الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

31 يوليو 2014

تعبت..!

تعبت...
تعبت من المحايلة والمدادية...
تعبت من الكدب والسلامات الباردة
تعبت اني اتحاسب بالحتة مش علي بعضه، تعبت من كل ده...
تعبت من الناس اللي هي ولا حاجة وعاملة نفسها حاجة...
تعبت م الحمير ف النجيل...لا الحمير بتشبع ولاالنجيل بتخلص...
تعبت من كوني ف مكان غبي، واني انسان غبي....
ومحتاجة أعمل حاجة تكون أكتر فايدة للبشرية ومفيدة أكتر ليا وليها طائل، بدل ما أفضل أنحت ف الصخر عشرتلاف سنة من غير مبرر، ولا مقابل مادي ولا معنوي...محدش بيكافئك علي انك بتعمل شغلك...
محدش بيكافئك علي انك بتعمل اكتر من شغلك، محدش بيقدر قرفك، ولا انتا اصلا فارق ببصلة مع طيزأي حد...
تعبت من كل الكلام الفاضي ده، ومن التكرار والملل والقرف والرط الفاضي....نفسي ف شغلانة تتعمل من غير ما يكون فيها رغي ولا رط...نفسي ف شغلانة تخلص من غير مناهدة ولا عالم ضيقة تقف علي ولا حاجة وتعمل منها حاجة....تعبت من كل القرف ده...
وخلاص...مبقاش ليا عيش ف الكارير ده....أظن اني بحاجة لمزيد من التغيير، لأني زهقت من البقاء نصف مبللة طوال الوقت داخل مستنقع خرا وطرنش مجاري..!، والكل بيطالبك انك تصطاد منه سمك..!!!


23 يوليو 2014

في حضرة الأميرة...سميرة..!



في عصور ما قبل النحنحة والتبجح، والردح في الأغاني، والايقاع الهابط...كانت سميرة....
سميرة سعيد....المغربية الفشيخة، اللي معتمدتش علي مؤخرتها وصدرها أكتر ما اعتمدت علي احساسها وصوتها....
في البلوج بوست ده بنستعرض سوا، أو أنا بستعرض عليكو عموما :D
الأغاني اللي باحبها لسميرة سعيد، علي مدي طول مشوارها الفني الطويل جدا، واللي استحقت فيه وعن جدارة لقب "عمرو دياب" المغنيات، لأنها مبتكبرش :
D

1- ماليش عنوان.

كلمات سيد حجاب - ألحان بليغ حمدي...

ماليش عنوان تعتبر أغنية غير مشهورة ليها، هي من أغانيها الأوائل عموما، ألحانها هادية جدا، من فلتات بليغ حمدي الهادية اللي مفيهاش مقسوم.
الأغنية دي باحس انها كلمات بليغ بردو، لوجود بعض التراكيب اللغوية الغريبة فيها..زي "في رقصة المراكب"، وهو ما يعد من فلتات بليغ اللغوية حيث انه كان شاعر مش أوي، بس بيوصل الاحساس علي أية حال.

2- بنلف.

كلمات وألحان بليغ حمدي...


لو عملو أوسكار أنكد أغنية علي مدار التاريخ، ماظنش اننا هنلاقي احسن من أغنية بنلف عشان نديها الجايزة دي، أغنية بنلف تصلح لرثاء حبيب مفقود، شخص ميت، أمل غائب...كل الحاجات اللي راحت مننا وعاوزين نسح عليها شويتين تلاتة أربعة..الأغنية اتعملها تلات توزيعات، اتنين سميرة غنتهم وواحد مصطفي قمر غناه :(
بس انا دايما بافضل التوزيع الأول والأصلي بتاع بليغ.
بليغ حمدي حط مأساته كلها في الغنوة دي، بحيث انك لو تعرف قصته هتتأكد من كلامي..

3- قال جاني بعد يومين

كلمات عبدالوهاب محمد - ألحان جمال سلامة.

أغنية قال جاني بعد يومين، للملحن صاحب الألحان ذات الضجة العالية جمال سلامة، جمال سلامة صاحب عدد من الألحان العالية التون زي محمدا يا رسول الله بتاع ياسمين الخيام، وأغنية تانية لسميرة هنحطها ف البوست ده، لحن أغنية جميلة لسميرة، قال جاني بعد يومين، يبكيلي بدمع العين.

