الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

29 ديسمبر 2013

دراويش..!

كلنا مريدين، كلنا دراويش، كلنا بندور حوالين شئ بنحبه وبندوب فيه لدرجة التيه والهيام....

أسرني سحر الموسيقي، والكلام، بقيت أسيرة كل شئ جميل، مقدرش مقولش علي حاجة حلوة انها وحشة، والعكس، صراحتي بتدايق ناس كتير -يولعو- والأهم اني عايشة ف عالمي الجميل، اللي كل شئ فيه جميل.

زمان كان فيه مدرس ليا ف اعدادي بيقولي انتي شبه دراويش الموالد، اللي حاطين سبح حوالين رقابيهم، مكنتش فاهمة ليه، وعمري ما فهمت ليه قد دلوقت، انا فعلا متدروشة، ودايبة ف عشق حاجات كلها مش بإيدي، وكلها بعيد عني وعمري ما هطولها إلا بالموت، والانسلاخ عن جسم باكرهه، وعالم متغربة فيه، والذهاب بخفة إلي أحبابي، اللي بكيت لأني اشتقتلهم من قبل ما أشوفهم.

"صلو علي من بكي شوقا لرؤيتكم" عليه الصلاة والسلام، انا مش متدينة، ولا متطرفة ف حبي، انا عرفت قد ايه الصوفية بيبقو مخلصين في حبهم، وأذكارهم، لما بتحب شئ، وتدوب فيه، وكيانك بيدوب ف كيانه بنشوف فيه اللي مايتشافش، بتشوف عيوبه، وتقبلها، وتشوف ميزاته، وتحبها، وتبقي فكرة ف بحر أفكاره، وتشرب من نوره وحروف كلامه، وتبقي جزء غير محسوس منه، وطرف من أطرافه.

النهاردة كنت بدوب في الموسيقي، باشوف الكلام قدامي متجسد في معاني نورانية، بارقص مع الحروف، باطير معاه، كانت حالتي غريبة النهاردة مع غنوة عمري ما سمعتها كاملة وتسجيل استوديو قبل النهاردة، أو يمكن سمعتها زمان ومركزتش، أو مفهمتش....

كل شئ جميل، جميل، حمادة هلال الجملة دي، معرفش حد فيكو هيقدر يفهمني ولا لأ، الأمر جواني إلي حد كبير، الجمال شئ مطلق، والجمال في عين الرائي مش المرئي، ناس كتير بتشوفني اني انسانة ممتازة، رغم اني ساعات بشوفني فشيخة بس برجع واتدايق مني، لأني اصلا بستفزني.


القصد، كل واحد يدوب ف اللي هو عاوز يدوب فيه، اللي بيحب السكس يدوس، واللي بيحب المزيكا يدوس، واللي شايف متعته ف التنكيد علي غيره يدوس، كل واحد حر، وانتا مش مضطر تمسك بوق وتعلن فيه انك حر، اتصرف انك حر، وفكك م الباقي..!


شونج
10 ديسمبر 2013

عزيزي عميل TEData

عزيزي عميل TEData


هذه نصائح من عدة موظفات سابقات خدمة عملاء شركة TEData ويارب نفهم....

إلي العزيز عميل شركة تي اي داتا، جواب مسجل بعلم الوصول، افعل ولا تفعل..!
1-     ريستارت الراوتر لو اتعمل ست تلاف مرة وانتا ف بيتكو من غير ما تتصل بينا مش هيعملك حاجة..
2-     السبلتر وهو معكوس بيخلي النت يقطع، ولو اتخبط النت هيقطع، ده متشعر اساسا علي سلكتين يعني طبيعي يبوظ بسرعة.
3-     بتقعد كتير علي الانتظار ومستني حد يرد عليك عشان فيه اذكيا تانيين ع الخط، ياريت تستني ومتزهقش وتقفل السكة.
4-     خلص نفسك و وصل م السلك الرئيسي علي سبلتر لأنك لو عندك فيش ف الحيطة مش هتاخد حق ولا باطل.
5-     لما تليفونك يعطل لأي سبب كان غير الفواتير كلمنا واحنا نرجع الحرارة مع النت، متروحش تغمز بتاع السنترال بعشرين جنيه بعد كدة ترجع تعيط وتزعق..!
6-     مينفعش تشترك في خدمة الدي اس إل من غير ما يكون عندك خط، ومتقولش هلغي التليفون عشان مش بستعمله، لو لغيته هتاخد الانترنت في ايه؟ ف كيس؟
7-     متشتركتش ف عرض طلقة، عرض طلقة محدود، وفيه كوتا، ولما بيخلص، بتدفع فلوس تاني.
8-     متشتركش ف عرض طلقة التمانية ميجا وخط حضرتك مبيشيلش غير واحد ميجا بالعافية.


