الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

13 ديسمبر 2016

شخبطة...

"وأنده ولا تردي..
ولا تردي..
وأعشق وبتصدي..
وبتصدي..
وأرجع صديق الاه..."

بحب الأغنية دي بشكل غريب، محمد الحلو فيه حاجة ف صوته تشد وتجنن أي واحدة، خصوصا وهو بيبتسم...كنت بحب ابتسامته وهو صغير جدا...


"في الشارع ده انا شفتك ماشية فيه..
لابسة جيب، وبلوزة وردي..
وعاملة ديل حصان وجيه.."

لما سمعت الأغنية دي امبارح، افتكرت أمي، امي وهي صغيرة جت ف دماغي أوتوماتيك، هي أكتر واحدة ممكن تحكيلكم عن الشقا ف المواصلات، وعن حواديت الشوارع، كنت بحب صورها وهي صغيرة أوي، كانت جميلة، فقيرة، سمرا، رجليها كانت حلوة، كانت أجمل مني ميت مرة، نفسي أفهم ازاي اتجوزت أبويا بس....




15 سبتمبر 2016

بليغ..ألف شمعة..للأبد...


كعادتي، في كل عام تحل فيه ذكري حبيبي "بليغ حمدي"، امضي يوم ميلاده ويوم ذكري وفاته وأنا أفكر فيه، وأستمتع بموسيقاه، وأوّد صديقي العزيز "تامر حمدي" ابن شقيقه، الذي يحمل من رائحة عمه الكثير، والتي تجعلني أود لو كنت في مصر لأراه كثيرا وأتحدث معه كثيرا...

الذكري مضت من يومين أو ثلاثة، كنت كعادتي لست في مزاج الكتابة، لكنني دوما في مزاج يسمح لي بالتغزل في "بليغ حمدي"، وقررت اليوم، بما إنها نهاية الأسبوع، أن اكتب شيئا في يوم ميلاده العطر، والذي كان فتحا ونصرا ونورا علي تاريخ الموسيقي الشرقية أجمع...

وبما إني خارج البلد وأعاني بعض الشئ من الحنين لتراب الوطن "حرفيا" فاخترت لكم اليوم أغنيتين من ألحان بليغ حمدي، من ألحان فترة الثمانينيات، يمكن لا يعرفهما الكثيرين، لكنهما من أعذب الألحان التي سمعتها يوما، اللحنين لبليغ حمدي بالقطع، وقد غناهما بصوته، بالاضافة للمغنيين الأصليين..

1. الأغنية الأولي "رغم البعد عنك"
كلمات وألحان: بليغ حمدي
أداء: عفاف راضي.

صدرت أغنية "رغم البعد عنك" من ضمن ألبوم "رسالة من الغربة"، وهي أغنيات Guide بصوت بليغ حمدي أرسلها من باريس لكن بشكل أو بآخر انتقلت الأغنيات من كونها أغنيات دليلية لتصبح ألبوم مستقل، حقق نجاحا كبيرا، لكننا هنا اليوم لنلقي الضوء علي الأغنية بنسخة "عفاف راضي" وهي الأجمل في جودتها الصوتية، وأداءها الهادي الرائع.
تبدأ الأغنية بتمويجة للحن كأنه صادر من فيلم كارتون، ثم نتحول إلي البيانو والذي يشكل قوام اللحن بشكل كبير، تليه الوتريات، من قانون لكمنجة، والبركشنز، ثم تدخل عفاف راضي بصوتها الجميل، خلفها الكورس من رجال ونساء.

"رغم البعد عنك..عمري ما هنسي إنك، أمي واني بنتك، وكلي حتة منك.." في نسخة "بليغ" من الأغنية طبعا كانت "أمي واني إبنك"، طبيعي..

بساطة اللحن لا تسمح لصوت عفاف راضي بخلق العرب الصوتية ولا استعراض الصوت، فقط المشاعر الجياشة بالحنين للوطن تصلك من صوت عفاف، كما ان استخدام البركشنز خلف صوت عفاف أضفي قليلا من البهجة علي اللحن، علي عكس نسخة "بليغ" التي أصابتني للأسف بكآبة شديدة لما سمعتها، لأنني أعلم القصة ومافيها..

توزيع الأغنية أخفي تماما الحزن الدفين في الأغنية، كما أن استخدام الكورس جعلها مشرقة بشكل أكبر، كذلك الكمنجات في الخلفية، مع توزيع الكيبورد، مفردات الأغنية لم تكن بالتنوع الرهيب الذي اعتدنا عليه أغنيات بليغ السابقة، فكما نعرف أن بليغ الشاعر فقط وجد ليسد فراغ لم يكن أي شاعر يقدر علي سده في حياة بليغ، ف بعد خروجه من مصر، وانسحاب "محمد حمزة"، وابتعاد "الأبنودي" عن الشعر الغنائي بشكل كبير، ظهرت الحاجة للشاعر بليغ حمدي، صاحب المفردات البسيطة المعبرة مثل 

"أنا شوق سهران ليلاتي، 
ملهاش معني حياتي،
 ولا طعم في ليل الغربة، 
علي صوت غير صوت آهاتي،
 لما أسمعها تقولي..وحشتيني يا مصر.."

في النهاية، يكفي أنه كان قادرا علي التعبير، فأخرج لنا أغنيات مثل: الحب الي كان، انا بعشقك، باودعك، وغيرها من الأغنيات الجميلة، ثم في نهاية كل كوبلية، يصيح الجميع "وحشتيني يا مصر"، في بهجة لم أعتد وجودها في نسخة الأغنية الأصلية لبليغ، الذي كنت أجده يصيح ألما لا شوقا لمصر...

استمع لأغنية "رغم البعد عنك" بصوت عفاف راضي من هنا:


واستمع للأغنية في نسختها الأصلية من "بليغ حمدي" من هنا:






2. الأغنية الثانية "القمر مسافر"
كلمات وألحان: بليغ حمدي
أداء: نهاد طربية.

الأغنية الثانية لهذه الليلة معنا هي أغنية "القمر مسافر" أو "دقيت علي الأبواب" وهي أغنية تفرق دمها بين القبائل، فغنانا إياها "بليغ حمدي" في نسخة علي العود، ثم "أحمد عدوية" ثم "رمضان البرنس" وأخيرا، صاحبها الأصلي "نهاد طربية"، لماذا هو صاحبها الأصلي؟ بالتأكيد لأنه المطرب الوحيد المسجل له الأغنية في استوديو، في تسجيل جميل، أعتز بأنني أحد القلائل الذين سمعوه، طوبالأمانة، لا صوت يعجبني بعد صوت بليغ سوي "نهاد".

تبدأ الأغنية بافتاتحية كلاسيكية، كمنجات هادرة مع بركشنز، ونايات حزينة، امعانا واغراقا في جو الحزن، لكن لا يفوتنا ايقاع بليغ المظبوط، يتباطئ اللحن تدريجيا، ليدخل نهاد مع صوته العظيم...

"دقيت علي الأبواب..قالو كفاية..
ده مفيش حد..
وناديت علي الأبواب قالو كفاية..
ومين هيرد؟
ده القمر مسافر...
والسهر مسافر..
والفرحة مسافرة..
حتي الحزن سافر..."

