أحلي وأحلي - عمرو دياب: قراءة نقدية...

السنة دي ولأول مرة قررت أتخلي عن الأحكام المسبقة، وأبطل أسلم دماغي للناس في موضوع ألبوم "عمرو دياب" وأسمع وأحكم بنفسي، لأن أراء الناس عامة عطلتني عن سماع ألبومين "بناديك تعالي" وألبوم "شفت الأيام" لعمرو، كان اخر ألبوم سمعته علي بعضه تقريبا كان ألبوم "ليلي نهاري" ومن بعده بدأت اطلاق الأحكام علي عمرو دياب انه خلاص شطب، وانه ملوش عازا أثلا، وكلام كتير من هذا القبيل، لكن الشئ المؤكد ان عمرو دياب السنة دي، عمل ألبوم حلو..!

الألبوم اسمه "أحلي وأحلي" اتسف عليه سف السنين خصوصا ان كلمة "أحلي" مشابهة لكلمة "أحا" وكدة، معلش نعتذر عن اللفظ القذر، بس كان لازم نقول السفة، الألبوم جيد الصنع، انتاج شركة اسمها "ناي فور ميديا" وهو أول ألبوم لا يتعاون فيه "عمرو دياب" مع شركة روتانا، والواضح ان شركة روتانا كانت السبب ف بلاوي كتير، مش هنتكلم عنها دلوقتي.

هنتكلم عن الألبوم اختصارا شوية، مش هنتكلم كتير عن الجمل اللحنية، لأن عمرو عامة مش بتاع طرب وتلحين، بس هو فنان كويس، بيعرف يختار التراك اللي يسمع ويعلم، خلونا نتكلم كدة اختصارا...

1. رسمها.

كلمات: تامر حسين، ألحان: عمرو طنطاوي، توزيع: أسامة الهندي.

أغنية "رسمها" أغنية سريعة، كلماتها إلي حد ما جديدة، لفظة "رسمها" نفسها جديدة وغير مطروقة علي المستمع، لكن الكلمات اجمالا بشكل عام مفيهاش تجديد كبير، التوزيع بتاعها معتمد بشكل أساسي ع الجيتار والأكورديون، ودي لمسة جديدة من أسامة الهندي، بالاضافة للفواصل بتاعة الكمان، والأكورديون داخل الأغنية، استخدام الفوكالز نفسها جوة الأغنية، مع صوت عمرو، اللي لسه محتفظ برونقه ولمعته لغاية دلوقتي، مع سهولة لحن "عمرو طنطاوي" وصوت عمرو، عملو أغنية سهلة وسلسة وجميلة.

عبقرية "عمرو طنطاوي" بتكمن ف انه شريك أساسي ولاعب في فرقة عمرو دياب ومن زمان، لحن ليه أغنيات عظيمة زي: خد قلبي معاه، وعودوني، بتظهر بشكل كبير ف انه حافظ صوت "عمرو دياب" وبيعمله حاجة متفصلة علي مقاسه بالمللي، مش أي حاجة وخلاص، عمرو طنطاوي علي قلة أعماله فهو فعلا ملحن كبير.

الأغنية تاخد 3/5 وده عشان لحنها الرشيق.

2. أحلي وأحلي.

كلمات: تامر حسين، ألحان: عمرو طنطاوي، توزيع: أسامة الهندي.

البطولة التانية المطلقة ل"عمرو طنطاوي" في ألبوم عمرو، أغنية "الهيد" اللي سمعناها قبل ما الألبوم ينزل ب24 ساعة، أغنية "أحلي وأحلي" مش هنتكلم علي ان الكلمات بردو مفيهاش جديد، لكن "عمرو طنطاوي" عمل جملة جميلة جدا بكلمات سهلة ومفيش فيها أي تجديد "كل مدي بتحلو ف عيني، بس أحلي وأحلي الليلة ياه ع السحر ده" وعلي الجملة دي بني كل دفاعاته، وطلع من تحت ايده للموزع تراك جميل وخفيف، أغنية صيفية هتتسمع ف مارينا وهاسياندا والسخنة وسيدي عبد الرحمن وسهل حشيش والجونة، وهتتسمع من كل العربيات في كل حتة ف مصر.

