الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

22 أبريل 2014

خمسة وتلاتين طريقة تشتغل بيهم نفسك!

خمسة وتلاتين طريقة تشتغل بيهم نفسك...
1-     اتفرج علي أفلام ليوسف شاهين "ينصح بشدة بفيلم عودة الابن الضال".
2-     اسمع أغاني محمود العسيلي، وحاول تقنع روحك انها أغاني.
3-     احضر حفلات في ساقية الصاوي ع الواقف، وحاول تتابع حفلات رامي عصام، وتدفع تذاكر غالية ليه.
4-     روح السينما ف أفلام مستقلة زي فرش وغطا، وعشم، وحاجات محدش بيفهمها اصلا
5-     ممكن بدل النقطة رقم أربعة تتفرج تاني علي فيلم ليوسف شاهين لو مفلس معكش فلوس للسينما "ينصح بفيلم اسكندرية ليه؟"
6-     اتفرج علي جوتيوب، وهوبا فلوج...
7-     اركب المترو وقبل محطة السادات شغل اغنية "دار يا دار يا دار" بتاعة وديع الصافي.
8-     تخيل وديع الصافي نفسه وهو ماشي جوة المحطة –وهي فاضية- وبيغني نفس الغنوة.
9-     اتفرج علي برنامج قصة حياة تامر حسني وقصة حياة محمد حماقي.
10-  اتفرج علي رأي واحد مفروض انه رابر في الموسيقي (اللينك هنا).
11-  اعمل الموبايل فلايت مود، ولماحد يكلمك شاورله بالموبايل وقوله انه شغال.
12-  اعمل اغنية "انا هاجي علي نفسي" بتاعة تامر عاشور نغمة منبه.
13-  اتفرج علي قناة  MBC Persia وحاول تفهم الترجمة الفارسي.
14-  روح الشغل يوم وقرر انك متكلمش حد، وهتلاقي أعصابك ارتاحت.
15-  غير الويندوز علي اللابتوب وحط اللينوكس...
16-  غير مكان حجرة الريموت، وافضل دوس ع الزراير جامد.
17-  غير مكان علبة الملح بعلبة السكر.
18-  حمل الأعمال الكاملة للمخرج وائل احسان، أو السيناريست سامح سر الختم.
19-  دور علي أفلام بطولة عمر حسن يوسف، وأحمد جلال عبد القوي، وأحمد سعيد عبد الغني.
20-  اتفرج علي Game of thrones  زيك زي غيرك.
21-  اسمع أغاني مريم صالح كتير، وحاول دايما تفتكر ان الانتحار حرام، وقتل النفس أصعب شئ :D
22-  اتفرج علي أحمد موسي كل يوم بالليل، وف الاعلانات اتفرج علي لميس الحديدي.
23-  اسمع غالية بن علي وهي بتغني الأطلال.
24-  اسمع غالية بن علي وهي بتغني يا مسافر وحدك، وبوس إيد سيدك عبد الوهاب.
25-  اتفرج ع الأعمال الكاملة لغرام وحنين...
26-  حمل مسلسلات "نونة المأذونة – اخت تريز" وجميع أعمال الفنانة حنان ترك الدرامية.
27-  مسرحيات محمد نجم بانتظارك يابطل، خلصها وتعالالي.. (ماعدا مسرحية شفيق ياراجل عشان هي بتضحك فعلا)
28-  ان كنت من محبي القراءة اشتري الأعمال الكاملة لنبيل فاروق وسلسلة رجل المستحيل..
29-  تابع قناة MBC Masr  وخصوصا برنامج أحلي مسا للشهيدة فيفي عبده والرائد هشام عباس.
30-  حمل جميع التولبارز في البراوزرز، واستمتع بالشاشة وهي مش باين منها غير ربعاه بس :D
31-  اشترك ف الانترنت مع TEData
32-  اشترك في عرض طلقة مع نفس الشركة، واتصل بخدمة العملا يوميا.
33-  اشتغل في مكان لازم تركب كل يوم وتطلع ع الدائري أو المحور، وتمتع بازدحام الطريق المستمر.
34-  اشتري عربية...ويفضل تكون مستعملة لتطليع دين أمك.
35-  وأخيرا وليس آخرا: اعمل حساب تويتر، وتابع بلال فضل،  ووائل عباس، ويوسف الحسيني..