ثم يبدأ اللحن في التصاعد العظيم:

"كل الناس مسافرة..
وهي قريبة مني..
كل الناس في غربة..
ومين هيسأل عني؟؟!
دحنا قريبين..
وهما قريبين..
لكن من سنين..
كلنا مسافرين.."

قماشة اللحن في مطلع الأغنية تسمع لنهاد بأن يستعرض عضلات صوته القوي، لكن من أقل طبقات صوته، بدون زعيق، أو ازعاج للمستمع...وانتقال اللحن بسلاسة من جملة لجملة، لن يفعله أحد غير بليغ، خصوصا في جزء "محنا قريبين، وهما قريبين.."، يشعرك بكم الأسي الذي شعر به بليغ وقت تلحين الأغنية.

تمتد الأغنية بفاصل موسيقي يجمع ما بين الكمنجات والناي، حتي يمتد صوت نهاد مرة أخري في كوبليه آخر:

"يا زمان الحب فين؟
يا عهد الأمان؟
كان لينا معاك حكاية..
خلصت قبل الأوان.."

ثم يلتف اللحن مرة أخري ليؤكد أن "كل الناس مسافرة، وهي قريبة مني، كل الناس في غربة، ومين هيسأل عني..!؟" اغراقا في الشجن والحزن العظيم...
الحقيقة ان الأغنية لا تحتاج كل هذه الآلات لتوزيعها، فقط حاول أن تستمع لها وهي بصوت بليغ علي العود، أو حتي صوت نهاد طربية علي العود لتعلم ان اللحن الرشيق لا يحتمل كل هذا الضجيج...

اسمع "القمر مسافر" بصوت بليغ حمدي:


اسمع "القمر مسافر" بصوت رمضان البرنس:



اسمع "القمر مسافر" بصوت أحمد عدوية:

وأخيرا إسمع "القمر مسافر" بصوت "نهاد طربية":


04 سبتمبر 2016

جواب لبنت السبعتاشر..

لو عرضو عليا أرجع بالزمن تاني ليا وانا لسه ف سن المراهقة، مش هتردد وهوافق علي طول، هحاول اني أتفادي كل أخطاء الماضي، وأحسن من نفسي، ولو بعتت لنفسي جواب وقالولي انه هيوصل للماضي، وهتقراه نسختي اللي عندها سبعتاشر سنة، أكيد هكتب ما يلي:

عزيزتي الحلوة الأمورة، الحياة مش زي الكتب، الحياة مش زي الأغاني والأفلام، حبيبتي الصغيرة، اللي لسه بنضارة، اللي لسه بتحضن شنطة كتبها وبتكتب شعر ف كراريسها، الحياة للأسف أقسي مما هتتوقعي، الحياة صعبة ياريم...صعبة بجد..

هتدخلي كلية مش فاهمة منها أي حاجة، هتخسري صحاب بالعبيط لأنك غبية ومتخلفة، بتاخدي قرارات متسرعة، بتعملي حاجات كتير غلط، بتقطعي مع صحاب عمرك اللي كان مفروض تكبرو سوا، هتحبي من طرف واحد كتير، هتحبي مرتين، مرة منهم هتزهقي وتملي منه، وتسيبيه، والمرة التانية هيسيبك، هيسيبك تقريبا ميتة...

مش عاوزة أقولك شكلك أهبل قد ايه لما سافرتي وراه وسبتي مصر وف الاخر هو سابك هنا، أيوة انتي سبتي بلدك وأهلك وأمك عشان خاطره، وكان عندك استعداد تضحي أكتر وأكتر، وكنتي هتبقي مبسوطة، انتي كنتي بتحبيه أوي، ولسه بتحبيه، ولحد النهاردة ياريم، كنتي معدية من جنب الشارع اللي كنتو بتتقابلو فيه، ورحتي مدمعة عشان افتكرتيه...

برغم انه اداكي بالشلوت ومحسيتيش انه ماسك فيكي خالص، وعايش حياته بعد ما سابك، لكن انتي لسه جواكي بتموتي فيه، وبتنامي تحلمي بيه، ومن وقت للتاني بتعيطي بسببه، وحتي من جواكي رافضة تدعي عليه، وبتدعيله...لسه بتحبيه يا بنت الجزمة..مفيش فايدة..

هتشوفي ناس كتير اوي ياريم بتتريق عليكي عشان انتي تخينة، مش هتعمليلهم حساب، وهتفضلي تاكلي تاكلي، تاكلي لحد ما تبقي تخينة أوي، لدرجة اني بتمني أرجع لأيام ما كنت ف الجامعة، كنت مش تخينة اطلاقا بالمقارنة لدلوقتي...

كل حاجة بتلمسك بتوجعك، صدقيني انتي طلعتي ولا جامدة ولا نيلة، انتي مخوخة من جوة أساسا، زي القزاز المكسور، اللي هيمسكك هتعوريه...

14 أغسطس 2016

وحشني...

وحشتني شفايفه...وحشتني عينيه...وحشتني بوسته..وحشني أبوسه...وحشني أحضنه...وحشني أول مرة أشوفه فيها...وحشتني أول مرة اترميت ف حضنه..وأول مرة حسيت ان حضنه ده مكاني...وحشتني ضحكته..دخان سجايره...كل حاجة فيه وحشتني..
حتي ألوان جزمه، وريحة البيرفيوم بتاعه...وتيشرته الأخضر اللي كان جايبلنا الفقر...

حاجات كتير عمالة تبعد عن نظري سنة سنة، بس لسه محفورة جوة قلبي بالدم...مدتنيش سبب واحد يخليني أفضل معاك، وحتي لما كنت بتطمن عليك من بعيد لبعيد، وأشتكي وأطلق تويتاتي ف الفضاء الواسع، انت اتدايقت...ومنعتني حتي أشوفك..

تعرف بأنك لسه واحشني؟ وتعرف بأنك لسه علي بالي، وتعرف بأن برغم كل الكلام اللي كل الناس قالته، واللي انتا قلته، وبرغم كل حاجة...انا لسه باحبك...ليه زرعت جوايا الحب ده كله وسبتني؟ ليه سبتني اتألم كدة يا عصام؟ هنت عليك فعلا؟ قد كدة كنت سهل أتنسي؟ الحب اللي حبيتهولك اترمي واتداس عليه بالجزم؟ سبتني أخبط ف كل الناس يا عصام، سبتني قصاد نفسي...وخليتني أحس اني مليش لازمة، ولا فايدة...

سبتني لكل الناس يا عصام، سبتني وانت عارف اني بحبك، ومكنتش عاوزة منك غير الرضا ترضي..وسمعت كلام أول واحد جه علي هواك، ووافقك...
نسيت اني استحملت كتير، نسيت اني جيت كتير علي كرامتي...ونسيت اني اديتلك كل حاجة ويمكن عشان كدة رمتني بالرخيص....

ياريتني كنت بعرف أكدب، وأمثل، وانافق، علي الأقل كنت عرفت محبكش أوي كدة..وكنت قدرت أتخلص منك قبل ما تبقي زي السم ف جسمي..

