الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

17 أبريل 2015

كنوز مدفونة: سامحني - ايهاب توفيق

كمية السف اللي ممكن الناس تسفها علي ايهاب توفيق تاريخية، بما انه مطرب حزايني، وكئيب، وفتئ، وانتهي فعليا من حوالي 15 سنة، بس الأغنية دي تستحق اننا نحطها في لستة الكنوز المدفونة، لأسباب كتير، منها لحنها الجميل...


أغنية سامحني كلمات أحمد شتا - ألحان حسين محمود - توزيع أشرف عبده.
اسمع سامحني من هنا: 

بتبدأ أغنيتنا بصولو عود، حاجة مؤثرة كدة تدخلك في المود، بيرد عليه الأورج، وشوية جلاجل في الباجروند كدة، بس العود والكمنجة مسيطرين، بيدخل ايهاب توفيق وهو بيتشحتف ويقولك "سامحني خلاص، سامحني ياريت، انا غلطان، وتهت وجيت"

ثم يبدأ الايقاع في التناغم، "رجعت بألمي، وأسفي، وخوفي، ولهفة قلبي عليك، غلطت وبعت، في بعدك ضعت، سامحني الله يخليك"

ثم الانتقال بسلاسة إلي مذهب الأغنية، والمذهب ده صايع، فيه جملة كدة تكسرك من جواك
"خد وردي، وهات الشوك، وعيوني اللي بيحبوك، انا راجع وكلي حنين، وطلبت السماح أرجوك"

ويردد الكورس ورا ايهاب المذهب، ثم صولو اكورديون كدة بيرد عليه كمنجة ظريفة جدا، والشخللة في الخلفية تتوهك ثانية، بعد كدة ايهاب يخطفك بصوته تاني في الكوبليه الأولاني:

"أهون عليك، وانا بين ايديك، تبعد وتظلمني، ندمان انا، وازاي بقي، من روحي تحرمني، ازاي تقولي اختار، بين العذاب والنار، هو الزمان قساك، ولا انتا مني خدوك..!؟"

ثم انتقالة سلسة تانية بين الكوبليه والمذهب تاني "خد وردي وهات الشوك..."

تكرار للازمة الأغنية اللحنية مرة كمان، ثم الكوبلية التاني، اللي مفيهوش اي اختلاف موسيقيا، انتهاءا بجملة: "دنا قلبي زي ما كان، بيفكرك بزمان، لو تديني الأمان، وكفاية خوف وشكوك"

الأغنية بتنتهي بنفس الصولو اللي من غير موسيقي تقريبا، بعد ما ايهاب يكون خرط كل البصل اللي معاه علي قلبك، وحاجة تقطيع شرايين كدة.

للأسف حسين محمود اللي ملحن الأغنية دي توقف عن التلحين بعد سنة 2000، متفهمش ليه، رغم انه كان لطيف جدا، وليه في الحزايني اللي بيجيب مع الناس جامد، المعلومة دي بحسب التدوينة دي من هنا.

غالبا المعلومات دي صحيحة لأني مسمعتش حاجة عنه بقالي كتير، الله يوفقه بقي واتيفير هو فين، بس حسين محمود عامة صاحب جملة لحنية ظريفة، منها أغنية "يارموشها" لإيهاب بردو: ممكن تسمعها من هنا:




15 أبريل 2015

كنوز مدفونة: ناوي أغني - ريكو

الموضوع ده ممكن يبقي صعب علي ناس كتير، خصوصا الناس اللي مقتنعة ان ذوقي في الموسيقي ذوق رفيع وراقي، لأن البوست ده كله عن الفنان "ريكو" :D


صورة لريكو

الأغنية اللي في ضيافتنا النهاردة هي أغنية "ناوي أغني" من أول ألبوم لريكو "عامل مشاكل"، الأغنية دي بالذات علاقتها معايا وثيقة جدا، ووقعت في حبها وقت طويل جدا، لدرجة اني لما كنت بشتغل بين المهندسين والزمالك مكنتش بسمع غيرها تقريبا، وانا راجعة م الشغل، لأني وانا رايحة الصبح بسمع "عبده عمل ايه" ما علينا بردو.

حاولت أتوصل لفريق عمل الأغنية، حتي عن طريق الفيديو كليب بتاعها لكني فشلت للأسف، ما يميز هذه الأغنية عدة أشياء، سنسردها بالتفصيل حالا...!!