أغنية تخليك تسمعها وتسب لراجل بايخ واحدة حبته وجاي يشكيلها من الست التانية...يا بجاحتك يا اخي..!



4- احكي ياشهرزاد .

كلمات عبد الوهاب محمد - ألحان جمال سلامة بردو.

سيبني لبكرة الله يخليك :D رغم عدم اقتناعي التام بحسين فهمي كشهريار بعين أمه الخضرة دي، بس الغنوة عاشت، وعاشت أكتر بكتير من المسلسل، ومحدش أصلا هيفتكر المسلسل غير الجيل اللي من سنه غير كدة محدش يعرف غير الغنوة، الغنوة من ألحان جمال سلامة بردو، تونها عالي لكن صوت سميرة أفخم من ان لحن يغطي عليه، دي كانت مرحلة سميرة سعيد اللي انا لما كبرت سمعتها، واللي حبتها عليها.

5- خايفة.

كلمات عماد حسن - ألحان صلاح الشرنوبي.

خايفة، مش عارفة منك أو عليك...خايفة....
الأغنية دي تبدأ هادية ورايقة وفجأة تخش عليك بجو الرعب، مش هي خايفة بقي
:D
سميرة سعيد في ألبوم خايفة بالتحديد بدأت تكشف عن أظافرها كمرأة حديدية ملهاش كاسر، وانا حبيت ده الحقيقة لأنها كانت بتختار أغانيها بشياكة ولازالت بردو كذلك.

6- عينك مني.

كلمات وليد رزيقة - ألحان صلاح الشرنوبي.

ايقاع الغنوة دي كفيل انه يدخلك ف مود كويس، شئ مبهج، حتي الكليب نفسه مبهج، ملوش حل، سميرة وهي بتقول "لالا لالا..عيني لالا..حب تاني لا...استحالة.."
بترقص وش
:D

في الأغنية دي البطل هو الوتريات، والفوكالز الي سميرة بترددها وسط اللحن، كذلك توظيف الكورس الصح في وسط اللحن.



7- ليلة حبيبي.

كلمات سامح العجمي - ألحان أشرف سالم.

الألفينات بقي وسميرة وهواك....سميرة كانت Goddess  بالمعني الحرفي في الألفينات، مكنتش باشوف ولا بسمع غيرها ولابستظرف غيرها بردو، أغنية بتحمل كل معاني الاشتياق والاحتياج في الكون، لحنها عاصف، خاطف، خصوصا في اللازمة بتاعتها وهي والكورس بيغنو مع بعض "ليلة حبيبي، خليك معايا، ليلة حبيبي، ملهاش نهاية"
الأغنية نفسها بتحسسك انها بتتغني ف ليلة برد، وهي تحت اللحاف...!

استخدام الدفوف في الايقاع في الأغنية معبر جدا، وأشبه بدقات القلب، كذلك استخدام الكورس، متوظف صح في سابقة لأغنية ايقاعها سريع زي دي.

8- يوم ورا يوم..حبيبي..."بصوت هنيدي"

كلمات خالد تاج - ألحان عمرو مصطفي.
الفاتوحة اللي سميرة فتحتها علينا ومتقفلتش لحد دلوقت، الدويتوهات مع العالميين، سميرة أول من أدخل الشئ المسمي بالشاب مامي إلي الوطن العربي، بعد ما كان انتشاره في فرنسا والجزاير وبعض المنحرفين من سماعين الراي في مصر، ما علينا، الأغنية دي انا فاكراها كويس، كانت من انتاج محسن جابر، اناباعتبر عصر انضمام سميرة لمحسن جابر عصرها الدهبي الي عملت فيه أفشخ ما غنت في فترة الألفينات،
بعد كدة بلاعة بتوع الراي ضربت، وجه خالد عمل دويتو مع عمرو دياب، وجه فوضيل عمل دويتو مع أمل حجازي، وجه مامي تاني عمل اغنية مع إليسا "كانت حلوة".

9- ما خلاص.

كلمات أمير طعيمة - ألحان عمرو مصطفي.
مرحلة الشراسة –أموت أنا- دي أجمد مرحلة ف تاريخ سميرة، فاكراها انا كانت ف حدود سنة 2006 تقريبا لماماخلاص نزلت مع ألبوم جامد تنين ليها، كنت بشوفها علي قناة مزيكاايام ما كان جاد شويري هو فتي أحلامي، المهم يعني، ما خلاص كلماتها استثنائية وجريئة، والكليب كان جرئ ومختلف ولون شعر سميرة فيه كان حلو...!

