كنوز مدفونة: مين فيهم؟- فؤاد ولا لؤي..؟ -بارت تو.


بعد مرور عشرة أعوام بالتمام والكمال، صدر لمغني شاب، اسمه "لؤي" ألبوم اسمه "انا كدة"، سنة 2003، الجميع عرف لؤي من أغنيات متعددة للحزب الوطني، مثل أغنيات:

1- الحزب الوطني ف مصلحتك.

2- شباب النيل قوام بينا (أغنية جمعية FGF)

3- قدامنا يا مصري تحدي كبير.


لؤي انا عامة كنت بسميه "مطرب الحزب الوطني"، مكنتش بسمع حسه غير ف دعايا جمعية جيل المستقبل، واعلانات الحزب الوطني واحمد عز، المهم، لؤي وعلي مدار خمستاشر سنة، ربنا كرمه وطلع "ألبومين" :D

الحقيقة ألبومه الأول "انا كدة" كان فيه كذا جوهرة مش جوهرة واحدة بس، علي سبيل المثال وليس الحصر: "انا كدة - اه يا عين يا ليل" وأغنيتنا دلوقت "مين فينا".

مين فينا من ألحان: أشرف سالم، وكلمات سلطان صالح، توزيع عمرو طنطاوي.
اسمع "مين فينا" من هنا:


باختصار شديد، مين فينا أغنية استعراض صوت، مينفعش مغني نص لبة أو حد نفسه قصير يغنيها، لؤي من المواهب اللي متفهمش مبتشتغلش ليه، مبتغنيش ليه، حد لو مسك مايك ودندنن بس بيطلع مزيكا، هتعمل ايه ف الدماغ المش نضيفة بقي!

أغنيتنا بتبدأ مع كولة، صوت حزين يساعدك بسرعة علي تفهم جو الأغنية الحزين، انا مش متأكدة ان كانت كولة ولا أبوا، هي الة نفخ عامة، لكنها بتسود الجو عامة، وراها يدخل الايقاع، والبركشن، ثم الوتريات، ثم تصاعد للايقاع تدريجيا.

كل الالات دلوقت بتعزف نفس النوتة علي اختلاف الأصوات، فرش لصوت لؤي، كله يسكت ماعدا البركشن:
"بعد ما قلت خلاص ودعني، واهو حب وكان...

راجع تاني كأنه ما باعني، ولا سابني زمان....
بعد ما قلت خلاص يا حبيبي، قربت أنساك...
راجع ليه من تاني حبيبي...يشغلني هواك..؟"


انتقال لمقام اخر، ليرد علي الاوفرتور..
"ومين فينا اللي خان؟ قلبه ملوش أمان؟

مين فينا اللي خان؟ أحلي عهود زمان؟؟!
يا ليالي.....
قولي ع اللي حصلي ف بعده...
ضاع أجمل ما ليك...حبي وشوقي ليك...
الغالي...
شفت كتير وقاسيت من بعده...ليالي..."


أولا الحتة دي تستاهل جايزة أوسكار في التلحين والتوزيع، عمرو طنطاوي كان أذكي ما يمكن لما تجنب استخدام الكورس في الأغنية، الأغنية أصلا احساس من حد واحد، مينفعش صوت كورس يدخل عليها، فاستخدم اسلوب "من دقنه وافتله" خلي لؤي يغني كورس لنفسه "توناليتي"، علشان نحافظ علي احساس الأغنية.

استعراض صوت لؤي عامة في عرب "ياليالي" و "الغالي" شئ وهمي ولا يمكن يقوم بيه حد غير لؤي، ولا حد أصلا ممكن أتصوره بيغني غنوة زي دي غير مثلا "مدحت صالح".

يكرر لؤي مطلع الأغنية كصولو، ثم يفسح المجال للحن الموسيقي، صولو كمان مع بركشنز، ثم صمت ليغني "لؤي" مرة أخري.

تكرار للحن المقدمة في الكوبليه
"كنت بداري كتير أحزاني...

من خوفي عليك...
كنت واهبلك كل كياني...
يمكن يرضيك...
انسي حبيبي أرجعلك تاني...
وارجعلك ليه؟
قلبي اتعلم يبقي أناني...
من غدرك فيه..!"


ثم تكرار للازمة الأغنية بصوت لؤي توناليتي "مين فينا اللي كان..."

الشئ المثير للعجب أن لؤي لم يبذل مجهودا صوتيا كبيرا لأداء هذه الأغنية ومع ذلك خرجت أكمل ما يكون، أداها بأقل نوت ممكن، مابالك لو علي كمان هيعمل فينا ايه! هالله هالله يا لؤي يابني والله، أحسنت، احسنت يا حبيبي والله :)

أشرف سالم عامة ملحن تقيل، بيلحن ألحان صعبة ومش مشهور في السوق ولا بتقل وليد سعد مثلا، يكفي انك تعرف انه ملحن "عد حبايبك" لصابر الرباعي، "عمري ايه" لمدحت صالح وايهاب توفيق.

الأغنية كانت وللعجب التجربة التوزيعية الأولي للملحن "عمرو طنطاوي" اللي تعاون مع عمرو دياب ف أكتر من عمل منهم "الليلة حبيبي الليلة".

تعليقات

  1. الأغنية من ألحان وتوزيع خالد عز.

    ردحذف

إرسال تعليق

تعليقك يسعدني..يا أفندم!

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!