أولا ريكو اللي كان بادئ كمغني شعبي، واشتهر بأغنية "شبرا" اللي عرفنا بعدها بسنين أنه مغنيها أصلا، الأغنية دي مش لايقة عليه كمغني، التوزيع بتاعها غريب، واللحن نفسه أكيد مقتبس من لحن غربي، الحقيقة انا مش عارفة أوصل لا لملحن الأغنية، ولا للميلودي الأصلي، الاقتباس نفسه مش شئ غريب علي الأغنية المصرية، مثلا أغنية دلع بنات بتاعة أوكا وأورتيجا مقتبسة من أغنية تانية:

اسمع دلع بنات:


ودي الأغنية اللي مقتبس منها أغنية أوكا وأورتيجا Ini Kamoze - Here Comes the hot stepper:



الأصلي أظرف بكتير، بس الAdaption بتاع أوكا وأورتيجا ظريف بردو، القصد، أغنية "ناوي أغني" كلماتها سريعة وعاملة زي طلقات الرصاص زي الهيب هوب بالظبط، أو الراب، وهو الراب ايه غير ابن شرعي للهيب هوب يعني، المهم، كلمات الأغنية نفسها ظريفة، ده مطلع الغنوة:


اززته كولا بست تانج تروى عشط الحرنان ورقناته بنكنوته تملى جيبى الفقرنان
والجعان يبابا ياكل لقمه نشحافنان والغناته سلطنونى بالغنيتى سلطنان يا
سادناته فهمونى صحصحونى وفوقونى الخلاصه دنيا فنيه نرجع تانى ومره تانيه
اززته كولا بست تانج تروى عشط الحرنان ورقناته بنكنوته تملى جيبى الفقرنان.

كلمات الأغنية فيها تحوير للكلمة الأصلية، زيادة علي نهاية كل عبارة عشان تجيب وتوزن القافية، ويكمل الموضوع في الكوبليه الأولاني:




ناوى اغنى اغنيات تنزلي فى النيل سات واعملها فيديو كليب يكون مرشق فيه
البنات وبقى نجم من النجوم والناس تسمعنى بالسعات وانسى فقر عشت فيه سنين
كتير فقر فات وان تو ثرى اند فور
والله ناوى اليف ودور كل بلاد العالم وانسى فقر خلاص يختفى ويغور
ناوى اغنى اغنيات تنزلي فى النيل سات واعملها فيديو كليب يكون مرشق فيه
البنات وبقى نجم من النجوم والناس تسمعنى بالسعات وانسى فقر عشت فيه سنين كتير فقر فات...

وكذلك الكوبليه التاني للغنوة:


عملنا فرقه بالاغانى وجبنا عده ودربوكات انا اغنى الديب من ديله وهما

يغنوا التعلب فات واتعزمنا فى حى شعبى والعريس بتاع بنات اه ياليل اه ياليل اه
ياليل لسه بقول اه يا ليل
لقيت الليل بقى نهار واللى يقول هات المطافى واللى يقول فيه ضرب نار
والكراسى كسرتنى زى ما يكون عليا تار قديم تار قديم تار قديم
وان تو ثرى اند فور والله ناوى اليف ودور كل بلاد العالم وانسى فقر خلاص يختفي ويغور...



الأغنية طبعا توزيعها بيعتمد علي الايقاع والوتريات بشكل أساسي، زائد نقرشة كدة من الجيتار الالكترك، في الباكجراوند بيخليك تدب فالأرض بثقة وانتا بتسمع الأغنية، تنظيم الكورس اللي بيغني مع ريكو مقطع انجليزي بردو ظريف جدا، زائد الموزع اللي بيستعين بصوت ريكو في الخلفية وهو بيليل، أو بيقول "ناوي أغني"، قوة صوت ريكو نفسها مع صوت الكورس بتملا الأغنية بالحيوية.

توزيع "ناوي أغني" أقرب لتوزيع الميتال والهارد روك، ممكن تشبه الحالة اللي بتخرج بيها منها كأنك سمعت حاجة ل Linkin Park مثلا....زائد القفلة اللي تشبه في رأيي كبسة غطا الحلة علي النار، سابتك مجنون بالأغنية اللي لو بتفهم فعلا، هتفضل تعيد وتزيد فيها لحد ما تحفظها ومش هتزهق منها.


اسمع ناوي أغني من هنا:



08 أبريل 2015

علي كل لون - الصحاب

في حياة كل واحد مننا مجموعة من الصحاب، بيساعدوك، بيهدوك، بيكلموك، او بيفشخوك بشكل أو بآخر....الصحاب دول بنلاقيهم حوالينا، علي كل لون، منهم الاتي:

1- بركوتة:
الصاحب الجدع، اللي مبياخدش خطوة من غير ما يسيبك، الصاحبة الجدعة اللي أول كلمة "بحبك" لما تسمعها، انتي تاني واحدة بتسمعيها بعدها، اللي بتساعدك ف الفرش، والكوافير، والحنة، والجهاز، بتنزل تنقي معاكي قمصان النوم واحد واحد، بيشيل معاك عفش البيت حتة حتة، بينقطك في أفراحك، وبتعيط علي كتفه في أحزانك، والنوعية دي من المستحيلات التلاتة جنب "الغول، والعنقاء"، نسبته واحد ف المليون الصراحة..!

