الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

28 مايو 2014

العسكري

اتكرمش العسكري

بين العرق...والسور...

قدامه شايه بلبن..

شربه...وقعد مكسور...

والصهد طال...وانحني..

ركز علي الطوابير...

صناديق..وورق اترمي...

ودموعي ف المنديل...

امضي، وعلّم، ولف..

بل الصباع يا جميل...

اقبال تاريخي اتحكي..

وزعيق...عويل..ولميس...

أنياب وتنهش لكا....

وتقطّع الكوابيس...

ادي الضمير هشتكة...

والذمة متفككة...

وخميس..يصحي خميس...

قوم يا عريس الهنا...

مشيها يابني عريس...

واهي العروسة الي انا...

زينتها بالعنا...

خدها وغور من هنا...

ملعون...غبي...مدحور...

واتكرمش العسكري...


بين العرق والسور...

28 مايو 2014

27 مايو 2014

دش...

لو معايا فلوس كتير فشخ وعاوزة أضيعها، هعمل قناة فضائية.....قناة الشونج الفضائية
القناة هتبقي كالتالي....

1- الصبح هنطلع مذيع يعمل برنامج يسب الدين فيه يوميا لسواقين الميكروباص، ويذيع تهاني من الناس اللي خرجت بسلامة من محطة المترو...

2- في فترة الصبح هنذيع أغاني صابر الرباعي بس، وبعد كدة نذيع أغاني لأحمد جمال وهو بيغني أغاني لصابر الرباعي...

3- فترة ما بعد الضهر الناس بتبقي في المكاتب مأنتخة وخدت قهوتها وبتفكر تشتغل، لذلك هنذيع ليهم حاجة تفوقهم، وييجي دور برنامج ساعة مع محمود الليثي والحسيني، واذاعة لأحدث أغانيهم باستمرار...

4- فترة الغدا بقي، هننزل مذيع في المطاعم بتاعةالوجبات السريعة ومحلات الكشري، وهناخد عينة عشوائية م الناس، واللي هيكسب هنديله كوباية شاي هدية

5- بعد الغدا، المذيعين هيبقو ريحو بقي، والناس بتبقي خلاص رنخت ع المكاتب وفيه ناس بتروح، وقتها نبدأ فقرة مع محمد منير، واغنيته "بعد ما ادا وبعد ما خد".

6- المغربية بقي، أغاني عبد الوهاب، وحليم، ورا بعض كدة، رايح جاي، والمذيع قاعد بيشرب كوباية شاي العصاري اللي أنتخ فيها وأجلها...

7- هنذيع أفلام ع الهوا، ومذيع يقعد يعلق عليها، ويقول مثلا "هوبا شوف مرفت أمين بتنط من فوق السرير عشان تسقط البيبي يا عيني"، وناقد فني ينتقدالفيلم ويعمل استوديو تحليلي ويجيب مخرجين معتزلين :D

8- بالليل هنذيع بالتبادل برنامج لكابتن ممدوح فرج بيتكلم عن الأحوال السياسية في مصر، وبرنامج توك شو مع  علي ربيع، وفواصل اعلانية لأفلام اسماعيل يس.

9- الحاجة الوحيدة اللي هيبقي ليها اعلانات في القناة هي موقع ESS وصفحة World Trollers ولو فيه ضيوف ف القناة هيبقو هنا عمرو سكر، ودرغام، والفنان محمد حمد طبعا مش هننسي دوره معانا....

10- هنجيب الملحن عمرو مصطفي في القناة كنوع من البواخة ع المشاهدين...

11- هنعمل برنامج عن الموضة وانا اقدمه، وهيبقي كله دعاية لمحلات ممر روض الفرج، ومحلات شارع فيصل، ومحمد بتاع الجزم اللي ف شارع المليجي...

12- أي مذيع هيشتغل في القناة لازم يبقي قعد سنة علي الأقل كول سنتر، وغير كدة ممكن نعمله تست اننا نبعته يشتغل ف 888 كنوع من اختبار قدرة التحمل....

13- هنعمل برنامج موجه للصم والبكم وهنجيب واحد تحت يتكلم صغير كدة عشان يترجم :D

14- بالليل بقي، فقرة الليل هتبقي كلها موجهة للفنان مروان خوري، اللي هيبقي رهينة في مقر القناة :D

15- منتصف الليل هنذيع فيلم هندي قديم من بطولة اميتاب باتشان ويفضل يكون Coolie عشان باحبه فشخ...

16- بعد الفيلم الهندي هنذيع أفلام صامتة، وهنجيب واحد يترجم للصم والبكم تحت كنوع من الغتاتة علي الصم والبكم...

17- هنخصص برنامج يومي فيه مداخلات ع الهوا لأي حد حازقاه أي شتيمة، وبعد كدة تلات ساعات مفتوحين للمستشار مرتضي منصور في برنامجه اللي هيحض فيه الشباب ع الفضيلة وكدة -فضيلة دي تبقي امك-


يا قلة المزاج...

المهندسين...ليلة صيفية حارة...أشبه بليالي رواية منخفض الهند الموسمي، كأن سيد العجاتي في سيارته ال128 ومعدي من شارع السودان الساعة سبعة مساءا....

السماعة في زوال، المناديل في الشنطة، خلصت الشغل، نزلت زي السهم...دايما باحب اتحرك في شكل سهم، من نقطة لنقطة بيرشق...كلامي مباشر وصريح، سهم بردو...

