الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

27 يناير 2016

مولات الغلابة - الجزء الثالث.!

لو فاتتك الحلقتين اللي قبل كدة ممكن تقراهم من هنا:

مولات الغلابة "الجزء التالت"

زي ما المهندس العظيم حسن فتحي عمل كتاب "عمارة الفقراء"، قررت أنا العبدة الفقيرة لله تخصيص جزء من وقتي ومجهودي لمولات الفقراء، المولات دي متلاقيش فيها كوتشي ب 900 جنيه، وشنطة ب1500 جنيه، لأن المبلغ ده ممكن يكون مرتبك في الشهر بحاله تلاتين يوم أشغال شاقة، وانتي يا بنتي، مرتبك فيه كام 900 جنيه، بداية البوست للبنات والولاد مع نفسهم بقي :D
الجزء التالت من سلسلة "مولات الفقرا" بتتكلم عن جمهورية شبرا، مكان مناسب لمتوسطي الدخول، وأصحاب الورث والأملاك، مكان تقدر تعمل منه انتجريشن بحاجات صغيرة جبتها م الوكالة، وتبان كأنك لابس اللي ع الحبل.

ثالثا: ممر الراعي الصالح.



أظن كل الشبراوية وكل بنات مصر عدو علي ممر الراعي الصالح، مبدأيا الممر ده عبارة عن شارع عرضه اتنين متر، بيتمشي فيه بالجنب، وفيه عدد لا نهائي من المحلات، بيبعو كل حاجة، هنفصصهم حاجة حاجة بقي:
بداية  انسي كلمة مش لاقي مقاسي في ممر الراعي الصالح، كل المقاسات والألوان والأحجام مسموح بدخولها، لذلك المكان ده هو جنة ثقيلي الوزن أمثالي :D

بلوزات وشيميزات وتونيكات –باكره الكلمة دي أصلا- متوسط أسعارها من 100 ل 250 جنيه، الخامات ممتازة، ليكرا أو قطن او قماش مخلط، كل الألوان والأحجام.

هتلاقي محلات كبيرة كدة، سيبك منها، خليكي في الستاندات في الشارع، وقيسي عادي ولا يهمك، كل الناس بتقيس حواليكي ولا هاممهم، فاصلي مع البياعين وميغركيش انه عمال يحلف ويتقطع، اضربي ولا يهمك هيرضخ لارادتك الحديدية عزيزتي حواء.
البنطلونات هناك من جميع الانواع والأشكال، وكذلك الجيبات، جينز، جبردين، ليكرا، بس الأسعار عامة بالنسبة للمقاسات بتبدأ من أول 120جنيه، والمقاسات الصغيرة من أول 90 جنيه.

الطرح والبندانات والسكارفات هناك مش هتكون غالية بردو، في محلات فيها حاجات حرير، من أول خمسين، لكن الأسعار الشعبية العادية من أول خمستاشر لحد تلاتين، والبندانات زي ما لقيناها ف الجيزة بخمسة، هنلاقيها هناك.

الجزم: هنلاقي هناك جزم منتشرة في ستاندات عالرصيف، منصحش م الشرا منها عامة، إلا لو مثلا هتشتري شبشب أو شوز بلاستك، لكن المحلات مليانة تشكيلات ممتازة، وبأسعار بتبدأ من أول خمسين للباليرينا، لحد 150 و 250 لو بوت طبعا.
لو انتي ذوقك كلاسك شوية، او بتحبي الحاجات الجلد الطبيعي، هتلاقي محلات كتير فيها الذوق الكلاسك ده، والأسعار فيها هتكون معقولة جدا أخرها 150 جنيه، وهتبقي جزمة عمرها طويل.

الشنط، بلاش شنط م المحلات، لو عاوزة تدوري علي شنط هتلاقي برة ممر الراعي الصالح، وفي ستاندات قريبة من شارع خلوصي، ومحطة مترو روض الفرج، الشنط السعر الرسمي بتاعها 50 جنيه، التشكيلات كتير ومتنوعة علي كل الألوان والأشكال والأحجام.