2- في الوش مراية، وف القفا سلاية..!
اللي يبينلك قد ايه انتا حد جدع وعظيم وفشيخ طول ماهو جنبك، ولما يبقي بعيد عنك بيقول للناس انتا قد ايه وضيع وواطي وجلدة ولما جيت تحاسب مرضيتش تدفع ضريبة المبيعات ولا تدي تبس....

بتتلخص عادة في المواقف الاتية:
"البت اسراء دي واطية أوي، قلتلها تسلفني البلوزة النبيتي ومرضيتش قالتلي دي ف الغسالة
يا بنتي مش اسراء دي صاحبتك؟
متقوليش صاحبتي بس، دي واطية أوي."

النوع ده بيمتاز انه عصفورة ممتازة، وشغال علي موجة FM...

3- انا ضميرك يا حيوان...وده النوع اللي انتا بتحاول علي قد ما تقدر تهرب منه ومن قعدته، لأنك مهما عملت قدامه هيقولك "مش تتقي الله ف أمك، مش تتقي الله ف خطيبتك"
ما تحط لسانك في بقك يا عم الواعظ وترحمنا..!
المستشيخة اللي تقولك الأغاني حرام، لا مبضيفش ولاد، لا حرام تسلمي علي ولاد بالايد، انتي مبتصليش ليه هه؟ وبغتاتة مش بعشم الصحاب....

4- انا قرينك يا زواوي!توأم روحك، حبيبك، النوعية دي عادة بتبقي في البنات، شغالين علي مكتبين جنب بعض، ساكنين جنب بعض، بيجيبو لبسهم مع بعض، بيحبو ف شخص واحد، أفضل وصف للنوعية دي هي: "طيزين في لباس" وعادة لو اتصاحبت علي واحد لازم تتصاحب علي التاني فيهم، عملا بمبدأ "انا عاجي معاكو كدة" !

النوعية دي من البشر لو نصها الاولاني اتجوز، هتلاقي التاني حاطط علامة "سيستر اوف زا برايد" و "النهاردة حبيبة ألبي هتتجوز وتغور"، البعد عنهم غنيمة لتجيب انفقاع المرارة..!

5- محمد هنيدي AKA حمادة سلطان..
الشاب الظريف اللي ف الشلة اللي تاخده علي جنب عاوز تفضفضله شوية يهريك ألش، متعرفش أو متعرفيش تتكلم/ي معاهم جد للحظة واحدة بس، تلقائيا بتلاقي نفسك زبلته وبطلت تتكلم معاه أساسا، ماهو احنا مش جاهزين للضحك 24 ساعة يعني..!

6- أيمن ابن أحلام كراوية.
دائرة المعارف المتحركة وسط صحابك، أخر صيحات الموضة عرفتها منه، أول واحد منهم مسك السامسونج الS3، أول واحد ركب كاست بايونيير ف عربيته، أحيانا بيبقي النيرد اللي في صحابك، حملي الفيلم، حاضر، هاتلي الأغنية حاضر، قطعلي وش البت م الصورة حاضر...

7- سعيد برشامة:الشخص ده أول واحد ف صحابك بتروحله لو عندك صداع، بترجع، أول واحدة بتميلي عليها لو البريود تاعباكي، عادة معاها فوط صحية احتياطي علي طول، معاها مسكن ف الشنطة، نقط بروزولين، دوا للضغط، Sun Block، ولو قلبت شوية ف جيبه أو شنطتها هتلاقي شرايط ترامادول، وحقن ماكستون فورت.

8- سيكا ها..سيكا ها...
صاحبك اللي علي طول روحه ف مناخيره، وعلي اخره وعاوز برشامة مهدئة عشان يهبط وربنا يكرمه.

9- شنطة السفر.
البطيخة اللي ممكن تشده وتروح بيه أي حتة، تعالي ننزل السينما، يلا، نروح مول العرب، موافقة، نشد ع الساحل يومين ميضرش، نسرق عربية أبوك وماله.

10- صحفي في جريدة لا.
وده شعاره/ا في الحياة "خلقنا لنعترض" دايما ما بيبوظ خطط الشلة في الخروج، كل ما تقوله مكان يقولك لأ، كل ما توريه حاجة متعجبوش، مفيش حاجة بتنزله من زور وكل حاجة ف الحياة بالنسبة له خرا خرا خرا.

11- Herp Derp
أغبي صحابك، اللي انتا بتفضل تشرحله تفاصيل صغيرة، وتضيع مرارتك معاه وتفهمه وهو ف كوكو تاني.

12- لا شئ يعجبني..
صديقتك اللي زامطة النضارة علي وشها علي طول، مبتبتسمش نهائيا، بتشير حاجات ع الفيسبوك لمحمود درويش، ومارسيل خليفة، بتتفرج علي أفلام فرنساوي، ويا محجبة وطالعلها شعر في صدرها، يا فيمينست وناكشة شعرها..!