اخترق الشوارع كأنني علي عجالة، رغم ارهاقي، وأسمع صوتها ينادي من بعيد...كأنها في حالة انتشاء، وهمهمات بداية الأغنية تجعلني علي ترقب بما ستغنيه...

"الحزن ليه علاج،
 والخوف ده ليه علاج..
.لكن علي فين نروح...من قلة المزاج..."

دائما ما ترتبط كلمة المزاج عندي بعادل امام، لسبب بسيط....قرأت مرة في مجلة العربي حديث مع عادل امام ويحاوره محمد المنسي قنديل...عنوانه "عادل إمام، عدو المزاج العكر"، ومن يومها كلمة المزاج مرادفة لعادل إمام....

"امبارح ليه طويل...وعايش للنهاردة...
من ليل ندخل ف ليل..ونشرب قهوة باردة...
ونعيش للمستحيل...نلاقي العمر عدي..
في قلة المزاج...."

أعبر شوارع المهندسين كالسهم، وشارع السودان بأنواره الضعيفة يصيبني بالنوم، الشارع ناعس مثلي، السيارات تعبر ولا تتوقف، والكل في عجالة، والأكسجين انتهي من الهواء، وانا أقف في كسل، محاولة توقيف سيارة...لكنني فشلت....

"بنخاف من الحقيقة....نطمن للخداع
 ودقيقة تجيب دقيقة.... نتفاجئ بالوداع 
وبخمسمية طريقة نلاقي العمر.... ضاع ف قلة المزاج
 يا قلة المزاج "

السيارة تقف، أنحشر فيها، أسند رأسي لشباك الاوتوبيس، والتباع لا ينفك ينادي...فيصل فيصل فيصل فيصل...سيدي الفاضل فيصل تحلل خلاص ومات من زمن...مش هيرد عليك....اطلع بقي...

العربية سخنة...ودماغك سخنة...والجو حر....وانتا لوحدك...السماعة في الشنطة بتأن...الموبايل ف ايدك بيأن....رجليك بتنقح عليك....ولسان حالك بيقول...موت بقي...

"عايزين نعمل مؤامرة
 نوقف الساعات
ونكمل المغامرة
فنلغي الذكريات
أحسن من غير ما ندرى
 نلاقي العمر فات"

تندفع من المواصلة كأنك تندفع إلي رحم أمك، سائق التوكتوك اللزج: توكتوك يا ابلة...تجاهلك له، شجارك مع سائق الميكروباص الثاني، صياحك فيه لينزلك في محطتك...انحشارك ثانية وسط الركاب، كأنك تمضي نصف عمرك في الشوارع، حتي المطبات حفظت خطواتك عليها، والشوارع ملت من ذهابك وإيابك...

أما آن أيها الفارس أن تترجل؟ أما آن أيها المسافر أن تعود؟؟


هوامش: 
1- أغنية قلة المزاج لفيروز كراوية من كلمات مؤمن المحمدي، وتوزيع أسامة الهندي...! اللينك هنا... 


CC

أ: هو انا هروح ازاي مصلحة الدولة للفلنكات العنقودية من هنا؟
ب: بص يا سيدي....
انتا هتكسر يمين، في شارع الفريق السيسي، ف شمال، هتلاقي ميدان المشير السيسي، بعد كدة علي طول هتلاقي تمثال سيادة الرئيس السيسي، وبعديه علي طول الكورنيش السيسي، تاخده طوالي، لحد ميدان عبد الفتاح، من هناك هتلاقي ميدان المشير الفريق السيسي، تلف الصينية، بالطول وبالعرض، وهتلاقي هناك جنب المصلحة صورة بالحجم الطبيعي لسيادة الرئيس الفريق المشير الفشيخ عبد الفتاح.....
فهمت؟
أ: فهمت سيسي!

حب ما تعمل وكدة....

كابتن محمد صبحي ليه مقولة مشهورة بتقولك "حب ما تعمل حتي تعمل ما تحب"
والعلامة القدير الفاضل الكوميديان المنتشر انتشار الفشخ ف البتنجان أحمد حلمي هو راخر قال "حب ما تعمل عشان محدش لاقي شغل"

المقولتين في الحالتين باطلة...باطلة باطلة.....
انا ضيعت أربع سنين في حياتي أو بمعني أصح درست كومبيوتر ساينس، معرفش ليه، بس الكبر والغتاتة اللي جوايا دخلوني علمي رياضة وانا مبعرفش اكامل معادلة فيها رمزين علي بعض!

صفر في الرياضة، وبالتالي صفر في البرمجة...صحيح حبيت حاجات تانية درستها زي البرمجة الخطية ودعم القرار، بس بردو كنت أبيض ف تلات تربع اللي درسته، م الاخر انا خلصت الكلية بأعجوبة عشان مبقاش عالة ع البيت أكتر من كدة، وانطلقت إلي عالم المرح وسفن أب...

اشتغلت حاجات كتير من ساعة ما اتخرجت، لقيت عندي ملكة الترجمة واعادة الصياغة من انجليزي لعربي، وملكة الكتابة ف مواضيع كتير اوي من مقالة واحدة، واشتغلت فري لانس بس اتخنقت، فلوسها قليلة وبتاخد وقت كتير بردو والموضوع ميعجبش المجلة فتشوف واحد تاني وموال بقي، بس هي كانت حلوة ساعتها...

