاعادة المقطع مرة أخري، المهم.

الأغنية تستحق 4/10.


10- هروح وأسأل عليه.
كلمات: محمد شكري - ألحان: محمد النادي - توزيع وسام عبد المنعم.


دخول بجيتار، هادئ، ثم قانون ويتوقف الجميع لصوت "سوما"

"هروح و اسأل عليه بكره، وده مش حب على فكرة
أنا بس عاملة على العشرة، وبرضي ضميري مش أكتر

بقالي كتير مبسألش، و صعب بجد مقلقشي
بعدنا و ده ميمنعش، ان احنا في بعضنا نفكر"

ثم اللازمة الموسيقية:

"و مش هكدب انا بتمنى اشوفه بخير
و عارفة هو لسه أكيد بيدعيلي
وبيتطمن وبيسأل عليا كتير
و لو مروحتش بكره هو هيجيلي"

توزيع اللازمة في منتهي الرتابة، لا جديد تحت الشمس، لا اعتبر ان الأغنية قدمت جديد، لكن الفاصل الموسيقي كان لطيفا بغض النظر عن "البركشنز" عالية الصوت.

"بالخير دايماً أنا في سيرته، و ان حاولوا يشوهوا صورته
في عيني بَرُدّ انا غيبته، ده بينا عمر مش فترة

صحيح الحب ما كملشي، لكن عشرتنا متهونش
خلاصة القول ما ينفعشي، مرُحش اسأل عليه بكره"

لم يقدم اللحن جديدا في الكوبلية الثاني، مجرد تكرار علي نفس اللحن، ثم تكرار للازمة الأغنية، التوزيع ذكرني بأغنية "علي فكرة" لجنات.

الأغنية تستحق 5/10.



11- واحشني حبيبي
كلمات: نصر محروس - ألحان: محمد يحيي - توزيع: أمير محروس.

أغنية خالصة الشرقية، مطعمة بخط شديد الخصوصية للكمان، استغلال ممتاز لمساحة لم تستغل قط في صوت "سوما" التي باتت "تسرسع" بما فيه الكفاية في اغنيات لم تقدرها موسيقيا.

صولو كمان ذكرني بشدة بفخامة أغنية "قد الحروف" لأصالة، ثم دخول من غير مقدمات متفلسفة لصوت "سوما" القوي هذه المرة.

"واحشني حبيبي روح قلبي ده هو عمري وكياني
واقول بكرة ده هيجيني يدوّب كل أحزاني
ومين غيره يداويني ومين في الدنيا دي مكانه
ومين من نفسي يحميني ومين في قلبه وحنانه" 

شهد الكوبليه انسحابا للموسيقي لصالح صوت سوما، وهو ما يعطيه الحرية في التألق...

ثم لازمة الأغنية الجميلة، اعتمدت علي البركشنز، والوتريات بشكل أكبر.

"لما يغيب عني وينساني ليه بتزيد حيرتي وحرماني
وابقى لوحدي واقفة مكاني لا عارفة اروح و لا عارفة آجي"

فاصل موسيقي ما بين الكيبورد، والقانون، حوار مثمر للغاية ومطرب للغاية، تقاطعهما الكمان كلمسة نعومة علي أغنية "زاعقة" بعض الشئ، أغنية "فخمة" موسيقيا، تمهيدا لكوبليه ثاني يحمل تجديدا في اللحن:


"عينيا ليه مداقتش نوم؟ سهرانة ليه أنا كل يوم؟
واقول حبيبي بكره هيجي، امتي حبيبي تاني هتيجي؟
بكره هيجي تاني تاني حبيبي"

ثم تقاطعنا اللازمة ثانيا:

"لما يغيب عني وينساني ليه بتزيد حيرتي وحرماني
وابقى لوحدي واقفة مكاني لا عارفة اروح و لا عارفة آجي"

وتكرر المطلع مرة أخري، في أغنية أعدها أروع أغنيات الألبوم، تتفوق نظرية اللحن والتوزيع مرة ثانية علي الكلمات التقليدية، في نظري أنها أجمل أغنيات الألبوم والوحيدة التي حملت تجديدا قدمه صوت "سوما" الذي كنت ولا زلت أحبه.

الأغنية في بنائها الكلاسيكي ذكرتني بأغنيات نجاة الصغيرة، وكنت أتمني لو كانت أطول قليلا، علي غرار الأغنيات القديمة الطويلة.

تستحق 9/10.

خلاصة الألبوم: 6/10

ملحوظات أخيرة
1- نصر محروس ياريت يبتعد عن كتابة الأغنيات ويفسح المجال للمتخصصين.
2- محمد يحيي أسطي ومعلم.
3- عزيز الشافعي، لا تعليق رائع كالعادة..
4- وسام عبد المنعم: ابتعد عن التقليدية.
5- سوما: الغياب والعودة بألبوم متوسط المستوي مثل ألبومك لا يفيدك علي المدي الطويل، وحاولي الظهور بشكل اكبر، اختفائك المبالغ فيه يجعل الجمهور ينساك.







1 و الناس شايفة ايه؟:

غير معرف يقول...

انا شايفة ان الالبوم يستحق اقل بكتير من 6/10
وكمان انا من رأيك ان نصر محروس يرحمنا ويتقى ربنا فينا وفى مطربين شركته ويبطل كتابة اغانى

إرسال تعليق

تعليقك يسعدني..يا أفندم!

 
Reem Essam Cairo , Egypt | copyrighted2011 - Reem Essam