ست أغنيات هتفكرك ب شريفة فاضل..!

كلنا مبنحبش المغنيين القدام، وفكرتنا عنهم انهم كلهم أم كلثوم وكلهم عبد الحليم، بس الحقيقة ان كان فيه ناس كتير جميلة جدا عايشة أيام الستينيات والسبعينيات، ومغنيات أصواتهم كانت أجمل من الجمال، لكن حظهم خلاهم اتدارو تحت شهرة أم كلثوم وتحت عظمتها، من الستات الجمال اللي كانو موجودين في الفترة دي، المغنية الجميلة، ربنا يديها طولة العمر والصحة، الست "شريفة فاضل"..!

شريفة فاضل من الأصوات المميزة، اللي ليها نبرة صوت وخامة مميزة، ملهاش حل، اشتهرت بأداء الأغنيات الخفيفة، صوتها كان أميل للخامة الشعبي، مثلت وغنت كتير، واشتهرت باحياء الأفراح والليالي الملاح، وتشتهر في الأوساط الفنية بأنها صاحبة كازينو "الليل"، وتش از عادي يعني، مغنية عاوزها تفتح ايه؟ مدرسة؟ المهم يعني، خلينا في البوست ده نستعرض مع بعض أجمل أغنيات أدتها الفنانة شريفة فاضل، أغنيات في التاريخ الفني لمصر، محدش هينساهم ولا يقدر ينسي صوتها المميز بشكل كبير..!

1. علي مين "حارة السقايين".

كلمات: حسين السيد وألحان منير مراد.

الأغنية الأشهر علي الاطلاق في تاريخ الست "شريفة" الفني، أجمل ما في الأغنية هو لحنها الرشيق، وكلماتها الدارجة السهلة، اللي بتحمل قدر كبير من الاستهانة بالخصم والتهزيق الي هو متبعهمش علينا يعني احنا صيع وانتا رايح تصيع احنا كنا راجعين :D

الأغنية أعاد غناءها محمد منير في توزيع مليء بالبهجة والطفولة، لكني في النهاية بكون أميل للتراك الأصلي كالعادة..!

2. اكمنك حلو حبة.

كلمات زين العابدين عبد الله وألحان محمد فوزي.

علاقتي بالأغنية دي للأسف بدأت متأخر قوي، من أقل من شهر تقريبا، سمعتها الصبح بدري وانا رايحة الشغل في تاكسي، عجبني توزيعها الرشيق، ف مستغربتش خالص لما لقيت عليها اسم محمد فوزي، الدرر دي مش مستغرب أبدا انها تطلع من تحت ايديه، بالتوزيع الجميل، والأكورديون اللي في منتهي الرشاقة، وصوت شريفة كان صبي وجميل، وهي أدت الأغنية بكل رشاقة بصراحة.

3. أسمر يا سمارة.
كلمات: خليل محمد خليل والحان ابراهيم عشماوي.

يقال ان الأغنية دي اتكتبت مخصوص للسادات، بغض النظر عن الأوشاعة ف الأغنية جميلة جدا، رغم ان اسم ابراهيم عشماوي مش مشهور جدا، لكن الأغنية من أغنياتها الجميلة، واللي كنت بسمعها باستمرار في الراديو عشان أدندنها مع الست شريفة.

4. اه يالمكتوب.

كلمات محمد حمزة وألحان بليغ حمدي.

من الأغنيات اللي لما سمعتها كدة من أول طلعة عرفت ان "بليغ" هو الملحن بتاعها، مع اني سمعت فيها طراطيش من "اخر ليلة شادية" علي كام أغنية تانية، بس معلش، الأغنية حلوة وكل حاجة، وصوت شريفة فاضل محليها جدا، كالعادة، صوت أنثوي له بحة قاتلة بصراحة.

5. لما راح الصبر منه.

كلمات: مجدي نجيب وألحان منير مراد.

منير مراد م الناس القليلة اللي بتعرف تطلع قدرات المغني الصوتية من غير ما تتعبه، الأغنية دي من أجمل أغنيات شريفة علي الاطلاق، عليها "ااااه" في الأغنية تسيح الحجر..!

6. مبروك عليك يا معجباني.
كلمات: حيرم الغمراوي وألحان سيد مكاوي.

أشهر أغنيات الأفراح في فترة السبعينيات علي الاطلاق، كنت متعودة أسمعها في اذاعة الأغاني كل يوم خميس، لما كانو بيذيعو أغنيات الأفراح في الوقت ده، زمان بقي، لحن جميل وسلس، ومليئ بالبهجة والفرح، والزغاريط من المرقع رقم واحد في الملحنين: السيد مكاوي..!