الأكسسوارات هي علامة شبرا وممر الراعي الصالح المميزة، هناك فيه حاجات ممتازة بس غالية شوية، هتلاقي العقد، والخاتم والدبوس، والتوك، متوسط أسعارها عامة 50 جنيه لأنها بتكون فيها فصوص.

الميكاب هناك محدش بيبيعه إلا البوتيكات الصغيرة فيها كل منتجات التجميل، وبأسعارها المتعارف عليها، والبيرفيومز والكريمات، واحتمال تلاقي ماركات نادر وجودها، وهتنبسطي أوي صديقيني.

عامة لو انتي نزلتي لممر الراعي الصالح ولفيتي في شبرا عامة هتكوني طقم في حدود ال500 جنيه، وهيبان عليكي انك صارفة ومتقلقيش.


مروان والشتاء والقصة الأخيرة...!

هي فتاة تجري في حذاء خفيف..ليست خفيفة الجسد، ولا خفيفة الروح، لكنها مثقلة بالأوجاع والهموم والأحزان، كانت بحاجة لمن يحمل عنها همومها الكبيرة، كانت بحاجة لمن يضمها بقوة، فقط كانت بحاجة لمن يهمس لها "لا تخافي، غدا سيتغير كل شئ"، لكن لا أحد كان هناك...

هي أنانية، لا تدعي ولا تنكر، لم تطلب شيئا سوي مساحة تعادل مساحته في حياتها، أحبته، أحبته بجنون وصدق، وعلي استعداد أن تمنحه كل شئ، فقط ان أراد، لكنه لم يرد، ولم يفعل شيئا سوي أنه جعلها تسلية طريقه، دمية يلعب بها وقت فراغه، ولطالما أحست بأنها لاقيمة لها، ولا فائدة منها، وجودها كعدمه، وبقاؤها لا يشغل باله، وأصعب شئ أحست هي به أنها لا لزوم لها، ولا مكان لها في حياة من تحب.

كل خطأي أنني طمعت، طمعت في الرجل الذي أحببت، والذي تمنيت أن أصطبح بوجهه كل صباح، طمعت في رضاه، طمعت في راحته، بكيت لما كان ما بين هنا وهناك، لا بيت ولا حضن، لكن الواضح والظاهر، انه لم يردني بنفس القوة التي أردته بها، بل من الممكن أنه لم يردني علي الاطلاق.

الفكرة في كل هذه التفاصيل أنني ألغيت عقلي، وكرامتي، وتخليت عن نصائح المقربين والأصدقاء، ومشيت وراء قلبي، والحمد لله أخذت علي قفايا كعادتي...

الشئ الوحيد الذي يعينني علي كتابة هذه الكلمات الموجعة هو مروان خوري، هو من يعانقني صوته في هذه الأيام الباردة الماطرة الكئيبة، التي كان من المفترض أن يعانقني هو فيها، لكنه بالعمل، وفي العمل، وللعمل، وانا لا شئ علي الاطلاق، واجهي الأمر يا فتاة، أنت لا شئ علي الاطلاق....وستستمرين بكونك لاشئ....وشكرا..

23 يناير 2016

ايناس..وسامح...