13- الشيف الشربيني.
اللي راشقة في المطبخ، بتجرب مقادير جديدة، حافظة رقم نجلاء الشرشابي اكتر من رقم أمها، وعلي طول في شنطتها علبة بلاستك فيها حاجات من اللي عملتها بالليل ف المطبخ.

14- الزمالكاوية/ الأهلاوية المدعية.
النوعية دي عادة بتبقي في البنات، تدخل البروفايل تلاقيها حاطة شعار الزمالك، وأغاني الأولتراس، وهي أصلا مش عارفة الفرق بين أحمد جعفر وعمرو الصفتي، ومبتفرقش البنالتي من الركنية، عادة الكومباينيشن دي بتستخدم لتعليق ولد ذو ميول رياضية.

15- حمامة السلام.
اللي لما اتنين بيتخانقو بتلاقيه جاي يصلح بينهم.

16- Fuck the whole universeوده الشخص الي يمثلني، تيجي، متجيش، انا كدة كدة راضي، اتحرقو بجاز انا باعرف اتعايش لوحدي الصراحة مش محتاجة ولا فردة م الفرد اللي فوق دي.

17- السكة شمال...
اللي معاك ف أي حاجة غلط: يلا ننزل نعلق بنات/ طب تيجي نروح نشيش/ معكش اصطباحة يا صاحبي/ معلش طب هات رقم الديلر وانا هنزل أسكور بدالك 


06 أبريل 2015

تامر حسني كما لم تسمعه من قبل..!

انا عارفة ان الموضوع ده هيفتح عليا فاتوحة ملهاش اخر، بس يلا، بجملة :D

الجميع يعرفون ان الشونج بونج صاحبة ذوق موسيقي رائع، راق، متحضر، مختلف، لكن ما يعيب هذا الذوق حبها الغير محدود ل" تامر حسني"، وايمانا مني بدكتاتورية الفرد واستبداده وتجاهله لامتعاض الأصدقاء، وليحترق الجميع بجاز وسخ، فأنا قررت أكتب هذا الموضوع عن تامر حسني، وأحطله أفشخ 10 أغنيات غناها من ساعة ما طلع، عشان نكمل حرقة دم الناس..!

عرف عن تامر حسني أنه منذ بدايته وهو صاحب نظرة دونية للمرأة، فهو يخاطبها دوما بكلمة "يابنتي" كأنها تبيع المناديل في اشارات المرور، ويكتب أغانيه بمفردات تمتزج بالسذاجة والاستظراف أحيانا، وألحان سلق بيض يغلب عليها الاستسهال والاستهبال، إلا انه كمان عشرة خمستاشر سنة، هذه الأغاني ستصبح كأغاني عمرو دياب، وسيطرح تامر ألبوما لا شئ فيه سوي سلق البيض، وسيتلقاه الشباب بصدر رحب، مرددينه في الساحل، ان ظل هناك ساحل، كفانا كلام ولننتقل إلي الموسيقي: 

10- قرب حبيبي - من ألبوم حب

كلمات مصطفي مرسي - ألحان وليد سعد
والأغنية مقتبسة عن أغنية أشوف عينيكي لعمرو دياب، والاتنين مقتبسين من تراث بورسعيدي.
الكليب ده كان طفرة أياميها، كان تامر طالع مع زينة في الكليباية، وبيتصورو علي موتسيكل هارلي، قدام شاشة خضرا، الأغنية فيها جملة لحنية عبقرية ألا وهي "هتداري وانا اداري، وتقيد نارك وناري، وتموت وتعرف أخباري، وانا اموت م الشوق واحتاااار"


9- بعيد عن عيني - من ألبوم قرب كمان.

كلمات عبد العزيز الشافعي - ألحان محمد يحيي
مش هنتكلم كتير عن تقطيع الشرايين في الأغنية دي، لكن يكفينا الجملة اللحنية العبقرية اللي بتخليك تتكلم وتطلع همك فيها..!
"ما ترجع بقي، والله هموت....من وقتها..." ثم تزعق من زهقك بقي "فيه حاجات عشتها وياك، ومتنفعش إلا معاااااك"


8- لأول مرة - من ألبوم اخترت صح

كلمات شيماء الشربيني - ألحان تامر حسني وكريم محسن.
للي بيحب يسمع تامر وهو بيقسم شرقي، هيلاقي اللي بيحبه في الأغنية دي، الكلمات لطيفة جدا، وكذلك اللحن، وخصوصا التوزيع ف الباكجروند وانتا بتسمع تامر عايش دور القهوجي، وبيسقف، التاتشات دي صدقني بتفرق فشخ!

7- ياريته حد يستاهل - من ألبوم بحبك انتا.