21 أبريل 2014

مسلسلاتك يا صبحي..!

بمناسبة انه بيدافع عن منع فيلم هيفا وهبي....
اهداء إلي فرحات أفندي براقع...بوست من تلات محاور...!

يا تري ليه كل مسلسلات محمد صبحي الجديدة شبه بعضها ؟؟؟
يعني عايش ف الغيبوبة زي ونيس و أحفاده زي رجل غني فقير جدا
زي كل المسلسلات اللي هو عملها و لسه هيعملها
ده بالاضافة للسبع أجزاء القدام بتوع ونيس



محمد صبحي أفكاره ثابته و مش بتتغير حتي لما كان مهدي يوسف الله يرحمه بيكتب معاه كان بردو ماشي علي
نفس الخط:

- البطل شهم و أمين و ابن ناس و معطاء و كريم.

- كل اللي حوالين البطل أغبياء و مهملين و مجانين و مقصرين في حق المجتمع و حق نفسهم.

- البطل ليه أولاد...اصحاب...جيران....قرايب...مسئول عنهم مسئولية تامة...و بيرجعوله ف كل حاجة و هو
بيتدخل ف كل كبيرة و صغيرة ف حياتهم من غير ما يعترضو.

- البطل لو كان متجوز فا مراته موافقة علي كل حاجة هو بيعملها و شايفة انها اتجوزت ملاك نازل م السما 
و ان مفيش منه اتنين "راجع شخصية مايسة".

- البطل المتجوز لازم يبقي فيه ست وقعت ف غرامه و بتموت فيه و تبقي لا تقاوم و أحلي من مراته و أغني منها و أشيك منها و هو يرفضها بشمم و اباء

- مشاكل و مفارقات كوميدية بتحصل بين البطل و مراته بسبب الست اللي بتحبه و هو مش سائل فيها

-البطل لو مش متجوز (بيحب - خاطب) غالبا كل الظروف بتقف ضده هو و البنت اللي بيحبها و مش بيتجوزها
حتي ف آخر حلقة "غاوي عكننة علي المشاهدين"

- حشر طرف غير مصري في جميع المسلسلات زي مصري و أم مصري ف يوميات ونيس
زي فيروز ف مسلسل انا و هؤلاء .... و الطرف غالبا بيكون لبناني أو فلسطيني "اللعب علي مشاعر القضية"
و الطرف ده لو كان ست فهي بتنضم و تحب البطل.

- صديق البطل الغني الغبي اللي البطل بيصلحله حياته و يربيله عياله علي القيمم و الاخلاق الحميدة

- فكرة الحل اللي بينزل م السما أو بيطلع من تحت الارض علشان ينقذ البطل من (الوقوع في فخ الرشوة -
التصرف ف فلوس لقاها - بيع البيت اللي هو ساكن فيه(

- فكرة المحنة اللي بتحصل للعيلة علشان تلم شملها

- الدرس اللي كل حلقة بتنتهي بيه و تحسس المشاهد انه قاعد فاتح كتاب القراءة و بياخد الدرس بالمعلقة

- فكرة البطل اللي بيضحي من أجل الجميع علشان سعادة حد ملهوش علاقة بيه زي مثلا(يتجوز من واحدة مش
بيحبها(

-
 البطل بقي لو مش بيحب أو انت عارف انه بيحب وساكت....و مش بينطق حتي ف اخر المسلسل (راجع نهاية مسلسل أنا و هؤلاء) و يبقي نفسك تنط ف الشاشة و تخنقه علشان ينطق...لكن ايه...تناكة محمد صبحي بتدخل ف شخصية البطل للنهاية

- الطقم المتكرر اللي محدش بيشتغل معاه غير محمد صبحي و محمد صبحي مش بيشتغل غير معاهم
يعني تحس انهم متخزنين علشان يشتغل بيهم ف كل مسلسل  و يحطهم ف الدولاب تاني

- نفس الاسلوب الممل ف القطع بين المشاهد و الكلام اللي تنتهي بيه لقطة و تبتدي بيه لقطة تانية

- فكرة البطل اللي كل مشاكل الدنيا اتحطت فوق دماغه لدرجة انو ساب شغلو و ساب حياتو و اتفرغ لحلها

