الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

31 أغسطس 2014

مائة عام من الكول سنتر..!

انها وقفة مع النفس....كبير أوي الكلام ده، لا ده كشف حساب كدة...يمكن عشان انا استقلت وفاضية....ويمكن عشان ندمانة علي قرار استقالتي ويمكن لأني سايبة لنفسي مساحة أفكر لأني فاضية مش أكتر...

انا هكتب تجربتي مع الكول سنترز اللي اشتغلت فيها...هكتب كل حاجة بأمانة ومش هاممني أطلع حمارة...لأني حمارة فعلا :D

بادئ ذي بدء..انا حابة أتكلم عن نفسي شوية...أنا انسان موهوب..أو هكذا قيل لي...انا شخص بيجيد الكتابة الساخرة، السيناريو، باكتب شعر، باكتب مقالات رأي ومقالات نقد...وذات حس موسيقي عال، وذات طابع ساخر لاذع....حساس....إلي أخره...

اتخرجت من كلية الحاسبات والمعلومات جامعة القاهرة بتقدير عام جيد، الكلام ده كان سنة 2012، واحنا ف 2014، اشتغلت أكتر من شغلانة، وعملت أكتر من حاجة، والمشكلة الكبيرة بدأت من وانا ف الكلية....كرهت البرمجة...

من سنة أولي، كرهت دكتور البرمجة، والانسان المتخلف -اللي للأسف كان واحد من زمايلي- بيشرحلي برمجة كرهني فيها اكتر، معرفتش استوعبها، محبتهاش....اتخنقت منها.....وكبرت معايا العقدة...البرمجة كمبادئ قشطة أفهمها...يعني كل حتة سليمة لكن لوحدها..جمع بقي التوتال..مفيش توتال...نفذ المبدأ اللي اتعلمته واعمل حتة كود صغيرة مفيش...الموضوع فضل يتفاقم يتفاقم لحد ما وصلت تالتة كلية ودخلت قسم مش محتاجين نشتغل بروجرامنج فيه إلا لماما...

الحمد لله أخدت كورس جافا ف تالتة، كان سنة الثورة حتي، بدأت ألوش..تلويش...نحت كبيرة...شلت مادة ف تالتة بسبب ان كان فيها تسليمات كل أسبوع وانا الحمدلله لا أفقه أي ابن كلب ف اي حاجة....بس....

وانا ف رابعة دخلت مشروع تخرج مع صديقتي الأنتيم واتنين معاها، الأربعة كانو أنضف م الصيني بعد غسيله، انا الرابعة بتاعتهم..لكن وبصفتي أذكاهم شنبرت الدكتور المشرف، وبدأت أتدحلب هنا وهنا، وأطبق اللي خدته ف الكلية، وأعمل النظري، وألحقه بالعملي، واشتغل كدة واشتغل كدة، لحد ما بقي عندي شبه مشروع، كله كوبي وبيست من بعضه، حاجة كدة ضحكنا بيها علي اللجنة وخدت امتياز بيها ولحد دلوقت مش مصدقة ازاي....

دخلت عليهم بالكتاب والديمو الفيديو والبريزنيشن والمشروع أصلا مش كامل وبايظ...وفيه حاجات بايظة وحاجات مش كاملة والحمد لله ربنا ستر....

الظاهر انه كان امتياز حرام بقي :D

خرجت م الكلية بردو مش فاهمة حاجة، حاولت اروح كذا شركة واشتغل برمجة، فشلت....حسيت ان بيني وبينها حاجز رهيب...حاجز نفسي معرفش اتبني امتي وفين وازاي، خيبة كدة....خيبة فضلت تبقي ناقعة لحد ما الناس كلها بقت خيبتها السبت والحد وخيبتي موردتش علي حد....

رحت فودافون وحكيت عن تجربتي فيها ف بوست شلته بعد كدة عشان أسباب مهنية بحتة...ورحت بعد كدة شركة اكسيد...

اتعلمت ف اكسيد حاجات وسخة كتير....واتعلمت حاجات نضيفة وحاجات ملهاش لازمة...
اكسيد ماهي الا مصلحة حكومية كبيرة فيها موظفين محدودي الذكاء والخبرة...أغلبهم كان أول شغل ليهم جوة ومن ساعتها مطلعوش...

اكسيد هي شركة اوتسورسنج لتوفير عمالة رخيصة وعبيد أرخص لشركات تانية كتير همها الوحيد مص دم الناس -بدون ذكر اسماء تي اي داتا-، وتخريج وتفريخ موظفين ملهمش عدد ولا نهاية رايحين جايين علي اكبر ترن أوفر ف مصر...الكول سنتر...