كلمات نصر محروس "عديها متبقاش رخم" - ألحان عمرو مصطفي
الدويتو الفلتة اللي عمرو مصطفي لحنه لبهاء سلطان وصحي تاني يوم الصبح لقا تامر مركب صوته عليه، حاجة كدة زي ماتش البينج بونج، مباراة ممتعة بين صوت بهاء وصوت تامر.

6- زي النيل - من البوم 180 درجة.

كلمات وألحان تامر حسني.
الأغنية دي كلامها عجيب شوية، بس باحبه عامة، لأني من مشجعي الكافيين والادمان عامة، ف جملة "انا ف دمك انا ادمان، انا صاحب ليالي زمان، مش كدة ولا ايه؟" والجملة الأخرانية تقولها بغمزة كدة.

5- هعيش حياتي - من ألبوم هعيش حياتي.

كلمات وليد الغزالي - ألحان كريم محسن.
طلعة الأغنية دي أجمد من طلعة الدائري من مدينة نصر! حاجة فخمة كدة وتوزيع عظيم لكريم عبد الوهاب، الألبوم كله كان قنبلة الحقيقة، انا باحب الأغاني فيه بلا استثناء!

4- بعيش - من ألبوم عينيا بتحبك

كلمات محمد حمادة - ألحان تامر علي.
الأغنية دي اتشهرت فشخ بعد ما تامر دخل السجن، كانت بتتذاع علي الراديو ليل نهار، بيصدعونا مع انها أغنية جميلة، أغنية عمرها ما هتقدم أبدا....


3- يانا يانا - من ألبوم حب.

كلمات نبيل معتوق - ألحان محمد رحيم :D
الأغنية دي من علامات مراهقتي، لذلك باحبها حب غامر مبعرفش اوقفه، لأني كنت بعيط وانا بسمعها، واتحطيت ف نفس الموقف الرزل ده واتحلقلي جامد فشخ..!


2- فرصة أخيرة - من ألبوم حب

كلمات مجدي النجار - ألحان خالد عز
مجدي النجار بطل الأغنية دي، بلحن خالد عز، لازم تتسمع وتتمعنن وهي بتسمعها كدة

1- بينك وبيني - من ألبوم هعيش حياتي.

كلمات محمد جمعة - ألحان محمد رحيم "احا بقي انتا فشيخ أوي"
انا مش هتكلم كتير، بس لازم تسمع الأغنية دي عشان تعرف ليه دي ممكن تكون أجمل أغنية غناها تامر علي الاطلاق....كلمات، توزيع، ألحان، حاجة سوبر لوكس مع انها مش مشهورة اوي بين أغانيه، لأن لا فيها تهزيق ولا فيها شتيمة لواحدة ولا بيقولها يا بنتي!


05 أبريل 2015

كنوز مدفونة: يا زايد في الحلاوة - عزت عوض الله.

ضيفنا النهاردة اسكندراني، بلد الهريسة، ومن بحري وبنحبوه، وعمار يا اسكندرية يا جميلة يا ماريا، ضيفنا النهاردة في حلقة كنوز مدفونة هو الفنان السكندري القديم "عزت عوض الله".



المقدمات الطويلة، والتعريف بعزت عوض الله، هنلاقيه باستفاضة في مقالة لشريف حسن علي موقع كسرة، ممكن تقراها من هنا.
احنا هنا عشان نتكلم عن أغنية جميلة من أغانيه، ألا وهي "يازايد في الحلاوة".

يازايد في الحلاوة من كلمات: محمد ملوخية ومن ألحان عزت عوض الله نفسه، اللي كان عادة بيلحن لنفسه، بالاضافة انه استعان بمجهودات ملحنين آخرين.

اسمع الأغنية بصوت عزت عوض الله من هنا.


جملة عزت عوض الله اللحنية الصراحة سهلة ورائعة، خصوصا الأغنية دي، والكلمات اللي تدخل وقتها في باب الغزل الشعبي البسيط، في وقت كان عبد الوهاب فيه بيغني الجندول، وام كلثوم كانت بتغني "انها قصة حبي" كان الفن المصري بيزخر بفنانين بسطاء شعبيين كل غلطتهم انهم غنو من الجمهور للجمهور علي طول، محدش فيهم اتفذلك، وكانت نتيجتهم انهم اتنسو زي عبد العزيز محمود - كارم محمود - فايد محمد فايد - ماهر العطار - وغيرهم وغيرهم.

عزت عوض الله بردو ليه أغنية اسمها "دول بنات اسكندرية، مشيهم ع البحر غية" استعان بيها بليغ حمدي في أغنية من ضمن أغنيات مسرحية "ريا وسكينة"، والأغنية دخلت في التراث الاسكندراني عموما.