كنت بتخنق من وجود واحدة تانية ف حياتك؟ واديتك الخيار كذا مرة؟ وانت أحسنت الاختيار بصراحة، اخترت صح علي رأي تامر حسني، اللي انت بتكرهه..اخترتها...لأنها مش انا...لأنها مش بترضيك زي منا برضيك، لأنها بتزعق وتشتم وتسب وتلعن وتهزأ وانا لأ...مش بقول اني ملاك يا عصام...لكن انت ظلمتني، وظلمك ليا انا مش هشتكي منه لحد...انا هخبيه ف قلبي لحد ما أموت...

مش همسك كل حد احكيله عنك، بس هما بيشوفوك، بيشوفوك ف شرودي وانا لوحدي، وانا علي طول لوحدي، بيشوفوك ف نشوفيتي وعصبيتي ورجولتي، اللي محدش غيرك شالها وشاف تحتيها ايه، انت الوحيد اللي كنت عارف ريم الحقيقية، وانتا اللي بايديك رميت عليها غطا البلاعة...

ف تحت الميكب الجميل، والشعر المعمول حلو، واللبس النضيف، مفيش حاجة أكتر من انسانة أنانية، متهتمش غير بنفسها، وبسعادتها، وبس...وأي حد هيخنقها هترميه ف الزبالة علي طول دراعها..

عارف الزبالة يا عصام؟ دي الحتة اللي انت رمتني فيها، وانا بحاول أطلع منها...كان نفسي تقولي مش قادر أعيش من غيرك، كان نفسي تقولي عيدي النظر، كان نفسي تقولي يلا نخليها تنفع بدل ما هي مش نافعة...بس انت مقلتش...

انت ادتني الأوبشن موت نفسي شنق أو بسكينة، ولما اخترت أبعد، قلتلي انه اختياري، هو فعلا اختياري، لا أنا شهيدة، ولا ضحية، ولا أي حاجة...
ولا انتا استغلتني، ولا خلتني أحبك أكتر من نفسي..ولا خلتني أبات ليالي طويلة معيطة، ولا نظري راح من كتر العياط ولا حاجة...
ولا بقيت زي الكورة الشراب بخبط ف كل رجل شوية، ولا وعدتني بأمان ولقيت نفسي لوحدي، ولا أي حاجة

ريح ضميرك يا عصام....ريح ضميرك وكمل حياتك...واعتبر نفسك مقابلتش ريم عصام مصطفي أحمد ف يوم، ولا عرفتها، ولا قلتلها "انا مش هتجوز غيرك" ولا أي حاجة، وكمل حياتك، ومزيكتك، وشغلك، والفلبينية بتاعتك، كمل حياتك زي الروبوت..

ريحت ضميرك خلاص؟ انا عمري ما هسامحك أبدا...بس للأسف، عمري ما هكرهك...عارف انا ايه دلوقتي؟ انا باكره نفسي بدل ما بكرهك...عشان اللي يحب زي منا حبيت، الكره ميدخلش ف قلبه لحظة....

ريح ضميرك يا عصام.....ونام مرتاح....
وشكرا علي كل حال....

ريم.

12 أغسطس 2016

6 أغنيات عظيمة ل"هاني شاكر"...!

استكمالا لسلسلة الكتابة عن المغنيين اللي محدش بيسمعهم أصلا، واللي بدأناها بالحلقات دي..







النهاردة راجعيين مع سلسلة أجمد ستة الساعة ستة، عشان نوريلكم أجمل 6 أغنيات في تاريخ الفنان هاني شاكر الفني، والحقيقة ان هاني شاكر صوت جميل، واحساس جميل، علي عكس ما يشاع عنه انه فنان حزين أو يدعو للانتحار، ولو مش مصدقني اسمع مصطفي كامل وانتا هتبوس كعب كوتشي هاني شاكر..



هاني شاكر ظهر مع نهاية السبعينيات، وكان نجمه صاعد لدرجة ان عبد الحليم اتبني "عماد عبد الحليم" فنيا عشان يحارب بيه هاني، بس للأسف، عماد مات م الهيروين، وعبد الحليم مات ف لندن، ومفضلش غير هاني شاكر يقرفنا :D

النهاردة خليني أستعرض معاكم ست أغنيات من أجمل أغاني هاني شاكر، واللي بصراحة مش بزهق منهم مهما سمعتهم..

1. معاك.

من ألبوم معاك، غني لينا هاني شاكر أغنية معاك، أغنية حب جميلة، وكلها معاني حلوة، طبعا فشلت اني الاقي الملحن، أو الشاعر، بس الأغنية جميلة، علي شكل كريشندو، جملة لحنية واحدة، وعليها تنويعات ف التوزيع، وصوت هاني فيها ك بيز وتوناليتي مخليها من أجمل ما يكون، الأغنية معتمدة علي الأورج كعادة كل أغنيات التمانينيات..


2. هو الي اختار.
كلمات: محمد حمزة، ألحان: بليغ حمدي.

الأغنية دي كانت أصلا بتاعة عبد الحليم، ولما رفض يغنيها تقريبا، أو بليغ مكملش لحنها، راح مديها لهاني شاكر، طبعا قامت عركة كبيرة بين بليغ وحليم ع الغنوة دي، خصوصا بعد ما هاني نجح فيها بشكل كبير..!

في الغنوة دي هتلاحظ ستايل بليغ في استخدام الكورس المسرحي، وانه ازاي لاحم جمل الكورس اللحنية في جمل الغنوة، بحيث انه مينفعش تستغني عنه، تمام زي أغنية "وحشتوني" بتاعة وردة كدة..

الأغنية طويلة نسبيا، حوالي عشرين دقيقة، فيها نقلات وصولوهات رائعة، متتفوتش بصراحة..!


3. محتاجلك يا عمري.
تقول الأسطورة انها من ألحان: هاني شاكر، والشاعر غير معروف

لكننا نحيي الشاعر علي خياله الجميل علي أية حال، لأن الغنوة جميلة جدا، ومشرقة بالحب والتفاؤل والأمل، علي غير عادة هاني شاكر في السواد...

في الغنوة دي، مزج الملحن، ما بين صوت هاني بيز وصوته توناليتي، وصوته أداها باقتدار بصراحة، هي غنوة صعبة..




4. حكاية كل عاشق.
كلمات: سمير الطائر، ألحان: محمد سلطان.

من نوعية الأغاني اللي هاني شاكر بيحبها، كلها صعبانيات ومأساويات، بس والله جميلة، فيها جمل جميلة وملمعة صوت هاني كدة وحلوة، لازم تتسمع بصراحة....



5. لو بتحب حقيقي صحيح.
كلمات: مجدي النجار، وألحان: حسن أبو السعود.

بردو أغنية شجن وحزن، لكن جميلة، ومعتقدش فيه صوت زي صوت هاني يقدر يغنيها حاليا، أغنية تقيلة، وحلوة، وكلها حزن..

"كنت وقفت معايا ف صفي، وانا بنهااااااااااااااااااااااااااااار" 
ونحب نفتكر الفيديو ده لفزاع وهو "بينهار يا كابير"




6. نسيانك صعب أكيد.

طبعا معرفتش أوصل للملحن ولا الشاعر، لكن الغنوة دي لحنها مميز جدا، بيجمع ما بين قرار صوت هاني وجواب صوته، بيبدأ الغنوة هادي جدا، ويروح جايبلك الجواب كدة خاضك بيه، جميلة وحزينة ولازم تتسمع..!

