الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

28 ديسمبر 2015

كشف حساب 2015.

قبل ما السنة الجديدة تخلص، ونقعد نقول باي باي يا ويسخة ومع السلامة يا سنة بنت مرة، والكلام الهري ده، انا قررت ولأول مرة من تلات سنين، اني اعمل كشف حساب مع نفسي كدة، بالهداوة  والقانون، وأعرف كدة راسي من رجلي...عشان نشوف احنا هنكرر اخطاء الماضي ولا هنعمل اخطاء جديدة..!

مبدأيا مش فاكرة غير اخر راسين سنة، ف راس السنة 2014، كنت سارحة مع صحابي ف شارع جامعة الدول العربية، كلنا فراخ مندية عند العمودي، وضربنا ميلك شيك من سينابون، ومكانش ف جيبي غير خمسة وعشرين جنيه، بس صحابي كانو حواليا، وكنت مبسوطة فشخ...مبسوطة فشخ بمعني الكلمة، كنت أسعد انسانة ف الكون، ياريتني فضلت مفلسة وصحابي حواليا، جيس وات، انا مفلسة ووحيدة دلوقت :D

راس سنة 2015، كنت متنيلة شغالة ف الشركة اللي انا بستقيل منها دلوقت، كنت قاعدة لوجن، ولحد الساعة تسعة، ولابسة زعبوط، وعندي كمية تشوكليت رهيبة ع المكتب، وجنبي بلالين، بس كنت لوحدي، كنت شغالة بس لوحدي، كنت مطحونة، ومكنتش مبسوطة....سمر ساعتها كانت لسه بتكلمني، وكنا صحاب، بس مكناش كلوز زي السنة الي قبلها، وكانت دخلت تشتغل ف نفس الشركة.

بما اننا بقي ف طيز السنة، لا مؤاخذة للناس اللي بتتكسف، وبما انها كانت سنة وصخة علي دماغ اللي خلفوني، فقررت أعيد حساباتي، واقولكو انا خسرت ايه وكسبت ايه...

الخسارة :D

أولا: خسارة الناس:
1- خسرت سمر في مارس 2015.
2- خسرت يارا، لالا يارا كانت ف أكتوبر 2014، ومن بعدها مكلمتنيش تاني :D
3- بطلت أكلم نورهان وايمان، ماهو الصاحب الناقص بناقص بقي.
4- فقدت التواصل بشكل تام وكامل مع جنس النساء.


ثانيا: خسارة الشغل:
1- استقلت من شغلي، مش هقول علي اسمك يا فودافون "باي باي يا وسخة فعلا"
2- قررت ولآخر مرة وبلا رجعة اني مشتغلش تاني ف الكومبيوتر ساينس وابل ورقة البكاليريوس وأشرب ميتها.
3- فقدت التواصل مع فكري، أجمل وأحسن مدير اشتغلت تحت ايده من ساعة لما بدأت اشتغل.

ثالثا خسارة العيلة:
1- أبويا وأمي انفصلو :(
2- أبويا عايش لوحده وحالته تصعب ع الكفار..

رابعا خسارة الفلوس:
1- طلعت كريديت كارد وسحبتها كلها
2- استلفت السنة دي من طوب الأرض عشان انا مسرفة وايدي مخرومة.


المكاسب :D

أولا مكاسب الناس:
1- قابلته وحبيته
2- عرفت ناس جدعة جدا وزي الفل، كلهم رجالة طبعا، كمال، حسام، حمزة، أحمد فتوح، ناس زي الفل والله....

ثانيا مكاسب الشغل:
1- سبت المخروباااااااااااااااااااااااااااااااا
2- أخدت قرار اني مش هنشتغل كول سنتر تاني يا مني :D
المشكلة ان جيس وات: انا راحة اشتغل كول سنتر تاني، بس المرة دي بشكل مؤقت.
3- رجعت أذاكر تاني، وبشكل أقوي، وباصرار
4- رجعت اذاكر ألماني، واكتشفت اني بقيت اعرف اقرا كلمات فرنساوي وأربط المعني، يعني لو شديت ف الاتنين هبقي بتكلم أربع لغات!
5- اتاكدت اني لازم أشتغل الحاجة اللي بحبها، مش الحاجة اللي ماشية ف السوق.
6- بدأت شغل تطوعي وبالزم نفسي بيه، كعقاب، كخدمة عامة للناس، كنواية لحاجة أكبر ممكن استثمرها.
7- بدأت أفكر بشكل جدي  ف الهروب من مصر
8- بدأت أدور علي شغل برة مصر :D


ثالثا: مكاسب العيلة:
1- البيت بقي مكان أهدي للشغل والابداع، بعد خروج أبويا منه.
2- بقيت أنشط وبشتغل في البيت وبحط فيه فلوس بمزاجي مش غصب عني، ومحدش بياخد مني فلوس عافية.

رابعا: مكاسب الفلوس:
1- مفيش دين أم مكاسب فلوس، يلعن تلاتة ديك أم قطمة الوسط، مشفتش شلن زيادة فايدي من أول السنة.

علي الصعيد بتاع الكتابة:
1- بقيت أكتب بشكل منتظم، اكثر احترافية وعمقا.
2- اهتميت بجودة المحتوي، وبقيمته.
3- المزاج أصبح لا يتدخل أكثر من ذي قبل في الكتابة.
4- أصبحت أكثر انتاجية والحمد لله.

علي الصعيد بتاع الصحة:
1- اكتشفت ف السنة دي اني عندي اكتئاب.
2- بدأت اخد علاج يساعدني أحارب الاكتئاب.
3- أمي عملتلي الليزك.
4- تخنت فشششششخ  بس مسيري هخس.
5- شيشت، شربت سجاير، انحرفت فشخ.
6- دخلت ف نوبتين اكتئاب أعنف من بعض، واحدة منهم قعدتني أسبوعين ف البيت م الشغل، والتانية اللي انا ف اخرها دي، قعدتني شهر.
7- حبيت جسمي أكتر م الأول شوية، شكرا يا يوسف، نصايحك لسه بترن ف ودني لغاية دلوقت.
8- بطلت أفكر  ف الانتحار، انا بفكر ف التنفيذ.
9- شعري طول، الخبطة الجاية هجيبه زيرو زي ريانا.