الأغنية دي الحقيقة فكرتني بأغنية "اللي تاعبنا سنين" اللي كل الناس غنتها، واللي بردو ممكن تعرف عنها أكتر من هنا.
المهم، الأغنية دي، وزي اللي تاعبنا سنين، غناها في البداية "عزت عوض الله"منجحتش للأسف، استلقطها مغني تاني اسمه "فايد محمد فايد" لو حد يسمع عنه بردو، أشهر أغانيه "سوق الحلاوة جبر"،وغناها، وقتها نجحت نجاح فشيخ، وممكن تسمع الغنوة بصوت فايد محمد فايد من هنا:



بعد فايد محمد فايد، غناها الكبير أوي -مش أحمد مكي- البوب أحمد عدوية، بتوزيع جديد، ونزلها ف شريط "كركشنجي"، وكانت بردو ليها توزيع مميز، وبما ان فايد محمد فايد كان بردو مش مشهور أوي في السبعينيات، ولا حد كان يسمع عنه أساسا، ف الناس كلها افتكرتها أغنية "عدوية" بردو، وممكن تسمع الأغنية بصوت عدوية من هنا:


الأغنية اللي عدوية سجلها، كانت أسرع في التمبو من أغنية "عوض الله"، بالاضافة ان توزيعها كله بركشنز وشخاليل وطبلة وكورس وحاجة سبهللة الحقيقة، انا باعتبرها الصراحة أسوأ Cover للأغنية من التلات Covers اللي معمولين ليها.

كان فيه محاولة نسائية وحيدة من مطربة مختلفة هي "دنيا مسعود"، دنيا عادة ما بتغني في ساقية الصاوي، وللي ميعرفهاش، هي اللي كانت عاملة دور كريمة السكرتيرة في "جعلتني مجرما" بتاع أحمد حلمي :D

دنيا الحقيقة غنت الأغنية بشكل ظريف جدا، وياريت كان عندنا نسخة أوضح للتسجيل ده، الي واضح ان واحد من الفانز مسجله بموبايله.

اسمع الأغنية بصوت دنيا من هنا:



04 أبريل 2015

علي كل لون - الميكروباص !

بما اننا بدأنا السلسلة علي الناس اللذيذة اللي بتكلم الكول سنتر، فانا الحقيقة حبيتش الموضوع اوي، وقررت أتوسع بالسلسلة وأعمل فرانشايز "علي كل لون" علي الحاجات السخيفة في الحياة، ومن أكتر الحاجات السخيفة في الدنيا، الميكروباص..!

1- الزعيم.
البرنس اللي اتولد من بطن أمه بيعرف يحسب ويطرح ويجمع، ويطلع باقي خمسة من السبعة وتلاتين جنيه، ويجيب اربع من السواق، ويطلع من جيبه فكة ميتين وخمسين جنيه، ويتشقلب ف الميكروباص، والكل يطلع مرضي، عادة بيبقي موقعه ف الكنبة اللي ورا السواق، ف المكان اللي ف النص.




2- لمونة ف بلد قرفانة.

اللي بيعرف يحسب كل حاجة، بس بيعامل الناس بقرف، هو مش واكل شبشبين علي قد ما الناس والسواق مقرفين فشخ الحقيقة.


3- الخلقي:

اللي بيتعصب ع الناس، وبيتعصب ع السواق، وعادة بيتخانق وبعد الخناقة دي السواق بيفرمل جامد ويقول "انا مش هكمل إلا لما هو ينزل"، ساعات كتير بيتم التحول بين "اللمونة" وال"خلقي" ف ثانية خصوصا لو السواق ابن كلب زبالة...

4- عبده العبيط: 

الهندي اللي بيركب الميكروباص من خمسة وتلاتين سنة وكل مرة يبعت الأجرة ناقصة ويقولك انا باركبها طول عمري بخمسة وستين قرش بقت امتي بخمسة وسبعين!

5- الأم المصرية:

الست اللي بتطلع الميكروباص بتلات عيال، وتلات شنط مدارس وطفل رضيع علي ايديها وتاخد مكان نفر واحد...هتروحي النار علي فكرة...!!!


6- المسقط:
فطين قوم اتشطف وكلم الحاج :D

اللطيف الليي بيبقي قاعد ف اخر كنبة ورا، جنب الشباك، عادة بيبقي راكب من أول الخط، بيبقي نايم/تحت تأثير برشامة مخدرة/مأفور وبينسي يدفع الأجرة، أو بيرمي اي فلوس ف جيبه وينام لحد ما السواق يصحيه بالسلامة، لما يوصل...


7- ديسبرادو: 

وده اللي بيركب والميكروباص مليان، من نص الطريق، مفيش مكان، وبيتشعلق في الباب من برة وبيفضل يطوّح رايح جاي مع المطبات...



