الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

14 أكتوبر 2013

نانسي...الخلطة السرية.!

نانسي عجرم

في أحيان كتير ببقي نفسي أرجع بالزمن لورا، وأحضر اللقاء التاريخي اللي تم بين جي جي لامارا ونانسي عجرم لأول مرة، وأعرف اللي دار ف دماغه ساعتها، وليه خد القرار انه يخليها أهم مغنية خفيفة في الوطن العربي...وازاي وصل معاها للنجاح ده كله...

جي جي ونانسي
جي جي لامارا هو وكيل فنانين لبناني، بيشتغل شغلانة مش موجود مسماها ف الوطن العربي لكنها موجودة وهي الAgent  وكيل الفنانين، اللي ممكن تقابل النجم من خلاله، تعمل معاه حوار صحفي، الشغلانة دي تعرف في الوطن العربي باسم "مدير الأعمال".

إلين خلف

لسبب أو لآخر جي جي لامارا قابل نانسي عجرم بعد ما انفصل عن الفنانة "إلين خلف" فنيا، إلين خلف كانت في حالة نشاط فني باهر في أوائل الألفينات وكان عندها من المقومات اللي تخليها فنانة أجمد من نانسي جسديا وصوتيا وشكليا، لكنها انفصلت عن جيجي وبدأت مرحلة انحدارها وبعد كدة دخلت ف طي النسيان.


نانسي قبل النفخ


المهم، جي جي ساعتها تقريبا كان بيدور علي Fresh meat  ينافس بيه، كان بيدور علي نجم جديد، ووقع اختياره علي نانسي عجرم اللي كانت لسه مخلصة طازة برنامج اسمه "نجم المستقبل" وواخدة فيه الميدالية الدهبية وكدة، بس دي طبعا حاجة ملهاش لازمة والميدالية دي ملهاش لازمة لو مشتغلتش علي نفسها بعد كدة والدليل ناس زي: شاهيناز، ايساف، محمد عطية وغيرهم من خريجي برامج المواهب اللي بقت أكتر م الرز ف المحشي.


نانسي عجرم بعد البرنامج ده عملت ألبومين محدش سمع عنهم حاجة هما: محتاجالك، وشيل عيونك عني، طبعا محدش أصلا حط عينه علي أي حاجة م الأغاني دي، ونانسي ساعتها محدش كان يعرفها، لحد ما اتقابلت مع جيجي وعملو مع بعض أول ألبوم اللي هو "ياسلام".

طلت علينا نانسي عجرم سنة 2003 بكليب "اخاصمك اه" بعد ما خضعت لسلسلة من جراحات التجميل تشمل نفخ وشد وتكبير وخلافه، وكان الكليب ده قنبلة أيامها، وكل الناس بقت تمشي ف الشارع تتكلم عن البنت اللبنانية الجديدة اللي عملت كليب اسمه "أخاصمك اه" والكليب كان من اخراج المتميزة "نادين لبكي"
نادين لبكي

وممكن تشوف الكليب من اللينك ده: أخاصمك اه.

ألبوم "ياسلام" اتعاملت فيه نانسي مع أسماء لامعة في  التلحين في مصر ولبنان وعباقرة الشعر منهم: سليم سلامة، مصطفي زكي، عادل عايش، سمير صفير، نزار فرنسيس، طارق مدكور، وكان مليان أغاني مميزة زي: أخاصمك اه، وياسلام وياي. والتلاتة نانسي صورتهم مع نادين لبكي تقريبا وفيه حاجات بردو اتصورت مع كارولين لبكي.

نانسي بعد النفخ

التعارف نجح مع الشعب المصري، والعربي، ونانسي بقت طلقة، بقت بنت حلوة زي القمر، صحيح حسها مش قوي وجهوري، لكن مين قال اننا عايزين وردة تانية أو أم كلثوم تانية؟ الساحة ساحتها كانت مفتقدة أنثي بتتدلع وهي بتغني، صوتها بيرقص، بترقص معاها الناس والموسيقيين وجميلة وغنوجة.

جلابية نانسي ف اه ونص


جلابية نانسي....الناس كلها ف السنة دي "2004" كان شغلها الشاغل تشتري لجهاز بناتها جلابية نانسي عجرم اللي كانت طالعة بيها ف كليب "اه ونص" الأغنية اللي لحنها طارق مدكور، واتعاونت نانسي ف الألبوم ده مع وليد سعد، ووزعلها جون ماري رياشي اغنية فيه. البوم اه ونص كان ألبوم ناجح وثبت أقدام نانسي وعزز موقفها كمزة لبنانية شقية وبقت كل مزة جاية من لبنان بتقلد نانسي عجرم.