اشتريت  السنة دي:
1- موبايل HTC ليا.
2-  موبايل هواوي بابا ومصطفي استخدموه.
3- حطيت فلوس ف تابلت ماما دفعت تمنه.
4- اشتريت موبايلين صغيرين لاخوواتي، واحد منهم اتغسل.
5- اشتريت سماعة سوني من فيرجن ميجا ستور.
6- كاميرا سامسونج جامدة فشخ

اه، وشفت فيلم تامر حسني ف السينما، ودي كانت تاني مرة أدخل فيها السينما من سنة 2006 :D

بس، ده كان كشف حساب السنة عامة، ومفيش حاجة تاني...
عامة، السنة مكانتش وسخة، انا اللي كنت جزمة وبنت ستين كلب....وشكرا...

27 ديسمبر 2015

صابر الرباعي: أسطورة نجم ينتهي..!

صورة من برنامج زافويس

ترددت كثيرا قبل كتابة هذه المقالة، مقالة عن أسطورة طفولتي ومراهقتي "صابر الرباعي"، مقالة عن فنان استمعت له منفردا طوال فترة دراستي وجامعتي، شرائط اشتريتها من كل مكان، كنوز التقطتها وسجلتها، حفلات بقيت أمامها مطولا أسمعها مرارا وتكرارا، بوسترات ضخمة علقتها علي حائطي، وأزالتها أمي لأنها تجلب ال"شياطين"، لكن للأسف، الشيطان الذي جلبته الصورة لم يبق في غرفتي، فقط دخل إلي عقل صابر.

بالأمس كان نهائي برنامج المسابقات الممل "زا فويس" واحد من عدة برامج تقدمها محطة MBC طمعا في جلب المزيد من الاعلانات للمحطة، بالأمس قدم صابر الرباعي أغنية جديدة، بالخليجية، كالعادة، لم أسمع الأغنية، أنفر بعض الشئ من الأغنيات الخليجية، لا ضير في هذا، فالأذن تستمع لما تحبه وليس لما يحب الفنان، لكن من الواضح أنه يستهدف الخليجيين فقط، ولا تعنيه مصر في شئ.

حاولت استرجاع آخر أغنية أعجبتني لصابر، كانت أغنية لمسلسل في رمضان الماضي اسمها "بنتخلق" لمسلسل "أحمد السقا" كانت أغنية درامية زاعقة، جميلة، قبلها لم أجد شيئا..!


لمن لا يعلم، صابر الرباعي هو الوحيد الذي أحتفظ له بأرشيف مترخ علي حاسبي الشخصي، كما لا زلت أحتفظ بمجموعة شرائط الكاسيت برغم أنها لم تعمل منذ أعوام طويلة، سأسمح لكم بإلقاء نظرة علي مكتبتي الشخصية:
صورة لمكتبة أغنيات صابر من كومبيوتري الشخصي.

كما ترون، بعد البحث والتمحيص، وجدت أن آخر ألبوم يستحق الاستماع قدمه لنا "الرباعي" كان في عام 2009، وهو ألبوم "واحشني جدا"، ثم أخذت الألبومات في الانحدار، ألبوم "عد حبايبك" كان مقبولا فنيا، وأتي في ضمن ظروف ثورة مصر وتونس، ثم الكارثة الكبري، ألبوم "أجمل مختصر"، سماعه أصابني بخيبة امل كبيرة، لا لقلة الأغنيات المصرية به، لكن لمستواه المرعب فنيا، مستوي لا يليق بفنان جديد.

لا أجد غضاضة في أن أقول أن ألبوم "سيدي منصور" الذي قدمه الرباعي من خمسة عشر عاما، أعلي فنيا من كل ما قدمه في السنوات الأخيرة، ومع كل السنجلز الخليجي، التي لا أجد لها داع علي الاطلاق..!

صابر وزوجته اخلاص


مستوي "الرباعي" آخذ في الانحدار فنيا، منذ أن احتلت أخبار "زواجه" و"طلاقه" صفحات المجلات والأخبار الفنية، منذ أن احتلت الاعلانات مساحة من كليباته لا يستهان بها، منذ أن صار يهتم بذكر "براند" ملابسه، عن أغنياته التي يقدمها، والتي هي من صميم عمله من الأساس.

بعض من الأسئلة التي تدور بخاطري منذ فترة طويلة:

هل أصيب الرباعي بالغرور الفني؟
سؤال مهم، الرباعي تخلي عن مرحلة الانتشار منذ زمن بعيد، انتشاره عامة ونجاحه الفني التام اكتمل مع عام: 2004، مع ألبوم أتحدي العالم، وبعدها بدأت رحلة الهبوط، عكس النجاح، بدلا من أن يظل علي القمة، كعمرو دياب مثلا، بدأ في الهبوط، البطئ أحيانا، والسريع مؤخرا.

علي يقين أنا من أنه فنان، يحتاج للماديات والمظاهر كي يستمر بالشكل اللائق، لكننا أيضا بحاجة لفنه الجميل، الماديات لا تأتي بهذا الشكل الفج، والغرور الفني سيقتل صاحبه يوما ما.

الصورة من بوستر ألبوم الغربة

متي توقفت عن سماع صابر الرباعي؟
كما أسلفت، لم يقدم جديدا منذ ست أعوام، يصدر العديد من الأغنيات المنفردة الخليجي للأسف، أغنيات أسمعها بالصدفة ك "كش ملك - ولا انت حارس للنجوم" وغيرها، متي كانت أغنيات صابر تذاع خفية؟ وهي التي كانت تملأ الدنيا ضجة؟

ماذا قدم صابر الرباعي في ألبومه الاخير؟
في ألبوم "أجمل مختصر"قدم صابر الرباعي، توليفة من أغنيات "تونسية" والتي لا اعتراض عليها علي الاطلاق، و"خليجية" و"لبنانية" وأغنيتين مصرييتين، الاثنين من ألحانه، منها واحدة مهداة ل"وردة الجزائرية"، الأغنيتين مستواهما متوسط، ان سألت أي مار عن أشهر أغنيات صابر لذكر لك "أتحدي العالم" و"أجمل نساء الدنيا" و"خلص تارك" ولن تتعدي ذاكرته هذا الحد.

أغنياته أصبحت سريعة النسيان، لا بصمة لها، لم يعد يقدم الأغنيات بحب وضمير كالسابق، ومنذ أن أصبح يغني للسوق، فقد طبقت عليه معايير السوق، أشعر أنه أصبح غير حر، ان أخذت في الاعتبار تجربة ألبوم "سيدي منصور" وألبوم "أجمل مختصر" ستجد سيدي منصور أكثر حرية وانطلاقا من "أجمل مختصر" فسيدي منصور حمل الأغنيات التونسية، المصرية، الخليجية، القصيدة، وهو ما عمل صابر علي تجاهله بشدة في كل ألبوماته بعد ذلك.