البوست خلص، بس أحب ف الاخر اقولكو اني عامة، من الناس اللي بتحب تسمع "هاني شاكر" علي المسرح، لأنه بجد فنان فشخ :D



24 يوليو 2016

ما بين الحرب الحقيقة والنفسية...ماركو بولو الموسم الثاني..!

لم أعتد بصراحة علي كتابة مقالات نقدية لمسلسلات أو أفلام، إلا من رحم ربي، أؤمن تمام الايمان بأنني لم أخلق لنقد المسلسلات، فقط الموسيقي هي من تلامس روحي وأقدر علي تملك مفاتيحها الصعبة..


لكنني بعدما انتهيت من مشاهدة مسلسل "ماركو بولو"، في موسمه الثاني، شعرت بشئ ما يدفعني في داخلي لكتابة نقد، أو مراجعة، او رأي بسيط فيه هذا المسلسل، وإليكم التفاصيل.

مسلسل Marco Polo  من انتاج شبكة Netflix  والتي أصبحت مؤخرا أحد عمالقة الانتاج الدرامي في الولايات المتحدة الأمريكية، خصوصا بعد انتاجها للمسلسل الذي شغل الرأي العام العالمي House of Cards  والمسلسل الذي يعالج قضية المثلية الجنسية وأبعادها بشكل درامي Orange is the new black  والعديد والعديد من المسلسلات والأعمال الوثائقية والدرامية الأخري.


مسلسل ماركو بولو يعتمد في الأساس علي بعض الحقائق التاريخية، تم تحويرها بأسلوب يناسب التشويق الدرامي، فلأجل غرض الدراما تم لي ذراع التاريخ، لكن في النهاية الأمر يصب في مصلحة المتفرج العادي، والذي مثلي تماما، قد استمتع بمشاهدة الموسم الأول، والمكون من عشر حلقات، كالموسم الثاني، والذي تم طرحه مؤخرا علي نت فلكس، دعوني اوضح لكم أبرز ملامح الموسم الثاني من Macro Polo:




1.    رغم ان اسم المسلسل "ماركو بولو"، إلا أنه لا يتمحور في الأساس حول ماركو بولو، بل في بعض الأحيان قد تجده لا يظهر في الحلقة سوي كضيف شرف، وبعض الأحيان قد يكون وجوده غير مؤثر علي الاطلاق، بالعكس، المسلسل يتمحور حول "قوبلاي خان" خان المغول الشهير، والذي خدم ماركو في بلاطه سنين عدة، وحول صراعه مع بني جلدته، ومع الصينيين.

2.     مشاهد العري والتي احتوي الموسم الأول منها علي الكثير، نجدها قد خفتت بشدة في الموسم الثاني، وان احتوي بعضها تصريحا "لكن لمدة أقل" أو "تلميحا" والمشاهد الذكي بالطبع سيفهم، من الممكن أن مشاهد العري كانت مجرد عامل جذب للمتفرج في الموسم الأول؟ من يعلم؟


3.    الحوار بدا أكثر عمقا، وأكثر تركيزا، وبدا مناسبا أكثر لطبيعة كل شخصية، ولم يعد هناك المزيد من الألغاز في الحوار، بل امتاز بالسلاسة، والبساطة لكن بدون اخلال بطبيعة خلفية كل شخصية.

4.    امتاز الجزء الثاني بالتركيز أكثر علي النواحي النفسية لكل الشخصيات، وعرض لنا خلفيات تاريخية لكل شخصية، بل وركز علي الناحية الانسانية لطاغية مغولي مثل "قوبلاي خان" و "أحمد" و"كايدو" ابن عم قوبلاي، بينما تجاهل وعلي عكس الموسم الأول "ماركو بولو" والأمير "جينجام" و"بيامبا" أبناء الخان، كما حظيت "تشابي" زوجة الخان بنصيب عظيم من الناحية النفسية، ويبقي السواد الأعظم ل "كوكاتشين" زوجة ابن الخان.



هذا الجزء يحتوي علي بعض الSpoilers  ف ان كنت شاهدت المسلسل فلا ضرر من ذلك :D

الدراما في الجزء الثاني، اعلي بكثير من الأول، الأول كنا متشوقين لنري إلي أين ستنتهي رحلة "ماركو بولو" وهل سيرحل أم لا، ومصيره مع أعداءه في البلاط المغولي، لكن في هذا الجزء، لا أعلم عن عمد أم بدون قصد، تم تجاهل مصير Polo  تماما، ولم يعد محرك للأحداث كالجزء الأول، ربما لأن حياته لم تعد علي المحك؟ حتي أننا لم نري سوي مشهد واحد"فلاش باك" لماركو، أثناء اختطافه لوالده من معسكر الجيوش الصليبية.



اعتمدت الدراما بشكل أساسي في المسلسل علي النواحي النفسية، ف تري المؤلف يعزي سلوك أحمد الغريب تجاه "قوبلاي خان" لعقدة "أوديب"، فتراه يؤذي نفسه بنوع غريب من العلاقات الجنسية مع أخت "لي سيداو"، كذلك عقدة الذنب التي أصابت "كوكاتشين" بعد حملها من رجل آخر غير زوجها نزولا علي رغبة "تشابي" حماتها، كذلك نلمح بشكل طفيف حب ماركو بولو ل"قوبلاي خان" الأبوي، حتي انه عاد بعدما تم طرده، وأنقذ حياة الخان للمرة الثالثة تقريبا.



كذلك اعتمدت الدراما بشكل أساسي، وكمحرك قوي علي "الضمير" وأزماته، وكيف كان حاضرا حتي في نفوس أعتي قواد المغول مثل: "كايدو" ابن عم قوبلاي، وابنته كوتولون، وقوبلاي خان، وكيف حاصره ذنب قتل امبراطور الصين الصغير، الذي أعتبر مشهد قتله من أقسي مشاهد القتل في الدراما..



كما لن ننسي اطلالة "نايان" عم "قوبلاي خان" المسيحي، وكيف كان ذنبه وخطيئته "حب الأطفال" هي من قضت عليه في النهاية، وكيف اختار نهايته بناءا علي طلب "قوبلاي خان"، والاضاءة السريعة التي ألقاها المؤلف علي علاقة "مائة عين Hundred eye" مدرب الملك الشخصي ب"لوتس" حامية الامبراطور الصيني، والتي أعتبرها بشكل شخصي تمهيد لدور أكبر في الجزء الثالث.



فنيا وانتاجيا: الموسم الثاني أفضل من الموسم الأول في نواحي عدة.
دراميا: الموسم الثاني أكثر ظلامية، وعمقا من الأول.
وانا في انتظار الموسم الثالث..!



17 يوليو 2016

من ريم إلي حبيبي...حوّل..!

أؤمن وبشدة أن الكتابة هي العلاج لكل الأمراض، وهي الداء لكل الأدواء، أؤمن أن الكتابة تخرج سموم بداخلنا، بدلا من أن تقتلنا نسطرها جميلة علي الأوراق، ومعاناتنا تصبح محل اعجاب الجميع، فإذا بك أرضيت غرورك، وأطفأت نارك، واكتسبت شهرة واسعة..!

