الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

25 يناير 2015

دايرة الرحلا......

هي دايرة الرحلا...ليست دايرة الرحلة، ولا دائرة الرحلة، ولا دائرة الانتقام، هي دايرة، ودايرة كدة لوحدها مش دايرة علي حل شعرها مثلا حضرتك....

كل من يقول أن صوت أحمد منيب رخيم عن صوت منير، أتهمه بفساد الذوق، منيب ملحن عظيم وكل حاجة، لكنه ليس صوتا عظيما، يذكرني أكثر بحميد الشاعري، سريع الايقاع، لا أعلم لم يتخذه الجميع قدوة وزعيما لجيل الثمانينيات البغيض، الذي اختفي أغلبه بسبب تفوق حميد الشاعري المزعوم، البعض استمر يكابد حتي الألفينات كإيهاب توفيق، لكنه اختفي بسبب تطور الزمن، وملل المستمعين.

الثمانينيات حقبة مليئة بالغثيان، أغنيات مستهلكة، ايقاعات عالية، أوتوتيون، وشخاليل وطبلة، وكلمات خفيفة تافهة، فاقت تفاهة طقاطيق العشرينيات، لا أدري مالذي قدمته حقبة الثمانينيات بأسرها للفن المصري، أفلام نادية الجندي، نبيلة عبيد، كوميديا عادل إمام، أكشن نور الشريف !!

عن فيلم الفيل الأزرق: 
"متأخرة أوي دعوتك يا عم القرد"
الآية التي تقول "ليميز الله الخبيث من الطيب" أهو الفيلم ده خبيث، والرواية خبيثة، واللي معجب بأحمد مراد كروائي عالم خبيثة، وكل الناس اللي حبت الفيلم وأعجبت بيه عالم خبيثة الحقيقة، الفيلم خراء مصفي، كما الرواية تماما، ضيعت زمان من وقتي ست ساعات من 12 ل 6 الصبح لقراءة الهراء المسمي بالفيل الأزرق بدافع الفضول مش أكتر، شتمت في النهاية اكثر ما شتمت في نهاية رواية علاء الأسواني "نادي السيارات"
أيوة علاء الأسواني هو مقياسي لنهايات الروايات العبيطة.

وامبارح بس وبدافع الملل وبإلحاح من أخويا الصغير شفت الفيلم أخيرا...بعد أربعتاشر سنة خدمة ف ثانوي.

مبدأيا الفيلم ضلمة طول الوقت، وكل دخلة لكل بطل دخلة سلو موشن تحس سلفستر داخل علي الاكسبندبالز، مليان مغالطات منطقية، ومليان بلاوي زرقا، الفيلم نايم، انا كنت بدأت أوريدي اتاوب بعد أول ساعة ف الفيلم، وكنت عاوزة انام وأخويا منعني بردو وقالي ده هيحلو وبتاع، المهم.

كريم عبد العزيز غبي، اللوك بتاعه غبي، نيللي كريم اداءها سطحي جدا، الخطوط الدرامية اللي اتشالت من الرواية ف الفيلم وقعت الفيلم اكتر، خالد الصاوي كان ظريف كالعادة هو بيحب الأدوار المريضة دي، قلت هشوفلي مشهدين ساخنين ولا حاجة ملقتش حاجة، ميتين أم السينما النظيفة، حتي المشاهد المفروض تبقي ايحائية مبينتش اي حاجة خالص، ام كدة يا اخي.

حتي النهاية بتاعة الرواية اللي خليت خمسة يشرحهوالي مفهمتهاش هما غيروها ليه، اه يا كلاب، فين فلوسي، اه صح، ده فيلم مسروق، انا لو كنت دخلت السينما ودفعت فلوس فيه كنت زماني اتشليت، واه انا حرامي بجح وكدة :)))))

18 يناير 2015

30 معلومة لا تعرفها عن #الشونج_بونج

ايمانا مني بأن الصحافة المفروض تبقي ليها هدف وفايدة وكل حاجة، دي مشاركة مني عشان أقلد انحطاط المصري اليوم...واليوم السابع والوطن....




30- بدأت التدوين بانتظام من أواخر عام 2010، واستمرت بالكتابة في المدونة حتي الان، وتنوعت الكتابات ما بين الخواطر، الأشعار، الدراسات النقدية، والسيناريوهات القصيرة.

29- فازت في عام 2009 بالمركز الثالث في مسابقة للشعر أقامتها دار "دوّن" للنشر وصدرت لها قصيدة بعنوان "قبض الريح" في ديوان مشترك بعنوان "الأرض بتتكلم".