- الرموز الفجة (يعني رجل الاعمال اللي معاه فلوس كتير و غبي بيقي الكويت - رجل الاعمال الخيبث الزمبجي يبقي اسرائيل - رجل أو سيدة الاعمال اللي بتحرك كل حاجة تبقي أمريكا - المغلوب علي أمره يبقي فلسطين - و طبعا البطل نفسه "محمد صبحي" رمز لمصر اللي بتحل كل مشاكل البشرية اللي حواليها(


- الموسيقي التصويرية التي لا تتغير بتغير المسلسل و ذلك لتعامل محمد صبحي الدائم مع الموسيقار الممل محمد علي سليمان بحيث انك مش بتقدر تميز تتر عايش ف الغيبوبة من تتر رجل غني فقير جدا"الشهادة لله تتر يوميات ونيس  ومميز عن الباقي" يستثني من البند ده تتر فارس بلا جواد لأن ياسر عبد الرحمن هو اللي عامله

 - عدم وضع أي ممثل لمكياج حقيقي في أي مشهد بحيث انك تحس انهم لسه صاحيين م النوم مع العلم بأن محمد صبحي نفسه بيحط مكياج كامل  و بيلبس باروكة علشان يبقي باين جدا وسطيهم



-تتر المسلسل ذات نفسه في البداية كل المشاهد اللي بتجري ف التتر لازم يبقي فيها محمد صبحي.

- تتر النهاية بيقفل علي صورة محمد صبحي أو حد أخر كلمة قالها كانت بردو علي محمد صبحي.

- انك تلاقي الست اللي بتحب البطل و هتموت عليه دي تتقدم و تعرض الجواز علي البطل و هو يرفض بشمم و اباء "أمين شرطة اسم الله".

-   انك تلاقي اسامي فجة بالاضافة الي الرموز الفجة ف المسلسلات زي ايه عايش شحاتة - دنيا أفضل غازي - عيلة منافع - سامي الديب - لبيب السحلاوي - سلسبيل قنديل عبد الجليل - سندس المناخيري - وفاء نادر-  - روعة - طوسون و طهطاوي و خليفة "في ام تسمي ولادها كدة أصلا؟؟"

- أحد الشخصيات ليها لازمة متكررة علي مدي كل الحلقات زي"متفهمنيش غلط - شو هالحكي - خليفة مالوش تصريفة".


- البطل بيحكي حكايات و بيقي قصده علي حاجة بتحصل جنبه أو وراه أو حصلت و خلصت

- بداية التعارف بين البطل و البطلة تبقي خناقات و تنافس شديد غير مبرر ثم اعجاب صامت ينتهي بشلل المشاهد ثم فراق ف اخر حلقة و هو ما يسبب خنقة شديدة يصاحبها حلفان بأني ما اتفرجش علي محمد صبحي تاني

- البطل لازم يكون بيشتغل شغلانة شريفة يدافع فيها عن حقوق الغلابة (محامي – مدرس تاريخ)
و الله العظيم انا باحب محمد صبحي جدا..بس بجد...محمد صبحي المؤلف...بيحرق الممثل و محمد صبحي المخرج بيدمر انجازات سنين الممثل بناها.......لأني لاحظت ان أعظم أعمال محمد صبحي هي تلك التي لم يكتبها.....

النص مكتوب في ديسمبر 2010  


20 أبريل 2014

منصور يابني....

منصور يابني ان شاء الله..!


البداية صعبة الحقيقة، انا مش فاكرة من امتي، بس فاكرة انها كانت ف بدايات الوقت اللي بدأت افكس فيه للتليفزيون، وألتفت فيه أكتر للإعلام البديل، اليوتيوب، والبرامج ذات الايقاع السريع، وكل ده بدأ تقريبا مع باسم يوسف، سنة 2011، كانت لحظة فارقة، وفاكراها كويس، لأن الفيديو بتاع باسم يوسف فضل قدامي أكتر من أربع أسابيع رايح جاي ع الفيسبوك قدامي، ووقتها قلت فاكس، راجل أهبل، لحد ما لقيت صاحبتي الأنتيم شافته، ومشيراه، قلت مبدهاش بقي، واتفتح الهاويس يا فؤادة..!

أسامي كتير، منهم اسم واحد بس علق معايا وبشدة، هماالحقيقة اسمين، والمجال دلوقت مفتوح عشان نتكلم علي واحد منهم بس، وهو الأكثر تميزا وشهرة، وهو الأستاذ "هشام منصور"..