ما مررت به اليوم ليس بالهين، ولا بالسهل، ولا انا المرأة القوية التي ستعبر ما حدث في يوم، ربما أعبره في أعوام، ربما حتي موتي، لا أعلم، لكن الحب الذي عصف بي، وهز كياني، وجعلني أشعر بأني امرأة من شعر رأسي لأخمص قدماي حب صعب أن أتناساه، لكنها الظروف، وقلة التفاهم، وعدم الراحة، وأشياء كثيرة، تجعلك مضطرا لإنهاء القصة منذ بدايتها، ربما لأنك لست مرتاحا، ربما لأن الطرف الآخر ليس مرتاحا، ربما لأنكما لم تتفاهما علي أشياء كثيرة، ربما لرفضكما التنازل، أو بالأخص لرفضي أنا التنازل بمفردي..

أنا من المؤمنين بأن الحب لا كرامة فيه، ولا عيب ولا ضير من بعض التنازلات، حتي تسير المركب، لكن ليس كل ما يتمناه المرء يدركه، ولربما هذا الراحل من بعيد، الذي لن أخطئ في حقه لحظة، وأحترمه في غيابه أكثر من وجوده، وأقدره، وأنعي خسارته كصديق أكثر من حبيب، يعلم علم اليقين أنه يخفي قلبي فيه صدره، ودفء مشاعري في جيبه، واشراقة وجهي في عطره..

لربما يعلم الراحل إلي وجهة بعيدة أننا قد لا نلتقي مجددا، لكنني أقسم بحق كل قبلة انتزعت من داخل روحي له قطعة، وبحق كل خطوة خطوناها سويا، وبحق كل دمعة بكيتها اليوم في صحة خسارته أني لا زلت أحبه...

لكنها هي الحياة القاسية...التي تضع فيها أولوياتك، وتسعي وراء سعادتك، ف ربما كنت أحبك، لكنني لن أرضي يوما ما أن أنضم لأسباب تعاستك الكثيرة، وفقك الله يا حبي الكبير...ولتعلم أن روحي تسعي خلفك ما حييت حارسة لك...

أحبك...
ريم..

كنت أسمع في هذه المقالة "الحب كله، نسخة بليغ حمدي"



15 يوليو 2016

من مفضلات الشونج الموسيقية - 1

النهاردة جيت عشان أطلع حبة من الحاجات اللي مخبياها في الصندرة، أغنيات مفضلة ليا وعزيزة علي قلبي، وباحبها جدا، وجيت النهاردة أشارككم بيها..!

1. لغة العين  ل UTN1.
كلمات وألحان: طلال القنطار، وتوزيع: طوني أبو خليل.


ده فريق لبناني، مسمعتش عنه كتير، الغنوة سمعتها بالصدفة وانا بقلب في قنوات روتانا الموسيقية من قديم الأزل، يمكن كانت الفرقة دي تقليد ل بوي باند زي باك ستريت بويز، لكن جزء كبير من سر حبي للغنوة هي كلماتها الجميلة.


2. بابي دق ل يحيي رضوان.
كلمات والحان: مروان خوري، توزيع: مارك عبد النور.



من أيام ميلودي الجميلة، لما كان جاد شويري بيشتغل وبيعمل كل أسبوع كليب، وبيطلع كمية مزز رهيبة ملهاش زي، الغنوة دي من روائع مروان خوري المنسية، اللي أظن انه لو غناها هيبعث فيها الروح من أول وجديد، وهيشهرها..
للأسف يحيي رضوان مش مغني مشهور، لأني مشفتلوش أي أعمال من بعد الغنوة دي وغنوة "إلا الأسي"، لكن اجمالا الأغنية جميلة، واللحن رائع، والتوزيع يجنن...

3. بحبك ل رضا.
كلمات: هاني عبد الكريم، ألحان: وليد سعد.



الغنوة دي من ألبوم رضا "عدي العمر"، الراجل ده جه من لبنان عمل ألبوم جامد فحت نجح نجاح رهيب، وبعد كدة رجع بلدهم مسمعنالوش حس تاني، للأسف مكررش التجربة رغم نجاحها الكبير..!

"بحبك هي نقطة ضعفي، وعارفها..وبردو بحبك..!!"

4. تتر "مبروك جالك ولد" ل نيللي.
كلمات: سيد حجاب، ألحان: عمار الشريعي.




لأسباب كتير، منها يرجع لأيام طفولتي انا باحب التتر ده جدا، ووقعت ف غرامه بصريا قبل سمعيا، عشان تصويره الجميل...
اللحن الجميل والكلام الرشيق لسيد حجاب خلوني احبه جدا...

5. تلاكيك ل حكيم
كلمات: هاني الصغير، ألحان: ناصر عارف..



من أجمل أغنيات حكيم الي محدش يعرفها علي الاطلاق، كلامها من أجمل وأرق ما يكون وحكيم بيغنيها وايديه سايبة..!

13 يوليو 2016

شخبطة

أنا في أسوأ فترة من فترات حياتي....ولو مكتبتش احتمال كبير أكون قتلت نفسي قبل يوم الجمعة الجاي، سبعة وعشرين مايو ألفين وستاشر، اليوم اللي حياتي كلها فيه هتكون بتتغير، باغير مكان سكني، ببعد عن عيلتي، بتنقل في بلد جديدة، ببقي لوحدي، مش معايا أي حد، ومعييش حتي الحد الادني من الفلوس اللي ممكن تساعدني أقف علي رجلي في بلد غريب...

فيه سلسلة من الأحداث المؤسفة اللي بتحصل وحصلتلي مؤخرا، ابتداءا من السنة اللي فاتت، ارتبطت بشخص، هو محترم ومهذب، لكن للأسف، أناني بزيادة، مش شايف ف وجودي معاه أي اضافة لحياته، لذلك جيت مجيتش، مكانتش فارقة، حتي معرفتش ارتبط معاه بعلاقة صداقة، خارج اطار الجواز، محستش باللهفة اللي كنت عاوزة أعيشها، محستش انه مشتاقلي زي منا دايما كنت مشتاقاله، وتعبت كتير من اني أمشي لحد، عمره ما مشي ناحيتي خالص...

بعد ما قابلته، بدأت مشاكل تحصل ف البيت عندي، خلافات زيادة ما بين أمي وأبويا، الموضوع انتهي بخناقة كبيرة فشخ، ثم ردح وشرشحة، ثم أبويا ساب البيت، معرفتش أو لساني اتشل، الاتنين غلطو والاتنين عكو الدنيا، وبعدها بكام شهر تحديدا في يناير اللي فات، انفصلو بهدوء...

معرفش ليه حملت نفسي جزء كبير من ذنب طلاقهم، وجوايا احساس دفين اني كنت جزء في الطلاق ده، معرفش ليه، دايما لما بفتكر الموضوع اجمالا عيوني بتتملي بالدموع، يوم ما اتطلقو انا عيطت عياط محصلش، كنت مشغلة عمرو دياب، وأغنية ملهاش أي علاقة بالحزن "كدة عيني عينك..." ولما جت الحتة بتاعة "يللي زمان انا كنت حياتك، شلت زمان ليه من حساباتك" بكيت اوي، حسيت ان انا السبب، والغريب ان أمي نفسها كانت مستغربة من حزني، ومن حزن أخويا الصغير علي كل اللي حصل ده...