للصدفة الغريبة اشتغلت مع راجل ظريف كدة اداني مرتب ظريف وخلاني اشرح حاجات انا نفسي مكنتش اعرف عنها حاجة إلا ساعة ما شرحتها، أو قبل ما اشرحها، فكنت بذاكر وأشرح، كانت قلش عموما، وفالاخر سبتها عشان معرفتش اعمل الي طلبه هو في الآخر، لأني حاولت فيه كتير وفشلت، وسبت الشغل معاه كله، لأن ساعتها جالي شغل تاني ف كول سنتر في شركة مالتي ناشونال...

بمنتهي الغرابة اتقبلنا في الشركة دي من غير اي امتحانات صعبة، كان انترفيو وفيه اتش ار وسوبر فايزور الكول سنتر، وانجليزي وسألني علي IP وفتيت وطلع صح، وهوب لقيت نفسي اتقبلت ونجحت وكدة، وهوبا بقينا ف تريننج، وهوبا بنشدور...

مكنتش مقتنعة بأي ابن تيت حاصل، وكان كل ما حد يعرف اني متخرجة من كومبيوتر ساينس يقولي بالحرف "انتي ايه اللي جابك هنا؟" محدش كان خريج الكلية خالص وكنت حاسة بأمانة اني لوحدي في ال Shark Tank ولا ليا صاحب ولا سند وبتخبط، وكنت قاعدة بقي مع شوية عيال أجاركم الله، بنات خريجات هندسة والله ما هزيد حرف علي كدة....

المهم يعني، بعد أقل من تلات شهور، حلفت طلاق تلاتة مانا لابسة سماعة تاني، وكنت حاسة بالذل بقي وازاي انا الترينر أبقي كدة ونسيت اني ترينر كفتة وورق واني ولا حاجة،رحت اشتغلت ف شركة تانية، وكنت متخلفة عقليا أو جبانة، أو متفهمش ايه حصلي بالظبط.....

سبت الشغل هناك بعد شهر واحد عشان اتأكدت مليار في المية اني مش متخلفة وبطيخة وقدامي مليون سنة عشان اتعلم ومش هتعلم، ومستحملتش نقرزة ده واهانة ده واستعجال ده، والحقيقة مشفتش نفسي في المجال ده هبقي اي ابن ستين كلب، مع كامل احترامي للمبرمجين يعني، الي انا عمري ما اشتقت ابقي منهم....

أجزت ف بيتنا رمضان والعيد ونزلت اشتغل سماعةتاني في شهر تسعة.....
وكارهة نفسي بقي ومرتب ملاليم غير أول مرتب من المالتي ناشونال....
ونازلة اشتغل متضررة، وهوبا وانا ف الشغل التاني، اللي كان فيه صحابي، وكنت مبسوطة بيهم فشخ، وحاسة اني وسط عيلتي التانية، حسيت اني هبقي علي كف عفريت، يعني رضينا بالهم والهم مش راضي بميتين أمنا، وخناقات مع التيم ليدر بتاعي، ومشاكل معاه، ونمسك ف بعض....ونشد ف شعور بعض، هو تقريبا كان فاضله زلطة ويرميني برة.....

قوم يا مؤمن سبحان الله الواحد حاله يتقلب من حال لحال، ويتغير وانا ومديري مش نبقي سمنة علي عسل، احنا بقينا عسل علي عسل وبقيت من المقربين ليه ومش من الAss Kissing لأ، ده بقي صاحبي فعلا!!!

سبحان الله....!

ما محبة إلا بعد غباوة...بس الديباجة الطويلة دي ليه بقي؟
الديباجة الطويلة دي علشان انا ولغرابة شديدة انا نفسي مستغرباها انا حبيت السماعة وبقيت أحب أبقي أحسن ف شغلي ده، وحسيت ان الشركة دي بيتي التاني، واني ممكن أبقي حاجة، رغم شبح اليأس اللي بيراودني فيها وف بالي طول الوقت....

لكن حسيت بجد ان دي الحاجة الوحيدة اللي باعرف اعملها بمزاج وضمير، وباتمتع فيها أغلب الوقت، وحبيت جوها وعشقته، ولميت معلوماته بسرعة وبستوعب تغيرها وباتأقلم معاه...زائد انها وببساطة شديدة....مش هتشغلك برة باب الشركة دقيقة....

أمي عاوزاني استقيل عشان لما "اتجوز" اشتغل بردو، وابويا عايزني استقيل عشان امي عاوزة كدة....

رغم قرف الشفتات، وبواخة المواعيد، لكن في الحقيقة لما لقيت تشجيع، ب أدي أكتر، ولما بلاقي حد بيحمسني باعرف اشتغل بمزاج أكتر، وببقي رقيب علي نفسي اكتر ما هو بيبقي رقيب عليا، وبييجي يكلمني ف حاجة ومبعارضش.....يمين يبقي يمين لأنك الأدري بالمصلحة....

لأول مرة اتعاطف مع شخص وأحس ان شغلي هيشيل شغله ولازم أبقي أحسن عشان دي سمعة تيم، واني ابقي Guru لحد جديد مش عارف حاجة ويبقي تحت ضلي لحد ما يبقي أحسن ويطلع لقدام، وان شالله يبقي أحسن مني كمان!