حتي صوته القوي، توقف عن استعراضه، واحساسه الشجي، لم يعد يصلنا، جل اهتمامه أصبح علي شعره المستعار "المبالغ في منظره"، ونوع بذلته، وزوجته الجميلة وابنه الأصغر، وبرنامج "زا فويس"، أما الشئ الوحيد الذي سيبقيه حيا بعد مماته، وسيخلده في التاريخ، لا يهمه...لا يهمه علي الاطلاق...

شكرا يا صابر، شكرا علي تاريخك الذي تنهيه بيديك..

22 ديسمبر 2015

كنوز مدفونة: نجوم سوبر ستار...

كعادة برامج المسابقات في عالمنا العربي، المغني من دول يكسب ولا يتشهر، يعمل أغنية، تنجح، ينام جنبها....
النهاردة بقدملكم تلات أغنيات، من اجمل الأغنيات اللي سمعتها في حياتي عامة، التلاتة من مشتركين برنامج واحد "سوبر ستار"، الحقيقة معنديش فكرة هل كانو ف سيزون واحد ولا لأ، بس هما عامة انتهت حدود شهرتهم عند الأغنيات دي:

1- أيمن الأعتر:

أيمن مغني ليبي، شارك في سوبر ستار من قرابة ال11 عام، أغنيتنا التي سنعرضها اليوم له هي أغنية " بحبك"، أيمن اتجه بعد الأغنية لدراسة الطب في ليبيا، ثم عاد وللغرابة الشديدة العام الماضي بألبوم "حال الأوادم" "خليجي"!!! ولم يحقق نجاحا يذكر...

الأغنية من كلمات: أشرف أمين - ألحان: محمود خيامي - توزيع: عادل عايش



الأغنية حملت قدرا كبيرا من الاجادة علي الصعيد اللحني، أداءها ليس بالسهل علي الاطلاق، يحتاج لنفس وطاقة صوتية كبيرة، أميز ما في الأغنية هو "توزيعها"، في هذه الفترة نشهد نشاطا فنيا كبيرا لعادل عايش كموزع، مثال علي أعماله الجميلة "أخاصمك اه" لنانسي عجرم، التي أتت بدايتها في نفس تلك الفترة تقريبا.

2- ديانا كرازون:

ديانا كرازون، شاركت في سوبر ستار في نفس الفترة تقريبا، 2003، أو 2004، الأغنية التي سنعرضها لها اليوم هي "انساني ما بنساك"، أردنية الجنسية، ديانا، فازت بلقب البرنامج، وانتشرت أخبار فوزها وأحدثت صدي واسع في العالم العربي، لم تستغل ديانا نجاحها بشكل أو بآخر، اهتمت بشكل أكبر علي تغيير شكلها، فقامت بعمليات لتصغير المعدة، نجحت فعلا في تغيير شكلها وتقليل وزنها، لكنها لم تحافظ نهائيا علي وزنها الفني، قدمت أعمالا شهدت تراجع فني، قدمت برنامجا علي قناة النيل للمنوعات، لكنها استمرت في النجاح المتواضع، ولم تستثمر قدراتها الصوتية الكبيرة.

ظلت ديانا بلا هوية فنية حقيقية، فلا منها قدمت نجاحا باللون المصري، أو اللبناني، أو الأردني، أو الخليجي، أو المغاربي، أعتبرها الآن مغنية كالماء، لا لون ولا طعم ولا حضو، وجه جميل وابتسامة زجاجية فقط...

الأغنية من كلمات: سمير نخلة - ألحان: طارق أبو جودة - توزيع: هادي شرارة.


بشكل أو بآخر الأغنية تذكرني بأول أغنية ل"يارا" وهي "اتوصي فيي" يمكن لأن الملحن واحد، لكنني لما أسمع واحدة، أتذكر الثانية، التوزيع قريب، اللحن قريب،  ويمكن أن اللحنين "بهتو" علي بعض من "طارق".

3- سعود أبو سلطان:

اماراتي من أصل فلسطيني، في نفس البرنامج ظهر "سعود" وحملت أغنيته اليتيمة التي نعرفها عنه "سر العذاب" حبا جارفا من كل بنات مصر وقتما ظهرت، أذكر صديقة لي كانت تغنيها بدلا من النشيد الوطني في طابور الصباح.
لا نعرف الكثير من المعلومات عن "سعود" لكنه علي كل الأحوال ناشط فنيا، لكن في منقطة الخليج، كعادة مطربي الخليج، انتشارهم المحدود واصرارهم علي الغناء بلغتهم وعدم التجديد هو ما يحجم شهرتهم بشكل كبير، لكن جمهورهم متنام وفي ازدياد، وهم بالكاد في حاجة لنا ولرأينا الفني فيهم، لذا أغنية سعود التي معنا اليوم "وبعيد - سر العذاب" قدمها باللهجة اللبنانية، أيضا في سنة 2005، او 2004.

الأغنية تقريبا من كلمات: نزار فرنسيس ومن ألحان: سمير صفير، ولم أتوصل للموزع.


من نوادر الأغنيات التي شدت انتباهي من أول مرة سمع، تماما كأغنية "داقت بيك" لصابر الرباعي، أول مرة عانقت أذني كانت في "راديو سوا" تذاع ما بين الفواصل الاخبارية، أحببتها، لكنني لم أتوصل للمغني، وبعد زمن الانترنت، وصلت لها وتعلقت بها، وأحببت الأكورديون في بدايتها.

أغنيات مر عليها أكثر من 12 عام، لكنها ظلت حية في ذاكرتي، رغم اهمال أصحابها لها، شكرا لكم علي أية حال..!


14 ديسمبر 2015

6 أغنيات ستذكرك ب "حسن فؤاد" !

قلما تجد في الوسط الفني مطربا يتمتع بخفة الظل، وجمال الصوت والرقة والبعد عن الابتذال، حسن فؤاد جمع بين كل هذه الصفات، صوته كان خفيفا رخيما، من أجمل ما يكون، لكنه لم يستمر طويلا، وغاب ولم نجد له أثر حتي الآن.




فيما يلي، بعض من أعمال حسن فؤاد الجميلة، أغلبها حمل توقيع عمار الشريعي، ومعظمها كانت تترات لأعمال درامية، أغلبها ارتبط بشهر رمضان الكريم، وبقيت في ذاكرتي لأستعيدها معكم ولنتمتع سويا :)



1- تتر بداية أرابيسك - 1993.
سيد حجاب - عمار الشريعي
"وينفرد من بين ايدينا الزمان..كأنه سحبة قوس..ف أوتار كمان.."