لأسباب كتير جدا، انا مش باحب أبويا بشكل حميمي، هو أبويا ومخلفني وكل حاجة، بس دايما مسيطر عليا احساس بالقرف، بالشفقة، لأسباب كتير، المشكلة اني دايما باحكم علي ابويا بقسوة، باحكم علي أبويا من خلال تصرفاته، باحكم علي أبويا من خلال وجهة نظر أمي، وساعات كتير باكره أبويا بسبب أمي، كانت دايما توريني عيوبه وتخبي عنه مميزات، أكيد كل انسان له ميزة يعني، المهم اني كبرت علي ان الراجل ده فاشل، ملوش لازمة، ودايما عبء علي الأسرة...

لما أبويا ساب البيت لمست الهدوء النسبي اللي حل ع المكان، البيت مبقاش فيه ريحة سجاير، مبقاش فيه الراجل المزعج اللي بيقعد طول النهار بالغيار الداخلي، مفيش كوبايات شاي كتيرة فشخ، مفيش حد يقرفنا اننا مغسلناش يونيفورم الشغل كل يوم أربع، مفيش حد يزعقلنا اننا مطبخناش، مفيش الكلام ده كله، أبويا بصراحة كان عامل حس في البيت ولو حس مزعج...

برحيله عن البيت حسيت اني مرتاحة، ويمكن ده اللي مقيدني ومحسسني بالذنب أكتر، خصوصا لأني فعلا مش محتاجاه ف حاجة، منين ما يشوفني يشتكيلي قلة الفلوس، تعبه في الشغل، يحاول يعرف انا بقبض كام، انا مستقلة عن أبويا بالكامل من أربع سنين، مباخدش منه جنيه، بالعكس العكس بيحصل أحيانا...انا مكنتش معترضة، بس الموضوع بدأ يدخل في منحني تاني، اني أنا بدأت فعلا أصرف علي البيت....خصوصا من بعد ماهو سابه...


دليلي احتار..!

كأنني تلك القطة التي تحاول عض ذيلها، فتدور حول نفسها مرارا وتكرارا، وما ان تصل لحافة ذيلها حتي يفلت منها، وهكذا إلي أن تصطدم في الحائط، أو تظل في نفس الحلقة المفرغة إلي قيام الساعة..!


ما بين العمل، الطعام، المواصلات، الشمس، والروتين اليومي، وانا في نهاية اليوم، وجهي للحائط، ود لا ينتهي، منذ أن شرعت في بداية رحلة جديدة في بلد جديد وانا أتعذب من الروتين، وللدقة، أتعذب من مواجهة نفسي يوميا، وما ان أنفرد بنفسي حتي أري كل الأفكار السيئة أمامي، وأتذكر فشلي الذريع في كل شئ، وأذرف دموعا كثيرة، لأنام عقب بكائي...



لم أكن أعلم أن السفر سيعذبني إلي هذا الحد، كنت أظن أن الأمر سهل، وهناك من فعلها من قبلي، لكن يبدو أنني أحن إلي أمي التي كانت تستنزفني، وأحن إلي أبي ونصائحه الرتيبة، وإلي كل شئ في بيتي الصغير، الذي أفتقده بشدة حتي هذه اللحظة...



الحياة صعبة خصوصا عندما تحياها بمفردك تماما، فلا لسانك يتحرك بالعربية طوال اليوم وأنت في العمل، ولا في البيت لأنك لا تفتح فمك من الأساس، فقط تتفاهم بنظرات العيون، وتتجنب أي محادثات محرجة، بل وتتجنب بناء أية نوع من العلاقات داخل هذا البيت، لا لشئ إلا لأنني مذعورة، دائما وأبدا...منذ وصلت إلي هنا واحساس الذعر لا يتركني..



وما زاد وغطي هو قصة الحب التي تمزقني إربا إربا...والتي بسببها أصبحت بحاجة لمصح عقلي...يبدو أن أمثالي يجب أن يمنعون من الحب والرومانسية، فمن لهم عقليتي وشخصيتي أجدر بهم أن يتم حبسهم في مستشفي للأمراض النفسية، لا حب ولا خلافه، فقط طعام وحبوب مخدرة ليس إلا، انا لا أشعر بأنني في حالة جيدة، فقط أشعر بانعدام الأمان، وقلة الثقة في النفس، وبالعهر، نعم أشعر بالعهر، لأسباب كثيرة أعجز عن شرحها، لكنني من داخلي أشعر بأنني أحقر الحقيرات، ولو كنت شخصا غيري لبصقت في وجههي، وكل ما أرغب فيه الآن هو سوط لأضرب به ظهري، فما أشد رغبتي الآن في ايذاء نفسي...



برغم أنها ليست الآن "دورتي الشهرية" إلا أن أوقاتي العصيبة قد طالت هذا الشهر، كل يوم أبكي، أتلقي رسالة مؤثرة ف أبكي، أسمع أغنية حزينة فأبكي، كل شئ يدفعك للبكاء كأنك تحيا داخل بصلة عملاقة، كأن عيناي تنتهزان الفرصة لأداء دور تحبه كثيرا..
وما أشعر به الآن هو أنني طفلة مذعورة، تائهة من أمها، ولا لأحد هنا لتمد يدها إليه...

"ما بين بعدك وشوقي إليك، وبين قربي وخوفي عليك، دليلي احتار، وحيرني.."



رجلي يفكر في امرأة أخري، وبيني وبين أمي آلاف الكيلومترات، وأبي لا يكترث، وانا لا أرغب سوي في حضن دافئ...وهو ما لا أجده مطلقا....
أنا اكره نفسي...وأكره اللحظة التي ولدت فيها، ولا أدري من أين أتت كل تلك المشاعر السلبية، فقط أعلم أنها بداخلي، وأريدها خارجا، أريد سببا وجيها لأستيقظ من أجله صباحا، لا شئ، أشعر بالسوء، بالضعف، بقلة الحيلة، لست انا هذه القوية التي اعتدت أن أكونها، انا بقايا من بقاياي، هشيم تذروه الرياح العقيمة...



08 يوليو 2016

عمري ابتدا - تامر حسني: قراءة نقدية..!

بما اني "بيج فان" ل"تامر حسني" والموضوع ده مزعل ناس كتير أوي من صحابي، وحبايبي ومعارفي، ف انا قررت امعانا في الغيظ والكيد اني أكتب ريفيو حوالين ألبوم تامر الجديد "عمري ابتدا" وده لأني كسلت اكتب عن ألبومه اللي فات، مع انه عجبني فوق العادة، بس نقول ايه ف الكسل ووحش العلوقية الشرير..!




تامر في الألبوم ده بيتعامل مع فريق يعتبر إلي حد ما جديد، انا شايفة في الألبوم بصراحة مجهود وشغل، ونضج فني جديد عليه، يمكن بحكم السن؟ يمكن لأنه بينزل الألبوم بعد عمرو دياب ف يتلاشي كل أخطاءه، الله أعلم، لكن خلينا كدة مع تحليل سريع للألبوم ونشوف أكتر حاجات عجبتني وأكتر حاجات حلوة والحاجات النص لبة، وإليكم تفاصيل الألبوم..!

 1. يا مالي عيني.
كلمات: تامر حسني، ألحان: عبد الرحمن شوقي، توزيع: جلال الحمداوي.