ـ انا مانمتش من امبارح ، سوقت 200 كيلو من بلد لبلد ومش عايزة غير إني اسمعك
انا اسف اني سببتلك كل الالم دا
ـ سامح انا مش عايزاك تعتذر ، انت عايزني بجد ولا لأ؟
لو ماكونتيش متأكدة اني بحبك ماكونتيش جيتي
ـ طالما بتحبني وبحبك يبقى يالا نتجوز
خايف يا إيناس
ـ ماتخافش دي زي شكة الدبوس
ايناس في حاجات كتير اوي بيننا مختلفة ، اهتماماتك تفكيرك غير تفكيري صحابك غير صحابي
طموحك غير طموحي
ـ انا كنت ممكن انهاردة اتجوز المهدي وكان هيحققلي كل طموحي ، بس سبت كل دا وجيتلك
يالا نتجوز يا سامح
ولو جوازنا دا فشل؟ يا ايناس احنا بنسيب بعض وبنرجع لبعض مرتين ف الاسبوع
ـ يمكن عشان مش مع بعض على طول ، لو اتجوزنا هيبقى في حاجة اقوى من اتنين متصاحبين
جايز انتي اجمد مني ف دا لكن انا مش هقدر استحمل الفشل
ـ كلامك دا معناه ان مافيش فايدة
انا عارف اني ممكن اكون صعب ولا اطاق بس ادينا بنتكلم مع بعض وبنفكر بصوت عالي
ـ انا ماعنديش استعداد افكر بصوت عالي ولا بصوت واطي
انا عايزة اعيش حياتي ، اتجوز الرجل اللي بحبه
عايزة احس بالامان
نفسي أبقي أم يا سامح...
عايزة أبقي أم...
انا ولا جامدة ولا نيلة ، انا كمان مش عايزة افشل
انت اناني اوي ..


22 يناير 2016

كنوز مدفونة: يا وجع قلبي - مي كساب

عدي وقت طويل من آخر مرة كتبت فيها بوست عن أغنية بتعجبني ومش كتير عارفها، أغنية تستحق تكون من ضمن الكنوز المدفونة، آخر شئ كتبته من شهر تقريبا كان بوست مجمع لنجوم برنامج "سوبر ستار" القدام، وممكن تقراه من هنا:



أغنيتنا النهاردة للفنانة مي كساب، مي كساب فنانة ذات حضور لطيف، بدأت كمغنية وغنت في الأوبرا، وغنت مع "مجد القاسم" الدويتو الشهير "غمض عينيك" وعملت حوالي تلات ألبومات آخر اتنين منهم مع "روتانا" بعد كدة ركزت أكتر مع التمثيل، مع ان قدراتها الصوتية لطيفة جدا، وأداءها لاغبار عليه، بس هي كممثلة بردو لطيفة جدا، ولها حضور وطورت كتير من قدراتها وأسلوبها وخرجت أخيرا من دور البنت البيئة بتاع "تامر وشوقية" ومثلت أدوار كتير في أفلام ومسلسلات، وتنوعت أدوارها.

كلنا عارفين الجدال اللي ظهر حواليها خصوصا بعد ارتباطها ب"أوكا" بس الحقيقة انا كنت مبسوطة جدا، وأتمني لمي كل سعادة :)

مي وأوكا

أغنيتنا النهاردة اسمها "يا وجع قلبي"، من ألبوم "أحلي من الكلام" صدر سنة 2007 عن شركة "روتانا"


كلمات مودي عبد العزيز - ألحان محمد يحيي - توزيع توما.
اسمع الأغنية من هنا:

مطلع الأغنية عبارة عن ايقاع وبركشنز زائد تقاسيم كمان حادة الطبع ثم دخول ناعم لمي كصوت صولو..

"وانا لسه هصبر تاني عليك..
وأعيد وأزيد غلطي تاني..
دنا كل مرة آخد بايديك..
ألاقيك نسيت ف ثواني...
وانا يوم ما هتعب مش هلاقيك..
ولا يوم تعيش عشاني..."

ثم تتحول الأغنية لتوناليتي بصوت مي يؤدي ككورس أيضا، وهي تغني وترد علي نفسها...

"كورس بصوت مي"
"يا وجع قلبي كل يوم بهواك..
يا تاعب قلبي هعمل ايه وياك..

"صوت مي"
هو اللي ضحي حبيبي معاك..
تكافئه بعذابه..

"كورس بصوت مي"
يا وجع قلبي ليه ف ناري تقيد..
ليه تيجي وتمشي من بعيد لبعيد..

"صوت مي"
وكمان عايزني انا اترجاك..
يا جارحني بغيابك..!"