9-     متسمعش كلام بتوع المبيعات والفروع وتشترك ف عرض طلقة، هو بياخد كومشن علي كل راس يا قفا!
10-  متشتركش ف عرض طلقة وترجع تعيط وتقول النت بيشتغل ويفصل ليه.! لو شيلت حمار نص طن حديد هيفضل يتحرك بالعافية لحد ما يتفشخ ف الاخر! ده حال خطك لما تشيله تمانية ميجا.!
11-  متطلبش زيارة لأنها مش هتجيلك إلا لو كنت م الأحرار
12-  متطلبش مدير لما تكلم الدعم الفني، مش هيعملك حاجة وهيثبتك وخلاص.
13-  لو عاوز تشتكي شد علي حاجتين: إما الجهاز القومي لتنظيم الاتصالات، أو جهاز حماية المستهلك، واطلب الرقمين م الدليل.
14-  متكلمش الدعم الفني تسألهم ع الفواتير، هيحولوك للمبيعات
15-  متتكلمش ف الاجازات الرسمية والأعياد تسأل ياتري النت هيتصلح امتي، لأنه مش هيتصلح إلا بعد الأجازة.
16-  متسألش عن التعويض، عمرك ما هتاخد شلن!
17-  متشتركش ف عرض طلقة وتفشخ خطك بعد كدة تسأل عن التعويض!
18-  متطلبش تعمل كونفيجيوريشن للراوتر أو تستذكي وتدوس زورار الريست، هو مش مستخبي ف زخنيق لوحده عشان تدوس عليه زي ما تكون بتفتح نور الحمام وتقفله.
19-  حاول علي قدر الامكان متستخدمش ويندوز باتمان وسوبر مان وكات وومان، ومتعملش الويندوز بالعربي احتياطي.
20-  متشغلش دماغك وتقسم سلكك الرئيسي حتتين عشان توفر حق السبلتر، هنرجعك قفاك يقمر عيش وهتشيل الفرعين.
21-  متقولش انتو حافظين مش فاهمين، ومتقولش انتو بتقبضو مرتباتكو من اشتراكي، احنا مبنقبضش حاجة أصلا!

22-  متدخلش علينا بلقبك الفشيخ، لقبك كمهندس أو دكتور أو سباك آخر شئ يهمنا.
23-  متقولش اسمك الخماسي لما بنسألك عن اسمك، انتا مش داخل السجل المدني يا روح خالتك!
24-  متوصفليش شقتك وتقولي انتا قد ايه بتتعب في المشي ما بين الدور الأولاني والتاني، وتشرحلي ان البوكس بتاع التليفونات ف الجنينة، احنا بنشتغل من مغلق خشب.
25-  السيد المواطن اللي مكسل يشتري تلات متر سلك، فبيلحم سلك ف التاني، بلاش اللحام يابن الناس بيبوظ الدنيا.
26-  العالم المعفنة اللي بتشتري الراوتر الTP-Link بلاش الله يرضي عليكم، ده ابن مرة معتوه..
27-  توصيلات السبلتر انا عارفة انها صح، لكن لازم نسأل عليها عشان الواد اللي بياخد عشرة جنيه ويشد سكينة الكهربا ساعات بيلخبطها، هنتعبك يا حمادة معانا.
28-  اللي عاوز ينقل الخط من رقم لرقم: قدم علي خط جديد أحسن.
29-  العميل اللي عاوز يوقف الخدمة مؤقتا: متدفعش الفاتورة وهي هتقف لوحدها، انتا بتدفع مقدم مش مؤخر.
30-  احنا اوسخ شركة انترنت في مصر، واللي مش عاجبه يروح كندا.
31-  متخرجش من تي اي داتا تروح فودافون: النت هناك ليميتيد وهيفشخوك.
32-  تي اي داتا اربعين في المية منها حكومة: انسي تاخد حقك



33-  تي اي داتا حاجة والمصرية للاتصالات حاجة، واحنا مش قاعدين ف كشك واحد، وشكرا.
34-  متتعبش نفسك وتعمل إلغاء للخدمة: اشترك علي خط تليفون جديد بخمسين جنيه يجيلك تاني يوم وادخل اي شركة تانية.

35-  برنامج السوبر سبورت مش بيعمل اي حاجة، ولا ليه اي لازمة، متستخدموش وريح الجمجمة.