توزيع حلو؟ حلو جدا وبيشد الودن، واستخدام صوت تامر كتوناليتي في الغنوة خلاها أحلي وأحلي، بصراحة مطلع الغنوة خلاها مميزة وعلقت معايا من أول مرة سمعتها فيها، وحبيت أسمعها تاني، أغنية صيفية بامتياز، بلاجات أو تسمعها وانتا بتجري، أو وانتا واقف بتروق أوضتك، بصراحة ماسترينج الأغنية حلو أوي، كل حاجة معمولة فيه بالمقاس، جلال الحمداوي ده متمكن من شغلته، الأغنية لحنها شقي، مع كلمات تامر "الطفولية" نوعا ما، عاملين أغنية لطيفة...

دمج التوزيع الهندي في اخر الغنوة مع التوزيع "التكنو" خلا الموضوع لطيف جدا، بصراحة صوت تامر أدي بشكل عادي، لكن التوزيع والماسترينج كانو هما أبطال الغنوة الحقيقين، فيه مساحة حقيقية للابداع في التراك ده...

7/10 تستحقها الغنوة دي، لأنها أغنية صيف خفيفة، مش وحشة بس مش الواو، ده العادي بتاع تامر...
لكن برافو ان الكلمات فيها نضج نسبي، من غير ابتذال، أو افيهات قبيحة.!


2. عمري ابتدا.
كلمات: سلامة علي، ألحان: شريف بدر، توزيع: تميم.


الغنوة الحلوة بتبان من مطلعها، والغنوة الطلسقة بردو بتبان من مطلعها..! الغنوة دي طلسقة، والدليل انها بتشبه ف روحها، وف لحنها أغنية "مين ممكن؟"، نفس الطلعة، نفس تكنيك اللحن، نفس التوزيع تقريبا، مش لاقية بصراحة حاجة حلوة ف الأغنية وهي متعتبرش أكتر من حشو، بصراحة أغنية لو اتشالت من كولكشن الأغاني مش هتحس بأي فرق.

مطلع الأغنية "عمري ابتدااااا" تقريبا هو هو "قال انساكي قااااااااااااااال" الغنوتين كوبي وبيست ف الفكرة والتوزيع، والكلمات مش قد كدة، بل اني أفضل غنوة "مين ممكن" عن "عمري ابتدي" بصراحة اختيار غير موفق لهيد الألبوم.
والجملتين: "اه م الهنا يا ليالي ليلة..لما تحب بجد بعد سنين طويلة" هو هو "مين ممكن تبقي انتي معاه وعينه تروح لحد تاني"

الغنوة تستحق 2/10

3. الحارس الله.
كلمات: سلامة علي، ألحانك شريف بدر، توزيع: تميم.


مقسوم سريع، أغنية صيفية بردو بامتياز، محستش فيها بتجديد، لكن الكلمات فيها بعض اللطافة "دنا قلبي اما لقاك، فتح الباب ويا الشباك" كانت جملة لطيفة، بالاضافة لأن مذهب الغنوة "الحارس الله عليك ياما شالله، م القريب والغريب واللي ما اتسماش، واللي شافك جنبي ومسماش ع الحب اللي جمعنا" واستخدام صوت تامر مستعار في المذهب كان لطيف، الغنوة تنفع تكون غنوة افراح وزفات، هي Light ودي حاجة حلوة ومش غريبة علي تامر، دايما مبهج في أغنياته.

تستحق 5/10

4. فاض بيا.
كلمات: حسين مهران، ألحان: تامر علي، توزيع: يحيي يوسف.


أول ما سمعتها لقيت Radio wave في الأول، بصراحة انا باحبه، خلاني مهتمة أسمع باقي الغنوة دي، المطلع عبارة عن جيتار وبركشنز وايقاع، بس حلوين جدا، أغنية مختلفة وغير ستايل تامر خالص...

اللحن من أول وهلة تقيل، والكلمات كذلك تقيلة وصعب تتلحن، لكن تامر علي لف حواليها بشياكة وعمل منها حاجة كدة فخيمة، عرف يلحن جملة زي "خلصت خلاص وفاض بيا، أتاريك مش قد المسئولية، وشكرا علي المعاملة دي، عرفت منها معني الأذية" الكلمات تقيلة وصعب تتلحن عامة.

واضح ان حسين مهران اسم جديد في عالم الشعر الغنائي، لكن لو استمر ع المنوال ده، هيبقي شاعر كبير، وهيسحب البساط من تحت رجلين ناس كتير ملهمش فيها أصلا...

بالنسبة للتوزيع، جميل، أول مرة أشوف توزيع جليل وجميل كدة، مأخلش بسياق الأغنية الحزين، مش عالي علي صوت تامر، بيوطي ف الحتت اللي مفروض يكون واطي فيها، اللي عامل التوزيع ده بجد، اسطي وهيكون ليه مستقبل..!

الأغنية تستحق 9/10

5. نفس الحنين.
كلمات: جمال الخولي، ألحان: محمد يحيي، توزيع تميم.


لما نقول الدكتور محمد يحيي، يبقي أكيد جنب اسمه أغنية من أجمل أغنيات ألبوم تامر، الأغنية دي انا كررتها حوالي عشرين مرة أول مرة أسمع الألبوم، بأمانة مش بعرف أقاومها، تحفة فنية..!

كلمات شاعر مميز زي "جمال الخولي" بتلمس القلب علي طول، التعاون ده ما بين جمال وتامر ويحيي هيقف قصاده التاريخ الفني كتير، واللي هيقف قصاده أكتر هو التوزيع العبقري الفشيخ علي غير العادة، للسيد الأستاذ "تميم"..!

طول عمري باحب أسلوب "الكريشندو" في الأغنيات، التصاعد والتوتر اللي بيزيد مع كل جملة لحنية في الأغنية، في الأغنية دي، مفهوم الكريشندو اتطبق صح، معندناش مذهب وكوبليهات لأ، عندنا جملة بيحصلها تصاعد لحني، وتوزيع ممتاز...


"علشان أعيش جربت ولا مليون طريقة..
وعرفت غيرك..بس حبك صعب نسيانه...

وعرفت غيرك بس حبك صعب نسيانه...

بكون معاه وفى بالى انت والحقيقه 
بغمض عينيا وبتخيلك مكانه..."


من بعد الجزء ده الاغنية بتبدأ تسخن بقي وبتبقي جميلة، حاولو تسمعوها بجد، لأنها تستحق..!

الأغنية تستحق 10/10

6. ياعيون.
كلمات: أحمد المالكي، ألحان: شريف بدر، توزيع: توما.


دايما عندي مشكلة مع أغنيات الغزل، مبعرفش أحكم عليها بمقاييس ثابتة، ساعات باحكم عليها من اللحن، وساعات مرة تانية م الكلام، وساعات بتكون توتالة كدة برزقها، الغنوة دي من النوع ده، عجبتني لأنها أغنية Slow وعجبني الكلام بتاعها جدا، وحاساها تنفع يترقص عليها، بس مش حاساها مش عارفة ليه...

التوزيع إلي حد ما مزعج بعض الشئ، كان من باب أولي انها مثلا تتغني بمصاحبة بيانو أو كمان، كانت هتكون اجمل بكتير لو تامر غناها ف نفس واحد زي أغنية "رسالة" مثلا، لكن استخدام الكورس فيها أفسد جوها الرقيق، وأضفي عليها صخب كان من الممكن الاستغناء عنه.