لفتة طيبة من الموزع "توما" وان كانت ليست بالغريبة عليه ان يجعل لازمة الأغنية كدويتو ما بين صوت مي المستعار، وصوتها الأساسي، حوار ما بين الصوتين يضفي حيوية وليونة علي الأغنية نفسها...

في خلفية الأغنية نلمح أطرافا ناعمة من الكمان، مع البركشنز التي بترقص إلي حد ما.

بعد كدة فيه كوبليه تاني علي نفس نسق المطلع مفيش فيه أي أبتكار لحني خالص...

"شوف لو فضلت تروح وتغيب..
وتسيبني أسهر الليالي..
انا يبقي كدة عداني العيب..
لو شفت بعدك حالي...
ولا عقلي بيودي وهيجيب...
ولا تاني يجري اللي جرالي.."

كوبليه لطيف وكلمات في منتهي الخفة والرشاقة، ثم تكرار للازمة الأغنية مرة أخري.
الحصيلة الاجمالية أغنية رشيقة، جملة لحنية غير متكلفة، أداء صوتي بسيط ولطيف، تساوي أغنية لا تنسي، ودندنة لا نهائية :)






مولات الغلابة - الجزء الثاني..!

مولات الفقراء "الجزء التاني"
زي ما المهندس العظيم حسن فتحي عمل كتاب "عمارة الفقراء"، قررت أنا العبدة الفقيرة لله تخصيص جزء من وقتي ومجهودي لمولات الفقراء، المولات دي متلاقيش فيها كوتشي ب 900 جنيه، وشنطة ب1500 جنيه، لأن المبلغ ده ممكن يكون مرتبك في الشهر بحاله تلاتين يوم أشغال شاقة، وانتي يا بنتي، مرتبك فيه كام 900 جنيه، بداية البوست للبنات والولاد مع نفسهم بقي :D
استكمالا لحلقتنا مع "مولات الفقرا" في الجزء اللي فات، النهاردة هنتكلم عن تاني مكان ممكن نعمل منه شوبنج بأقل وأرخص الأسعار:



ثانيا: وكالة البلح..!




كمية الواو والأوه والياع اللي هسمعها في الحلقة دي كبيرة جدا، مبدأيا وكالة البلح هي أحد أغني الأماكن بالهدوم والحاجات البراندز البالات، والحاجات المستعملة، وانا هحاول ألخص لكم تجربتي الكبيرة مع الوكالة علي مر الزمان –زي المسلسل التركي-.

الوكالة الأسعار فيها بشكل عام بتبدأ من أول عشرة جنيه وانتا طالع، الدنيا متقسمة ازاي؟  الشارع في النص فيه ستاندات، الستاند بيكون متعلق عليه هدوم متشمعة، كل ستاند متعلق عليه يافطة بسعر الحتة فيه، وطبعا السعر بيتقسم علي حسب حالة الحتة نفسها، علي ضفتين الشارع بتلاقي محلات كتير، المحلات عامة بتكون أغلي شوية، الأسعار فيها من أول تلاتين أربعين وانتا طالع.
بتلاقي ايه ف الاستندات دي؟ كل حاجة، قمصان رجالي، تيشرتات رياضية، بلوزات بناتي، جاكتات خفيفة وكارديجانز، الغالبية الموجودة فساتين قصيرة، يا يتلبس تحتيها استرتشات، يا اما بنطلونات جينز، والباديهات بقي مش هوصيكي.

الهدوم دي حكايتها ايه؟ الهدوم دي بتكون "سكندهاند" في بلدها، بتتجاب، وتتغسل وتتكوي، وتنزل مصر، غالبا من خبرتي في التدوير في الستاندات دي، بلاقي حاجات بالتيكيت بتاعها وجديدة.

البالطو، طبعا كل شتا، بنلاقي الهدوم الشتوي أسعارها في متناول تاجر المخدرات والسلاح، لذلك سلاحنا السري في مواجهة البرد هي الوكالة، من أول شهر خمسة، بتنزل تشكيلة من الهدوم الشتوي، بالطوهات طويلة، وقصيرة، رجالي وحريمي، أسعارها بتبدأ من أول 100 ل 150 جنيه، وانتا طالع بقي، بس نصيحة، متخليش البياع يغلبك.