10- حب ميئوس منه.


كلمات نادر عبد الله - ألحان محمد يحيي
استكمالا لسلسلة الأغاني الاستثنائية والكلمات الفوق عادية، سميرة عملت أغنية حب ميئوس منه، كانت هيد ألبوم بنفس الاسم....الأغنية توزيعها ساحر وكلامها فاجر...يكفي كوبليه "يلا سلام سلام، بينا مفيش كلام، أحسن لينا نبعد عنه، ننسي اللي فات كمان، ننسي اللي فات عشان، الحب ده ميئوس منه".

11- أربيل شمس كوردستان.
كلمات هلاوكت زاهير - ألحان آراس عبد الكريم - توزيع يحيي الموجي "تحيا مصر ياعم الحاج"

أغنية بالكردي لسميرة سعيد، عن أربيل محافظة اقليم كوردستان في العراق، الأغنية بالكردي،لكن صوت سميرة فيها كان رائع، لهواة الدعبسة زيي كدة اسمعوها.

12- شائت الظروف.

أغنية للنحتجي السبوبجي عمرو مصطفي، عمل علي لحنها أغنية هابطة ليه اسمها الكبير كبير يا حبيبي، بس بصوت سميرة أحلي، يعني أكيد فيه فرق بين "حبيتك ومشيت طريق طويل وعملت عشانك المستحيل" وبين "ولعلمك انا مش هموت عليك، انا عندي خمسة ستة يدايقو فيك"، يخربيت أم هبوطك يا عمرو....مانتا عمرو بقي :D

غير ان عمرو بوظ اللحن بكلام سمج، ان الغنوة من سميرة أحلي فعلا....

13- مازال..!!


كلمات وألحان محسن تيزاف

بعد غياب طويل الامد متفهمش ليه بالظبط، سميرة عملت أغنية هي بتعتبرها دويتو عشان جابت واحد يغمغم في النص كدة، مغربي، بس أفشخ ما تم غناءه الحقيقة، مازال أغنية حلوة، وكلامها حلو، واللي عايز ترجمة انا ممكن أترجمله يعني انا ف الخدمة فالمغربي، البطل ف الغنوة هو اللحن ثم التوزيع، لأن الأغنية اكوستك جميلة جدا بردو، وانا مش باحب اسمعها غير اكوستك.
ملحوظة: اكوستك يعني من غير لحن صوت بس.




12 يوليو 2014

مدافع نافارون..!

ما بين الرقة والقوة والنعومة شعرات عديدة مزقها العديد من المطربين...والمطربات...
وردة هي احدي المطربات التي جمعت في صوتها الرقة والقوة في وقت واحد، لكنها أغلب الوقت يطغي عليها قوة صوتها وتستعرض بشدة...

قيل عن وردة سالفا أن أم كلثوم كانت تكرهها، وتبغض أن يمنحها بليغ ألحانا، أم كلثوم كانت أنانية فنيا، لا غبار علي ذلك، لكن أضف إلي هذا انها كانت تلقبها بال"رداحة"، علي اعتبار ان أم كلثوم مكانتش بتردح ف أغانيها :D

شاهد هذا المقطع لنري سويا كيف كانت أم كلثوم تردح أحيانا..فقليل من الردح لا يضر..


الأغنية هي للصبر حدود - كلمات عبد الوهاب محمد وألحان الموجي..

ما دفعني لأكتب هذه الكلمات ليست السيدة أم كلثوم لكنه بليغ حمدي نفسه...رحمه الله....
في الصباح أرسلت لي صديقة من تويتر بلاي ليست في ساوند كلاود -من هنا لو عاوز-
معظم هذه الأغاني أعرفها ان لم يكن كلها، لكن ما يهمني منها هو تسجيلات بليغ حمدي نفسه، فأنا أعشق سماع ألحانه منه، لأنني أسمعها كما أنزلت، عذبة ندية...لا موسيقي ولا ضوضاء، فقط ألحان...

خليك هنا خليك..وبلاش تفارق....الأغنية التي صرحت وردة في أكثر  من مناسبة أنها درة أعمالها مع بليغ، ومع كامل احترامي لها، أنا أكره هذه الأغنية، ولا أعلم لماذا...لكن وبهذا التسجيل الطازج وكأنني أعدت اكتشافها...