36-  فيه عندك لمبة ف الراوتر اسمها DSL/ADSL/Sync  دي اللي بتعرفنا فيه اشارة واصلة لراوترك ولا لأ، غير كدة لو فضلت ست تلاف سنة متنح في لمبة الوايرلس النت مش هيجيلك..!
37-     لمبة لاين 1، 2،3،4 ممكن ينورو ويطفو عادي هما مش منورين حياتك عشان تقلق عليهم كدة..!
38-     الوايرليس مش بفلوس ولا هينزلك عليه هدايا، ده ببلاش مادام جوة بيتكم.
39-     متتصلش وتقولي انا اللي اتكلمت من شوية، انتا مش متصل بكشك سجاير، وانا بارد علي ميات كل يوم.
40-     متكلمنيش وانتا مش موصل الراوتر وبتشرحلي مشكلتك..! مش هعرف اساعدك وانتا مش موصل محور المشكلة..!
41-     نحن لا ندعم الدش أبو كارت بيفتح الجزيرة وقنوات الشكس، ولا بندعم المزرعة السعيدة لذلك اتفلق انتا وبهايمك!
42-     الرجاء الابتعاد عن انترنت اكسبلورر، انترنت اكسبلورر فيه سم قاتل..!
43-     فيه فرق بين النت قاطع خالص وبيشتغل وبيفصل، وبطئ، فيه فرق والتمييز نعمة والنبي..
44-     رقم الشكوي اللي بنمليهولك متتكلمش عليه، ده عشان تمليه للتعيس اللي هيرد عليك بعدي عشان تريحه م التدوير.
45-  الدعم الفني مش هينزل يكارك لخطك، ولا هيديله زقة، ولا هيديك نمرة تليفون اللي هيعملك الزيارة.
46-  لو راوترك قاطع النفس خالص خده من سكات يابن الناس علي الفرع ومتضيعش وقتنا ووقتك..
47-  لما يبقي عندك مشكلة في السنترال بتاعك ونقولك أقرب وقت يعني ابقي قابلني، وابتهل إلي الله يتحل في ظرف شهر ولا حاجة.

48-  وأخيرا وليس آخرا: متقوليش يا ابلة – متقوليش يا آنسة – متقوليش يا أمورة، يا تنهدني باسمي يا تقولي يا استاذة زي ما بنادي حضرتك.

49- متكلمنيش وانتا مش جنب الراوتر وتتخانق وتتعصب اوي لما نقولك كلمنا من جنب الراوتر! ينفع الدكتور يبقي ف الهرم والمريض ف فانكوفر؟

50- متسبش الدين يابن العرص، الدين ملوش علاقة بأي حاجة....ولا حتي بالانترنت..!

51- ادفع لبتوع السنترال رشوة عشان خطك ميبقاش فيه مشاكل تبوظ النت...

52- ادفع للفني بتاع TEdata رشوة عشان يظبطلك الخط بتاعك من أجهزتنا..

53- لو عاوز تلغي الاشتراك الغيه من غير ما تعصب ابو اللي جابت أمي،انتا مش هتنقص من مرتبي شلن! انا بتحايل عليك عشان مترفدش بس!انما طظ فيك!

54- المهم الجامد اللي بيقولي شغله ع النت: سمعت عن اختراع الUSB؟

55- اللي عاوزة الفني يروحلها عشان يوصل السلك ف الاسبلتر، اتشليتي يا بيضة!

56- الشنتيح اللي حاطط السلك ورا النيش: اتلحلح يا اخويا..

57- سيدات حي النزهة والقطامية هايتس والمعادي:الغجرية ست جيرانها..

58- رجال منشية ناصر: ملعون أبوكو...

59- سيدات ورجال محافظة الاسكندرية الشرفاء: حسبي الله...

60- لو عايز تكسر الفرع روح....بالسلامة يابا مش هقولك لأ...

61- عارفة ان محدش من قسم الفحص عبرك، دوّر علي ميتك تسخن :D





26 ديسمبر 2013

جربت...!

جربت تقولي اهدي...
ما انتي لسه صغيرة...؟
الدنيا ياروحي وحشة..
والناس ولاد مرة..!
فكرت تضم قلبي..
وتعرف ايه السبب....
ولا انتا خلاص سكتت...
وسكوتك له العجب...
ايه بس اللي حصل..
ده عباس اتكسر..
ولموه وركبوه...
ولسه الأحوال خره...
جربت تقولي ابكي...؟
ده الدموع متقدرة...!




خالتي بمبي

هذا البوست هو بوست موسيقي محض، فإن كنت من هواة الموسيقي، اسمع هذه الأغنية.