الجينز، بما اني من أصحاب الوزن التقيل، ومبلاقيش مقاسي بسهولة، بلاقي مقاسي بشكل سلس جدا في الوكالة، ومن أكتر من محل، كلها بتكون طبعا حاجات جديدة، الأسعار للجينز بتبدأ من أول 60 لحد 200 وده علي حسب جودة البنطلون وخامته، الجبردين كذلك بيكون أرخص من كدة بكتير، وبتلاقيه عامة في الشارع الموازي للوكالة، الي فيه محلات الستاير والقماش.

الطرح والأكسسوارات والشنط مش متوفرة بكثرة هناك، وان وجدت بتكون حاجات مستعملة وقديمة جدا، لذلك منصحش بالشرا عامة من هناك.

أكتر حاجة عامة الستات بتنزل عشانها وكالة البلح وتشتري وتفاصل هي: اللانجيري والغيارات، كم لا يصدق من الأرواب، اللانجيريهات، الكورسيهات الموجودة هناك، وجميع الماركات والأحجام والمقاسات، وحاجات لا يمكن تخطر علي دماغ حد. أنصح عامة أي عروسة بتجهز ومحتاجة تزود في عدد اللانجيري انها تشتري من الوكالة، تدور وتفاصل، ولو هي نحيفة شوية هتجيب ما لا يقل عن 30 حته مختلفة بأقل من200 جنيه.

متوافر بردو في الوكالة فوط، ولبس بيت زي الجلاليب بشكل كبير جدا وبأسعار بتتراوح ما بين عشرين لتلاتين جنيه، فيه هناك برانس، وزي ما قلنا، اللانجريهات هناك سيدة الموقف.

الجزم: مفيش هناك جزم كويسة، الكوتشيات بالتحديد المتوافر منها نوعين: تقليد ردئ، وده بتلاقيه مرمي علي باب الشارع من برة، أو محلات كوتشيات مستعملة، دي بتكون ماركات مستعملة، أو مسروقة بقي الله اعلم :D و تتباع هناك، أو بتلاقي كومة كبيرة وانتا وحظك تدور بقي :D  عموما لو بتدور علي حاجة لمرمطة أو شغل أو كورة وعندك صبر تدور، لكن للبنات صعب تلاقي حاجة كويسة هناك.

منصحش عامة بشرا اللبس الجديد من المحلات هناك، المحلات هناك مغلوانية بزيادة ولازم فصال كتير، بس عامة، لو بتدور كويس هتلاقي، وهتلبس طقم جديد بأقل من 150 جنيه، ان مكانش 100.


20 يناير 2016

مولات الغلابة - الجزء الأول..!

مولات الغلابة - الجزء الأول..!

زي ما المهندس العظيم حسن فتحي عمل كتاب "عمارة الفقراء"، قررت أنا العبدة الفقيرة لله تخصيص جزء من وقتي ومجهودي لمولات الفقراء، المولات دي متلاقيش فيها كوتشي ب 900 جنيه، وشنطة ب1500 جنيه، لأن المبلغ ده ممكن يكون مرتبك في الشهر بحاله تلاتين يوم أشغال شاقة، وانتي يا بنتي، مرتبك فيه كام 900 جنيه، بداية البوست للبنات والولاد مع نفسهم بقي :D
فيما يلي أشهر الأماكن اللي ممكن تعمل منها شوبنج متوسط أو قليل الدخل، وتبان كأنك شيك ولابس براندز...


أولا: ميدان الجيزة..!