بالنسبة لتوزيع أسامة الهندي فاستخدامه للإلكترو خلا الأغنية إلي حد ما مليانة حياة، لكن أظنها كانت محتاجة شئ أكثر حيوية أو صوت عالي، محستهاش انها تستاهل تكون "الهيد" للألبوم بأمانة، تاني التوزيع بتاعها بردو كان معتمد علي الأكورديون، ممكن يكون كنوع من التجديد لأني مسمعتش توزيع زي ده قبل كدة، بس فعلا كانت محتاجة "طارق مدكور" يطلع منها شئ أكثر انطلاقا وصيفية..!

الأغنية تستحق 2/5.

3. معاك قلبي.

كلمات: تامر حسين، ألحان: محمد النادي، توزيع: أسامة الهندي.

أغنية رومانسية! واو! عرفنا الافراح السنة دي هيرقصو الFirst Dance علي ايه ! بس بجد، برافو يا "محمد النادي" لحن صايع فشخ، لحن جميل، تحسه انه جواب علي سؤال في عيون الحبيب: "قولي ياحبيبي، ليه وانتا عني بعيد، انا شوقي ليك بيزيد؟" ثم يسترسل في لازمة الأغنية الجميلة "معاك قلبي وبلاش تغيب عني بتوحشني.." إلي آخره...

صوت عمرو اللامع كعادته مش محتاج حاجة في الأغنية الSlow دي أكتر من البيانو والكيبورد، لأن صوت عمرو نفسه عالي ومزهزه فيها جدا، أسامة الهندي في توزيعه كان ذكي في الأغنية دي، ساب صوت عمرو في المقدمة ومصدعناش في التوزيع أوي، هو اشتغل علي انه يهدي الجو مع عمرو، مدخلش أي وتريات في الأغنية، كفاية علينا بس لمعة عمرو والكيبورد والبيانو، والأغنية جميلة أوي، من أجمل تراكات الأغنية.

في النهاية لما عمرو بيكون بيختم بيدخل أسامة الهندي بركشن والكمنجات بشكل متناغم زي السمفونية، وده بيكون أجمل ختام ليها.

الأغنية تستحق 5/5

4. أمنتك.

كلمات: تامر حسين، ألحان: محمد النادي، توزيع: أسامة الهندي.

من زمان مسمعناش ان عمرو دياب غني أغنية ب"مقسوم" شرقي أو عمل موال كدة غير ف حفلاته، دي كانت من رابع المستحيلات، الألبوم ده حصل فيه تكسير للتابوهات بكل الأشكال الممكنة، من أول لحظة في الأغنية بنسمع التقسيم بتاع الكمان والبركشن ثم الايقاع، بنعرف ان دي أغنية "فشيخة" ثم بيدخل صوت عمرو بأجمل طبقة ممكنة بيغني منها وهو بيقول:"أمنتك يا حبيبي أمانة..سلملي علي ليالي هوانا...وحشانا أجمل أيام"، الأغنية نفسها بتحمل دخلة الموال، شئ مبهر..!

عمرو دياب نفسه باللحن العبقري اللي "النادي" عامله مش سايبلنا فرصة نتنفس حتي، وكلمات "تامر حسين" السهلة بتخليك تحفظها مع اللحن السلس، اللي أظن ان "محمد النادي" بذل فيه مجهود كبير واشتغل عليه مع "عمرو دياب" عشان يطلع بالصورة الرائعة دي..!