2- تتر نهاية أرابيسك- 1993.
سيد حجاب - عمار الشريعي
"ويرفرف العمر الجميل الحنون ويفر و يفرفر ف رفة قانون"


3- تتر بداية علي بابا - 1995.
"سيد حجاب - عمار الشريعي"
"يا علي يا علي...يا عترة يا فللي...وحياة سيدنا الولي..فين انتا يا علي؟؟"





4- تتر نهاية علي بابا - 1995.
سيد حجاب - عمار الشريعي
"واقفل بقي يا سمسم..يا لولي يا مسمسم.."


5- تتر مسلسل الوتد - 1996.
أيمن بهجت قمر - محمود طلعت
"فيه ناس بتمشي علي الطريق...لما التعب بيحل.."

كما شارك "حسن" أيضا بدور "عبد الباقي" في نفس المسلسل، وكان ممثلا خفيف الظل جيد الحضور.


6- أغنية أيوة سيدي.
كلمات وائل هلال - ألحان عمار الشريعي
كعادة كليبات التسعينيات، كانت عبارة عن فيلم لطيف قصير، أتي هذا الكليب، الذي ظل ضيفا لفترة طويلة علي "مجلة الأغاني"، أدي حسن فيه دور "العريس" و"المغني"، وكما نري في الكليب، العريس والعروس "جلوس" والفرح فيه "فقرات"، والله يرحم الزمن الماضي.





كنوز مدفونة: مباراة زوجية - محمد محيي ودنيا سمير غانم.

اليوم وبمناسبة الشتا، ولظروف النوستالجيا الجميلة، المرتبطة بذكريات كتير أوي، النهاردة أغنيتنا أغنية مميزة، مش كل الناس تعرفها، أغنيتنا كانت تتر لمسلسل قديم، بقاله تقريبا 10 سنين...أغنية تتر مسلسل "مباراة زوجية".



الأغنية من كلمات: أيمن بهجت قمر وألحان: محمود طلعت.

التتر مميز علي أكثر من صعيد، أولا لأنه كان تتر لمسلسل مميز ومن اخراج مخرجة مميزة "إنعام محمد علي" وتأليف الست العظيمة "نادية رشاد"، وبطولة وجهين من أجمل الوجوه اللي طلت ع الدراما مؤخرا، "هنا شيحة" و "أحمد شاكر عبد اللطيف".

المسلسل بالتتر، بالأحداث، بالأبطال، كل ده معلق معايا بشكل غريب، كأنه كان امبارح، لدرجة اني ساعات بشك ان المسلسل ده كان حقيقي، لأني تقريبا ممكن أكون الشخص الوحيد اللي فاكر المسلسل أو حافظ تفاصيله، لدرجة ان التتر كل ما بسمعه بتنتابني القشعريرة.

ده لينك لأعلي جودة للأغنية للي يحب يسمع وهو بيقرا عامة:



الأغنية بتجسد الحوار بين صوت محي، وهو صوت قوي لكن بنوت قليل، وصوت دنيا العالي، الأغنية اتعملت وقت ما كانت دنيا سمير غانم غير معروفة بالكلية، كانت لسه مصورة مسلسل "للعدالة وجوه كثيرة" ومش ناس كتير تعرفها، ولا كانت مثلت كتير، ولا كانت غنت كتير.

الأغنية هادية لطيفة، بتتغني من مقام وسط ما بين صوت محي ودنيا، محدش فيهم بيعلي ع التاني، دنيا استخدمت فيها قدراتها الصوتية بشكل لطيف جدا، وأداء عالي باحساس عالي من محي كالعادة.

بتدخل كلمات الأغنية علينا بعد صولو من قانون وجيتار، ثم كمنجات استكمالا لمذبحة الوتريات الشاملة..!

تبدأنا دنيا بالأغنية يليها محي:

"من منطلق الحب، والحدوتة الأزلية..
من أول قصة حب، ولحد القصص الجاية...
واللعبة هي هي...اللعبة هي هي.."

"من يوم ما ادم وحوا، 
كانو ف الجنة وحديهم..
واللعبة دايرة ما بين اتنين..
بيحبو بعضيهم..
بمنتهي الأنانية...
بمنتهي الأنانية..!"

الكلام عامة ثقيل جدا، لكن اللحن لأنه لحن تقيل، ومميز شاله، وخلا أداء كلمات زي "أزلية" و "لعبة" و "أنانية" سهلة في الأداء وسلسلة في الغناء.



بداية الكوبليه لدنيا أيضا:
"ليه نتعاند ونشقي..
ما نتلاقي ف طريق..
مخلوقة قلوبنا عاشقة...
من قبل أي شئ..
مادام جوانا...فينا..
مشاعرنا ودفينة..
ياريت ناخد وندي..
مرة بحق وحقيقي.."

ثم عودة للازمة الأغنية الجميلة:


"من يوم ما ادم وحوا، 
كانو ف الجنة وحديهم..
واللعبة دايرة ما بين اتنين..
بيحبو بعضيهم..
بمنتهي الأنانية...
بمنتهي الأنانية..!"

كوبليه آخر بنفس التيمة الهادئة، فاصل من الوتريات العبقرية، ثم الكوبليه الثاني بقيادة الكابتن "محمد محي":


"الحب ايدين تطبطب...
وحنية وحنين..
وحضن ف يوم ما نتعب..
ودوا للمجروحين...
خليك دايما ف طوعه..
لا تضيع زي اللي ضاعو...
خرجو م الجنة قبلك..
هتخرج انتا منين..!"

واللازمة مرة أخري:

"من يوم ما ادم وحوا، 
كانو ف الجنة وحديهم..
واللعبة دايرة ما بين اتنين..
بيحبو بعضيهم..
بمنتهي الأنانية...
بمنتهي الأنانية..!"

عبقرية الشاعر هنا في الربط ما بين نهاية الكوبليه الأول واللازمة "خرجو م الجنة قبلك"  - "ادم وحوا"، تتجلي في كلمات الأغنية ككل، الأغنية تلخص بشكل عظيم موضوع المسلسل "مباراة زوجية" فكان من اللازم أن تكون الأغنية علي شكل دويتو أيضا حوار ما بين امرأة ورجل، آدم وحواء...حوار بديع كان من اللازم أن يضاف لقائمة الكنوز المدفونة !

12 ديسمبر 2015

أنواع الAgents في الكول سنتر..!