ميدان الجيزة قبلة لعاشقي التميز والتنوع، قربي يا مدام، تعالي يا انسة، ميدان الجيزة الأسعار فيه بتتراوح للملابس زي مثلا من خمسين لمية وخمسين جنيه في الحتة، ده لو بنتكلم علي بلوزات، أما لو بنتكلم علي بنطلونات، وانتي سفيفة ومقاسك صغير، هتلاقي البنطلونات من ستين لتسعين، جينز أو جبردين، كذلك الجواكت، الكارديجانز، هتلاقيها ف نفس رينج تمن البلوزات بردو، من خمسين لمية مية وخمسين يعني.

بالنسبة للطرح، انتي وأنواعك المفضلة، هتلاقي الشيفون بخمسة وعشرين جنيه وانتي طالعة، هتلاقي الطرح الليكرا والقطن من أول عشرة وخمستاشر، والشيلان الطويلة أو السكارفات من أول تلاتين وانتي طالعة، والبندانات تشكيلتها متنوعة، وعامة أسعار أي بندانة مش بتعدي العشرة جنيه، ده لو هي قماشتها غالية واو يعني.

الشنط في ميدان الجيزة مفيش فيها تشكيلة كبيرة، يعني محلات كدة متنتورة ما بين شارع سعد والشوارع المحيطة، كام محل متوسطي المستوي، الشنط فيها بدايتها من مية، بس تشكيلتها وموضتها غالبا هتلاقيها قديمة شوية.
لوانتي بتدوري علي شنطة مدرسة، او شنطة باك، هتلاقي في نصبات الشارع، مش ف المحلات، أسعار الشنط الباك من أول خمسة وسبعين، مية، وانتي وشطارتك في الفصال.

الجزم والسابوهات والصنادل هتلاقيها منتشرة وبكثرة في المحلات، لكن المحلات بيغلب عليها الطابع المداماتي أكتر، لو بتدوري علي حاجات مطرقعة وجديدة عليكي وعلي نصبات الشارع،ولو محظوظة ومقاسك صغير هتلاقي المحلات بتصفي من وقت للتاني، حاجات كانت مركونة ومتباعتش، وانتي وحظك ف الألوان بقي.

الجزم عامة أسعارها من أول 50 لحد 150، ده لو بوت، لكن مفيش أغلي من كدة عامة.

بالنسبة للغيارات الداخلية عزيزتي حواء، هتلاقي تشكيلة عظيمة، حاجات بسبعة ونص، وبعشرة ونص، بس تدوري كويس، وتنقي كويس، وفي الغيارات بالذات متحاوليش تفاصلي مع البياع. الغيارات كلها في ميدان الجيزة بسعر واحد. ومش هنفصل أكتر من كدة بقي انتي عارفة انتي بتشتري ايه.

الأكسسوارات بقي، اخر حاجة، هتلاقي كل أنواع الأكسسوارات في الميدان والشوارع، هتلاقي أحزمة، الحزام سعره ما بيعديش 15 جنيه، الحريمي طبعا، هتلاقي توك، هتلاقي محلات وبوتيكات صغيرة بتبيع الديودرانت، وبيرفيومز من كل الماركات، والتقليد، مش هتلاقي محلات تركيب ريحة كتير.

هتلاقي نصبات في الشوارع بتبيع ميكاب، أنصحك بلاش، دي حاجة هتتحط علي وشك بلاش تغامري فيها، هتلاقي نصبات صغيرة بتبيع دهب صيني، دي عاوزة فصال وطولة بال مع بياعينها، هتلاقي اكسسوارات عادية بس البياع بيضرب في العالي عشان يكسب أكتر، بسك عليه بقي مش هوصيكي.

أضمنلك صفقة رابحة في ميدان الجيزة، وطقم كامل جديد في حدود الميتين جنيه، من أول الطرحة والبندانة، لحد الشوز والشنطة.


16 يناير 2016

6 أغنيات ستذكرك ب #خالد_عجاج !