اسمع معي التسجيل


لتر كيف كان بليغ بارعا في صياغة الألحان وتلوينها، بينما تخصصت وردة في اضفاء لمسة ازعاجية شديدة عليها....

لا أتهم وردة بأنها مزعجة، صوتها مقرب إلي قلبي، لكن هذه الأغنية وبالتحديد لا أتحمل منها أكثر من مطلعها والموسيقي في المقدمة، التي أعتبرها شيئا عبقريا لن يتكرر...لكن وردة تصيح وتصيح، وتدمر المشاعر التي هي من وراء الأغنية والتي كانت يجب أن تغني همسا لا صياحا...

الامر يتكرر مع أغنية الحب كله لأم كلثوم...التي طالما كرهت سماعها من أم كلثوم، لأن الحب وقت الأغنية يتحول إلي صواريخ نفاثة، ومدافع هيدروجينيه وقنابل يدوية تؤذي السامع، فأنا لم أحب الأغنية إلا من بليغ، ولم استسيغها إلا منه، لا لشئ إلا لأنه يؤديها باحساس، لكن أم كلثوم -طبعا- بصوتها العريض تستعرض...

اسمع معي بليغ يغني الحب كله...

تفهمت معاني الأغنية من بليغ حمدي، وعشقتها منه، واختبأت وراء الموسيقي هربا من القسوة، وتفهمت أم كلثوم وهي تغنيها، فلمسة بليغ علي الأغنية كلمسة المياة علي التائه في الصحراء، لكن أم كلثوم هي الام القوية التي تؤدبك وتطربك في آن واحد...

الحقيقة أن أم كلثوم وان كانت تتهم وردة بالردح فهي أول من كان يمارسه علي المسرح، وأنا أعتبرهما أول من مارس البلطجة والارهاب الموسيقي علي آذان المستمعين فتطاولتا علي الموسيقي، وقامتا بالارتجال، وأحيانا كثيرة كان الارتجال ضد صالح العمل وليس العكس...تماما كالكوميديان الذي يخرج عن النص، ليسعد جمهوره بنكتة خارجة، وهي ليست في صلب العمل...

ورغم كراهية أم كلثوم لوردة إلا أنني أجد فيهما تشابها كثيرا، فالاثنتين ملكتا المسرح حتي لحظات متأخرة من حياتهما الفنية، ووردة ظلت نجمة حتي نهاية عمرها، برغم خفوت النجم في سنوات المرض، وبعد توقف التعاون مع الشرنوبي ووفاة بليغ وسيد مكاوي، فعادت وردة في ألبوم هزيل لكنه حمل تجديدا علي الصعيد الفني، فتعاملت وردة مع خالد عز ومروان خوري، وكأنها تثبت لنا ولآخر نفس أنها ستظل نجمة، وفي الواقع حتي لو لم تنتج أية أعمال لظلت نجمة، وليرحمنا الله...

أم كلثوم أيضا لم تتوقف عن الغناء، وامتلكت الوطن العربي تحت أقدامها، ولا يختلف عليها اثنين،وشعبيتها طاغية حتي في اسرائيل...الاثنتين غنتا حتي الثمالة وتلاعبتا بالموسيقي والألحان...

لكن ماذا عن الاحساس؟؟

الاحساس هو الفرق بين أداء بليغ لجملة "لالا، يا حبيبي لا" وصياح وصراخ وردة في نفس الجملة، وهو ما يبرر لك كيف تغني الأم، وكيف يغني العاشق، الفرق بيولوجي من الأساس....

يمكن ما يفقد الأغنية احساسها في بعض الأحيان هو التوزيع، وميل بليغ للتوزيع الايقاعي واستخدام الأورج والجيتار -عمال علي بطال- في اوقات كثيرة هو ما يقفد اللحن الأصلي قوامه، ولا يمكننا أيضا أن ننسي أن أعمالا كثيرة من ألحان بليغ لوردة كان من قبيل الثرثرة الموسيقية لا أكثر ولاأقل لكنني لن أسرد منها شيئا...