فيما يلي أهم أنواع الAgents الي ممكن تقابلهم ف أي فلور ممكن تشتغل فيه لباقي عمرك..!

أي تشابه بين البوست والواقع فهو أكيد مقصود D:


1- محصل النور.


زميلك الشبح اللي بيدخل الفلور علي دماغه ايس كاب -لو شتا- وكاب -لو صيف- وحاطط ورا ودنه سجارة، أو لبانة، علي حسب هو مدخن ولا لأ، ملوش دعوة بحاجة غير زمايله الرجالة اللي ف سنة، بيتراوح عمره ما بين التلاتين وانتا طالع، وبيحب التيشرتات البولو المخططة بالعرض أوي، وبينشي ياقة القميص.

بيحب يشرب شاي العروسة كتير، وغالبا بيجيب أكل من البيت ف عمود أكل مراته عاملاهوله.

2- أم المصريين:

مطبخ الفلور، ماشية بعلب ومعالق وأطباق وسكاكين، معاها تشيز كيك، كفتة، كبيبة، مكرونة بشمايل، جلاش، أي حاجة كانت بتعكها ف المطبخ ف اليوم الي قبلها، غالبا بتبقي بنت، وبترسم علي حد معين، وبتستعرض مهارتها ف الطبخ عشان توقع خروف ما مش واخد باله منها.

بتفضل نوت ريدي كتير ونادرا لما بتشوفها علي الStation بتاعتها عشان الهانم بتوزع أكل.

3- كهرمانة لمي عيالك:

الأم المصرية الأصيلة، بتفضل طول النهار قاعدة ف الفلور ع الموبايل بتطمن علي ولادها مع أمها واخواتها، وطول النهار تشير ف صور ولادها ع الفيسبوك فبتضطرك تعملها Unfollow، طول النهار صور بوس وقلوب، وصفحة Super Mama وغالبا بتشير صور فيها دعوات للأطفال الصغيرين وبوستات العيال التايهة..!

بتبقي راشقة ف أي سواب لشفتات الصبح، بتلاقيها بتسواب بطفاسة، عشان البيت والعيال..!

4- باربي:

نازلة تشتغل عشان حست بالفراغ، دايما قدامها كوبايات Starbucks والجزمة الماركة، والشنطة الغالية، شعرها مفرود كأنها مش بتستحمي ابدا، والميكاب لا يفارق وجهها.

غالبا بتلاقي باربي عاملة Ranking ابن حرام، طالعة قبل الأخير ع الفلور، ومع ذلك محدش بيمشيها :D وبتبقي من أول الناس اللي بتترقي :D

باربي بيبقي ملموم حواليها كمية ولاد مثيرة للغثيان كلهم بيحكوها وباربي عامة بتكون مبسوطة بالضجة دي.


5- عب-راشق:

وده بيكون مزيج من محصل النور وخالتي اللتاتة، بالاضافة لبعض اللزاجة والسماجة، هو السوبر فايزور بيقبض كام؟ هو المانيجير بيقبض كام؟ هو فلان اترقي ليه؟ انا كنت ف الشركة الساعة عشرة بالليل لقيت فلانة بتتكلم مع فلان، هي فلانة متجوزة، هو فلان طلق مراته ليه؟ طب مين طالع Top Performer الشهر اللي فات، طب هو طلع ي Support فين، طب مش عارف ايه...!

ده بردو بنرد عليه بنفس الفيديو الشهير للدكتور توفيق "ارحم دين أمي"..!

6- عماد حمدي:

القديم المترب، يا نينة بتاع الفلور، يقولك ممكن تشيل حضرتك النوت ريدي الفلور فيه عملا منتظرين، ما تقول ان فيه رش وتخلص، غالبا بيحب البنطلونات القماش، موصلتلوش موضة الجينز والتيشيرت، القمصان بتاعته فيها جيبين، بيحط فيه السجاير، والولاعة اللي عفا عليها الزمن، تقريبا بيعبيها بنزين..!

لما بيشوفك بيناديك ب"أستاذ فلان" و"أستاذة فلانة"، هو الشهادة لله مؤدب فشخ ومبيغلطش ف حد، لكن عماد حمدي فشخ ف نفسه..!

7- خطيبي:

أوسخ نوع من البنات ال Agents اللي ممكن تقابلهم ف حياتك، بتحشر كلمة خطيبي ف كل جملة بتقولها، عاوزة سواب عشان خطيبي بيقفش، جبت الطقم عشان خطيبي جابه، مش هاكل عشان هتغدي مع خطيبي، خطيبي هيعدي عليا يروحني، خطيبي هيرد علي الأرقام الغريبة.

عامة انا بسيب النوعيات دي تهري، كان عندي واحدة ف شغلي القديم كانت بتقول "أحمد مش عارف كذا" "أحمد هيعمل كذا" واتضح بعد كدة ان "أحمد" ده خطيبها، ومسافر الامارات، وبقاله تلات سنين منزلش أجازة، يعني طفشان من وش أمها..!

8- بكابوظة:

أتخن واحدة ف الفلور، يا بتلاقيها بتاكل، يا بتطلب أكل، يا بتشرب، ولو لقيتها قاعدة فاضية اعرف انها مستنية الديليفري، بتقولك بدل صباح الخير "انا جعانة" وبدل "مساء الخير" انا جعانة، عامة بتبقي عصبية فشخ، ولو عميل عصبها بتقلع السماعة تهبدها ف الستيشن، وتقوم تطلب أكل عشان تهدي أعصابها :D

بكابوظة مبتقولش للأكل لأ، حتي لو لسه واكلة، ذواقة فشيخة وطباخة أفشخ، بس مبتأكلش حد حاجة عشان هي بتاكل الأكل كله.

9- عبده المجنون:

الAgent المرووش بطبعه، بيتصرف تصرفات غريبة، ويبص بصات غريبة، وبيتحرك بشكل مثير للريبة، عامة حاول تتجنبه، لأنه ممكن يعمل أي حاجة حرفيا مع العميل، يزعق، يضرب، يكسر، حاول متقفش ف وشه كتير..

10- حمدي بادي بلدنج:

واحد كل شغلته انه ياخد المرتب من هنا، يروح يدفعه ف الجيم من هنا، عنده كمية عضلات غريبة عجيبة، لو اتكرع هيطلع صالة حديد من بقه، بيلبس باستمرار فانلات Cut عشان يبين الباي والتراي، وزمايله بيروشو عليه أحيانا ويركبو فوق كتافه، بس بيبقي جواهم نفسنة وحقد دفين بردو.