28- اتخذت الشونج بونج هذا اللقب من أواخر سنة 2010 بعد نكتة سخيفة قرأتها علي الانترنت وظلت تضحك ببلاهة عليها طوال النهار، ومن أطلقت عليها هذا اللقب صديقة مقربة لها، واللقب كامل هو "العقيد شونج بونج الشهير بأبو تريكة".

27- بدأت الشونج بونج فعليا كتابة الأشعار منذ الصف الخامس الابتدائي، بقصيدة "يافلسطين يا فلسطين"، بعد حادثة محمد الدرة.

26- امتلكت الشونج بونج مجموعة الأعمال الكاملة للفنان صابر الرباعي ف شرائط كاست حتي تخلصت منها في نوبة دروشة "أيام ثانوية عامة".


25- تعرفت الشونج بونج علي "هاري بوتر" لأول مرة من زميلة في ثانوي، وبدأت الرحلة بشراء الكتب من مصروفها، حتي اخر كتاب اشترته من اخر معرض كتاب اقيم قبل الثورة بعام أو عامين.

24- تجميع الصور من الجرائد كان من هوايات الشونج المحببة حتي الصف الثالث الاعدادي، كانت تمتلك أجندة كبيرة كلها صور ملصوقة من الجرائد والمجلات.

23- أعجبت الشونج لأول مرة بولد في الصف الخامس الابتدائي، وكان اسمه "أحمد زين".

22- علي مدار ثلاث سنوات في الدراسة الثانوية لم تحضر الشونج طابور الصباح سوي ثلاث مرات فقط.

21- أثناء عامها الدراسي الاخير في ثانوي، لم تذهب الشونج لأي درس انجليزي، بل كانت تنفق النقودبتاعة الدرس ف السايبر، وكانت بتذاكره لوحدها، وتعرفت وقتها علي الموقع الناشئ "فيسبوك".

20- علي الرغم من ميولها الأدبية، دخلت "علمي رياضة" بعد أن كانت رغبتها الأولي "علمي علوم" وهو ما يفسره البعض بظاهرة "علمي علمك"، وحصلت في ثانية ثانوي علي 95%، وفي تالتة علي 85%، وهو ما نتج عنه في النهاية اجمالي 91%.

19- دخلت الشونج لكلية حاسبات ومعلومات - جامعة القاهرة - المرحلة الثانية من التنسيق، واكتشفت بعد دخولها ان قرار علمي رياضة كان من أفشل القرارات اللي اتخذتها ف حياتها.




18- انضمت الشونج في بداية حياتها الجامعية لاتحاد الطلبة، وعملت كمقرر مساعد للجنة الثقافية لعامين متتاليين، ثم مع قيام الثورة صبت لعناتها علي شلة الاتحاد التي كانت السبب الأساسي في فشلها الدراسي المتكرر وشيلها أربع مواد ف سنة تانية كلية.

17- الشونج تحب اللغة الفرنسية كثيرا وتسعي لتعلمها واجادتها قبل انتهاء العام الحالي 2015.

16- تعشق الشونج الأكل، مطعمها المفضل هو"كوك دور- فرع ناصر الثورة"، و"مكدونالدز - فرع شارع تسعة".

15- مطرب الشونج المفضل بالترتيب هو "مروان خوري - صابر الرباعي - تامر حسني"، ثم الكل يتساوي بعد ذلك.

14- في أكتوبر 2014، كتبت الشونج عن ألبوم "مروان خوري" الجديد وتلقي المطرب الكبير النقد بصدر رحب بل وأعاد تغريد النقد في تويتة من حسابه الرسمي.


13- كما علق أيضا علي كتابات الشونج كلا من: الملحن "محمد رحيم"، والكاتب الكبير "عمر طاهر" و"محمد عساف".



12- للشونج أغنية من تأليفها قام بغنائها صديق  (محمد أحمد علي) من الفيسبوك، بعنوان "شربت القهوة".



11-  بدأت الشونج أيضا كتابة سيناريوهات، ومسلسلات قصيرة، لم تر النور أبدا، منها رواية "ثنائي القطب" وسيناريو "دستة خطوات" و"باب خلفي" و"الوديعة" ودالم - الدولة الاسلامية في ليبيا ومصر".

10- في عام 2012، بدأت رحلة الشونج الطويلة مع الملحن بليغ حمدي، حيث أعادت اكتشافه وبشدة، وكتبت من وحي حياته سيناريو بعنوان "بليغ ورندا"، وكتبت عنه موضوعات متعددة علي المدونة، وتشرفت بصداقة "تامر حمدي" ابن شقيقه.