نبدأ بالحاجات الحلوة:
1- تقدير قيمة الوقت بالدقيقة: حاجة اكسيد علمتهالي، اني أقدر قيمة الدقيقة،انها بتفرق لما بحاول ألحق البص وهو طالع، او اني معديش البريك، أو اني ألوج بدري عشان مينزلش تاردي..إلي آخره.

2- التوفير: علي قد دين أم لحافك مد رجليك ومتتفشخرش أوي، انتا مش بتاخد زيليون جنيه يعني!

الحاجات الوسخة بقي:

1- تضييق الدماغ: متقولش للعميل ف اقرب وقت ممكن قوله مفيش وقت محدد...روح امك الفرق فظيع الحقيقة..!

2- البواخة: ايه ده انتا قاعد فاضي وممعكش عميل وفاتح الساوندكلاود...اقفله يا كافر يا عدو الله..!

3- قلة الأصل: انا مليش دعوة بيك...ومعرفكش اساسا...

4- القسوة: بتموت...انزل اشتغل عادي، والمقولة الشهيرة للسيدة الفاضلة اللي تعبان ياخد سك واللي متدايق يقعد ف بيتهم.

5- انعدام الضمير: الAbusing هو سيد الموقف، وحرامي بلا بينة سلطان...

6- التظبيط هو الحل: طالما مظبط التيم ليدر بتاعك يبقي كسم العالم...بس كدة...

7- الزن ع الودان أوسخ م السحر: وما ضاع حق وراءه مطالب....

8- حافظ مش فاهم: يتناسب موقعك الوظيفي مع قدرتك علي الحفظ وانعدام قدرتك علي التحليل والفهم بشكل منطقي، وطالما انك تفكر بشكل منطقي فذلك سيتسبب حتما في تجمدك في موقعك لأطول وقت ممكن.

9- بالحب..بالحب...بالحب...

10- الوساخة: زنبق اللي جنبك...

انا كرهت اكسيد....وكرهت كواليتي اكسيد...وناس اكسيد وTEData وكل مايتعلق بيهم...المكان كريه...ممل...زحمة..والأبشع لما تبقي قاعد متلاقيش واحد تعرفه قاعد جنبك...وكل اللي حواليك ناس جديدة...محدش يعرفها....وداخلين شلل..كأنهم رايحين النادي...
كرهت الاستغلال والعبودية....اشتغل بيوم أوف واحد قشطة...اشتغل من غير اجازة قشطة..انزل ف العيد قشطة...اشتغل ف رمضان قشطة....خد بريك ربع قشطة...مفيش بريكات تلات ساعات قشطة....كل حاجة قشطة....كل الناس بتضغط علي بعض...
وانتا مطالب تتحمل نتاج ضغط الاكاونت مانجر، ع السوبر، ع التيم ليدر علي ام دماغك...

ماشي تدندن...ياعدو الله يا فاجر...ماشي مبسوط...ايه ده انتا ازاي مبسوط....ازاي تجرؤ تبتسم ف مكان عفن ومستنقع زي ده....
قرار اني استقلت ممكن يكون غلط وممكن أندم عليه....ندمت علي حاجات كتير قبل كدة...لكن الشئ الوحيد اللي كان يستحق الندم علي هو استقالتي من فودافون...

لما يكون كل ظروف الشغل قذرة...ومديرك بس هو الشئ الوحيد اللي مخليك صابر ومتحمل قرف الشغل...ييبقي كدة يغور مديرك يعني..هو بروح أمه مش هيعوض دمك اللي بينحرق كل شوية...ولا هولامؤاخذة هياخد التهزيق بدالك...ده هيكمل عليك..ازاي هيطلع زميله غلطان....

مادام الواحد قطعة شطرنج...وبيعمل ألف شغلة مع شغله بلا مقابل...يبقي أرحمله يشوف مكان تاني...انا مش هقبض لما هو يتارجت..وكلمة شكرا مش هتجيبلي عربية ولا هتحط زيادة جنيه ف جيبي...هو عند الله اه...لكن ربنا مش هيبعتلي عربية دلوقت...

الانترفيو اللي ضيعه عليا انا مش مسامحاه فيه....قال ايه مستخسرك ف قعدة البيت...قعدة البيت أشرف وأكرم ألف مليون مرة من لقاء سحن وسخة يوميا زي سحنتكو....وغلكو اللي ملوش حدود...وغبائكم....خليه لنفسكو...انا تحملت بما فيه الكفاية...وصبري نفذ....وخلاص انتهي كل شئ...