انا ومديري كنا قافشين علي بعض الأول لسبب اكتشفته بعد كدة اني انا وهو نفس البرج ومواليد نفس اليوم، وكلانا برج ناري حميري خنزيري هو برج الحمل :D
انا باخد مميزات محدش بياخدها ف التيم، معرفش ليه، عمري ما طلبت أي ميزة، بس لما تلاقي حد بيعاملك معاملة مميزة لازم تردله الميزات دي شغل من نار!
انا بقي بردو معرفش انا لابدة في الشغل عشان حبيت الشغل، ولا حبيت المدير نفسه...!

الظاهر ان طبيعة شخصيتي راكبة فشخ مع شغلي فعلا!

وانا مش هستقيل....

21 مايو 2014

دهشة...دردشة فنية...

اللهم لا تحرمني من نعمة الدهشة...والاستمتاع بالأشياء الصغيرة....وبهجة لا تنقطع من ضحكة من القلب في ليلة السما فيها بتنجاني....

"وكل ظلومة متظلمتش...وكلمة حق متكمتش...وكل قلم نقص ف القسم...وكل علامة مش ف الجسم...بتدعي لكل وش واسم"

احساس لما مديرك يكلمك يزعقلك...وهو مش بيزعقلك انتا بالذات...هو بيزعق للكل، والكلام يفلت منه، ويشتم....وينسي ان اللي قدامه ومفروض يعني ميشتمتش قدامها بنت....
انا مبيفرقش معايا الشتيمة قد ما بيفرق معايا الي قدامي ده ماله.....

"يوم قرارك...تم لك فيه الصعود...حب دارك قبل ما تحب الوجود....."

ابقي فكريني مرغيش ومفتحش بقي....عشان اللت الكتير وحش فشخ.....

بمناسبة الدهشة...يحيي الفخراني عامل مسلسل جديد اسمه دهشة....بيحكي عن واحد قرر يوزع ثروته علي بناته، وبيلاقي منهم جحود..ما عدا من بنته الصغيرة...انا قريت الكلام ده فين قبل كدة.؟؟؟ فين قبل كدة؟؟ ويحيي الفخراني عمله مسرح فين قبل كدة؟؟
احا يا عبد الرحيم يا علي! دي مسرحية الملك لير! حضرتك واخد الأحداث وملبسهم صعيدي، ومسمي المسلسل دهشة؟

وبعدين ايه حوار المسلسلات الصعيدي دي! هو كل واحد يفلس يجري يجيبلك عبد الرحيم علي ويعمل مسلسل! ويجيب صابرين ويديها باروكة؟!

تلحيق: بعد ما عملت البوست بتاع يوسف الشريف، اتضحلي ان هو طالع كفيف في المسلسل الجديد اللي كاتبه عمرو سمير عاطف، واللي ده اول تعاون بينه وبين الشريف، هتلاقي الشريف كفيف وبينط وبيقلب عربيات وبيضرب نار عادي بردو...ده الشريف!

المثير للجدل ان كتاب رمضان لعبو الكراسي الموسيقية، محمد سليمان عبد المالك كتب مسلسل لتامر، وعمرو سمير عاطف ادي مسلسل ليوسف الشريف، ومحمد أمين راضي جاب نفس الكاست من غير منة شلبي وظافر العابدين وعامل الوصايا السبعة، وظافر العابدين نفسه عامل مسلسل مع تامر....

وأحمد محمود أبو زيد اللي اتعود كل رمضان يتحفنا بحاجة معملش حاجة السنة دي بعد العار، وآدم، والشك، وخطوط حمرا...
المفاجأة بقي ان حسين مصطفي محرم اللي معرفش هو دكتور ف ايه بالظبط هيعمل مسلسل اسمه كيد الحموات، ده طبعا بعد كيد النسا واحد، وكيد النسا 2 وان شاء الله السنة الجاية يعمل كيد النسايب، وكيد الأحفاد، وكيد السلايف....وكيد امك!

محمد صلاح العزب بتاع سرير الرجل الايطالي، ربنا كرمه وكتب مسلسل اسمه "دلع البنات" وجايب فيه كاوتش طري طري طري، من أول مي عز الدين لحد كندة علوش، لدرجة اني بسأل نفسي فين الرجالة اللي ف المسلسل....

ناصر عبد الرحمن السيناريست صاحب "هي فوضي - دكان شحاتة - حين مسخرة" عامل مسلسل اسمه جبل الحلال لمحمود عبد العزيز، وهند صبري هتعمل مسلسل بضان -من قبل ما اشوفه- اسمه امبراطورية مين وهيبقي عبارة عن تلاتين حلقة من فيلم عسل اسود بتاع حلمي، عن عيلة رجعت من لندن لمصر، واللي كان باين فشخ ف التتر لما جابو اخر لقطة لما سجدت وهي خارجة م المطار ورفعت راسها لقينا عقب سجارة لازق ف قورتها، يعني كسم البواخة، والأبوخ انهم جايبين غادة عبد العال تعمل السيناريو والحوار، وزي ما احنا عارفين يا جماعة ان هند بايخة فشخ في الكوميديا، وبايخة فشخ في المسلسلات، ده طبعا بعد ما حضرتها دمرت رواية فيرتيجواللي كانت متفصلة علي راجل، وبقت هي مكان احمد، وفشخت الخيال...احا....ومسلسل عايزة اتجوز كان برميل بواخة...