هشام منصور، صاحب برنامج "العلم والايماو"، وهو بوضوع لعب علي اسم البرنامج الشهير للدكتور مصطفي محمود، اللي كان بيعرض فيه فيديوهات كونية حلزونية، ويقولك سبحان الله وكدة، بس الموضوع هنا مختلف، هشام منصور صاحب رؤية ساخرة وموضوعية، بعيدا عن الهزي بتاع مصطفي محمود أصلا...

معرفتي أو معلوماتي الضحلة عن هشام منصور كالتالي: انه مهندس كومبيوتر، وهجر الكارير –لأنه مش جايب همه أصلا- عشان الحاجة اللي بيحبها أو هو مميز فيها، أو بيعرف يعملها جدا، هشام بيكتب الحلقات بنفسه، وبيشاركه فيها سانتوس، وهو عازف جيتار محدش شاف وشه قبل كدة، وباختصار كل اللي هو بيعمله انه بيدي جرعات مكثفة، أو بيديك Shot تيكيلا تدور دماغك وقتي..!



مش قادرة أنسي حلقات كتير، زي حلقات العلاقات، اللي لخص فيها حاجات كتير عن العلاقات بين الشباب والبنات، وحلقة المخدرات، اللي بقت دليل معارف لكل جاهل في أنواع المخدرات، وجرس انذار لكل أم عاوزة تراقب عيالها، وحلقة الأغاني، وافيهاتها الدهبية، والحلقتين اللي يستاهلو جايزة نوبل، حلقتين الجواز، وحلقة الاشاعات، وغيرها من الحلقات المميزة.

أعرف حاجة كمان عن هشام: انه كان بيشارك الكتابة في حلقات باسم يوسف اللي كانت علي ONTV  وبعد كدة سابه لأسباب انا معرفهاش، الفكرة اني نفسي اسمع من هشام اكتر.

هشام منصور مقدم برامج هايل، صاحب حضور وطلة مميزة، وسيم –من وجهة نظري طبعا-، والأهم إنه صاحب رؤية، وانا مؤمنة من جوايا انه عاوز يغير الواقع، بيحاول من خلال البرنامج انه يلمس حاجة ويغيرها، وده كان شئ بين في اخر حلقة ليه "الإعلانات"، أو في سلسلة حلقات الانس والجنس، اللي تحسب ليه بكل المقاييس، وحاول من خلالها انه ينشر مفهوم الثقافة الجنسية السلييييييمة بين الستات والرجالة وبشكل حضاري راقي جدا، وحلقة الجاهلية، اللي رصد فيها ظواهر المجتمع السلبية والقميئة عشان نحاول نتخلص منها...

كيوت فشخ :)


في مقارنة أو مقاربة سريعة بين هشام منصور وباسم يوسف، نلاقي بعض نقط التشابه، زي انهم بدأو الاتنين من الانترنت، بس باسم ماشاء الله ركب الناقة وشرخ، وهشام لسه بيعمل اسم، او يمكن هو مرتاح كدة، أو ليه فكر تاني، الفكرة ان باسم يوسف بدأ بداية صحيحة، بعد كدة ماشاء الله قلب البرنامج منبر للردح والسخرية عمال علي بطال، وشوية فرق اندرجراوند –تلات تربعهم ملوش جمهور-، هشام بدأ بخط واضح، ولسه ماشي عليه، السخرية اللازعة، محاولة تغيير المجتمع، وماشي في نفس الطريق، وأظن انه هيبقي أكبر وأحسن من باسم يوسف، لسبب، لأن طبيعة هشام مش هتخليه يتحول لإله زي باسم.


برنامج هشام مستمر، ودلوقت احنا ف السيزون التاني منه، وان شاء الله من نجاح لنجاح، واحنا وراه دايما بالنقد السلبي أو الايجابي، لأن ده دورنا، هشام مش بياخد أكتر من حجمه، ومستمر في سخريته حتي من نفسه، وكلنا شوق للجديد بتاعه دايما J

19 أبريل 2014

فنان صاعد محمد حمد..!

الفنان الصاعد (محمد حمد)...