استكمالا مني لسلسلة المقالات اللي بكتبها عن مغنيين محدش يعرف عنهم أي حاجة، ولأني مصرة اني أفرض ذوقي الفني الخاص علي جماهيري العريضة -صدي صوت- لذلك قررت اني أكتب مقالة عن فنان للأسف مظلوم، الأستاذ المحترم "خالد عجاج"..
من الفنانين القليلين أصحاب الأصوات الجميلة بجد، بدأ بغنا خفيف، لسعاد محمد ووردة، اتشهر بCover شهير جدا لأغنية "وحشتني" لسعاد محمد، و"أكدب عليك" لوردة، بعد ذلك بدأ يشق طريقه الفني الخاص، ومشواره الفني علي رغم قلة أغنياته "97 أغنية" إلا أنه شبهه ومميز زيه.

لو عاوز تتابع مقالات أكتر عن فنانين محدش بيسمعهم دلوقتي ممكن تتابع:
1- عن محرم فؤاد.
2- عن حسن فؤاد "بتاع أرابيسك"


النهاردة بنتكلم عن "خالد عجاج" وبنحاول نردله اعتبار ولو بسيط قدام طوفان الأجيال المسخ اللي كلها شبه بعض، بنقدملكم من وجهة نظري الشخصية التي لا قيمة لها علي الاطلاق أجمل أغنيات وأميز أغنيات في مشوار خالد عجاج الفني، اللي للأسف قضت عليه شركة "روتانا" لعنها الله في كل كتاب، وإلي صلب الموضوع:

هنحاول قدر الإمكان نبعد عن الأغنيات المشهورة، وهنلقي الضوء علي أغنيات مميزة جدا، من أجمل أعمال الفنان..

1- ولا مرة 
كلمات مصطفي مرسي - ألحان وليد سعد. - الموزع أشرف عبده.


ولا مرة أغنية جميلة جدا، صدرت عن ألبوم "حقيقة واحدة" سنة 2002 - بقالها أكتر من 14 سنة لكن جيدة الصنع وعمرها ما هيطولها الصدا أو التراب.

2- عمرك

كلمات مصطفي مرسي - ألحان وليد سعد. - الموزع أشرف عبده.
من ألبوم "وحداني" صدر عام 2000.
عمرك أغنية درامية زاعقة، لكنها قمة في الروعة، بصوت خالد، تصاعدات لحنية في عز "وليد سعد" قبل ما يشطب للأسف :(

3- يوم

كلمات سلطان صلاح - ألحان خالد عز
صدرت أغنية "يوم" من ضمن ألبوم Guess What "يوم بردو" - سنة 2006 تقريبا، الأغنية جميلة ومختلفة، وتستحق ان تتسمع.

4- العسل المر.

كلمات : مجدى النجار-الحان : ريــاض الــهــمشرى-توزيع : د. اشــرف عــبــده
من ألبوم "ولادمعة - 1999.

علي الرغم من غرابة كلمات الأغنية دي، إلا ان لحن رياض الهمشري، الصايع بشدة، وصو
ت خالد ع
جاج المتمكن، طلعولنا لحن حراق، لحن لازم يتسمع.


5- ولا دمعة.

كلمات : مصطفى كامل - الحان : حسين محمود - توزيع : د. اشـرف عـبـده
أيام ماالعظيم حسين محمود كان بيلحن، ومصطفي كامل مكانش نقيب الموسيقيين ومفيش تسلم الأيادي، ومفيش حاجات تنغص علينا حياتنا، أغنية "ولا دمعة" من أجمل أغنيات خالد اجمالا.


6- الست دي أمي 
كلمات مصطفي النجار - ألحان رياض الهمشري - توزيع عمرو عبد العزيز.
الأغنية اللي كنت بستاناها كل يوم خميس وحبيت يوسف معاطي بشكل غيرمفهوم بسببها.
أغنية جميلة ورائعة وكان ليها كليب لطيف جدا، تهدجات صوت خالد كفيلة بأنها تعيطك.



بس، دول عامة خمسة من الأغنيات المميزة لخالد عجاج، ولو تحبو نكمل نشر عن فنانين محدش بيعرفهم اعملو شير ولايك وريتويت.

02 يناير 2016

6 أغنيات ستوقعك في حب #محرم_فؤاد..!