8- "هما مالهم بينا يا ليل":

النوع ده بينقسم لنوعين ذكر وانثي، والاتنين بيفضلو يتكلمو طول الطريق في الموبايل بصوت واطي فشخ، وعادة عمال/ة تضحك زي الهبلة طول الطريق، ولا بتلم أجرة ولا ليها فيها اصلا، وبتصدعك، وحلها الوحيد الهيدفونز بتاعتك واخلع من دوشة أمه/ا وزنه/ا...








9- "ايديا ف جيوبي":

انا بقي :D البرنس ف نفسه اللي عنده توحد ف نفسيته، السماعة ف ودنه، الفكة ف جيبه ملوش دعوة بحد، وعادة الناس بتلبسه ف لم الأجرة، ف الموضوع بينقسم لاحتمالين، اما انه يتعايش ويلمها، واما انه يرمي الفلوس ف وش الناس، ويقولهم انه ساقط حساب، وعادة انا بافضل الاختيار التاني، مكانوش عينوني تباع ليه بروح أمه!

10- التنح:

الشخص اللي قاعد قدامك وتخبط ست ساعات علي ضهره عشان ياخد الأجرة مبيرضاش.....

11- البضان:
"فيه ربع جنيه ورا يا اسطي"
"فيه ربع جنيه ورا يا اسطي"
"فيه ربع جنيه ورا يا اسطي"
"فيه ربع جنيه ورا يا اسطي"
"فيه ربع جنيه ورا يا اسطي"
"فيه ربع جنيه ورا يا اسطي"
إلي مالا نهاية طبعا..

12- الحرامي:

اللي بياخد الأجرة الباقية من الزباين التانيين ويدبها ف جيبه وينزل، أو يفضل قاعد ساكت والسواق يقعد يجعر "فيه واحد ورا مدفعش، فيه واحد ورا مدفعش" وهو عامل نفسه م الهند...

 13- الكداب:

"ايوة يا باشا، لا انا ف ميدان الجيزة خلاص، دنا شايفك اهو بتكلمني ف التليفون" واحنا نبقي لسه طالعين م الموقف.
"أيوة يا ماما، لا انا لسه ف الشغل واحتمال اتأخر" ده انا ده.

14- "ألو يا مصر":

ده العميل اللي بيتكلم ترنك ف كفر أبو بطيخة، تبقي سامعه وسامع الناحية التانية اللي بيكلمه، وهتموت وتضحك أو تتحشر ف تفاصيل المكالمة بس خايف لا يضربك كف يرقدك :D


كنوز مدفونة: اللي تاعبنا سنين - جورج وشركاه

معادنا النهاردة مع أغنية ولا بلادي بلادي، الأغنية اللي كل الناس غنتها، ومفيش حد مغناهاش حتي قدام مراية الحمام بتاعته.....

الأغنية دي هي "اللي تاعبنا سنين في هواه" للسلطان "جورج وسوف"، الأغنية دي من كلمات: أيمن أجاز وألحان: شاكر الموجي.

شاكر الموجي نفسه مصري مقيم في لبنان، ويقال ان خاله هو "محمد الموجي"، شاكر الموجي ده سافر يدرس في فرنسا، وهناك قابله "حسن أبو السعود" وأقنعه يغني، صوته أكيد كان ظريف، غني شاكر الموجي لكن منجحش قوي، وغني شوية مع فريق الجيتس -لو متعرفش مين فريق الجيتس ممكن تدوس هنا - وبعد كدة قدم لحنين ل"جورج وسوف" منهم كان "اللي تاعبنا سنين".

اللي تاعبنا سنين في هواه مكانتش نهاية التعاون بين الوسوف والموجي، بل قدم ليه عشرات الألحان الجميلة، منها صياد الطيور، ودول مش حبايب، الفرق هنا ان محدش علق معاه غير "اللي تاعبنا سنين" واللي غنوها عشرات المغنيين، حتي انها بتفكرني ب" My Way" لسيناترا كأغنية محققة رقم قياسي في الRemakes والCovers من المغنيين الاجانب.

اسمع الأغنية بصوت شاكر الموجي من هنا:


وبصوت جورج وسوف من هنا:


أول واحد قال بسم الله الرحمن الرحيم في غنا الأغنية دي كان "محمد رؤوف" كان مغني الفرقة القومية للفنون الشعبية بعد عمر فتحي -الله يرحمه- وحسب الأستاذ سيد أغا  صديقي من تويتر، رؤوف كان أول واحد ينزلها مصر علي شريط كاست، ومع انها مكانتش أغنيته أصلا، إلا انه رفع قضية علي مغني تاني اسمه "عصام الخولي" في المحكمة عشان غناها!!!

