تجربتي مع الاكتئاب..--معاناة السنين!

الاكتئاب مرض، مرض زي أي مرض، زيه زي الأنفلونزا والإسهال، والنزلة الشعبية، اللي مبيقدرش يميز الفرق ما بين الاكئتاب والأزمة النفسية العابرة، عنده مشكلة، وكمريضة اكتئاب ضليعة فيه، من سنين، أقدر أقولك أهم الأعراض اللي ممكن تميز بيها مرض الاكتئاب من الأزمة العادية...

- مرض الاكتئاب هو مرض مزمن، لا يمكن الشفاء منه، فقط يمكنك التعايش معه والتحايل علي آثاره، وماهو إلا معارك بينك وبينه، ممكن تنتصر ف بعضها، وممكن تخسر جولة أو اتنين، بس متسيبهوش ينتصر عليك ف النهاية.


--هذا البوست شخصي بحت ولا يعتمد علي أي تجربة طبية غير تجربتي الشخصية.

1- مرض الاكتئاب مرض عضوي، بيحصل في الأساس بسبب خلل في النواقل العصبية، او بسبب خلل في فيتامين B أو بسبب حاجات كتير بغض النظر عنها، بس هو مرض، ومرض مزمن، وغالبا مبيخفش.

2- مريض الاكتئاب مش ب"يخف" من الاكتئاب، مريض الاكتئاب بيتعايش معاه، وبيتعامل معاه، وأي أدوية بتتاخد دورها بس التقليل من حدة الأعراض ليس إلا.

3- الاكتئاب بيتم التعايش معاه والسيطرة عليه من خلال أكتر من حاجة، منها إرادة المريض نفسه، جلسات العلاج النفسي، الجانب الروحاني، لو موجود عند المريض، دعم الأسرة والأصدقاء، جلسات علاج جماعي، التواصل مع مرضي تانيين بشكل مستمر.

4- الاكتئاب، الذهان "البارانويا"، اضطراب المزاج، الاحباط، القلق، كل دي سلسلة أمراض مرتبطة ببعض، أشهر اتنين مرتبطين ببعض عالميا هما Depression & Anxiety.

ايه هي أهم أعراض الاكتئاب، أو بمعني أصح ازاي عرفت ان عندي اكتئاب ومزمن كمان :D



1- نوبات هلع:وقلق غير مبررة لأسباب واهية جدا، ضربات قلب سريعة، عرق زيادة، تعب، ارهاق.

2- اضطراب الأكل:
 سواء بالزيادة أو بالنقص، عن نفسي جت عليا أيام "ولسه بتيجي" ممكن أتغدي فيها ست سبع مرات، أفضل أكل لحد ما أرجع، وأيام تانية ممكن أفضل طول النهار مباكلش أي حاجة خالص، ومقتنعة اني مرتاحة كدة، فيه أيام طويلة عشت فيها علي النسكافيه البلاك.

3- عادات ادمانية:
 ادمان السكس، سواء بالفرجة أو الممارسة المتكررة، الي ممكن تكون مؤلمة أحيانا، وانتا مش محتاجها، بس محتاج توصل لاحساس الأورجازم وخلاص، ادمان السجاير، انا عن نفسي ف اخر سنة من عمري، اتعلمت شرب السجاير، والشيشة، بطلتهم بس من وقت للتاني برجع لما بكون متدايقة بحتاج أنفخ ف أي حاجة، أفرغ غضبي.



4- اضطراب النوم:
وصلت لفترة قبل ما أكتشف ان عندي اكتئاب بالمعني المرضي اني مكنتش باقدر أنام، استعنت فيها بكل الأدوية الي ممكن تنيم ف الكون، سواء أدوية الحساسية، الكحة، أدوية الضغط العالي، المسكنات القوية، حتي الأعشاب المهدئة، اضطراب النوم بردو بيبقي ف النوم المتقطع، الاحلام المزعجة المتكررة، وهكذا، اي حاجة تنغص عليك نومك وتقومك تعبان أكتر من الأول.

5- الموت..!
التفكير في الموت من أكتر الحاجات اللي بتحصلي كمريضة اكتئاب، يعني بمعدل مرتين تلاتة في اليوم، بافكر ف الموت، وانا باعدي الشارع بفكر "هيحصل ايه لو رميت نفسي قدام المقطورة دي"، وانا ف البيت "هيحصل ايه لو رميت نفسي من البلكونة؟".

