الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

31 مارس 2014

زنزانة...

"المكان: مجهول – قاعة مظلمة "
"الزمان: بعد انتهاء برنامج زافويس أحلي صوت"
"نري ممرا مظلما وقدمي شاب تتحركان في تردد نحو الضوء الموجود في آخر الممر"
"يصل الشاب الذي لا نري منه شيئا سوا قدميه إلي البقعة المضيئة ونراه من الخلف وهو يضع كفيه أمام عينيه حتي يتفادي النور المبهر"

الشاب:
"يصيح بخوف"
انا وين؟
صوت:
"بصوت عالي"
انتا في قاعة الشرف....مع زمايلك يا ستار...

"يزيح ستار سعد الفائز بزافويس عينيه لينظر حوله"
"نري صورا معلقة لبعض الشباب المبتسم والممسك بدروع مختلفة الأشكال والألوان"
"نلمح في لقطة سريعة صورا لشابة وقد كتب تحتها عرب آيدول 2012 – وشاب آخر كتب تحته ستار أكاديمي 2014 والشابين مبتسمين"

ستار:
"يبدوعليه عدم التصديق"
وين أنا؟ وين انتا يللي بتحكي؟

الصوت:
"يضحك ضحكة عالية"
انتا خلاص يا ستار، مهمتك انتهت، وهتتحبس هنا للأبد، مع كل زمايلك..!

ستار:
"يصرخ"
شو يعني، رح انحبس هون....؟؟
"يخلع الجاكت من علي جسده"
"يلقي ستار بالجاكت في هستيرية"

بدي اخرج...

"نسمع بابا ينفتح ويسرح ستار وراء صوت الباب"
"يسير ستار في ممر مظلم نحو صوت فتح الباب"
"نسمع همهمات وهمسات تعلو باقتراب ستار وهو يتخبط في الممر الآخر"
"نري بابا يشبه باب الزنزانة ينفتح ونري الفنان محمد عطية وهو يشير لمقعد خال بجواره ليجلس بجواره ستار"

عطية:
اهلا يا حبيب أبوك...تعال ياروحي...

"يدخل ستار وهو غير مصدق لعينيه "
"الزنزانة شبه مظلمة"
"تقترب الكاميرا من ملامح محمد عطية التي بدت كأنها أكبر في السن، وذقنه غير حليقة"
"يجلس ستار سعد إلي جوار عطية"
"يبدأ عطية بتعريف ستار إلي الموجودين"

عطية:
"يشير لفتاة محجبة تجلس أمامه"
دي شاهيناز، ستارميكر 2001
"يشير لشاب آخر بنظارة سميكة يجلس بحوارها ويضع سيجارة خلف أذنه"
وده ايساف، ستار ميكر 2002
"يشير لفتاة أخري تلعب في خصلات شعرها"
ودي ديانا كرازون، سوبر ستار 2003
"يشير  لنفسه"
محمد عطية، ستار أكاديمي 2004
"يشير إلي العديد من الفتيات والشابات حتي يتوقف إلي شابة جميلة"
نسمة محجوب، ستار أكاديمي 2009

"نري نسمة وهي تغني بطبقة عالية كأنها تصرخ"

"يشير لركنا مظلما في نهاية الزنزانة"
عطية:
"يضحك ضحكة ساخرة"
وده آخرايراد من السنة اللي فاتت، موراد بوريقي زا فويس، 2013
واللي جنبه دي،أيوة، اتزاح يا اخويا كدةشوية..
"ينهض عطية ليزيح مراد من مكانه "
"نري فتاة صغيرة مختبئة خلف مراد"

ودي كارمن....طقم سنان....سليمان..مش فاكر...عرب آيدول ده....2013...

"يستنهض عطية الموجودين بالقوة"
"يخرج عطية مطواة من جيبه وينهض الجميع من مقاعدهم"
"يلتف الجميع في حلقة حول ستار وكأنهم سيضربونه"

عطية:
"ساخرا"
"يضع المطواة في جيبه"

رحبو بأخوكو ستار يا جماعة...
"ينظر في السقف للحظة"
اقفل الباب يابني...
"نسمع باب الزنزانة ينغلق"
"اظلام "
"قطع"
"النهاية"




الشنطة...

خلونا نتكلم كفنيين....أو كبنت، ولأول مرة بتكلم بصفتي بنتمي للكيان الأنثوي مش للكيان الانساني عامة....