نانسي عجرم بردو عززت موقفها من الكليبات مع كليب "انتا ايه" اللي عملته مع نادين لبكي، وكان طلقة، مثلت نانسي فيه بكل حواسها، وعيطتنا معاها.
نانسي مضت عقد ف الوقت مع كوكاكولا وبقت تطلع تقول ف كل كليب "أحححح" والجو ده، وده كان بداية للمشروع التجاري الناجح اللي كانت بتمثله، وبقي ليها ف كل البوم غنوة تعملها دعاية مع كوكاكولا، اللي رفعت من أسهم الشركة ف مصر قبل ما تتجه للتنمية البشرية والدعاية لبلد مش موجودة ف الأصل.


مرت نانسي بحالة صمت فني علي المستوي الانتاجي وحالة انتشار واسعة ف السنتين من 2004 ل2006 وبعدها خرجت علينا بألبوم جديد هو "يا طبطب"، البوم "يا طبطب" عكس حالة نضج فني واضحة عند نانسي، بقت اكثر اتزان ف اختيار اغانيها، وبقت Pickyأكتر بشكل عام حتي علي مستوي الكليبات، بدأت تقلع عباية البنت الجميلة الشقية وده كان واضح ف كليب "ياطبطب" اللي عملت فيه بهلوانة.

اتعاونت نانسي ف ألبوم "يا طبطب" مع نفس الشلة القديمة بتاعة أول وتاني ألبوم، لكن انا باعتبر يا طبطب هو أنجح ألبوماتها علي الاطلاق، هتلاقي نفسك حافظ كل اغانيه زي: يا طبطب، احساس جديد، معجبة، اشتكي منه، اللي كان، يا سي السيد.
نانسي عجرم ف الوقت ده بردو مضت عقد تاني مع شركة "لازوردي" وبقت تعمل دعاية لطقم فرفشة الدهب وبقي اسمه الحركي "طقم نانسي عجرم"، شوف الاعلان اللي ف كليب "اللي كان".

نانسي ف كليب شخبط شخابيط

فتحت نانسي علينا بلاعة أغاني الأطفال اللي كانت اتسدت من زمان، وقدمت لينا سنة 2007 ألبوم "شخبط شخابيط" ودخلت موضة التلات أغاني ف الكليب الواحد عملا بمبدأ "شامبو وبلسم اتنين ف واحد" ومن ساعتها مخلصناش، التجربة كانت غنية، الكليبات كانت مريحة للعين والاغاني ممكن تسمعها لأولادك من غير ما تقلق عليهم نهائيا. اللي قدم التجربة دي مع نانسي كان "وليد سعد" اللي قدملنا الصراحة تشكيلة مميزة م الأغاني، والكليبات كانت فيها رسالة جميلة منها دمج الأطفال المعاقين ما بين الاسوياء، ودي كانت لفتة جميلة جدا من مخرج الكليب: سعيد الماروق.

كليب احساس جديد - اخراج سعيد الماروق

كليبات نانسي عجرم كانت دايما فيها لفتات انسانية، كليب احساس جديد بيصور قصة حب بين البطلة والبطل الأبكم، وكليب "مين ده اللي نسيك" كان تكملة للكليب الأول لما اتجوزو والبطل اتعمله العملية وبقي يتكلم "افلام هندي فشخ"، الموضوع بالتحليل بيعبر عن النضج الفني لنانسي وعبقرية جيجي من الأول.

سنة 2008 أصدرت نانسي ألبوم "بتفكر ف ايه" وكانت الغنوة الهيد بتاعته هارد روك، كان فيها شوية جيتارات حلوة، واغاني حلوة منها: لمسة ايد – مين ده اللي نسيك – سهرني سهر – زمان كان عندي قلب –ماشي حدي.

المخرجة ليلي كنعان

وشهد ألبوم بتفكر ف ايه، تعاون نانسي مع المخرجة المميزة "ليلي كنعان" ف كليب "ماشي حدي" واللي ممكن تشوفه من هنا.

سنتين وصمت فني تاني وطلت علينا نانسي عجرم بألبوم "7" وهو الألبوم السابع فعلا، الالبوم ده كان فيه شوية اغاني لطيفة زي: شيخ الشباب وحكايات الدني. وبعدنها بسنتين "2010" كررت نانسي تجربتها تاني مع اغاني الأطفال بألبوم سوبر نانسي، اللي انا باعتبره استنساخ لتجربتها الأولي وان لم يكن بنفس البريق.