9- شاركت الشونج الأستاذ "مدحت ملاك" العمل علي قنواته في يوتيوب كباحثة فنية متطوعة، وهتلاقي اسمها الحقيقي موجود تحت تلات تربع الفيديوهات ف القناة الخاصة بشادية.





8- عملت الشونج علي مدي تاريخها المهني: مترجمة لمقالات تقنية، معلمة لتطوير المواقع، موظفة دعم فني، مطورة مواقع.


7- للشونج بونج أغنية مسجلة بصوتها علي موقع ساوندكلاود، أغنية "شو بعمل بهالقلب"، لمروان خوري.




6- نشرت الشونج وعلي مدار شهر كامل مقالات نقد فني علي موقع "بوابة يناير".

5- تبلغ الشونج من العمر 24 عاما، مواليد شهر مارس 1991، برج الحمل.

4- هواية الشونج المفضلة هي القراءة - الكتابة - سماع الموسيقي والأغنيات.

3- قدمت الشونج حلقات راديو علي موقع Spreaker وعلي مدي أكثر من ستة أشهر بعنوان "بث تكعيبي".


2- قدمت الشونج حلقات "فقرة الساحر" علي اليوتيوب، وهو برنامج صوتي لعرض كتاب ونقده.

1- الشونج بونج اسمها الحقيقي: ريم 

وكل عام وانتم بخير!

14 يناير 2015

اهداء....




اهداء لكل البردانين السهرانين

اللي ف اول خلقنا...

م الأصل: طين...

واللي هيتشلّو

 من النت البطئ...

واللي كمان ملّو....

واللي بيتسلّو...

بضحكة وكلمتين....

اهداء لكل السهرانين....


14 يناير 2015

13 يناير 2015

غطا....!

يا دفيانين شدو الغطا...

ما رسي العطا...

والبرد بان...

لاكت سيرتنا الألسنة...

وبقت خلاص...

مضغة ولبان...

وفقدنا حتي حقنا...

لو يوم هنحضن بعضنا...

البرد مش هيهزنا....

وتهدنا عيون الجيران!

يا دفيانين شدو الغطا...

ما خلاص بقي...


فات الأوان...!

10 يناير 2015

طويل التيلة..... #خالد_سليم

إلهي لا تكسب ولا تخسر!

زمان مرة أطاطا دعت علي عوكل بدعوة كدة... "إلهي لا تكسب ولا تخسر، وتفضل طول عمرك ف الاوفسايد كدة"، خالد سليم بقي، لا هو مطرب، ولا هو ممثل، ولاهو أي حاجة، هو عايش ف الأوفسايد!

خالد محمد سليم سمارة، الشهير بخالد سليم، بدأ غنا ف التسعينيات، بأغنيات ظريفة لطيفة كدة، ماكانتش شبه عمرو دياب، ولا ايهاب توفيق، ولا حتي محمد فؤاد، هو طلع ف الفترة اللي سبقت ظهور تامر حسني أو محمد حماقي، أو طلع ما بينهم هما الاتنين، هي الحقيقة محدش يعرف خالد سليم طلع امتي بالظبط، هو طلع وخلاص..!

بدأ خالد مشواره بألبوم "عالم تاني" طلع سنة 2000، وعمل كليب "عالم تاني" اللي كان بيحب فيه حورية بحر وكدة، وحاجة لطيفة، شوف الكليب من هنا:


بعد كدة كانت انطلاقة سليم الحقيقية ف أغاني فيلم "السلم والتعبان"، وأشهرها أغنية "انا حبيت"، فيلم "السلم والتعبان - 2001" نجح نجاح متواضع لكن بعد كدة البنات بدأت تحبه، الحقيقة انا كمان باحبه والله، مش عشان هاني سلامة، ولا عشان حلا شيحة، الفيلم كله كان حالة طارق العريان عملها، بمزيكا واخراج، واداء تمثيلي من أحمد حلمي قلما وجدناه بعد كدة ف أفلامه الكوميدية.