هند صبري علي عيني وعلي راسي، بس ياريت تركز في الأفلام، وتصور الجزيرة وتجري تخلفلها عيلين تلاتة وترحمنا من بواختها....

ياريت المخرجين يكشفولنا السبب اللي بيستعينو بيه بالفنان هاني عادل عشان يمثل! لأن هاني عادل اصلا بيمثل بقرف، وتحس انه عاوز يطرش ف وش المتفرج ويخليك تسبله ألف ملة ومحسسك انك بتتفضل عليه لما حضرته بيقوم يمثل قدامك....
وانا بتفرج علي اسيا كنت ببقي ماسكة شبشب علي التليفزيون، وف مسلسل ذات نفس الحوار...

هو غالبا السبب ده هو نفس السبب اللي المخرجين بيستعينو فيه بقدرات زكي فطين عبد الوهاب، الي هي مش موجودة أصلا، مع كامل احترامي لذكي، ولكونه سكسي مان ومن ماي تايب كمان، بس زيكو مبيعرفش يمثل، وبيهبش ف المتفرج، وبردو تحسه بيمثل بقرف...حضرتك شغلانتك تسلينا مش تبضن علينا....ولا عشان عندك كام بدلة فبتطلع رجل اعمال..!!

غادة عبد الرازق في تريلر السيدة الأولي عاملين ليها مكياج شبه سوزان مبارك فشخ، وهي اصلا في المسلسل مستعينة بسيناريست جديد مازجين ما بين قصة ليلي الطرابلسي مرات بن علي وسوزان يعني معرفتكش انا كدة..!

ظاهرة تياترو مصر سمعت وقناة ام بي سي مصر جابت العيال اللي ف مركز خالد اسمو ايه ده المخرج....والنبي ما عارفة اجيب اسمه....وعاملين مسرحيات وبتاع، بس يا خسارة مختارين أبوخ ناس فيهم اللي هما استغفر الله العظيم ع البيض....وعاملين مسرحيات مبتذلة....مضحكتيش وده مبرر اني اهجم عليها....

مريم نعوم كاتبة سيناريو لمسلسل سجن النسا، عن قصة لفتحية العسال، انا متفائلة بالمسلسل ده ونيللي كريم مش بتعمل حاجة وحشة، عموما درة طالعة بتتضرب وبتاع وانا هفرح فيها فشخ...انا مبقتنعش بتمثيلها اصلا.....

عندنا صواريخ ارض جو رجالي منهم أحمد داوود، حمزة العيلي، أحمد حاتم، حازم سمير....
وصواريخ ارض جو حريمي منهم ريهام حجاج.....والبت التانية أمينة مش عاررف ايه دي طلعت مع يسرا ف مسلسلين...

يسرا نفسها السنة دي مش هتنزل غير بسراي عابدين، اللي مش عارفة هبلعه ازاي، جايبين أوطي الممثلين صوتا في سوريا يعمل الخديو اسماعيل، قصي خولي اسمه الحركي عندي هو "الموشوشواتي" وفقعهالي الحقيقة من ساعة مسلسل قديم كنت بتابعهوله اسمه رسايل الحب والحرب، كان ابن مرة ممل....

فيلم الفيل الأزرق بقاله تسع تلاف سنة هينزل السينما، اللي هو أحا...خلاص الفيلم تارييخي لأم الدرجة دي كل مرة تقولو هينزل ومينزلش! ده لو نازل م المريخ مش هيفضل كدة!!!

أحمد حلمي عايش حالة نشاط فني فشيخ، مسلسل وفيلم، وعمرو سلامة هيعمل فيلم تجاري! واعلانات...
الحقيقة انا متعقدة فشخ من حلمي من ساعة فيلم اكسلارج...باكره الفيلم ده...لأنه كرهني ف نفسي.....

"لفيت وماتوهتش...ورجعت لمكاني..."

عزيزي المتفرج، لو بتتفرج علي مسلسل ف اي يوم من الأيام او فيلم ولقيت محمود البزاوي طلع فيه من غير مناسبة اعرف انه كاتب السيناريو مع اللي لاطع اسمه عالتتر....بس خلاص...

زي الزمن....

بداية شغل التراك ده وانتا بتسمع البوست ده....


زي الزمن...مالوهش غالي....زي الزمن...م الرحمة خالي....
الأغنية دي اتغنت من مغنية اندرريتد السنين...السيدة الأستاذة الآنسة المدام مي فاروق....صوت نسائي رائع مهدور حقه قصاد شوية شراشير واكلين الجو زي السيدة هيفا......

الأغنية اتغنت في برنامج ممكن مع خيري رمضان، اللي هو من كبار معجبي مي، ومبيفوتش مناسبة إلا لما يجيبها معاه ويفضل متنح قدامها زي التلميذ وهي بتغني...بتغني لوحدها كدة...بالمايك بس...وممكن من غير المايك....من غير مزيكا، ولا طبلة...ولا عود...ولا اي حاجة...

