مسلسلاتك يا صبحي..!

بمناسبة انه بيدافع عن منع فيلم هيفا وهبي....
اهداء إلي فرحات أفندي براقع...بوست من تلات محاور...!

يا تري ليه كل مسلسلات محمد صبحي الجديدة شبه بعضها ؟؟؟
يعني عايش ف الغيبوبة زي ونيس و أحفاده زي رجل غني فقير جدا
زي كل المسلسلات اللي هو عملها و لسه هيعملها
ده بالاضافة للسبع أجزاء القدام بتوع ونيس



محمد صبحي أفكاره ثابته و مش بتتغير حتي لما كان مهدي يوسف الله يرحمه بيكتب معاه كان بردو ماشي علي
نفس الخط:

- البطل شهم و أمين و ابن ناس و معطاء و كريم.

- كل اللي حوالين البطل أغبياء و مهملين و مجانين و مقصرين في حق المجتمع و حق نفسهم.

- البطل ليه أولاد...اصحاب...جيران....قرايب...مسئول عنهم مسئولية تامة...و بيرجعوله ف كل حاجة و هو
بيتدخل ف كل كبيرة و صغيرة ف حياتهم من غير ما يعترضو.

- البطل لو كان متجوز فا مراته موافقة علي كل حاجة هو بيعملها و شايفة انها اتجوزت ملاك نازل م السما 
و ان مفيش منه اتنين "راجع شخصية مايسة".

- البطل المتجوز لازم يبقي فيه ست وقعت ف غرامه و بتموت فيه و تبقي لا تقاوم و أحلي من مراته و أغني منها و أشيك منها و هو يرفضها بشمم و اباء

- مشاكل و مفارقات كوميدية بتحصل بين البطل و مراته بسبب الست اللي بتحبه و هو مش سائل فيها

-البطل لو مش متجوز (بيحب - خاطب) غالبا كل الظروف بتقف ضده هو و البنت اللي بيحبها و مش بيتجوزها
حتي ف آخر حلقة "غاوي عكننة علي المشاهدين"

- حشر طرف غير مصري في جميع المسلسلات زي مصري و أم مصري ف يوميات ونيس
زي فيروز ف مسلسل انا و هؤلاء .... و الطرف غالبا بيكون لبناني أو فلسطيني "اللعب علي مشاعر القضية"
و الطرف ده لو كان ست فهي بتنضم و تحب البطل.

- صديق البطل الغني الغبي اللي البطل بيصلحله حياته و يربيله عياله علي القيمم و الاخلاق الحميدة

- فكرة الحل اللي بينزل م السما أو بيطلع من تحت الارض علشان ينقذ البطل من (الوقوع في فخ الرشوة -
التصرف ف فلوس لقاها - بيع البيت اللي هو ساكن فيه(

- فكرة المحنة اللي بتحصل للعيلة علشان تلم شملها

- الدرس اللي كل حلقة بتنتهي بيه و تحسس المشاهد انه قاعد فاتح كتاب القراءة و بياخد الدرس بالمعلقة

- فكرة البطل اللي بيضحي من أجل الجميع علشان سعادة حد ملهوش علاقة بيه زي مثلا(يتجوز من واحدة مش
بيحبها(

-
 البطل بقي لو مش بيحب أو انت عارف انه بيحب وساكت....و مش بينطق حتي ف اخر المسلسل (راجع نهاية مسلسل أنا و هؤلاء) و يبقي نفسك تنط ف الشاشة و تخنقه علشان ينطق...لكن ايه...تناكة محمد صبحي بتدخل ف شخصية البطل للنهاية

- الطقم المتكرر اللي محدش بيشتغل معاه غير محمد صبحي و محمد صبحي مش بيشتغل غير معاهم
يعني تحس انهم متخزنين علشان يشتغل بيهم ف كل مسلسل  و يحطهم ف الدولاب تاني

- نفس الاسلوب الممل ف القطع بين المشاهد و الكلام اللي تنتهي بيه لقطة و تبتدي بيه لقطة تانية

- فكرة البطل اللي كل مشاكل الدنيا اتحطت فوق دماغه لدرجة انو ساب شغلو و ساب حياتو و اتفرغ لحلها

- الرموز الفجة (يعني رجل الاعمال اللي معاه فلوس كتير و غبي بيقي الكويت - رجل الاعمال الخيبث الزمبجي يبقي اسرائيل - رجل أو سيدة الاعمال اللي بتحرك كل حاجة تبقي أمريكا - المغلوب علي أمره يبقي فلسطين - و طبعا البطل نفسه "محمد صبحي" رمز لمصر اللي بتحل كل مشاكل البشرية اللي حواليها(


- الموسيقي التصويرية التي لا تتغير بتغير المسلسل و ذلك لتعامل محمد صبحي الدائم مع الموسيقار الممل محمد علي سليمان بحيث انك مش بتقدر تميز تتر عايش ف الغيبوبة من تتر رجل غني فقير جدا"الشهادة لله تتر يوميات ونيس  ومميز عن الباقي" يستثني من البند ده تتر فارس بلا جواد لأن ياسر عبد الرحمن هو اللي عامله

 - عدم وضع أي ممثل لمكياج حقيقي في أي مشهد بحيث انك تحس انهم لسه صاحيين م النوم مع العلم بأن محمد صبحي نفسه بيحط مكياج كامل  و بيلبس باروكة علشان يبقي باين جدا وسطيهم



-تتر المسلسل ذات نفسه في البداية كل المشاهد اللي بتجري ف التتر لازم يبقي فيها محمد صبحي.