الأغنية دي وعلي عكس باقي كلمات "تامر حسين" حملت جمال وتجديد خصوصا في جزء "نسيانك ده عايزله ارادة، وانا قلبي بيضعف كالعادة"، انا عن نفسي باعشق الكلمات اللي فيها تلحيم للكلمات وتضمين لمصطلحات متغنتش قبل كدة، أما عن الموال فهو جميل جدا واللي بيحضر حفلات لعمرو بيعرف انه بيجود ما بين الأغنيات وبيعمل مواويل عشان "يلضم" الأغنيات في بعضها، وحابة ألفت الانتباه لصولو الكمان اللي ف الاخر قبل الموال، لا يقل روعة أو جمال عن صولو الكمان في "ولا علي باله" والله يمسيك بالخير يا رحيم..!

الأغنية تستحق 5/5 بردو، ممتازة.

5. لالا.

كلمات: تامر حسين، ألحان: عمرو دياب، توزيع: أسامة الهندي.

وصلنا للأغنية الحشو اللي ف الألبوم، الأغنية اللي لو اتشالت مش هتحس بأي فرق علي الاطلاق، بس عمرو دياب بيحب يشكل ويريح زباين الصيف، والجو حر وربنا يخلي سعادتك لينا :D

الشئ الوحيد المميز في الأغنية دي واللي أول مرة أسمعه هو استعانة عمرو دياب ب"كورس"، تقريبا غار من أغنية "أجمل يوم" بتاعة حماقي، لما جاب شوية عيال مسميهم "ألتراس حماقي" راحو طالعين معاه ف الأغنية، الكورس لطيف عامة بس مكانش باين أوي، أسامة الهندي فرطت منه بردو ف الأكورديون، تحسه كان جايب شوال أكورديونات وراح اتدلق منه علي ماستر الألبوم، الأغنية دي أغنية توليع مسرح يا أسامة مش بتتغني ف حواري فرنسا، المهم ان المصلحة خلصت وعمرو دياب كملحن عادي، مش واو يعني.

الأغنية تستحق 1/5.

6. عكس بعض.

كلمات: تامر حسين، كلمات: اسلام زكي، توزيع: عادل حقي.

الأغنية دي "عمرو دياب" نزلها قبل الألبوم بأسبوع تقريبا، وانا رفضت أسمعها عشان محرقهاش، ولما سمعتها وسط الألبوم حصلتلي حالة ذهول وارتعاب من فرط اللذة..!! قنبلة..!!! 

اللحن مش غريب علي ملحن "أنا مش أناني" اللي هي أجمل أغنية في "شفت الأيام" طبيعي يطلع فشيخ، أما عن التوزيع ف حدث ولا حرج، عادل حقي ده معلم حقيقي، عرف ازاي يشتغل بصوت عمرو دياب، ويطلع منه تراك عالمي زي ده، سواء ف استخدام صوته كتوناليتي" مستعار بيغني كذا مرة يعني" أو ك فوكالز في الخلفية مع المزيكا" هتسمع صوت عمرو لو ركزت ب High Note خصوصا في الحتة بتاعة "بعدنا أكتر ما قربنا"، او في توظيف الاهات مع باقي الكلمات.

طبيعة الأغنية الحادة والحزينة بتسمح جدا ل"عادل حقي" انه يستخدم الجيتارات الحادة، وانه يطلع أغنية "هارد روك" جديدة تماما علي ستايل عمرو وعلي طبيعة عمرو، اللحن عامة مغري انه يخرج من جلده ويسمع كلام "اسلام زكي" اللي نجح معاه فشخ ف "انا مش أناني" وكانت تكرار التجربة في مصلحة عمرو أكيد، م الاخر الأغنية حدوتة ولسه كل ده متكلمناش ع الكلام..!

تامر حسين ف الأغنية دي، مكانش بيحشي زي تلات تربع الأغنيات، يعني الأغنية دي فعلا مميزة في كلماتها، وصعوبتها ف انه كتب كلمات تعبر عن فراق ومآساة بمنتهي السهولة، الراجل متمكن بس السبوبة بتحكم أحيانا...