فنان صاعد محمد حمد...هكذا سمي الرجل نفسه علي حساب الفيسبوك خاصته، فنان صاعد، كأنها أصبحت لقبا أو مهنة، وكأن أم كلثوم لو كانت تحيا بيننا اليوم لكتبت علي فيسبوكها "كوكب الشرق"، أو عبد الحليم لو كان له فيسبوكا هو الآخر لسمي نفسه "العندليب الأسمر"..!

يعرف محمد حمد نفسه علي حسابه بأنه (ممثل/ مخرج في شركة منار الفن للإنتاج والتوزيع، ومخرج وكاتب مسرحي، وفنان موسيقي)، ومقولته المفضلة "عاشق لبلدي وديني ولا اعرف الكراهيه واحب كل الناس لافرق عندي بين هذا وذاك"...



"يا فنان" تتكرر هذه الكلمة بمعدلات مخيفة علي هذه الصفحة، والصفحة في الأساس تخص ممثلا من الدرجة الثانية، أو الثالثة علي أقصي تقدير، ممثل يلعب أدوار نسائية ورجالية، ساعدته ملامحه المتعادلة في الشكل مابين الأنوثة والرجولة علي لعبها، وللمفارقة أول صورة رأيتها له كانت وهو متنكر في زي امرأة، ثم توالت الصور، ينادي ممثلو الدرجة الثالثة بعضهم بهذه الكلمات "يا فنان – ياحبيب ألبي - يانجم"، وكأنهم يعوضون شهرتهم التي لا توجد علي أرض الواقع بمناداة بعضهم بهذه الألقاب الرخيصة...



علي صفحة الفنان محمد حمد، توصلت لصفحة الشاب الذي أجاد تقليد القذافي منذ ثلاثة أعوام، وانتشرت فيدوهاته علي اليوتيوب، وهو ينادي إلي الأمام، إلي الأمام في توكتوك، قبل مصرع القذافي واندلاع الثورة الليبية في الربيع العربي، شاب يدعي حمادة من شبرا، وسبق وأن ظهر في برنامج فني درجة ثالثة كصاحبه (أحمد عبد العزيز) علي قناة الفراعين،الذي اتخذ من برنامجه منصة للردح وشهرة لفناني الدرجة الثالثة محبي الشهرة...

محمد حمد للوهلة الأولي يبدو رجلا غير مكتمل الرجولة، أمرد، لا لحية له، طويل الشعر، ضعيف البنية، حتي جسده الضعيف لا يمت بصلة لبدلته  التي ارتداها والتقطوا له صورتين بجوار جدار، وصورة أخري وهو (مش واخد باله)، وكتب عليها كلاما من نوعية (الذكري فكرة والأمل لا يموت) وغيرها من عبارات ادعاء الثقافة الزائفة التي من بعدها تتوالي التعليقات من نوعية (الله يافنان – اوعي يا نجم النجوم)...!



الفنان محمد حمد من حزب الكنبة، يؤيد السيسي، ويشاهد باسم يوسف، وينشر أخبارا مؤيدة لشيخ الأزهر، محمد حمد دائم التفاعل مع جمهور صفحته القليل (750 معجب) علي حد قوله، والمثير للتعجب أنه ينشر صورا من أعماله الفنية، والأغرب أنني لم أسمع أبدا عن هذه الأعمال...!

"إذا بلغت القمة فوجه نظرك إلى السفح لترى من عاونك في الصعود إليها .. وانظر إلى السماء ليثبت الله أقدامك عليها."
عينة مما كتب علي صفحة محمد حمد الفنان الصاعد، الشئ العجيب أن هذا الفنان لم يسمع عنه أحد حتي ولو في طبق اليوم، فأي قمة يتحدث عنها هو..!



الفنان محمد حمد علي علاقة وطيدة بكومبارسات، فنيين اضاءة، أقارب، معارف، وكلهم يعاملونه كأنه عادل امام الجديد، الشئ الغريب أنك كلما وجدت الشخص صاحب شأن قليل وجدته يحتفي بنفسه أكثر وأكثر وكأنه ملك الملوك..!

مسلسل فانتازيا بالمصري، أحدث اعمال فنان صاعد محمد حمد، ديكور ركيك، اخراج باهت، وممثلين من الدرجة الثالثة، والسؤال الأخير: أين تعرض هذه الأعمال...!!!

 
Reem Essam Cairo , Egypt | copyrighted2011 - Reem Essam