نانسي وحسن الشافعي

علي الصعيد الفني نانسي عجرم بقت من أغلي الفنانات ف الوطن العربي، وأشهرهم، وبتغني من وقت للتاني للشعب المصري، وغنت الCover  العربي بتاع اغنية كاس العالم 2010 بتاع جنوب أفريقيا، وطلعت ف برنامج أوبرا كأشهر مغنية عربية، صوتها بدأ ينضج مع الوقت، وغنت أغنيات تقيلة زي "مستنياك" لعزيزة جلال، وبقت حكم ف برنامج Arab Idol  وحكم ناجح كمان.

باختصار نانسي عجرم هي خلطة ناجحة بتتكون من: صوت رقيق - مغنية جميلة ومدير اعمال ابن حرام..!


وبرغم كل المشوار الطويل ده، هتجنن وأعرف ايه كان ف دماغ جيجي لامارا لما قابل نانسي عجرم أول مرة..!!

نشوات قديمة...

مشهد1
"ليل - داخلي"
"غرفة نوم صغيرة مغلقة"
"موسيقي غير معروفة تدور في المكان"
"فتاة عارية تدور في فناء الغرفة حول نفسها وتسقط علي الارض"
"تسقط الفتاة من شدة الدوران وتزحف في اتجاه كومة بودرة صغيرة ملقاةعلي الأرض وتشمها حتي نهايتها"
"تتكوم الفتاة في ركن من أركان الغرفة والموسيقي مستمرة في الارتفاع"
"نري الفتاة من زاوية رأسية وقد أغلقت عينيها"
"اظلام"



---------------------------------------------------------------------------------


مشهد 2
"نهار - خارجي"
"شارع جامعة الدول العربية"
"نري فتاة محجبة تسير في تؤدة وقد حملت حقيبتها علي كتفها الأيسر"
"الشمس تعاكس عيناي الفتاة التي تداري عينيها بيدها"
"تقف أحد السيارات الفاخرة بجوار الفتاة التي تسير بهدوء"
"يبدو الغضب علي الفتاة وتسرع في خطواتها "
"نري احد النسوة وقد ركبت مسرعة إلي داخل السيارة"
"تنطلق السيارة"
"تقف الفتاة علي بعد خطوات من مكان وقوف السيارة"
"نري الدموع وقد ظهرت علي خدي الفتاة"
"قطع"


---------------------------------------------------------------------------------
مشهد3
"ليل - داخلي"
"غرفة نوم"
"نري فتاة ترتدي نظارة وتكتب شيئا ما علي لابتوب امامها"
"نلمح الدموع في عيني الفتاة التي ماتنفك تكتب علي الجهاز ولا تنظر امامها"
"نسمع الفتاة تحدث نفسها"
الفتاة:
"بصوت مكتوم"
مش هبص ناحيته، مش هبص ناحيته

الفتاة:
"تكتب أمامها"
وحشني أوي.....

"تمد الفتاة يدها لتمسح الدموع عن عينيها"
"نلمح طيفا يدخل من باب الغرفة المغلق ليقف قليلا بجوار جهاز اللابتوب ويلقي نظرة طويلة علي ما كتبته الفتاة"
الفتاة:
"تتجاهل الشبح المار"
"تعاود البكاء"

لازم أعمل نفسي مش شايفاه
لازم أعمل نفسي مش شايفاه

"تنفجر الفتاة في البكاء فجأة وتلقي نظارتها"
"تهرع الفتاة ناحية الطيف الذي جلس في مقعد خلفي وتلقي بنفسها في أحضانه باكية"
"اظلام"





12 أكتوبر 2013

ما فعله جوني ديب!!!

ما فعله جوني ديب بالمعتوهة الصغيرة المسماة ضمنا ب"أنا”!



يقولون أن الدم أثقل من الماء، فهو ما يربطنا.يجمعنا...ويلعننا....انا بارنباس كولينز وقد انفكت لعنتي أخيرا!

انا بتلخبط بعدما بشوف الأفلام الكويسة ودي معروفة...ابطالها بيسيبو فياحاجة انا معرفهاش...بيعلمو فشخصيتي...وولهي بشخصية جوني ديب كممثل مجنون من أيام الهكسوس الناس كلها عارفاه ومحفور ع الحيطان!



فيلم دارك شادوز قصته مهروسة ف هبروميت حاجةقبل كدة....بس الفيلم حالة جديدة ومختلفة..انا عن نفسي اديه تمانية ونص من عشرة...اديه حاجات كتير أوي...ووممكن أدي جوني ديب عمري فوق البيعة بالمرة..ماهي زاطت بقي...