المهم، الأغنية تستحق 5/5.

7. حبيبتي.

كلمات: تامر حسين، ألحان: طارق نديم، توزيع: اسامة الهندي.

ملحن الأغنية دي هو الدكتور طارق نديم الوتيدي، دكتور في الاقتصاد ومتخرج من الكونسرفتوار، ومعتزل العمل الموسيقي من بتاع تلاتين سنة كدة..! تقريبا عمرو دياب بيبعت رسالة لكل الناس اللي قالت انه هيفشل من غير "عمرو مصطفي" و"محمد رحيم" وغيرهم وجايب ناس مستخبيين محدش يعرفهم وعمل معاهم أغنيات جميلة بردو..

الأغنية علي رتابة لحنها بعض الشئ، وتوزيعها التقليدي، لكن هي لطيفة، نص نص عامة، بس عجبني جملة "تامر حسين" بتاعة "حبيبتي لما بتتمايل، خطوتها بتسوي هوايل"، بغض النظر عن البيدوفيليا العجيبة ف "عودك طرح قبل أوانه" بطلو تحبو أطفال بقي..!!

الأغنية تستحق 2/5.

8. وعدتك.

كلمات: خالد تاج الدين، ألحان: اسلام زكي، توزيع: اسامة الهندي.

زي عادة عمرو دياب، ربنا ما يقطعله عادة، بيحب يضيف اغنية معتمدة كلية علي السبانيش جيتار، وقد كان، اختار كلمات رائعة من "خالد تاج الدين" ولحن أكتر من رشيق من "اسلام زكي" مع بعض التاتشات الي مش ملحوظة تماما من "اسامة الهندي" في توزيع أقل م العادي، عشان يطلعلنا تراك فيه جملة لحنية عبقرية زي "أنا حابب حياتي معاك، ولا عايز حبيب تاني".

اسلام زكي ملحن ممتاز، وخالد تاج شاعر مميز، والاتنين قدمو أغنية جميلة بصراحة تستحق 4/5.

9. راجع.

كلمات: تامر حسين، ألحان: اسلام زكي، توزيع: أسامة الهندي.

من أغرب الحاجات اللي ممكن تحسها في الأغنية دي، هي ان التوزيع بايظ، أو مبوظ الأغنية، تحس ان الأغنية دي عبارة عن بروفة لسه مكملتش للتراك، أو متغنية علي مترونوم كدة عشان تظبط الايقاع، طبلوها وهما قاعدين شغالين عشان يعملها واتسجلت ويلا هوب، سلق بيض فشخ!

اللحن عامة كان مميز جدا، خصوصا انه متماشي بشكل كبير مع الكلمات الي بتحمل "نقرزة" و"نقورة" ستات مكتوبة بمعلمة من "تامر حسين" خصوصا في الجزء بتاع "بقي مش عارف ايه غيرني يا برئ يا حنين يا ملاك"، اللي كان ناقصه ف الاخر "يا طعم يا سيد أمك"، الأغنية توزيعها للأسف أفسدها، وخلاها مش متكاملة زي غيرها.

تامر حسين عامة أجاد في الكلمات، اسلام زكي في اللحن، لكن أسامة الهندي، صيييفر في التوزيع.

الأغنية تستحق 3/5 لتوزيعها العجيب..!

10. علي حبك.

كلمات: أسامة مصطفي، ألحان: سامح كريم، توزيع: أسامة الهندي.

لحن من وجه جديد أعماله المعروفة قليلة جدا، منها "عايشة علي اللي فات" لأصالة، رغم قلة أعماله، إلا انه ملحن ممتاز، الكلمات كذلك كلمات جديدة وجميلة، أظن ان الملحن سمعها ل"عمرو" وعجبته من مجرد الدندنة، اللحن الكويس عامة بيظهر من مجرد دندنته، اللحن ودود جدا، تحسه بيتغني كدة ف أي وقت، وسهل تفتكره مع نفسك، شاطر يا سامح عامة.