حمدي بادي بلدنج بيتلف حواليه شلة من البنات السيس زيه زي باربي بالظبط، بس هو ف الاخر بعد ما بيمشي ويصيع مع كل البنات دي، بيجري يتجوز بنت خالته اللي امه اختارتهاله عشان محدش ضامن اللي قالبة عداد من اللي راشة دواخل.

11- حمدية كورسات:

بنت كل شغلتها ف الحياة انها تحوش وتاخد ف كورسات، اشي انجليزي، اشي فرنساوي، اشي نتورك، اشي ميكاب، بتدور دايما علي سوابات عشان عندها كورس، الكورس ده عامة مش بيخلص، شغال للأبد، بتشوفها دايما ف المكان معاها شنط الكورس، ولما بتخلص بتتصور بالشهادة ع الفيسبوك، وتعمل Life Event وتفضل تعمل احتفالات وليالي ملاح :D

حمدية كورسات عامة بتبقي فاضية ومعندهاش أي حاجة ف حياتها، والكورسات شئ جميل وتملا حياة أي حد :D

12- المواطن المنطوي:

زميلك ، أو زميلتك اللي بييجو ويروحو م الشغل من غير ما حد ياخد باله، محدش بيبص عليه اصلا، بيعيش دور كيس البلاستك الشفاف، حتي لما بيستقيل محدش بياخد باله، دايما للأسف عايش دور عاطف ف فيلم "الناظر" مش فاكرك ياض".

بيبقي مكموش ف نفسه كدة، ملوش دعوة بحد، تحسه بيوشوش العميل، وربنا مبارك ف هدوءه جامد.

13- الفتاي:

زميلك اللي ماشي ف الفلور يفتي ف أي Information، حد مش عارف حاجة يفتي، حد مش فاهم حاجة يفتي، سوبرفايزور محتار يقف يفتي، بيفتي علي روحه، عامة بتسمع منه للعميل أحلي فتي: "بص يا أفندم هو انتا لازم تريح الراوتر الماتور بتاعه بيتحرق"، "لا ازاي يا أفندم، شركة TEData قطعت النت عليك ولازم تشتكيهم"، وخد عندك أي فتي بقي..!

ده حله تتجاهله لأنك لو تعاملت معاه هتتبضن..فكك منه أحسن..!


14- المسقط:

"ايه ده هو المرتب نزل؟" - "ايه ده هو السيستم واقع!" - "ايه ده انتو طلبتو أكل!"
نظام تشغيله بيستقبل المعلومة بعد حصولها بساعة، عامة بياخد شكل "هريدي" بتاع فيلم "مرجان أحمد مرجان".

هريدي ده بيكون أحلي واحد تعمل عليه نمرة وتقسم عليه وتضحك، وهو مش هيفهم أي حاجة أصلا...


15- بت بت..

زميلتك اللي عدي عليها سنين كتير ف اللوجن، شعر ايديها بدأ يطول، وحواجبها سحبت علي قورتها، وطلعلها شنب، وصوتها اخشن، وبقيت تشوفها من بعيد مش عارف هي واحد ولا واحدة ولا اتنين ولا مين..!

بتبقي خبرة ف أنواع المعسل، والشيشة، بتهزر بصوت عالي، بتسلم وبتطرقع بكفها مع الولاد، وبتسمع ضحكتها ف الفلور كله.


17- اه يا حوستي السودة يانا يامه:

زميلك اللي ماشي يكلم نفسه من العملا، والمدير، والأرقام، واقساط الجواز، والبامبرز، ومصاريف الولادة، المرتب بيخلص منه يوم تلاتة منه، وبيدور علي كل زمايله.
زميلتك بكابوظة كذلك لما مرتبها بيخلص منها يوم عشرة ف الشهر بتتحول تبقي "اه ياحوستي"، وبتدور تشحت من كل الناس.

نادرا لما بتشوف ملامح الابتسامة علي وش الكائن ده، مكتئب علي طول الخط، مبيضحكش غير لحظة نزول المرتب، او غياب المدير.

18- Zero Fucks Given:

زميلك/ زميلتك المكبرين الجمجمة طول الوقت، مفيش حاجة هامة أمه أصلا طول الوقت، لو الفلور ولع بتلاقيه وطي بسجارة يولعها :D 

زميلك ده بتلاقيه ف عز الرش يقوم يعمل شاي، بتلاقيه ف عز البرد ماشي بنص كم، بيكون منفصل بمزاجه عن الواقع، لا متابع كورة، ولا سياسة، ولا حمادة :D

19- تويتي:


بنات رقيقة، اخرها تشتغل ف حضانة مع أطفال صغيرين، أصواتهم أصوات أطفال صغيرة، كفوفهم رقيقة وصغيرة، الزمن لطهم وشغلهم ف كول سنتر زي ده :D بتقول "مش وصلت" - "مش شحنت"، لما بتقول قدامها "أحيه" بتتكسف ووشها يتحول ألف لون ولون D: البنات اللي زي دول بيتم التريقة عليهم بشكل ابن مرة، ممكن تقبح عادي جدا قدامهم وهما مش هيفهمو حاجة :D

20- الأب الروحي:

البوب اللي بتروحله لما تعطل ف أي حاجة، ريكويست واقف، مدير معصلج معاك، مصلحة مش عاوزة تخلص، عامة بيبقي راجل، عشان الستات بتضرب لخمة وبتاع، بيكون قديم وصايع وكبير ومعلم، ووجوده مهم ف كل مكان لأن من غيره الدنيا بتضرب..!


6 أغنيات ستوقعك في حب فريد الأطرش..!

طيلة عمري أستطيع التفرقة ما بين المغني الجيد، والمطرب العظيم والفنان، صاحب الابداع، الفارق ما بين المطرب العظيم والفنان العظيم يتجلي في العلاقة ما بين فريد الأطرش وعبد الحليم حافظ.

فريد الأطرش حالة خاصة، فنان استطاع أن يفرض وجوده علي الساحة الفنية طيلة 50 عاما، نجح في كل المجالات، تلحينا، تمثيلا، غناءا، حفلات، فنانا شاملا تخطت شهرته الحدود، غني بكل اللهجات الممكنة، وكان صديقا مقربا لملوك وأمراء ورؤساء، حتي جمال عبد الناصر نفسه كان يحبه بشدة.