النهاردة أجازة، أجازة ليا، فكري اداهاني كدة علي حين غرة من غير ترتيب، المهم نزلت أخلص مصلحة م البنك ف جامعة الدول، في السريع المريع كدة ف ساعة، ونزلت م البيت، نزلت بكيس الفلوس اللي هو باحط فيه البطاقة والفكة والفلوس المجمدة، والموبايل والسماعة، وحطيت مفاتيح الشقة ف جيبي، ونزلت، ولما كنت ف الشارع، حسيت بسخافة فكرة الشنطة اللي بشيلها علي قلبي كل يوم، لأنهاببساطة حاجة بتتشال ع القلب، أو ع الكتف، عشان يتحط فيها حاجات ملهاش اي تسعميت لازمة، أو ليها لازمة ساعات.

عادة أي شنطة لأي بنت، بيبقي فيها الآتي:
1-     مناديل ورق، لأن سواء الجو حر أوبرد، المناديل لها لازمة فشيخة.
2-     وايبس (مناديل بردو بس بريحة ومبلولة ف روحها كدة) لزوم النضافة لوحضرتهاكلت برة.
3-     برفيوم، وعادة بتبقي سبراي بيرفيوم من ماركة She اللي البنات كلها بتحط منها!
4-     شوال ميكاب، البنت ف الشارع بتمشي بعلبة البودرة المائية أو كريم الأساس، برميل اي شادو، تلات صوابع روج، ولب جلوس، وفيه فرق بين الاتنين طبعا، وروجاجو، اللي هو أحمر الخدود، وقلم كحل احتياطي، وماسكارا، وآيلاينر، وممكن تلاقيها شايلة التسريحة في كيس الميكياج.
5-     مشط (لو هي مش محجبة)، ودبابيس لو هي محجبة.
6-     قزازة مية (عشان بنقرف نشرب من برة)
7-     كيس فلوس للفكة وخلافه
8-     محفظة (للورق المهم والبطاقة والكريديت كاردز وخلافه)
9-     مبرد ضوافر، واحتمال تلاقي قصافة وملقاط.
10-  خيط وابرة (عشان لو حاجة م اللبس اتقطعت)، وفي واقعة حقيقية اقسم بالله واحدة كان معاها بكرة في الشنطة وعملت شنبها فتلة في الحمام قدامي.
11-  كريم للإيدين عشان التقشفات.
12-  السماعات والموبايل اللي جرابه زي ودان الأرنب.
13-  برشام مسكن، عشان البنات بتصدع كتير فشخ.

14 -     فوط صحية، عشان أيام الشهر الصعبة

فلك عزيزي الرجل أن تتخيل اني بمشي كل يوم بحوالي ست أو سبع حاجات م التلاتاشر حاجة اللي فوق دول، في شنطة علي كتفي، عشان تعرف بس احنا بنعاني قد ايه، غير اني أصلا دايما معايا ف شنطتي بالذات كشكول وقلم، ونوتة صغيرة، يعني احا :D

شعوري النهاردة كان خفيف وظريف لما نزلت للمشوار من غير الزكيبة دي كلها، وحسيت اني طايرة وفرحانة وخفيفة، وقدرت شعور الولاد الحقيقة.....

كمان لاحظت ان من لفي علي محلات الجزم ان الجزم يا فلات عالأرض،يا اما كعب خمنشار سنتي، اللي هو احيه، مفيش حاجة خمسة سنتي، لو عملتو الكعب ده هتموتو متسلخين! يا كفرة يا ظلمة L

27 مارس 2014

بتسمعي ايه؟

"نهار – داخلي"
"ميكروباص الشغل"
"الكنبة الخلفية"

"في يوم من ذوات الأيام"
بنت 1: بتسمعي ايه ياريم؟
ريم: بسمع محمودالليثي....
بنت 1: "مع مصمصة شفايف" بلدي أوي...ياي..

"في يوم تاني"
بنت 2: بتسمعي ايه ياريم؟
ريم: كارل أورف – كارمينا بورانا
بنت 2: "مع رفعة حواجب " كارل أورف...ده مصري؟
ريم: لأ...ودي اوبرا...

"في يوم تالت"
بنت 3: بتسمعي ايه ياريم؟
ريم: مايكل جاكسون...
بنت 3:"تضحك بسخرية" ده قديم جدا...

"في يوم غير التلاتة اللي فوق"
بنت 4: بتسمعي ايه ياريم؟
ريم: عبد الحليم وأم كلثوم وعبد الوهاب...
بنت 4:"تنظر نظرة احتقار من أعلي لأسفل وترحل بدون كلام"

"في يوم كحلي غير كل اللي فوق"
بنت 5: بتسمعي ايه ياريم؟
ريم: "بنفاذ صبر" ليدي جاجا
بنت 5: مين ليدي جاجا دي؟
ريم: مغنية بوب....متعرفيش البوب..؟
ريم: اومال انتي بتسمعي مين؟
 بنت5: جنات وحماقي...