6- الحوار الطويل مع النفس:
خصوصا في فترة الصبح، منبهك يرن تقوم تروح الشغل، تبدأ تسأل نفسك "هو انا لازم أروح الشغل" ماهو انا لو نزلت هتخانق، ولو اتخانقت هترفد، ولو اترفدت همشي ف الشارع أكلم نفسي، وهيقولو عليا أهبل- فاكس شغل النهاردة".

الحوارات دي مع النفس وصلتني لأني مكنتش بقدر أروح شغلي بالأسبوع أو أكتر، الموضوع مكانش دلع قد ما اني كنت فعلا تعبانة.



7- اللامبالاة:
بيتك بيتحرق؟ فاكس، شعرك بيقع، فاكس، سنانك بيوجعك...مش مهم...اللامبالاة الشديدة كأنك بتحشش من فترة طويلة هي سمة وعرض فشيخ للاكتئاب، انتا أول واحد بتقع ضحية الاهمال ده، صحتك، مظهرك، تصرفاتك، مبيبقاش ليك طققان تقيس تصرفاتك هتأثر ف مين، ولا هتعمل ايه، بتبقي فعلا مش فارق معاك...

مكنتش بنزل شغلي رغم امي، وأبويا، وصاحبي اللي بيقولي مستقبلك هيضيع، فعلا مش بتشوف نور ف اخر النفق، غير نور القطر اللي جاي يدوسك.

8- الرمادية:
كأنك ماشي في دوامة من اللون الرمادي، كل شئ قاتم معتم، مفيش ابتسامة أمل، ساعات بتتدايق من صوت الناس العالي، او انبساطهم، بتحس انك عاوز تفضل جوة قوقعتك كتير.



9- العزلة:
كنت بقفل موبايلي كتير، أو باعمل Divert للمكالمات، مكنتش ببقي عاوزة أتواصل مع أي حد، بتواصل مجبرة مع ماما أو أخواتي، دايما باهرب بالنوم، او تمثيل النوم، عشان محدش يكلمني.

10- قلة الحموم:
آخر مرة قبل ما اكتشف مرضي اللطيف، فضلت تقريبا 7 أيام من غير ما أستحمي، طبعا مش قادرة أوصف الاحساس القذر ده كان عامل ازاي، بس وقتها كنت حاسة ان جسمي قزاز لو المية لمسته هيتكسر.


دي فيما سبق أهم الأعراض اللي انا مريت بيها كمكتئبة عظيمة، وأرجو انكو تستفيدو منها ومن تجربتي ولو أي حد يحب يسأل ممكن يسألني علي تويتر ف أي وقت :)




تعليقات

  1. نفس اللي حصل لي ٧ سنين مُتصلة
    علاج و انتكاسات و تفكير مستمر في الموت و انتظاره و لما اتأخر فكرت أروح له بنفسي .
    كنت اضعف من رماد السيجارة .. كنت قليلة الحيلة و مليانة هواجس .
    الحمد لله انا اللي كسبانة لحد دلوقت
    ٥ شهور بدون أدوية و بدون نوبات خوف و بدون اي افكار سلبية .
    انا بحبك أوي يا ريم ❤

    ردحذف
  2. نفس اللي حصل لي ٧ سنين مُتصلة
    علاج و انتكاسات و تفكير مستمر في الموت و انتظاره و لما اتأخر فكرت أروح له بنفسي .
    كنت اضعف من رماد السيجارة .. كنت قليلة الحيلة و مليانة هواجس .
    الحمد لله انا اللي كسبانة لحد دلوقت
    ٥ شهور بدون أدوية و بدون نوبات خوف و بدون اي افكار سلبية .
    انا بحبك أوي يا ريم ❤

    ردحذف
  3. حضرتك بتعاني من اكتئاب وهذا واضح جدا ولكن الغير صحيح هو عدم استمرارك وإصرارك على ايجاد الدواء الفعال المتناسب معك تحديدا وهذا امر لايدرك اهميته مريض الاكتئاب وخصوصا بعد تجربة عدة أنواع دون فعالية كاملة... لا تتوقفي عن إيجاد التوليفة المناسبة لك حتى لو احتاج الامر ان تمضي حياتك في تجربة الادوية. لانه عندما يعمل الدواء ستولد شخصية داخلك جديدة كنتي قد نسيتيها منذ زمن ساحق وطويل..

    ردحذف
  4. الكلام المكتوب فعلا يزيد الياس كنت اتمنى اني الاقي ملام ايجابي بيشجع ويحفز ارجو من الكل عدم تحبيط مرضى الاكتاب لانهم بحاجه الى امل وتشجيع مش تحبيط وتشاءوم الي فينا كافينا يا جماعه

    ردحذف

إرسال تعليق

تعليقك يسعدني..يا أفندم!

المشاركات الشائعة