وانا ما زلت عند رأيي أن اغنية خليك هنا هي ليست أعظم ألحان بليغ لوردة، فأعظم الألحان هو أقصرها، وأكثرها احساسا ولمسا لشغاف القلب، لا تلك الألحان الطويلة الثرثارة، والايقاعات المتكررة، ووردة الصياحة التي تنسينا وردة الأخري الجميلة، وهي تنام واقفة في كشك التليفون ونحن نبكي وراءها "وأتاري الدنيا غدارة غدارة".

في رأيي أيضا أن بليغ الملحن الغنائي أقل عظمة من بليغ الملحن المسرحي، وبليغ الذي لحن بقلب العاشق لوردة ألحانا تشابهت فيما بينها وأصابتنا بالحيرة...
أذكر يوما انني بقيت أسمع كوبليه من أغنية ولاد الحلال علي انها أغنية دندنة، لتشابه جملهما اللحنية بشدة...ووقتها فقط كرهت كون أذني ذكورة...

وبقيت أكره مدافع وردة وأم كلثوم أغلب الوقت، وأعشق عبير الشوق متجسدا في بليغ حمدي...الملحن والموسيقي...فقط..!




10 يوليو 2014

الدليل الوافي في عمل سيرة ذاتية...لشخص خرافي..!

اتكلمنا قبل كدة عن ازاي يوسف الشريف بيعمل مسلسلاته هنا...
واتكلمنا بردو عن ازاي المسلسلات بتتعمل عن الصعيد عامة...

ودلوقت جه الوقت اننا نتكلم عن ازاي بيتعمل مسلسل سيرة ذاتية في الوطن العربي بشكل عام...سواء سيرة ذاتية أو تاريخية، المهم العمل يكون عن قصة لشخص عاش ومات ولقي مصيره التعيس ف ان منتج حب يقلب من وراه قرشين بعد ما اتكل...

1- هات كاتب مركون ع الرف بقاله فترة، واديله المهمة دي...
هيملالك السيناريو بمشاهد كليشيه، من عينة "ياسي بابا"، و"لازم اذاكر عشان أنجح"، و"ابن الجيران والشباك".

2- هات انعام محمد علي، هتلاقيها ف الرف اللي فوق السيناريست اللي هيديك بالظبط الورق اللي انتا عايزه.



3- هات مدير تصوير بتلاتة جنية، وكام مشهد في مدينة الانتاج الاعلامي، ف القطر والحي الريفي ومبروك عليك حجر الأساس...




أو وفّر كل ده وهات لميس جابر وحاتم علي وافتحلهم اعتماد ف بنك HSBC :D

-- صفات الشخصية التاريخية أو صاحب سيرة المسلسل..

1- ملاك: لا ينطق عن الهوي
حتي لو كان صاحب المسلسل ده رقاصة "كاريوكا"
وحتي لو كان شخص كريه زي "الملكة نازلي" --راجع بوست نادية الجندي :D
دايما هي الصح والأصح، والناس بتجري تبوس رجليها ف الاخر عشان تتعلم منها...


2- دايما بدأ م الصفر
محدش مبدأش من تحت الصفر، محدش مبدأش من فوقيه بكام سلمة، دايما طفولتهم كانت مأساة، اللي نام ع الحمار وهو راجع م الفرح "أم كلثوم"، واللي ابوها استغلها وهي صغيرة "ليلي مراد"، واللي أخوها ضربها بالجزمة "كاريوكا"، واللي أبوه طرده م البيت "قاسم أمين".



3- لازم يبقي فيه قفزة درامية غير مبررة عشان البطل يظهر..
مثلا تلاقيه بيجري ف الغيط وتلاقيه فجأتن بقي شحط، تلاقيه مثلا هوبا بقي وفاء عامر ف كاريوكا، مع العلم انها كانت بادئة بتحيه من ساعة ما كان عندها بتاع 20 سنة :D



4- بيساعد كل الناس...
البطل بيساعد كل الناس وبيحب كل الناس وكل الناس بيحبوه، ومبيعملش حاجة عيب وحرام ومتهزش عرش السماوات والأرض..