- تتر النهاية بيقفل علي صورة محمد صبحي أو حد أخر كلمة قالها كانت بردو علي محمد صبحي.

- انك تلاقي الست اللي بتحب البطل و هتموت عليه دي تتقدم و تعرض الجواز علي البطل و هو يرفض بشمم و اباء "أمين شرطة اسم الله".

-   انك تلاقي اسامي فجة بالاضافة الي الرموز الفجة ف المسلسلات زي ايه عايش شحاتة - دنيا أفضل غازي - عيلة منافع - سامي الديب - لبيب السحلاوي - سلسبيل قنديل عبد الجليل - سندس المناخيري - وفاء نادر-  - روعة - طوسون و طهطاوي و خليفة "في ام تسمي ولادها كدة أصلا؟؟"

- أحد الشخصيات ليها لازمة متكررة علي مدي كل الحلقات زي"متفهمنيش غلط - شو هالحكي - خليفة مالوش تصريفة".


- البطل بيحكي حكايات و بيقي قصده علي حاجة بتحصل جنبه أو وراه أو حصلت و خلصت

- بداية التعارف بين البطل و البطلة تبقي خناقات و تنافس شديد غير مبرر ثم اعجاب صامت ينتهي بشلل المشاهد ثم فراق ف اخر حلقة و هو ما يسبب خنقة شديدة يصاحبها حلفان بأني ما اتفرجش علي محمد صبحي تاني

- البطل لازم يكون بيشتغل شغلانة شريفة يدافع فيها عن حقوق الغلابة (محامي – مدرس تاريخ)
و الله العظيم انا باحب محمد صبحي جدا..بس بجد...محمد صبحي المؤلف...بيحرق الممثل و محمد صبحي المخرج بيدمر انجازات سنين الممثل بناها.......لأني لاحظت ان أعظم أعمال محمد صبحي هي تلك التي لم يكتبها.....

النص مكتوب في ديسمبر 2010  


تعليقات

  1. وانا صغير كنت مستغرب انا ليه مش بتعلم منه اي حاجة !! انتي موسوعة .. انا كنت عارف اسمك الحقيقي بس نسيته هو كان ايه ؟ D:

    ردحذف
  2. ايوا افتكرته هو مش حلو اوي بس كويس .. انا لا احبك .

    ردحذف
  3. انا قرأت المقال ده ايام ما كان ملف (word) :)

    ردحذف
  4. اولا هو مش كل مره يقدم البطل رجل شهم وامين وكريم لانه فى رجل غنى فقير جدا كان عامل دور راجل انانى جدا وبالنسبه لفكره انه كل مره يظهر بيشتغل شغلانه شريفه فهو بردو فى رجل غنى فقير جدا لما كان رجل اعمال عمل ثفقة اسلحه اما بالنسبه للكرو اللى بيبقوا دايما معاه فى كل الاعمال وبعد كدا بيحطهم فى دولاب علشان ميشتغلوش مع غيره فدا كلام غلط جداا لان يوسف داود عامل اعمال كتير مع عادل الامام ومع غيره وعبد الله مشرف ليه افلام كتير جدا و محمود ابو ذيد اللى هو دايما موجود فى اعماله موجود فى حاجات تانيه زى مسلسل العار وفى مل اعمال محمد صبحى البطله بتكون مختلفه زى سعاد نصر ووفاء عامر وداليا مصطفى وسيمون ووفاء صادق اما بالنسبه ان كل حلقه بتنتهى بدرس كاننا قاعدين قدام كتاب القراءه فدا اصلا سر نجاح اعماله انها هادفه وبتعلم حاجات كتير احسن ماتكون هابطه وعلى فكره انا بحترم وجهة نظرك لكن من وجهة نظرى ان محمد صبحى المؤلف مش بيحرق محمد صبحى الممثل بالعكس دا بيظهره ولو كان مؤلف فاشل مكنش كتب عمل رائع زى فارس بلا جواد اللى عمل ضجه حتى فى اسرائيل ... ارجو تقبل وجهة نظرى

    ردحذف

إرسال تعليق

تعليقك يسعدني..يا أفندم!

المشاركات الشائعة