جوني ديب بدأ يحفر جوايا من أيام فيلم ادوارد سيسورهاندز، الفيلم ده لما شفته وخلص فضلت اعيط اعيط اعيط...كان محزنة الحقيقة...مؤثر جدا...انا طول عمري احب افلام الخيال ام نهاية حزينة....بتخنق م النهايات السعيدة اصلا...



امبارح لما شفت سويني تود اتدايقت يمكن عشان الدم الكتيراللي فيه، أو يمكن لعنف شخصية الأبطال...أو يمكن للبوكر فيس اللي بينجامن باركر ضاربه طول الفيلم...أحيانا تعاطفت للحظة مع القاضي توربين معرفش ليه..حسيت فيه بضعف انساني باكرهه وباحس جوايا بشفقه لأي حد بيحس بيه، بس باركر اتفشخ كتير وكان لازم ينتقم...بس م المجتمع كله...لأ...


يجوز باركر جواه دوافع غيط وغل تخليه يقتل ناس كتير اوي زي كدة لدرجة انه بقي أعمي وقتل مراته ف النص من غير ما يعرف انها حتي مراته،يعني ميتين ام دي غشومية الصراحة وف الاخر بيسيب نفسه لعقاب ربنا وعدله وبيقدم رقبته لتوبي عشان يحلقها هو راخر...



الفيلم ميوزيكال هايل ووممتاز ومتعوب عليه بس انا اتدايقت عشان منظرالدم تقريبا..أو لجو الكآبة العام فيه..أو لأنه كان أقل روعة من دارك شادوز ، عشان كدة جالي احباط داخلي واستبحس نفساوي علي رأي عادل امام.

انا باحب الميوزيكالز من زمان من أيام فيللم شيكاجو...كان وهم...كان سحر....عمري ما استنضفت فيلم زيه ما استنضفته وحبيته وحفظته...! تصورو واحدة حافظة اغاني فيلم بالكامل...بس ده عادي احنا حافظين اغاني حليم المحشورة ف اي فيلم ليه جت علي الأفلام الموسيقية يعني؟

المهم سلام دلوقت..انا هافف عليها اشوف سيتي لايتس بتاع تشارلي تشابلن..وحشني الساكت ابن الساكتة....سلامات!


شونج
16 مارس 2013

07 أكتوبر 2013

ميرفت ومي !



احساس ميرفت أمين وهي بنت تمناشر سنة وعبد الحليم هاريها بوس وغنالها نص اغاني فيلم ابي فوق الشجرة، هو نفس احساس مي عز الدين لما واحد ابن حرام خلاها تمثل قدام محمد فؤاد وباض علي ميتين اللي جابونا ببياضها الشاهق ده....



الاتنين وقفو قدام مطربين عاطفيين والاتنين كانو أول مرة يمثلو بس واحدة "ميرفت" كانت بتعرف تمثل بجد والتانية "مي" بتطلع بضوافرها وعينيها وبياضها عشان تلهينا عن موهبتها البضينة.

ميرفت أمين اتباست من أهم ممثلين ف مصر: حليم، حسين فهمي، عادل امام، نور الشريف، رشدي أباظة، وغيرهم، كانت حاجة ألاجة الحقيقة، بس ميرفت أمين قدمتلنا افلام كتير مهمة ف تاريخ مصر نفتكر منها: زوجة رجل مهم، الأراجوز، حافية علي جسر من الذهب، أيام السادات... مش هنعد.



مي عز الدين متباستش اطلاقا من اي حد، مش تقصير منها لأ، ده لأن موضة السينما النظيفة كانت وصلت علي بال ما مي طلعت، وبعدين هي كانت بيضة أوي فالناس خافت لا يكون عندها مرض ولا حاجة، بس هي كانت طفشت م الموضوع ده وصرحت بيه ف فيلم اللمبي 8 جيجا لما صرخت ف محمد سعد وقالتله "هتباس انا ولا مش هتباس ف الليلة السودا دي" وقد كان.


ميرفت أمين اللي اكتشفها حسين كمال، ومثلت مع مطرب مصر الأول "عبد الحليم حافظ" قامت بدور بنت بريئة بيحبها حليم، وعاوز يعيش معاها تجربة ويتكلم معاها ويتفاهم لكن هي بتسمع كلام امها وخايفة دايما منه، هي أدت الدور ببراعة ومثلت علي الرغم من تواضع قدراتها ساعتها بشكل موفق إلي حد كبير، مثلت بعينيها وايديها، وضحكتها.