التوزيع رتيب جدا، لكن لطافة اللحن والكلمات تشفع ليه، والنتيجة في النهاية هي أغنية جيدة.

تستحق 3/5.

11. أنا وانت.

كلمات: أحمد علي موسي، ألحان: أحمد البرازيلي، توزيع: عادل حقي.

من أكتر الأغنيات المميزة في الألبوم، سلو بس حزايني، الكلمات واو الواو، خصوصا مذهب الأغنية "عادي أهي خلصت، زي ما كل حكاية بتخلص، ايه اللي هيجري وايه اللي هينقص، بينا لو احنا مكملناش"، المذهب نفسه مكتب بشكل سلس صايع، يخليك تحفظ الأغنية من أول مرة تسمعها، لحن ممتاز من الملحن السكندري المميز "أحمد البرازيلي"، وتوزيع صايع من عادل حقي.

أكتر شئ عجبني في توزيع عادل حقي هو الفوكالز اللي بصوت دياب، عادل صايع وبيعرف يوزع الأغنية ويدي حق المزيكا وحق صوت عمرو بزيادة، التوزيع جه هادي، باستخدام كمنجات وجيتارز، ودقات بسيطة م الكيبورد، كانت مميزة مع الايقاع والبركشن عامة.

أحمد علي موسي شاعر ممتاز، والكلام رهيب ويبكي بصراحة، وعلي ذكره أحب أوريكم حكاية كوميدية، من شاعر "تملي معاك" اللينك بتاعها أهو.

الأغنية تستحق 4/5

12. عمرنا ما هنرجع.

كلمات: تامر حسين، ألحان: مدين، توزيع: أسامة الهندي.

عندي مشكلة مع الأغنيات اللي المغني فيها بيكون بيقول كلمات "جد" أو "فراق" واللحن بتاع الغنوة رتمه سريع أو راقص..!، باحس بالتناقض عامة، لكن لحن مدين عامة رجعني لجو التسعينيات وأغنية "كان عندك حق" معرفش ليه، كذلك كلمات "تامر حسين" جت لطيفة ومميزة المرة دي، خصوصا في مذهب الأغنية "انتا اتعودت تشوفني ملاك، وانا ف الاخر انسان"، التوزيع للأسف رتيب جدا، كان محتاج حيوية أكتر، تحسها سلق بيض بردو مش فاهمة ليه..! هو أسامة تعب م الشغل ف الاخر وراح عامل أي حاجة.

الأغنية عامة عادية، تستحق 2/5.

خلاصة الألبوم: 

1. تامر حسين واخد الألبوم تشطيب ومحارة وحلوق ودهان وده مش حلو، التنوع مطلوب، فين بهاء الدين محمد..! فين أمير طعيمة..!

2. أسامة الهندي، مش موزع ممتاز أوي، هو عادي، تماما زي "تميم" ما خرب ألبوم حماقي، أسامة الهندي خرب ألبوم عمرو دياب، بتوزيعاته الرتيبة وبوجهة نظره الواحدة اللي متغيرتش، مش لازم تسلم الألبوم يا عمرو تشطيب مفتاح لموزع تاني، أجمل الأغنيات مكانتش من توزيع "أسامة" خالص.

3. عادل حقي متفوق علي نفسه تماما وبالكلية في الألبوم ده، شابو يا عادل.

4. عمرو طنطاوي ملحن مميز، ياريت نسمعله ألحان مع مغنيين تانيين، هنسمع حاجات جميلة.

ألبوم عمرو دياب "أحلي وأحلي ل سنة 2016 يستحق من 3.25 من 5 ودي حاجة كويسة مش وحشة يعني، شكرا يا أبو عبد الله :D