فيما يلي، ست أغنيات من أرق وأجمل أغنيات فريد الأطرش، الترتيب لا يعني شئ سوي تسلسل الأفكار، ولا يعبر عن أفضلية أغنية عن الأخري، وإلي الأغنيات:

1- أحلفلك متصدقشي:





الأغنية من كلمات: يوسف بدروس، ومن ألحان فريد الأطرش، وتم غنائها في سياق فيلم "انت حبيبي"، تعتمد الأغنية في سياقها الأساسي علي البيانو، أو الأرغول، ثم ايقاع متهاد يشبه الفالس بعض الشئ.
مزج اللحن ما بين المقسوم الشرقي، واللازمة الغربية، واستخدام الكورس المميز كما عودنا فريد الأطرش.

2- نورا يا نورا.



من كلمات: محمود فهمي ابراهيم - ألحان فريد الأطرش.
هذه الأغنية وردت ضمن أحداث فيلم "لحن حبي"، رقصت عليها الراقصة المغربية "ليلي"، قيل أن الأغنية كانت في الأساس ل"ناريمان صادق"- ملكة مصر السابقة- فريد الأطرش يقال أنه كان متيما بها، ولحن لها هذه الأغنية كهدية، لكنها رفضت الارتباط به".


3- قلبي ومفتاحه.






أغنية من كلمات "فتحي قورة" ومن ألحان "فريد" بالطبع، وردت ضمن أحداث فيلم "رسالة من إمرأة مجهولة"، كلما سمعت هذه الأغنية تذكرت عيون "لبني عبد العزيز" وهي تتابع "حبيبها" من وراء الشبابيك بشغف وحب، وهو يبحث عن النغمات أمام البيانو، حتي يصل للأغنية في النهاية، وتبدو عليها ملامح السرور.

يمكنك مشاهدة الفيديو من هنا:



4- مش كفاية.


كلمات فتحي قورة أيضا، وألحان فريد، أيضا هذه الأغنية وردت ضمن أحداث فيلم "رسالة من امرأة مجهولة" لكن هذه المرة كان فريد يغنيها و"لبني عبد العزيز" في أحضانه، يرقصان علي أنغامها.

لا أنكر أنني أحب هذه الأغنية بصورة شخصية لحب أمي الشديد لها وللفيلم، لكنها في حد ذاتها من أرق وأجمل أغنيات فريد الأطرش عامة.



5- بقي عايز تنساني.
كلمات عبد العزيز سلام - ألحان فريد الأطرش.





هذه الأغنية تم استخدامها عدة مرات، عمار الشريعي أعاد استخدام التيمة الأساسية للحن من ضمن موسيقي فيلم "البرئ"، في مشهد الزيارة الشهير، بتقسيم العود.
وأيضا أدتها العظيمة "سعاد محمد" باقتدار شديد، يمكنك أيضا أن تستمع لأداء "سعاد محمد" من هنا:






6- الربيع.

كلمات مأمون الشناوي وألحان فريد الأطرش.
عن نفسي، أجد أوبريت "الربيع" هو أحد أعظم تجليات "العود" و"فريد الأطرش" علي الاطلاق، أجمل ما تم تلحينه علي الطلاق، أوبريت الربيع سيظل قائما في وجدان كل محب للموسيقي الشرقية، خصوصا تابلوهات سامية جمال الراقصة الرشيقة.

11 ديسمبر 2015

تجربتي مع الاكتئاب..--معاناة السنين!

الاكتئاب مرض، مرض زي أي مرض، زيه زي الأنفلونزا والإسهال، والنزلة الشعبية، اللي مبيقدرش يميز الفرق ما بين الاكئتاب والأزمة النفسية العابرة، عنده مشكلة، وكمريضة اكتئاب ضليعة فيه، من سنين، أقدر أقولك أهم الأعراض اللي ممكن تميز بيها مرض الاكتئاب من الأزمة العادية...

- مرض الاكتئاب هو مرض مزمن، لا يمكن الشفاء منه، فقط يمكنك التعايش معه والتحايل علي آثاره، وماهو إلا معارك بينك وبينه، ممكن تنتصر ف بعضها، وممكن تخسر جولة أو اتنين، بس متسيبهوش ينتصر عليك ف النهاية.


--هذا البوست شخصي بحت ولا يعتمد علي أي تجربة طبية غير تجربتي الشخصية.

1- مرض الاكتئاب مرض عضوي، بيحصل في الأساس بسبب خلل في النواقل العصبية، او بسبب خلل في فيتامين B أو بسبب حاجات كتير بغض النظر عنها، بس هو مرض، ومرض مزمن، وغالبا مبيخفش.

2- مريض الاكتئاب مش ب"يخف" من الاكتئاب، مريض الاكتئاب بيتعايش معاه، وبيتعامل معاه، وأي أدوية بتتاخد دورها بس التقليل من حدة الأعراض ليس إلا.

3- الاكتئاب بيتم التعايش معاه والسيطرة عليه من خلال أكتر من حاجة، منها إرادة المريض نفسه، جلسات العلاج النفسي، الجانب الروحاني، لو موجود عند المريض، دعم الأسرة والأصدقاء، جلسات علاج جماعي، التواصل مع مرضي تانيين بشكل مستمر.

4- الاكتئاب، الذهان "البارانويا"، اضطراب المزاج، الاحباط، القلق، كل دي سلسلة أمراض مرتبطة ببعض، أشهر اتنين مرتبطين ببعض عالميا هما Depression & Anxiety.

ايه هي أهم أعراض الاكتئاب، أو بمعني أصح ازاي عرفت ان عندي اكتئاب ومزمن كمان :D



1- نوبات هلع:وقلق غير مبررة لأسباب واهية جدا، ضربات قلب سريعة، عرق زيادة، تعب، ارهاق.

2- اضطراب الأكل:
 سواء بالزيادة أو بالنقص، عن نفسي جت عليا أيام "ولسه بتيجي" ممكن أتغدي فيها ست سبع مرات، أفضل أكل لحد ما أرجع، وأيام تانية ممكن أفضل طول النهار مباكلش أي حاجة خالص، ومقتنعة اني مرتاحة كدة، فيه أيام طويلة عشت فيها علي النسكافيه البلاك.

3- عادات ادمانية:
 ادمان السكس، سواء بالفرجة أو الممارسة المتكررة، الي ممكن تكون مؤلمة أحيانا، وانتا مش محتاجها، بس محتاج توصل لاحساس الأورجازم وخلاص، ادمان السجاير، انا عن نفسي ف اخر سنة من عمري، اتعلمت شرب السجاير، والشيشة، بطلتهم بس من وقت للتاني برجع لما بكون متدايقة بحتاج أنفخ ف أي حاجة، أفرغ غضبي.