مي عز الدين اللي اكتشفها واحد كدة "الله لا يوفقه" ومثلت في فيلم "رحلة حب" مع دبدوب مصر الأول الفنان "محمد فؤاد" وهو فيلم كليشيه من أيام أفلام عبد الغني السيد وعبد العزيز محمود وبعديهم فريد الاطرش، قامت بدور بنت غنية فشخ بيجري وراها ابن عمها "احمد سعيد عبد الغني" –هو كدة لازم تقول اسمه ثلاثي- وابوها جميل راتب، البنت دي بشكل او بآخر بتحب المطرب الغلبان "فؤاد" وفؤاد بقي بيتأذي بسببها، بعد كدة بيلتقو ف المطار في مشهد شبيه بمشهد نهاية فيلم "يوم من عمري" مي في الفيلم ده أثبتت بشكل قاطع انها مبتعرفش تمثل، وان اخرها ف التمثيل شوية الميكب والدموع وانتهينا، يعني جابت أخرها م الأول.



ميرفت أمين قامت ببطولة أفلام تعد من أهم الأفلام اللي تم انتاجها في السينما المصرية، وقامت بردو بشوية أفلام الظاهر اتصورو وهي بتستحمي، -ما علينا- الأفلام زي: زوجة رجل مهم، حافية علي جسر من الذهب، الأراجوز، الدنيا علي جناح يمامة، الاخوة الأعداء.
وانا باعتبر ميرفت أمين من أعظم ممثلات مصر، ومتكرمتش كفاية لحد دلوقت.

مي عز الدين قامت ببطولة مجموعة من أفشل الأفلام ان لم يكن أفشلهم وعلي سبيل المثال وليس الحصر: كلم ماما، عمر وسلمي 1، عمر وسلمي 2، عمر وسلمي 3، أيظن، شيكامارا، جيم أوفر، حبيبي نائما، كيمو وأنتيمو. ومي بتعتبر من أجمل ممثلات مصر حاليا، وأقلهم موهبة.


ميرفت أمين كان ليها حظ في الأفلام الكوميدية وقامت ببطولة فيلم "واحدة بواحدة" مع عادل امام – بتاع الفنكوش- وتعتبر من أخف الممثلات دما ممن عملن مع عادل امام، واشتغلت معاه فيلم تاني "مرجان أحمد مرجان" اللي كان ليها تابلوه الواوا، اللي كسر الدنيا!



مي عز الدين طلعت مع طمبورة نجم الجير في الترينيتي المقدسة بتاعته "عمر وسلمي" كانت مصدر ازعاج للعديد من المشاهدين والحقيقة بعد ما تشوف التلات أفلام هتفهم ليه عمر طفشان طول الوقت م البيت، لأن سلمي شخصية أصلا لا تطاق، وبرغم ان الثلاثية من المفترض انها تكون كوميدية رغم تهلهلها الدرامي –مين قال الكوميديا لازم تكون متستفة- لكن مي كانت حجر عثرة فيها، وللأسف هي لا تمتلك الحس الكوميدي ليها.


بقي لينا نعرف ان ميرفت أمين اتجوزت سبع مرات أولهم من مطرب سوري اسمه "موفق بهجت" وأخرهم من رجل اعمال اسمه "مصطفي البليدي" وان بنتها الوحيدة تبقي بنت "حسين فهمي" اللي كان بيحبها فعلا وطلق ام ولاده علشانها وان بنتهم "منه" متجوزه من الكائن اللزج المسمي ب "شريف رمزي"  -ابن محمد حسن رمزي-.



مي عز الدين لا تزال آنسة، اتخطبت مرة ل"محمد زيدان" لاعب الكرة المشهور لكن الموضوع مكملش ويبدو انها كانت رامية رمش علي عمو تامر لكن تامر عمل معاها السليمة وجري اتجوز عيلة كدة وخلاها اعتزلت الغنا، وبس خلاص!

05 أكتوبر 2013

الدنيا برد...

الدنيا برد

والقلب سرحان...

ف الحياة....

والحزن جايب منتهاه..

واليأس يشهق..

قاله: ياه..!

للدرجة دي

قلب انكسر..؟

ودموع مطر؟

انا ليه أروح

وأغرق هناك...

نده الألم...

خدني معاك...

مقدرش افضل

مش كتير....

انا بردو

 مش هبقي الأخير

شبك ايديهم

حزن راح...

فاقت جراح..

صحيت وزاد

فيا النواح..

وبكيت شوية

ونمت تاني..

والحزن فات...

مرت ثواني...

ولوحدي باضحك

مش لحد...

علشان خلاص...


الدنيا برد..!

خمسة أكتوبر 13.

 
Reem Essam Cairo , Egypt | copyrighted2011 - Reem Essam