5- البطل بيقلد الشخص الحقيقي بشكل مستفز...
راجع باروكة كمال ابو رية ف قاسم أمين، واسدالات الصلاة بتاعة وفاء عامر اللي كانت بترقص بيها، والنحنحة المبالغ فيها من صفاء سلطان ف "قلبي دليلي"، بالإضافة لفراس سعيد ونحنحتة المشهورة ف مسلسل محمود درويش..كرهتنا ف أم الراجل اكتر ماهو خنيق يا شيخ :D



6- لو بتعمل مسلسل تاريخي زور علي قد ما تقدر...
لو بتعمل عمل تاريخي غير ف مسار العمل ده، زيف وعي الناس عشان هما ذاكرة الدراما عندهم أصدق من ذاكرة القراءة، وانتا وشطارتك بقي...

7- هات كل الممثلين اللي عملو نفس الدور قبل كدة ف كل المسلسلات:
انا شفت ممثل واحد عمل دور عبد الوهاب تلات مرات ف تلات مسلسلات!
- هات واحد بيتنحنح بزيادة وبيسبل وخليه يعمل عبد الحليم.
- هات واحد ألدغ ف السين واعمله عبد الوهاب لو ملقتش الواد الأولاني...
- هات واحدة عاملة شعرها شنيون واعملها ام كلثوم....
- هات حسام الفارس واعمله الملك فاروق عشان بياكل اوي مع الناس...
- لو هتعمل قصة حياة حد صعيدي هات جمال سليمان...وريح دماغك...
- بالنسبة لدور السادات ده يعمله أي واحد معاه علبة ورنيش وحالق أقرع، اللي معاه ورنيش ده صاحب دور السادات فشخ..


8- بالنسبة للحوار في المسلسل التاريخي خليه مسطح لأقصي حد ممكن، خليهم كأنهم في البرامج التعليمية، مش ف عمل درامي...

9- البطل لو بيحب واحدة وفقدها أكيد هيلاقيها ف شكل تاني علي صورة مغنية ف الموالد مثلا :D

10- لو انعام محمد علي مسكت المسلسل هتلاقي معاها كمال أبو رية - ميرنا وليد- أحمد شاكر عبد اللطيف -نادية رشاد- هنا شيحة،  ولفيف من السادة العواطلية الصيع :D

11- اما لو مخرج سوري هيعمل المسلسل يبقي أبشر هتلاقي الكادرات ضلمة طول الوقت، المكان شبه مدخن، والبطل بيسكر :D

12- لازم جزء م الأحداث يتم داخل كباريه وده لمجاهدة الانجليز، كأنهم محتلين خمارة..وخاطفين رقاصة 

13- لازم تلاقي واحد ف العمل مش طايق ام البطل -راجع منال سلامة ف ام كلثوم-
وبيكرهه وعاوز يولع فيه بجاز.

14- الله يرحمه اسماعيل كتكت بقي فتح علينا الفتحة المنيلة دي وحشرلنا أمل رزق أرملته ف كل الأعمال حتي لو ملهاش دور... :D

يلا البوست خلص..بس خلاص :D




09 يوليو 2014

ليالي الشتا....

بشتاق للشتا ف الصيف

وأشتاق لليالي البرد...

الصيف ده سهر وزعيق..

ومحدش يحضن حد...

المطرة بتنزل سيل...

وضباب بيغطي النيل...

والكل بيجري مروح..

لابس أصواف..وتقيل...

وانا دايما قلبي حزين...

والبرد بيفتح عين..

علي دنيا تمر ف ثانية...

أحلامي بلون الورد...

وحبيبي بيشرب حبي...

والتلج ده ذنبه وذنبي..

الدمع كاسات بتعبي...

شبورة بتنشع شهد....

وأشتاق للشتا ف الصيف..


وانا وانتا بنحضن بعض...

07 يوليو 2014

طق...موت...

زمان كان فيه غنوة للفنانة السئيلة دانا حمدان اسمها طق موت....
الأغنية دي حاليا باحسها تنطبق عليا حرفيا مش معنويا بس....طق....موت....


انا هطق وأموت...وبشتكي كتير وبرغي...والشكوي لغير الله مذلة...لكن الكلام ف بق واحدة رغاية فشخ زيي بيبقي أمر من الصبار لو متقالش.....

وانا لو متكلمتش بموت...ولو مضجيتش بموت....بفضل اشتغل شغل حمير....واشيل واحط....بس لازم اتكلم...ماهو مش هيبقي تعب وغلاسة وشقا..وغباء....وكمان متكلمش ولا اشتكيش....

مطلوب انك تكون حديد....طق....موت....

 
Reem Essam Cairo , Egypt | copyrighted2011 - Reem Essam