"في يوم غير كل اللي قبليهم"
بنت 6: بتسمعي ايه ياريم؟
ريم: جنات وحماقي وتامر...
بنت 6:ايه التفاهة دي؟
ريم: اومال حضرتك بتحبي مين؟

بنت 6: جستن بيبر :D

26 مارس 2014

حــــــــــــــــــــ..............

بيقولك السيسي حـ....وبعد ما يـ....هـ......والبلد كلها اصلا مستنياه، فأصلا لما يـ......هيحصل اللي كلها مستنيينه، واخدلي بالك انتا، والأجمل بقي ان مصطفي بكري حـ.......وباسم يوسف حـ......وبتوع تويتر حـ........والاخوان حـ.......والناس اللي ف الشارع حـ......، بس أهم حاجة، سواقين الميكروباص ميغلوش الأجرة، وصور السيسي متبقاش زي صور ابو اسماعيل اللي......، عشان لو حـ........هتشائم الحقيقة، وهحس ان السيسي مصيره هيبقي........، فاهمني انتا طبعا...!

بالك انتا بقي هو عمال يأجل في الـ....، متفهمش ليه...كأننا بنعرض عليه لبوس مثلا، وهو مش راضي، او ابن عمه جايبله عقد ف الكويت، وهو مش مرتاح، كأنه بيمشي في الجزمة الأول، انا مش.......ولا بحترمهم، بس الفكرة اني زهقت، وحـ....... عين امي، أو دين أمي، بعدين مالك انتا ومال أمي، احنا حـ.........بالأوي، فإنتا بقي كسبت صلاة النبي لما.......يستقيل، وهو ياعيني مستقيل قبل ما الشهر يخلص، طب استني قبض مارس، ولا حـ......م المولد بلا حمص، طب خد أجازة من غير مرتب، لحد ما تمسك شغلانة تانية، ولا انتا خلاص، ضمنت وحطتينا ف......، ولا ايه؟

والتاني ده ياخويا اللي كان ظل عبد الناصر ع الأرض، ولاد عبد الناصر طلعو فسحوه، وان شاء الله حـ.........ومحدش حـ..........وكلنا حـ.......أوبح ان شاء الله....
نهايته،احنا حـ.......لأننا..لايصين كومبليتلي يا علي...!


عربية أتاري...


عربية أتاري...
ماشية ف شوارع مدينتي...
وايد خسيسة...
تتمد ناحية..
أختي...بنتي...
انا مش ف مصر...
غير بجسمي...وبس ليه؟
ومش باحس بحبي ليها...
وحتي حبي...يسوي ايه!
زهقت من عين الفضول..
وقلبي أصبح...
غيم ملول..
واتسطحت كل العقول...
والقدر غرق سفينتي..
أفكاري هايمة في الحواري..
لمتها...عربية الأتاري...
اللي دايرة تلم فينا...
وماشية...
في شوارع مدينتي...

26 مارس 2014
شونج...


25 مارس 2014

صعيدي بالكريم بروليه..!



المقادير: عدد تسعة مطاريد + عدد واحد عمدة ظالم – كبير القرية – عميد عيلة كبيرة ف القرية (المهم انه راس كبيرة وخلاص) + عدد تلات ستات لابسين ملس أسود وعلي وشهم طن بوية للقيام بدور (أم – أخت - حبيبة) للعمدة + عدد واحد زوجة للراس الكبيرة دي، ويفضل تكون مبيحبهاش + عدد اتنين ليهم تار عند العمدة + عدد خمسة بدقون للقيام بدور جماعة اسلامية متطرفة + عدد واحد قسيس واتنين 
جواهرجية للقيام بدور الوحدة الوطنية + عدد واحد غازية بفرقتها + عدد واحد يقف ف وش الظلم ده كله = مسلسل صعيدي مصري..

الطريقة: الفكرة كلها بأن الكاتب بيحاول يطبق كل اللي درسه في السيناريو ف مسلسلات الصعيد، فتبدأ الأحداث مثلا بكبير القريةالظالم (مندور أبو الدهب – حدائق الشيطان) أو كبير العائلة العاقل (رفيع بيه العزايزي – الضوء الشارد )، (زكريا ابو العمدة - الفرار من الحب)بأنه مسيطر علي كل حتة في البلد، البلد كلها تحت ايده، ليه كلب خدام ليه من اللي حواليه (صلاح عبد الله - الضو) أو أي غفير عادي، بيبقي كاتم أسراره، وعادة بيبقي عازب (متفهمش ليه!) أو ليه مغامرات نسائية مع راقصات من عينة (ميسرة) وليه شنب مهول، وحساس لكن مشاعره مكتومة فشخ.