هتسألني باحب الغنوة دي ليه بالذات...هقولك حاجات كتير....انا اول مرة سمعتها منها كانت ع الهوا، وهي مع خيري، عم ناصر الكهربائي كان بيصلح كهربة الشقة الضاربة، وكنت لسه قابضة يومها، وراجعة شايلة جزمة جديدة من Club Aldo اللي ف روكسي....وتنحت قدامها....

مي فاروق م الناس القليلة اللي صوتهم حلو وهما بيدندنو.....وحسهم قوي ومليان احساس مع بعض، عشان دول حاجتين نادرا ما يجتمعو....  -راجع مثال مروة ناجي- صوت قوي ومن غير سنس، واما يكون صوت ضعيف وفيه احساس -راجع إليسا-، يعني مي صوت مستحيل....بس ياخسارة...ملهاش حظ....


زي الزمن...غنوة من كلمات وألحان بليغ حمدي، من الألحان اللي لحنها بوجع لما كان مهجر قسرا بين فرنساوانجلترا وأسبانيا هربا من حكم ظالم غشيم....عليه..بتهمة تسهيل الدعارة...والناس كلها عارفة قضية سميرة مليان ومش هنرجع نهري تاني...

زي الزمن كانت من ضمن ألبوم تم تسجيله لبليغ برة مصر بعنوان رسالة من الغربة، الحقيقة هو مكانش يقصد انه يبقي ألبوم، هو سجل الأغاني كجايد لعفاف راضي، وبعتها ولما جت مصر متفهمش مين ابن جزمة استلقطها وعملها شريط وباعهها -غالبا محسن جابر-

الأغنية بصوت بليغ أهي:



الأغاني مش قوية فنيا أو درجة أولي وبليغ كان مسجلها بصوته إللي أكيد مكانش ف أحسن حالاته، لكن بالتأكيد الأغاني عبارة عن مأساة متحركة....لكل الناس اللي بتحب بليغ أو تعاطفت معاه...

الأغنية دي ليها Cover كمان بصوت ذكري...أيوة ياابني ذكري بتاعتنا دي الله يرحمها....
واهي...لو حابب تسمعها...



ذكري كانت في بداياتها، وعملت أغاني كتير جدا، وعملت أغاني ليبية وتونسية للي حابب يدور في تراثها طبعا، الأغنية كانت جميلة بصوت ذكري، لكن انا وبشكل خاص باحبها من مي، معرفش ليه...بس حسيتها من مي بشكل مستفز، لدرجة اني عملتها رنة لتليفوني وده قلما يحصل طبعا....

كلمات الأغنية أهي...
"زي الزمن طبعه الخيانة
زي الزمن خان الأمانة
وقالوا قالوا قالوا
أهل زمان ياما قالوا
بالأمثال عا لي خانوا
من له ثمن لا يؤتمن
صدق الزمان وأهل زمان
وهو دى اللي كان
زي الزمن يسرق ربيعك
زي الزمن تدبل يبيعك
يرميك وينسى انت مين
ويدوس على عشرة سنين
ولا له دموع لو حب يوم يبكي يلاقيها
ولا له في حلال ولا فحرام دي حاجات نسيها
ولا له ذكريات تعتز بيه ويعتز بيها
دا زي الزمن من الرحمه خالي
زي الزمن ما لوهش غالي
وقالوا قالوا قالوا
أهل زمان ياما قالوا
بالأمثال عالي خانوا
من له ثمن لا يؤتمن
صدق الزمان وأهل زمان
وهو دى اللي كان
 "  

طبعا شايف معايا ان الكلمات بسيطة جدا، وبنائها الشعري ممكن يكون اتكسر في بعض الأحيان، لكن صعب نقيس قدرة بليغ كشاعر، لسبب بسيط أنه كان بيكتب وهو بيلحن، يعني عملية انتاج الأغنية عنده ككل بتبقي ف وقت واحد، يعني صعب تقيد إلهامه ببحور شعرية أو أوزان...لأنه كان عنده ملكة الكتابة من زمان، وكان غالبا ما بيشارك الشاعر الأصلي في تعديل النص، ويقال انه كان بيكتب أغلب الأعمال اللي "محمد حمزة" اللي كتب اسمه عليها....المهم يعني....

انا كل ما أسمع الغنوة أفيل لايك: "مش حرام عليكو والنبي :(، كدة تعملو ف الراجل كدة"
طب اسمعو منه؟ طب افهموه؟؟! ترموه برة كدة...؟؟ عملتو ايه لمصر زي بليغ حمدي؟ غيرتو ايه ف المزيكا زي بليغ حمدي..! قدمتو ايه للناس زي بليغ؟ ارتقيتو بذوق الناس زيه؟ الاجابة لأ....
لأنه لو كان حرامي زي ناس...مكانش حد قربله ولا بخ فيه حتي....
الله يرحمك يا بلبل....
الفاتحة...

19 مايو 2014

معيلة....

بحثا عن طفولة ضائعة...أو حلم قديم نسعي ورائه من دون تفكير....
اهداء للقناة التالتة وفقرة عالم الكارتون كل يوم الصبح، وتتر صباح الخير يامصر، والفقرة الزراعية، وبرنامج للأطباء فقط اللي كرهني ف الطب والدكاترة....

اهداء لصوت عفاف راضي، اللي باكرهه ف كل حاجة إلا الأغاني دي....