4- اضطراب النوم:
وصلت لفترة قبل ما أكتشف ان عندي اكتئاب بالمعني المرضي اني مكنتش باقدر أنام، استعنت فيها بكل الأدوية الي ممكن تنيم ف الكون، سواء أدوية الحساسية، الكحة، أدوية الضغط العالي، المسكنات القوية، حتي الأعشاب المهدئة، اضطراب النوم بردو بيبقي ف النوم المتقطع، الاحلام المزعجة المتكررة، وهكذا، اي حاجة تنغص عليك نومك وتقومك تعبان أكتر من الأول.

5- الموت..!
التفكير في الموت من أكتر الحاجات اللي بتحصلي كمريضة اكتئاب، يعني بمعدل مرتين تلاتة في اليوم، بافكر ف الموت، وانا باعدي الشارع بفكر "هيحصل ايه لو رميت نفسي قدام المقطورة دي"، وانا ف البيت "هيحصل ايه لو رميت نفسي من البلكونة؟".

6- الحوار الطويل مع النفس:
خصوصا في فترة الصبح، منبهك يرن تقوم تروح الشغل، تبدأ تسأل نفسك "هو انا لازم أروح الشغل" ماهو انا لو نزلت هتخانق، ولو اتخانقت هترفد، ولو اترفدت همشي ف الشارع أكلم نفسي، وهيقولو عليا أهبل- فاكس شغل النهاردة".

الحوارات دي مع النفس وصلتني لأني مكنتش بقدر أروح شغلي بالأسبوع أو أكتر، الموضوع مكانش دلع قد ما اني كنت فعلا تعبانة.



7- اللامبالاة:
بيتك بيتحرق؟ فاكس، شعرك بيقع، فاكس، سنانك بيوجعك...مش مهم...اللامبالاة الشديدة كأنك بتحشش من فترة طويلة هي سمة وعرض فشيخ للاكتئاب، انتا أول واحد بتقع ضحية الاهمال ده، صحتك، مظهرك، تصرفاتك، مبيبقاش ليك طققان تقيس تصرفاتك هتأثر ف مين، ولا هتعمل ايه، بتبقي فعلا مش فارق معاك...

مكنتش بنزل شغلي رغم امي، وأبويا، وصاحبي اللي بيقولي مستقبلك هيضيع، فعلا مش بتشوف نور ف اخر النفق، غير نور القطر اللي جاي يدوسك.

8- الرمادية:
كأنك ماشي في دوامة من اللون الرمادي، كل شئ قاتم معتم، مفيش ابتسامة أمل، ساعات بتتدايق من صوت الناس العالي، او انبساطهم، بتحس انك عاوز تفضل جوة قوقعتك كتير.



9- العزلة:
كنت بقفل موبايلي كتير، أو باعمل Divert للمكالمات، مكنتش ببقي عاوزة أتواصل مع أي حد، بتواصل مجبرة مع ماما أو أخواتي، دايما باهرب بالنوم، او تمثيل النوم، عشان محدش يكلمني.

10- قلة الحموم:
آخر مرة قبل ما اكتشف مرضي اللطيف، فضلت تقريبا 7 أيام من غير ما أستحمي، طبعا مش قادرة أوصف الاحساس القذر ده كان عامل ازاي، بس وقتها كنت حاسة ان جسمي قزاز لو المية لمسته هيتكسر.


دي فيما سبق أهم الأعراض اللي انا مريت بيها كمكتئبة عظيمة، وأرجو انكو تستفيدو منها ومن تجربتي ولو أي حد يحب يسأل ممكن يسألني علي تويتر ف أي وقت :)




07 ديسمبر 2015

قواعد الكول سنتر الأربعون..!

1- إلبس السماعة علي ودنك الشمال.
2- خد مكالمات كتير
3- خليك بارد مع العملا..
4- ابتسم وانتا معاك عميل 
5- خليك بارد مع مديرك.

6- خليك بارد مع زمايلك.
7- اشرب نسكافيه كتير
8- خد مكالمات كتير
9- البس كوتشي مريح، او صندل انتا هتقعد عشرتاشر ساعة.
10- انسي تشوف نور الشمس لو انتا ولد.

11- انسي تقعد ف البيت ف العيد والوقفة وعيد العمال، و6 أكتوبر، وراس السنة الهجرية.
12- قول حضرتك كتير.
13- قول عفوا كتير.
14- اتعود تقول "انا فاهم ومقدر اللي حضرتك بتمر بيه، ولو ف ايدي حاجة اعملها كنت عملتها".
15- خد مكالمات كتير.

16- هز راسك علي اي حاجة مديرك بيقولها.
17- متعترضش علي كلام مديرك، هو بيفهم عنك أكيد.
18- اشتغل عصفورة لمديرك، هيحبك أوي.
19- خد مكالمات كتير.
20- اعمل تاسكات ف التيم.

21- قدم ف أي Vacancy بتفتح وادي دقني لو اترقيت.
22- اتكلم بصوت واطي مع العملا حتي لو بتشلفله.
23- رزع ف المكتب بتاعك وانتا شغال.
24- تعلم سب الدين في صمت.
25- خد مكالمات كتير.

26- اعملو جروب للتيم ع الواتساب.
27- اعمل Mute لجروب التيم من ع الواتساب.
28- متاخدش اجازات مرضي، عارضة، متجيش متأخر.
29- لو هتغيب حاول تختفي، متعملش Check in ف مول العرب وانتا قايل انك عيان.
30- العصافير كتير، تجنب الحديث حتي ولو همسا.

31- اعرض المساعدة علي زمايلك البنات، هيحبوك اكتر من تامر حسني !
32- خد مكالمات كتير.
33- اذا وصل الأمر للوجن والرش، فلا تحدثني عن حقوق الانسان.!
34- خد مكالمات أكتر.
35- تعالي قبل الشفت بساعة وامشي بعده بساعة، مديرك هيحبك أوي.!

36- متشتكيش لمديرك، ولا لزمايلك، ولا لأمك، ولا لصحابك، مديرك هيعرف ويتدايق.
37- قول صباح الخير كتير، ابتسم ابتسامات باردة، هما بيحبو الابتسامات الباردة..!
38- هز راسك لأي حاجة زمايلك بيقولوها واحفظها، خليك العصفورة انت احسن ما حد تاني يكون عصفورة..
39- اشتم ف Second Line والThird Line بتاعكو كتير، ولو Outsource اشتم ف الClient كتير.
40- خد مكالمات كتير فشخ، انتا هنا عشان تشيل Queue لوحدك يا كلب..!

 
Reem Essam Cairo , Egypt | copyrighted2011 - Reem Essam