الجوكي....

ملحوظة: البوست ده اعلان غير مدفوع...لمحل الجوكي ف المنيل.

البداية كانت مع أمي، أخدتني وقالتلي تعالي هأكلك جيلاتي، أيوة بنقول جيلاتي يا جدع انتا مش ايس كريم، فين يا ماما؟! ف المنيل....ركبنا، انا وهي ونهال، ومش فاكرة مصطفي كان موجود ولا لأ، كان موجود أه، انا فاكرة انه كان عيد تقريبا، أو صيف، خدتنا عند الجوكي، وأكلتنا عند كنتاكي الجربان اللي ع الصف التاني ف المنيل...


أمي حكتلي الحكاية بتاعة المحل، ان صاحب المحل ده كان أصلا بيمثل، جابوه ف فيلم "شئ في صدري" عشان يمثل دور رشدي أباظة وهو صغير، لأن فعلا فيه شبه من رشدي أباظة، صاحب المحل قاعد ف المحل طول الوقت ع الCase وراجل لطيف جدا، لو طلبت تتصور معاه مش هيقولك لأ.

المحل نفسه ببابين، باب قدامه الCase والتاني عند التلاجات، المحل فيه تلاجتين ايس كريم، وتلاجة ف الجنب كدة محطوط فيها التورتات، عندهم تورتة بالأيس كريم -دي بقي ايس كريم متفهمش ليه- هموت واجيبها بس عمري ما جبتها. الراجل بياخد منك الورقة، وتقوله انتا عايز ايه، وبعد ما يملالك الكوباية -ده لو انتا بتفهم طبعا-، أو البسكوتة -عيل سيس بقي وخلاص- هتلاقي طبق نحاس صغير كدة، ده للتبس، وكل واحد وذوقه، استذوق عامة وابقي حط فيه جنيه ولا نص جنيه يعني.



الجوكي عنده أنواع مريبة من الايس كريم، فيه ايس كريم بترولي كدة، باللبان، وعنده حاجات كتير،انا عن نفسي لما باروح باكل من عنده كراميل، وبندق وشوكلاتة، مبغيرش :D

من كتر حبي ف محل الجوكي، بقيت باخد كل الناس اللي باحبها عنده، خدت يارا صاحبتي، وخدت ايمان صاحبتي، لكن المرة الوحيدة اللي ندمت فيها اني خدت فيها حد هناك لما خدت شلة الكلية بتاعتي، بعد الفطار ف رمضان، وجبتلهم ايس كريم ومعجبهمش، مع انه المفروض ان الديفولت بتاعه انه بيعجب كل الناس....


العيد اللي فات، خدت امي ونهال ورحنا هناك، والمحل كان زحمة، واتعجنت ف النص، وعلي قد العجنة دي كنت مبسوطة، وحاسة بإن كل الناس بتشاركني حبي ف المحل، وكل الناس بتحب الايس كريم ده، وجاينله من بعيد.....

تعليقات

  1. عاوز الرقم ياجماعه

    ردحذف
  2. الجوكي ايس كريم ربنا يديمها نعمة علينا الشكر لله على النعم

    ردحذف
  3. عايزه النمرة وتكون واتس أب وارجو الرد عليه برساله عشان اعرف بقول ارجوكم ارجوكم بأي طريقة

    ردحذف

إرسال تعليق

تعليقك يسعدني..يا أفندم!

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!