علاقتي بمحرم فؤاد علاقة خاصة، صوته ذو طبيعة خاصة، صوت رخيم، عريض، جمع ما بين الشاعرية، والشعبوية، فلم يكن مغرقا في الرومانسية كصوت "عبد الحليم حافظ" ولا في الشعبية ك"محمد رشدي" بل أتي صوته وسطا ما بين الاثنين.

كبار الملحنين منحوا محرم ألحانا غاية في الرقة، "بليغ حمدي"، "ابراهيم رجب" بالاضافة لأن محرم كان يلحن لنفسه، ولآخرين أيضا، فيما يلي ستة من أجمل أغنيات "محرم فؤاد" ستوقعك في غرامه ان لم تكن تفضله، أو ستقدم لك بطاقة تعارف ذهبية، ستجعلك تسمعه بشكل أعمق :)

1- يا واحشني رد عليا.

كلمات: عبد العزيز سلام - ألحان فريد الأطرش - انتاج سنة 1959.
أنتجت هذه الأغنية خصيصا لتعرض في ضمن أحداث فيلم "سلاسل من حرير"، محرم كان لا يزال فنانا جديدا علي الساحة، بعد أن قدم فيلمه الأول "حسن ونعيمة".

2- أنا عايز صبية.


كلمات: عبد الرحمن الأبنودي - ألحان ابراهيم رجب.
يقال أن هذه الأغنية كانت في البداية ل"محمد رشدي" لكنه لم يغنيها لاعتراضه علي الكلمات، فذهب الأبنودي بالسيارة محضرا محرم فؤاد من اسكندرية "المصيف" وسجلوا الأغنية وسافر "محرم" مرة أخري لاسكندرية ليلتها، وأذيعت الأغنية ونجحت نجاحا ساحقا، مما جعل "رشدي" يندم لاحقا علي عدم غناءه لها.

3- ندم.


كلمات: مرسي جميل عزيز - ألحان محمد الموجي.
في غياهب الانترنت قرأت أن الأغنية في الأساس لحنها الموجي ل"عبد الحليم حافظ" لكنه رفض اللحن بدعوي أنه "كئيب جدا" ولن يعجب الجمهور.
طبعا الأغنية أنتجت في فورة الجيتار الإلكتريك وعمر خورشيد، وغالبا تم غنائها ضمن أحداث فيلم "عشاق الحياة" الذي مثله "محرم" مع "نادية لطفي".
بالطبع نجحت الأغنية نجاحا ساحقا هي الأخري، وعض حليم وقتها علي أصابع الندم.

4- يا غزال اسكندراني.


كلمات سيد مرسي - ألحان بليغ حمدي.
لهذه الأغنية مكانة كبيرة في قلبي، مقدمتها الموسيقية باستخدام البزق، والسمسمية، من أجمل توزيعات بليغ حمدي الموسيقية علي الاطلاق.

5- لو كان الامر أمري.

كلمات: عاطف النمر - ألحان محرم فؤاد.
ألحان الديسكو المنتشرة في هذه الفترة، مع كلمات خارج السياق المطروق، كانت عوامل كثيرة في نجاح هذه الأغنية اللطيفة، أكثر ما أحبه بها هو النقلات اللحنية المتعددة فيها، كأنها ثلاثة أغنيات في أغنية واحدة.

6- مسا التماسي يا قمر.

كلمات: مرسي جميل عزيز - ألحان محرم فؤاد.
توزيعة الأغنية في بدايتها هي الأكثر عبقرية علي الاطلاق من ضمن أغنيات محرم، وردت هذه الأغنية أيضا ضمن أحداث فيلم "عشاق الحياة"، أحبها بشكل شخصي بسبب نادية لطفي، كانت ترتدي ملس أسود علي باروكتها الشقراء وعيونها الشقية، منظرها كان لا يقاوم، وكانت تستحق الأغنية بكل تأكيد.


 
Reem Essam Cairo , Egypt | copyrighted2011 - Reem Essam