في البداية مقدمة موسيقية تقتحم عليك خلوتك، وتشعرك بالرهبة الأليفة، ثم الصوت العذب يهتف "بمبي بمبي بمبي بمبي" في سعادة كالأطفال، كشابة لم تخرج من أسر مراهقتها بعد، البمبي هو لون غزل البنات، وهو لون العيد...

هي تهتف" الحياة بقي لونها بمبي، وانا جنبك وانتا جنبي، وانا جنبك، يا حبيبي، يا حبيبي وانتا جنبي" ثم تؤكد لك أنه "بمبي بمبي بمبي" 



مفتتح موسيقي جاذب للانتباه، ثم تأتي هي بكل طفولة لتجذب أذيال ثوبك "شفت شفت شفت، سحر الحب" وينقصها أن تقول لك "يا عمو" تأكيدا علي طفولتها، وتعقب مع الموسيقي "الهنا مزغلل عينيا، مش باشوف غير بمبي بمبي"، الكورس يدخل، وهي تغني معه في تناغم، والكمان الساحر يسيطر علي الموضوع أغلب الوقت، ثم يعقبه الكيبورد الذي كان موضة في وقتها.



الموضوع بالتبادل بين الأورج والجيتار، تعبيرا عن الحوار، ثم تغرد "كنت بهرب، قال واقولك: أه ولأ، خدتني بالقوة ياروحي، ورتني، السعادة" وتضغط علي مخارج حروف "أشكرك يا حبيبي، عندك ألف حق، ده الهوي والعشق، ملناش فيه ارادة" وتنصرف مرة أخري إلي سمفونية البمبي الرائعة، في حوار مع الأورج، لا ينقطع، والكورس يدخل مرة أخري في الحوار.



الطفلة لا تختفي في الأغنية، لكنها تكبر تدريجيا، وتدريجيا تصل لمرحلة النضوج، الموسيقي تعلو، وكأننا قد وصلنا إلي أعلي نقطة في صخب الحب، ثم ينفتح الستار علي أنثي ناضجة "بيت صغنن فوق جزيرة لوحدنا، والعنب طالع، وريحة البحر هالة" العنب، خمر العشاق..."حلم ولا حقيقة، سيان عندنا، المهم نكون سوا، وكله علي الله" هكذا عادت في غمضة عين إلي طفولتها التي فقدتها بإرادتها، لتخطف منه قبلة وتغمض عينيها، لتجد الظلام وقد أصبح بمبي،والحياة وهي بمبي..!


لمن لا يعلم: بمبي غنتها سعاد حسني في فيلم أميرة حبي أنا، وهي من ألحان كمال الطويل وكلمات صلاح جاهين.

10 ديسمبر 2013

زهايمر...



مش فاكر امتي...حقيقي زمان..
انا خدت الحب...ده..بالأحضان...
مش فاكر حتي ان كنت حزين..
مش فاكر...دنا انسان مسكين...
باحلم ان أسكن في البساتين...
وسكنت هناك...
جنب الأموات..!
الناس بتموت...
وتروح لهناك....
وانا ميت عايش....في البهتان
الورد علي الحيطة ومرسوم...
والحزن ما بين كفي الموشوم...
ودهب وياقوت...
مرجان وبيوت....
ودفا، وهيصة، ولمة، وألوان
ورقم تليفون....
انا مش مجنون...
انا باحلم.....
ولوحدي، وونسان....
مش فاكر اسمي....
ولا العنوان....!

10 ديسمبر 2013

09 ديسمبر 2013

رسالة ليه...





وأتمناك...وأتعذب..وأشوفك وانتا ف الصورة..


وبارفع راية جوة البحر...وحتي الراية مكسورة..


منايا لو اعدي الوقت، وأجيلك...لحظة ف الماضي...


لكني خلاص...خلاص صدقت ان الوحدة شئ عادي....


وانا ف الوقت مسجونة...ومحبوسة ف حيطان الشوق..



وانتا ف ماضي..حلم بعيد.....وقلبي وحيد....وعاش مخنوق..
.
بليغ انا نفسي اني أجيك...

أجيك بالموت...أجيك بالقوة...بس أجيك....



أشوفك لحظة...وساعتها....أموت م الفرحة...لحظتها...

بحاول أبقي شخص رقيق....ومش باعرف...



مشاعري بتبقي فياضة....

لكن بتاخدني كالعادة لطريق ناشف...

وكله صخور...

وكله يغور...

وناقصني..أكيد رؤياك...

وبحلم...أبقي لحظة معاك....

وانا البنوتة اللي تعيش...ف أدوار خشنة...محصورة...

وأتمناك..وأتعذب...وأشوفك وانتا ف الصورة..





9 ديسمبر 2013

 
Reem Essam Cairo , Egypt | copyrighted2011 - Reem Essam