بعد الفرشة العظيمة عن سيطرة وفشاخة البطل، بنبدأ نشوف المليحة بتاعة المسلسل، المزة، الحتة الطرية اللي هتقع تحت نظر الجبار بعد كدة عشان يسيطر عليها (مني زكي – الضوء الشارد) و (آثارالحكيم – الفرار من الحب) و (سمية الخشاب – حدائق الشيطان)، واللي طبعا ياما مطلقة، يا ارملة، يا عانس، وعادة بتبقي أرملة أو عانس، لأن المزة دي مينفعش تكون مطلقة لأنها ملاك  لا ينطق عن الهوي، إلهه مجردة فوق كل البشرية وكدة.



طبعا فيه زيليون عائق بين البطل والبطلة، كان يكون أخو البطل الصغير متجوزها (الضوء الشارد)، أو يكون فيه بينهم نزاع علي أرض (الفرار من الحب)، أو يكون بينهم تار وهو قتل جوزها وهي مش عايزاه م الأساس (حدائق الشيطان)، والعائق ده بينتهي إما بأن البطلة بتخلع زي آثار الحكيم، أو بترضخ له بالعافية زي سمية الخشاب، أو محمد رياض بيموت ونخلص منه ويتجوزو بعض!



بطلنا همام، مغوار، بيلعب في الآثار / المخدرات / مجلس الشعب، وليه دايما عائلات في الصعيد دايما ماسكها الفنان يوسف شعبان ومجنن عليه عيشته، وبيضرب عليه نار من وقت للتاني كنوع من التسالي، ودايما بينتصر عليه ف النهاية، عادة بردو البطل بيعذب من ست لسبع خدامات وخدامين في المسلسل وتلت العدد ده بيموت كنوع من العقاب للخدامين اللي بينقلو الكلام بين اسيادهم وكدة، بالإضافة لأن فيه ظابط وست أمناء شرطة مخصصين طول المسلسل للتخديم علي البطل وتقديم الشاي والقهوة ليه في القسم، ونصرته علي اعداءه، بالإضافة لعضو مجلس شعب ويفضل يكون (محيي الدين عبد المحسن) وده طبعا في حالة ان البطل مش عضو ف المجلس أصلا.




الجو نشف؟ انزل يابني بالمولد والغازية ام بدلة رقص سودا وفيها ترتر ومفتوحة م الجنبين وداقة وشم ف دقنها وجنب عينها، واقتل الرقاصة ف الاخر لما الناس تزهق منها/ تحمل / تفتن علي البطل، كفاية عليها كدة.



مرحلة الصراع جت، البطل خد البطلة بعد صراع رهيب مع الأي حاجة، الخاين بيموت، البطل بيتعرض لمحاولة اغتيال ع الزراعي، بيطلع منها، بيضرب فراخ وشوربة من ايدين أمه / المربية بتاعته، بيتعافي، بينتقم، بياخد المزة، بيقتل شركائه، بيسلم المطاريد، بياخد باب المسلسل ف ايده وبيروح وبينزل بتتر النهاية.

عزيزي المتفرج: متنساش تضيف علي كل الخلطة دي عدد واحد تتر من غناء الحجار وتأليف الأبنودي وتلحين عمار الشريعي.

النتيجة: يقلب جيدا ويشرب علي غيار الريق.


الساعة..!




انا عارفة الساعة مبتكدبش...
لكن انتا بتكدب..
طول الوقت...
انا عارفة الساعة..
خرسا وعميا...
مبكدبهاش...بس انا صدقت...
ان الأيام ملكي وملكك...
والعمر ف ثانية بقي بستان...
وأستني وأقول الهنا جايلي...
والهنا ده...
جايلي امتي...كمان؟
م الصبر تعبت..
انا والساعة
والوقت بيمشي
بلكاعة
وعقاربه بتنهش ف سنيني..
والسنة سودا...
والموت نعسان..
انا عارفة الشمس هتطلع يوم...
لكن امتي؟
ف أقرب فرصة..!
كونك مش عارف ده امتي..
ده ف حد غرامنا..
يكون كارثة...
امتي الساعة تدق الدقة..؟
طب امتي العقرب يتحرك؟
وأطلع ع المسرح..
لو مرة..
وانا قضيت الوقت اتفرج..
وبسرعة ياساعة..
كفاية لكاعة...
علشان أنا اهو..
مليت..و زهقت..
وانا عارفة الساعة..
مبتكدبش...
لكن انتا..
بتكدب طول الوقت..!


 
Reem Essam Cairo , Egypt | copyrighted2011 - Reem Essam