الكلام ده بافكر نفسي بيه بس...عشان عمالة تقولي ارجعي ف استقالتك....انا مش هطلع عيلة اول حاجة...وتاني حاجة والأهم....حتي لو كنت صرصار وخرجت من بلاعة..فأكرملي ألف مرة أتضرب بالشبشب ولا ارجعش وسط الخرا تاني...

افتكري كل مرة حد جبرك علي حاجة تعمليها هي مش صح...
افتكري كل مرة واحد قتلك بندالته وسماجته
افتكري السحن الوسخة...والناس الجهلة اللي داخلة تتنطط عليكي...
افتكري كل مرة بتبدأي فيها م الصفر..
افتكري الأيام اللي حسيتي فيها انك علي كف عفريت....وانك مش ف أمان....وافتكري الأيام اللي كرهتي نفسك فيها بسبب حبك لشخص مينفعش تحبيه...
افتكري ضيعتي كام فرصة عشان تفضلي جنبه...
باقولك من منطلق كل ده...كفاية بقي...كفاية يا شونج....ويللا نبدأ من جديد :)

29 أغسطس 2014

الديك

جاية مشي...
من الشمال..
وم الجنوب..
انا اتبريت...
وبرغم وزني ده..
قربت أدوب...
شق الجبل..
بقي ف الكعوب...
ومسحت نفسي..
من الجروب...
بقي كله رغي...
ونمنمة...
وانا نويت...
والنية: أتوب..!
متشردة بين الحواري..
أشحت صحاب...
يادي القرف...
فين الشرف..
ف البهدلة فوق الاحتمال...
قاللي الوجع:
قومي اهربي...
دي اللمة دي..
لمة رجال..
وانا قلت لأ...
بالفتونة...
عادي..
ده طبعي..من زمان...
مش مؤمنة غير بالهنا..
والضنك..من شيم الايمان...
يانفسي...يوم..بس...
اخشعي....
منفسكيش يوم ترجعي؟!
عايشة...عشان تتوجعي؟!
وخز الضمير...
فتح الجراح...
وهنا انقطع حبل الكلام...
وشهرزاد زارها الصباح....
وشهريار مليان..عيوب..
وبرغم وزني وكل ده...
قربت أدوب..!!!

23 أغسطس 2014

06 أغسطس 2014

يا دين أمي

يا دين أمي...
مفيش أصنام...
ولا معبد..
ولا كنيسة...
ولا جامع هيلقي إمام...
ضربنا الكل تفليسة..
يا دين أمي..
مفيش تلاكيك...
ولا تشرك بديني شريك..
وهات اللي ف جيبي أديك...
دنا مش قادر..
أديلك...
يا دين أمي انا بقرنين...
ثواني اعدي فوق ديلك...
يا دين أمي شيطان..
وحمار...
وعقله مفيش..
ولا الصرصار...
وماشي بطيزه..
باستهتار..
وقلب نور...
وع العالي...
يا دين أمي
غبي ومجنون..
يا دين أمي...
هعيش مبضون...
هعيش بالحزن
انا مسكون..
وانتي تداوي..
وتضمي...
وانا كافر...
غبي ومجروح..
باقول وبانوح...
يا دين أمي...


03 أغسطس 2014

صاحبك الفصيل وصاحبك المنحرف....

صاحبك المحبط صاحبك المنحرف
1- لو قلتله الحق التنين المجنح باض بيضة سمكة واتزحلق ع الزتونة هيقولك عادي يعني فاكس.. 1- لو قلتله سلحفاة تأكل خس هيبص معاك بشغف
2- أي حاجة حلوةف الحياة هيبوخهالك 2- هيحليلك الحاجات البايخة
3- هتعمل معاه الحاجات مش بحب..بملل 3- هتعمل معاه أي حاجة ف اي حتة بحب
4- هتتحول انتا وهو لبطة بلدي 4- هتبقو طيزين ف لباس طايحين ف اي حتة
5- جاي من بيتهم علي وشه باقي نعاس اليوم 5- صاحبك المنحرف هييجي من بيتهم فايق علي عباد الله وهيستلمهم
6- الافيه صد بس... 6- الافيه بينك وبينه صد رد زي ماتش بينج بونج
7- شعاره الدائم: فاكس...اناكدة مرتاح 7- شعاره الدائم: وليه لأ؟
8- يميل للعبوس والاكتئاب 9- يميل للضحك والفرفشة

 
Reem Essam Cairo , Egypt | copyrighted2011 - Reem Essam