1- أغنية رقم واحد: حادي بادي - عفاف راضي
حادي بادي...حادي بادي...فيه صوت جاي هنا م الناحية دي....
ألبوم سوسة، الذي وجهته عفاف راضي للأطفال حصريا من قبل دلع نانسي وغنج هيفا، من كلمات سيد حجاب وألحان عمار الشريعي...


2- لو أنا فنان- ايمان الطوخي...

مسلسل كوكي كا...لغز غامض، ولم نتبين حقيقة كائن الكوكي كا، هل هو فرخة؟ أو تنين منقرض؟ هل هو ولد أو بنت؟ وتحت أي مسمي عاش حياته مع ايمان الطوخي في الشقة؟ هل فيه صلة قرابة بينهم؟ هل هما متجوزين؟؟


3- أغنية رقم تلاتة هي تتر كوكي كا نفسه - أداء كوكي كا :D
الأغنية التي خلت من أي صوت لايمان الطوخي، وهي مجرد توزيع موسيقي وتنويعات علي كلمة واحدة "كوكي كا..كوكي كا..كوكي كاكاكاكا..." تحتل جزء كبير أيضا من ذاكرتي الطفولية....ولا أعلم لماذا تذكرتها الآن أيضا..!



4- أغنية رقم أربعة ذهب الليل وطلع الفجر - محمد فوزي

فن الكارتون في صورته البدائية أحب لقلب أي شاب ثمانيني تسعيني من أي ثري دي أوانيميشن، ممكن لأنه مرسوم باليد، الأغنية دي تحتل مساحة جميلة، عشان الكتاكيت، وده طبعا قبل انتشار أنفلونزا الطيور، ولأن كنت باحب اسمعها عشان اسم بابا فيها :D


5- عيد ميلاد أبو الفصاد - المجموعة

الكارتون أيضا للفنان المميز أحمد سعد، رغم ماكانت تثير داخلي من رهبة بسبب آخر مقطع "عصفور الجنينة الجنينة..لولاه ما جينا ما جينا"، معرفش ليه، بس كنت بخاف من الأغنية ككل، يمكن عشان شكل العصافير كان غريب...أو الصورة الغنائية نفسها مش موجهة بشكل كامل للأطفال....

6- ألف باء تاء - محمد ضياء الدين

 التصوير الكارتون للأغنية دي، بس كانت مرتبطة في وجداني بشكل كبير بالطفولة، لمجموعة الأطفال اللي بتغني بشكل رائع خصوصا في تجميعة الحروف "بابا ماما وطني علمي حرية قومية سلام حمام...جندي بلدي شجاع"، انا حافظاها مش بانقل من أي حتة....!


7- سابق ولاحق - طارق العربي طرقان


الكلام طبيعي مش هيخلص إلالما نجيب سيرة سبيس تون وتتر سابق ولاحق وكل يوم انتظار بشغف الساعة خمسة وربع القناة التانية مستنيين سابق ولاحق ونكش وسيبا ودكتور عاقل.... "لن يهزم أبدا من سعي نحو الانتصار"


8- تتر عالم سمسم - المجموعة

وبما اننا جبنا سيرة اللي كان بييجي خمسة وربع كل يوم، فطبيعي نجيب سيرة الحاجة اللي كانت بتيجي قبله...عالم عالم سمسم.......يخربيت ام دي ذكريات :D
عالم سمسم عالم ضم...كل العيلة ف خيط ولضم.....عالم عصر السرعة...عالم سمسم....
حقيقي انا دمعت...



9- ماما زمانها جاية - محمد فوزي
ماما زمانها جاية...جاية بعد شوية...والتحذير شديد اللهجة: عارف الواد اللي اسمه عادل..جدك طور وعمله ايه؟...الله يرحمك يافوزي...!


10- في البحر سمكة - ايمان البحر درويش..
في البحر سمكة....أول مرةشفتها لزقت ف دماغي، وحبيت أكل مع البنت البسكوت والنوجة...سوزان مبارك كانت قاعدة...أيام حفلات عيد الطفولة بقي الله يرحمه...الفاتحة ع البلد و عالطفولة...خبطة واحدة....
ولماتضحك....وتقول لبابا...يابابا هاتلي...بسكوت ونوجة.... :)



11- واحد اتنين - محمود الجندي
اللينك من هنا

احنا صحيح..من غير جناحات..لكن نطتنا لفوق عالية..نطة لفوق صبيان وبنات..ورجوعا للأرض ف ثانية :)، طير معايا شوية :)
تقريبا فيه مشكلة في الفيديو والبلوج..!



12- المغامرين الخمسة - المجموعة

نوسة لوزة تختخ عاطف محب :D، للأسف التتر ده ألحان عمرو مصطفي!


13- وطبعا مش هنوقع من قايمتنا "بكار تتر البداية" - محمد منير :D

يخربيت ميتين ام الذكريات :(
والمغرب بيدن وبكار بيبدأ والحلقة تخلص ونقعد نشتم :(، مرة كنت عاملة الغنوة دي رنة وواحدة صاحبتي خدتها مني، وكانت داخلة امتحان متأخر والتليفون رن "من قلبه وروحه مصري والنيل جواه بيسري"، طبعا سبت الامتحان فضلت أضحك :))


14- بكار "تتر النهاية " - محمد منير بردو

هات ريشتك هات ألوانك....وارسم ع الأرض وامك عتيجي تدرمغك...
بغض النظر ان بكار زمانه اتخرج وشغال ف كول سنتر دلوقت :D


15- منكم هعمل رجال - هشام نور
من فيلم مولان...أغنية منكم هعمل رجال...من أجمال الحاجات اللي بتزلزل الكيان.... وتخلي العين تدمع....