واضح ان رؤوف كان بيعتبر نفسه مالك الأغنية عشان ربنا كرمه بمنتج طبع الأغنية علي شريط كاست! بس ممكن تسمع الأغنية بصوته من هنا:





ودي نسخة بصوت الطفل المعجزة أسامة: 


ودي نسخة بصوت "ليلي جمال" اللي الناس كلها عارفة أغنيتها "شئ من بعيد":


وفنانة التمانينات الأولي "فاتن فريد" كان ليها نصيب في الميغة دي:

بالمناسبة فاتن فريد كانت عبارة عن Parody لوردة الله يرحمها كانت شبهها، وغالبا كانت بتقلدها :))



حتي ياربي كارول سماحة :))) غنتها في حفلة من حفلاتها! -موازين 2014- 



وصابرين النجيلي متسابقة "عرب ايدول" الي أحلام ادتها صابونة بردو غنتها في برنامج من البرامج:



ومع ملك الاعادات الأول "وائل جسار" اللي منسيش طبعا يغنيها حتي ولو ف برنامج...





وأخيرا المجزرة اللي حصلت في فيلم "النبطشي" بتاع محمود عبد المغني علي ايد المغنية يسرا، والراقصة "سهر"


القصد ان الأغنية دي لحنها سهل وسلس ومش محتاج قدرات صوتيه كبيرة للمغني عشان يأديها، فبالتالي انتشرت انتشار كبير، بالاضافة لكدة ان الكلمات نفسها لطيفة جدا، وسهل تتحفظ.....زائد انها سهل يترقص عليها جدا ورقص شعبي من اللي هو، غير انها مش كئيبة أوي، فممكن تتغني في فرح عادي...


تحياتي لأستاذ سيد أغا علي المعلومات القيمة دي، وشكرا ليكو :)

03 أبريل 2015

كنوز مدفونة : بدي شوفك - حسن مغربي

أذكر أول مرة سمعتها كنت في مطلع المراهقة، في أول العمر، أستمع بشغف، إلي الراديو، خصوصا إلي أحمد العسيلي: قبل ما الواحد يتأكد انه هراي وهراس وفتاي وبتاع كلام كتير فشخ، المهم، كان العسيلي ساعتها بيسمعنا أغاني محدش كان يعرف عنها أي حاجة، مكانش عندنا غير تمن قنوات، والفنان محمد زياد، والفنان أركان فؤاد، وحرمه المصون، ومحمد ثروت :D

من الأغنيات دي، كانت أغنية ل"حسن المغربي"، الأغنية اسمها "بدي شوفك" وواضح انها كانت أغنيته الوحيدة الصراحة، لدرجة ان الراجل محدش يعرفه تقريبا.

أغنية بدي شوفك من الأساس لفنان لبناني قديم جدا، اسمه محمد جمال، صاحب صوت رائع ونبرة حزينة شجية بردو، وممكن تسمعو الأغنية من هنا، الأغنية من كلمات ميشيل طعمة وألحان محمد جمال: 


حسن المغربي للأسف مش مشهور كما ينبغي، لكن من واقع السيرش -ربنا يخلي جوجل- هو موسيقي مغربي وموزع موهوب جدا، وهو اللي موزع بدي شوفك، بتوزيعها الجديد الممتاز اللي وصلنا كلنا، لدرجة ان لما سمعنا الأغنية افتكرنا ان الأغنية ملك لحسن، وليس Remake لأغنية قديمة.

الأغنية علي يد حسن المغربي تحولت من أغنية تقليدية لبنانية في شكل طقطوقة، تعتمد علي الايقاع بشكل كبير(طبلة بقي، أورج، زمامير) علي قد ما تقدر تحشي، وعلي الكورس، وعلي العرب، بضم العو، لشئ لطيف، خفيف، أشبه بحلم جميل انتا بتعيش فيه، بيعتمد علي الوتريات والاحساس علي قد ما يقدر، وساعد المغربي ف كدة وجود عبقري زي "أحمد فرحات" بيقود كتيبة الوتريات، وأظن مفيش حد ف مصر مش عارف مين أحمد فرحات.

الأغنية علي قد شهرتها الكبيرة في لبنان، وعلي قد الناس اللي عملتلها Covers زي ملحم بركات - وائل جسار- كارول صقر، إلا إنها الحقيقة مركبتش الطيارة ونزلت مصر إلا علي ايد حسن، ببساطة لأن اللبنانيين عندهم كسل غريب في تقريب أغنياتهم ووجهة نظرهم للمصريين، أو للوطن العربي عامة، والدليل أغاني وديع الصافي التاريخية اللي محدش يعرف عنها حاجة، وأغاني نصري شمس الدين، وطروب، وسلوي القطريب، وكل الناس العظيمة دي، اللي محدش يسمع عنها أصلا، ولا حد عارف حاجة عن لبنان غير فيروز!!




الأغنية بتاعة "حسن مغربي" تستاهل تتسمع وتتسمع بضمير، لأنها حلوة، وحلوة أوي كمان :)


 
Reem Essam Cairo , Egypt | copyrighted2011 - Reem Essam