تستحق تستحق 5/10

7. حبيبي خلاص.
كلمات: محمد مصطفي ملك، ألحان: محمود أنور، توزيع: إلهامي دهيمة.


لالا يا جماعة لأ، مش معني ان عمرو دياب بيعمل أي كلام يبقي نقلده ف الأي كلام ده، الأغنية دي مش حلوة بصراحة، ولا حسيتها ولا لقيت فيها جديد لا كلاما ولا لحنا ولا توزيعا، تقليدية، أغنية تليق بسنة ألفين وستة، ألفين وأربعة، مفيش فيها غير شوية لعب التكنو اللي ف الاخر، غير كدة بلح...

الغنوة تستحق 2/10


8. بطلة العالم في النكد.
كلمات: تامر حسني، ألحان: عبد الرحمن شوقي، توزيع: تميم.


اللي شدني ف الغنوة دي، الكوميديا اللي فيها، من قبل ما اعرف أي حاجة، كنت عارفة اللي كاتبها هو "تامر"، والايفيهات دي طبعا افيهاته، اللي بأمانة في الغنوة دي حلوة "مبروك كسبتي معانا جايزة أحسن تكشيرة" 

صياعة تميم في الأغنية دي، انه مزج رنة الموبايل باللحن، وخلا لحن "عبد الرحمن شوقي" حرك كدة وفيه سلاسة، خصوصا اخر جزء "أيوة يا حبيبتي، بنت حلال، كنت لسه بشكر فيكي" :D 

الأغنية كتوتال لطيفة وتستحق 6/10

9. احساسي مبيكدبش.
كلمات: تامر حسني، ألحان: تامر حسني، توزيع: هيثم راضي.


عجبني التوزيع، وانترو الأغنية شدني ليها جدا، وحسيت ان وراها حكاية كدة، لكن للأسف طلعت أغنية متوسطة اللحن، متوسطة الكلمات، ياريت يا تامر ترفع ايدك شوية عن الكتابة والتلحين، الاغنية بأمانة ما فيها حاجة واحدة مميزة أكتر من التوزيع، والراجل اللي وزع الاغنية ده، نفخ ف الغنوة الروح وخلاها أجمل ما يمكن..!

6/10 هي اخر ما يمكن ان تنول هذه الأغنية.

10. كان فيه واحدة.
كلمات: سلامة علي، ألحان: محمد يحيي، توزيع: تميم.


معرفش ليه الغنوة دي فكرتني بأغنية "أعرف واحدة" مع الفرق ان سوما كانت بتحكي علي نفسها بصيغة واحدة تانية، بس تامر بيحكي علي مين؟ صاحبته؟ معرفش...الموضوع ويرد شوية بس الغنوة عامة حلوة، الكلمات جميلة، ورقيقة، بس التوزيع مكرر فششششششششششششششششششششخ، ميتين أم توزيع تميم بصراحة، ونعتذر عن الفاصل الأبيح ده بس تميم بيطلعني من هدومي بصراحة..!

أغنية لطيفة تستاهل 8/10

11. يا بعيد.
كلمات: نادر عبد الله، ألحان: تامر علي، توزيع: ياسر ماجد.


نادر عبد الله أسطي وتقيل، وكلنا عارفين كدة، والغنوة دي أكبر دليل، طول عمري باحب أسمع صوت تامر في حاجة قريبة للمقسوم الشرقي، زي أغنية "لأول مرة" كدة، في الغنوة دي، تامر علي قدم لحن يشبه كدة، صوت تامر الدافي بيلمع في الحتت دي زي: 

"لك ناس فاكراك، هنا ولا كنت هناك، هتغيب هتغيب، الله ف سماه ما انساك"

وبعد الجملة دي بيقدم تويست في اللحن كدة، انتقال م المقسوم الشرقي، لتون أهدي، انعطاف لحني جميل جدا، بيرجع تاني للحن الأصلي بعد كدة، الأغنية جميلة ودافية بصراحة..

تستاهل  8/10



12. كداب وأناني.
كلمات: أمير طعيمة، ألحان: تامر عاشور، توزيع: طارق مدكور.


أيوة بقي، تعاون التامرين طبيعي يطلع منهم حاجة جميلة، لأول مرة يتعاون تامر عاشور مع تامر حسني، ويطلعو بغنوة جميلة زي دي، أغنية "غاضبة" والتوزيع المعتمد علي "الجيتارات الكهربا" موفق من أستاذ كبير زي "طارق مدكور"...

كلمات هجومية عظيمة من "أمير طعيمة" اللي معودنا علي أغاني الحب والسهوكة بقاله كتير، لكن المرة دي، الكلام كله إهانة مبطنة وتجريح، وف الوقت نفسه بكل ذوق وأدب.

كويس ان تامر عاشور أخيرا طلع حاجة من تحت البلاطة لزمايله بدل ما بيحوش الألحان الحلوة ويبوظها بصوته في ألبوماته :D

الأغنية حلوة، تستاهل  8/10

13. شكرا انك ف حياتي.
كلمات: تامر حسني وأيمن عزمي، ألحان: شريف بدر، توزيع: تميم.


أيوة ليه أغنية زي دي يكتبوها اتنين؟؟ كاتبين الأطلال؟ وايه افتح ايدك تحت المطر؟ وامسك الهوا بايديك؟ وليه اللفة بنت الجزمة دي..! جري ايه يا جماعة انتو بتارجتو ناس عندها اتناشر سنة بالأغنيات اللي زي دي؟

صيييييييفر، قصدي الغنوة تستحق 2/10

14. رحلة الحياة.
كلمات: أيمن بهجت قمر، ألحان: وليد سعد، توزيع: أحمد ابراهيم.


الغنوة دي من نوعية "اللعب في المضمون"، هات كلام من أيمن بهجت قمر، هات كلام من وليد سعد، وابعتها لأحمد ابراهيم، و فوالا، أغنية جميلة..!! الموضوع نفسه مش جديد، بس مفرداته جميلة وراقية، بصراحة هو أشبه بتتر مسلسل، فكرني بتترات مسلسل "فرق توقيت" بتاع تامر اللي عمله من سنتين، تتراته بصراحة عجبتني أكتر من المسلسل نفسه.

"قلوب بتتبدل، عناوين بتتغير..
غربال وبيغربل، وقت اللقا قصير.."

التوزيع يمكن كان محتاج يكون أهدي شوية، لكن بصراحة الأغنية جميلة وتستحق توتالة 8/10


7/10 الألبوم توتال يستاهل سبعة، لأسباب كتير، ولو شلنا منه الأغنيات الحشو هيبقي أفضل من كدة بكتير..!



شكرا تامر علي النضج النسبي في الألبوم،واتمني الموضوع ده يتكرر، وشكرا علي انك قللت أفيهاتك السخيفة جدا، ورفعت ايدك واديت فرصة لناس جديدة تشتغل معاك، شكرا لأنك بدأت تحترم عقل جمهورك، وشكرا لأنك تعبت ف ألبوم زي ده، وفي انتظار كليبك الجديد وكلي شوق لألبومك الجديد..!






 
Reem Essam Cairo , Egypt | copyrighted2011 - Reem Essam