ف 2003، طرح خالد سليم ألبوم "ولا ليلة ولايوم"، بالتوازي مع أول أفلامه كممثل "سنة أولي نصب"، فيلم متواضع الامكانيات من انتاج جهاز السينما، عمله خالد بصفته مغني جديد مع الجان الصاعد الجديد بردو "أحمد عز"، وعملو فيلم حلو مع "نور" و"داليا البحيري"، وعدي والدنيا انتهت، أغنية بلاش الملامة وقتها كانت طفرة وبقت رنة ف كل التليفونات، يمكن عشان مطلعها متاخد من رنة أصلا :D


المهم روح يانوفمبر وتعالي يا نوفمبر، وعمل خالد سليم فيلم تاني من انتاج جهاز السينما بردو، واسمه "كان يوم حبك" أستغفر الله العظيم يعني مش هتكلم ونجيب سيرة الناس، بس الصراحة فيلم استغفر الله العظيم، بعديه طرح خالد رابع ألبوم ليه "خد الجميل".

مسيرة خالد في السينما وقفت، وهو ذات نفسه عطل علي الصحراوي شوية، وطلع سنة 2007 بألبوم مع "محسن جابر" ف "عالم الفن"، وصور منه غنوة واحدة، وكان ألبوم جميل جدا، وبعدها بتلات سنين طرح خالد ألبومه الأخير "This is Me" تقولش مايكل جاكسون يا خي.

خالد ف الوقت ده ما بين كل ألبوم وألبوم كان بيعمل رشة ألبومات وأغاني خليجي معتبرة بحكم انه اتولد ف الكويت أصلا، عادي يعني كله بيعمل مصالح من وقت للتاني، راجع أنغام - أمال ماهر- شييرين عبد الوهاب.


خالد بيغني أسباني، انجليزي، مصري، كويتي، الصراحة شامل، بس تحس من مسيرته الفنية أنه قرفان من انه مغني، بيعمل الألبوم ويرميه، يصور الكليب ويرميه، مفيش اي تلميع ليه من جانب الأغاني، مش كسل منه، غباء ف ادارة الأعمال، غباء ف التسويق، أو هو نفسه مش معتبر نفسه مغني، مع انه بيغني وقادر يغني حتي لحليم:

شوف خالد وهو بيغني بلاش عتاب لحليم:


بس الفكرة كلها ان خالد مركز بكل طاقته علي انه ممثل، مع انه ف رأيي مش ممثل واو، هو ممثل عادي، أو أقل من العادي طبعا، مدرسش تمثيل، هو صحيح جسمه مساعده وطويل ماشاء الله، بس ارحم ديك أبونا يعني، مش ف كل حتة يابن الناس !

هو خالد ماشي بنفس مبدأ كل الناس، وايه يعني لما أمثل: هي كيميا !

قبل ما اقفل البوست وأروح، عاوزاكم تشوفو الكليب العبقري ليه "أدعي عليك" بتعليق الدكتور المبهر أحمد عاطف..!




10 يناير 2015

#ذكريات_اعدادي

هذا البوست شخصي بشكل بحت ولا يمثل أي حد من الحدود أو الحدات، ولو مش عاجبك لك كامل الحق ف الاعتراض من غير شتايم.

- ف اعدادي وكطالبة معندهاش غير أوبشنين اما نجوم اف ام أو الشرايط....
مكانش عندنا اختيارات كتير.....
محمد حماقي وعلي رغم تحاملي الشديد عليه من كل الأحوال كان رفيق مراهقتي بالأغنية دي: 


حبيبي وحبيب حياتي تامر :D كان رفيق الطفولة المشاكس اللي فضل معايا سنين لحد دلوقت، تامر كان نجم المرحلة بأغنية "انسي":

الأغنية من ألحان تامر حسني وكلمات محمد زقزوق
وعلي الرغم من بساطتها إلا انها جميلة من أغاني تامر المنسية
"تامر حسني بقي ليه أغاني قديمة يا جيهان :D "

مطربة الجير :D كاتيا حرب :D وأيام سكوت هنصوت بتاع مفيدة شيحة وأدهم الكموني، ايه البهارات اللي اتدلدقت دي!

انا شفت كليب الأغنية دي بعد خمس سنين من صدورها تقريبا لأن مكانش عندنا دش :))


مطرب السيف والقلم، القبطان فضل شاكر أعاده الله علينا يارب كدة بالخير واليمن والبركات ويفوقه من سكرته اللي اتنيل اتحط فيها...
كان ليه ذكريات معايا ملهاش حل بأغنيته: يا حبيبي تعالي تعالي...(مشتاقالك) تعالي تعالي.



وكفاية عليكم كدة :)
 

08 يناير 2015

النابلسي....

أديب ضل طريقه إلي عالم التمثيل، وصحافي مثقف درس في الأزهر، مثل وكتب، وأحب وتزوج، ومنعته كرامته عن السؤال، وتكفل صديقه بمصاريف دفنه.