"النهاية"




17 مايو 2014

رقم مؤقت

"مكان سري"
"زمن سري"
"نري مكان قديم، تتراص فيه اطارات السيارات القديمة وشباك الصيد الممزقة"
"نري بعض الأشخاص يجلسون متراصين حول طاولة اجتماعات قديمة، تبدو عليها الشروخ"
"نري رجلا غامضا يدخل إلي المكان معتمرا قبعة غامضة الشكل ونظارة سوداء كبيرة الحجم"
"يجلس الرجل الغامض علي رأس طاولة الاجتماعات"
"يبدأ الاجتماع"

الرجل الغامض:
أنا جمعتكو النهاردة يا جماعة عشان رمضان قرب، ولازم ننزل بحاجة جديدة...

"تقترب الكاميرا من ظهر أحدي الفتيات التي جلست باهتمام"

الفتاة:
"بصوت خفيض"
ياتري فيه حاجة معينة هنعملها ؟

الرجل الغامض:
انا عندي فكرة جديدة خالص....
الأستاذ المخرج هيقولها...

"نري وجه المخرج وقد بدا عليه الارتباك"
المخرج:
بصو بقي..
"بارهاق"
انا بقالي تلات شهور مطبق علي أفلام أكشن أمريكاني، نقشتلكو منها زوايا تصوير حكاية...وكام مشهد مطاردة كدة....
وناس بترقص وناس بتموت وحاجة لوز العنب...
بس ايدكو معايا بقي..ما تقول حاجة يا مونتاج..!

"نري شابا نائما علي الطاولة"
"يهز المخرج فتي المونتاج بعنف فيستيقظ"
المونتير:
"بصوت نائم"
بصو يا جماعة انا جايبلكو أحدث ما توصلت إليه المونترات في العالم، وهنعمل مونتاج هيكسر...
بس نجيب فريق خدع أجنبي من برة بقي...

الرجل الغامض:
"بحدة"
ونجيبهم ليه؟ ماهما احنا خاطفينهم من رمضان قبل اللي فات...
هنطلعهم م الحبس يشتغلو ونرجعهم تاني..

الفتاة:
"تتسائل"
وانا دوري هيبقي ايه؟


الرجل الغامض:
انتي هتفضلي طول المسلسل ميتة وهتصحي ف اخر حلقة...

المخرج:
"ممسكا بورقة وقلم"
لا ياريس...
هي هتفضل طول المسلسل طيبة وهتبقي ف الاخر شريرة...

الرجل الغامض:
"يحدث المخرج"
ما نموتها أحسن؟

المخرج:
مينفعش، احنا موتناها رمضان اللي فات...لازم نغير بقي...

المنتج:
"يتنحنح"
انا عندي اقتراح يا جماعة..

الرجل الغامض:
انتا تؤمر يا باشا
"يشعل للمنتج سيجارة"

المنتج:
احنا لازم نزود عدد المزز...ونجيب مزتين تلاتة كدة غير الابلة عشان نبيع أكتر...

المخرج:
"يرسل قبلة للهواء للمنتج"
ألماظات يا باشا...

الرجل الغامض:
"ينظر حوله متلفتا"
أومال المؤلف فين؟

المخرج:
"يشير بعدم الاهتمام"
القصة والأحداث اخر حاجة نفكر فيها...، المهم اننا اتفقنا علي اللي هيتعمل خلاص...تعالي نراجع؟

الرجل الغامض:
المسلسل هيبقي كالتالي: واحد فاقد الذاكرة،المسلسل كله بيجري وراه، واحد بيكلمه من برايفت نمبر، مصاحب علي مراته ومراته بتخونه،بيكشف قضايا فساد حماه متورط فيها، أخوه ف مستشفي أمراض عقلية، ونجيب زكي فطين عبد الوهاب، وصفاء الطوخي، ورامز أمير...

المخرج:
"يقاطع الرجل الغامض"
ومتنساش المطاردات اللي هتحصل، وهنضرب عليك رصاص ست مرات، وهنخمس ونأمرك ف المسلسل، وهتنط من عمارة خمسين دور...
ايه رأيك تطلع كفيف يا معلم؟

الرجل الغامض:
فاتتني دي....
"يهرش في ذقنه"
كفيف؟
تصدق فكرة؟
"يهرش شعره"

وانا جايب لينسيس بيضة م الهالوين اللي فات...أخض بيها الناس..!

المخرج:
وف الاخر البطل هيخلص من كل اعداءه وهترجعله الذاكرة وامه هتطلع قاتلة مأجورة في النهاية...

الرجل الغامض:
"بحدة شديدة"
انتا نسيت اهم حاجة في المسلسل
البطل...
أقسم بالله ما هرحمك لو نسيت الحاجة دي....

المخرج:
"بفزع"
مالو يا عم؟

الرجل الغامض:
البطل لازم يبقي اسمه علي...

"يخلع الرجل الغامض نظارته لنجد أنه الممثل يوسف الشريف"




"اظلام"
"النهاية"




 
Reem Essam Cairo , Egypt | copyrighted2011 - Reem Essam