عبد السلام النابلسي، مصري من أصول فلسطينية، ولد وتربي في مصر، وتوفي في لبنان، وقت أن كانت مصر للجميع، والوطن العربي مفتوح المصراعين.

كوميديان بدرجة كونت، كما أطلق عليه يوسف وهبي "كونت دو نابلوز" ونابلوز هي نابلس بالفرنسية، لم يلجأ للحركات الجسدية المضحكة، ولا للاسفاف، فقط ظل كوميديانا نبيلا، ودوما ما كان يبرع في أداء دور المتغطرس الفقير، أو المتحذلق، بمرونة وسلاسة يحسد عليهما، وبرع في أداء الأدوار الثانية.

أدي عددا لا بأس به من الأفلام خلف صديقه الصدوق "فريد الأطرش" الذي فضل أيضا العمل مع الكوميديان الصاعد "اسماعيل يس"، لكن عبد الحليم حافظ علم بتأثيره علي الجمهور، وفضل ضرب "الاطرش" تحت الحزام، ومثل تقريبا أغلب أفلامه مع النابلسي، حتي فيلم "معبودة الجماهير"، كان من المقدر أن يقوم النابلسي بدور "المهندس" لكن توفاه الله.

أفلام "حليم" عامة لم تكن زاعقة كأفلام "فريد الاطرش"، أفلام فريد احتوت علي الاستعراض، الرقص، الكوميديا الساخرة، والسخيفة أحيانا، لكن أفلام حليم كانت تابلوهات رقيقة، والنابلسي لم يكن سوي ند لحليم، بل وحصل علي أجر مواز لأجر حليم.

تذكر معي دوره في فيلم "فتي أحلامي" ونديته مع حليم، خفة دمه كانت بارزة بشدة مع حليم، ودوره اللطيف سيبقي عالقا في الذاكرة للأبد، شاهد استعراض أغنية "بكرة وبعده" فيه حليم والنابلسي وفريدة فهمي:



استعراض لطيف....كذلك تذكر دور النابلسي في فيلم "يوم من عمري" واداءه اللطيف جوار حليم في أغنية "خايف مرة أحب" من ألحان "بليغ حمدي" :


في نفس الفيلم أيضا "منير مراد" وظف صوت النابلسي من ضمن أغنية "ضحك ولعب وجد وحب":

حضور النابلسي الطاغي يرسم البسمة تلقائيا علي وجهك، وظل متوهجا في الأدوار الثانية، لكنه لما واتته الفرصة لينال البطولة لم يحالفه الحظ، فيلمين فقط قام ببطولتهما،
"عاشور قلب الأسد"، وفيلم "حلاق السيدات  - 1960"، الذي أعتبره الجزء الثاني من فيلم "اسماعيل يس في الجيش- 1959"، حيث نري مصير الشخصيات من الفيلم الأول، ونري اسماعيل يس يساند صديقه بدور ثان، فتتبادل المواقع بين النابلسي ويس.


من ينسي دور النابلسي في فيلم "اسماعيل يس بوليس سري" نعم، دور الصول بكير!
والثنائي الأسباني الشهير "دون كاميلو" والمطربة الحسناء "باتستايا" :D

ودوره في فيلم "انتا حبيبي"...
شادية: عصفور ييعني باحبك
فريد: والمقطف؟

شادية: يعني باحبك يا مقطف..
فريد: وايه الحنش اللي هناك ده؟
النابلسي: ها انا ذا :D

للأسف مفيش فيديو للمشهد ده بس، بس دي أغنية من أغاني الفيلم الجميلة "أحلفلك متصدقشي":

النابلسي كان أديبا، مفوها، متحدثا طلقا، شاهد حوار نادر له مع "ليلي رستم" هنا:

عاش النابلسي عازبا مضربا عن الزواج، حتي وقعت عينه علي زوجته التي تزوجها حتي توفي، كانت شابة لبنانية جميلة، تزوجها زواج خطيفة لما رفض أهلها الزواج منه، وفارق السن كان كبيرا، لكنها كانت تحبه، ورفضت الزواج بعده.

نهاية النابلسي كانت مؤلمة، ولا أحب الحديث عنها كثيرا فالرجل رسم الابتسامة علي وجوهنا طوال حياته الفنية، في النهاية أترككم مع الفيديو الأثير لي: 

وأشوفكم بخير :)

 
Reem Essam Cairo , Egypt | copyrighted2011 - Reem Essam