الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

27 أغسطس 2013

ولعلمك بقي...

انا مش موجود..
انا كيس شفاف...
ولعلمك بقي:
بطلت أخاف..
ولعلمي الخاص..
انا قلمي رصاص...
وسجايري رخيصة..
وفرط كمان...
انا مش موجود..
بس انا مفروض..
افضل موجود
ف عيون الناس..
الكون ترباس..
مفتاحه الموت...
وانا هايم سرحان
ف الملكوت..
والجسم بيخبط ف الكبوت..
نضارتي تطير...
وباروح وخلاص...
ناول استيكة...
انا قلبي رصاص..

24 أغسطس 2013

مديوكر...


انتا شخص مديوكر، متوسط....متوسط الطول، متوسط العمر، متوسط الوزن،و اللون والبشرة....

في كليتك مكنتش بتجيب مقبول، ومكنتش بتجيب جيد جدا....دخلت قسم متوسط عشان الأقسام التانية صعبة عليك....

اتخرجت بتقدير متوسط، اشتغلت ف مكان متوسط....وخدت مرتب متوسط...وحلمت بأبسط الأحلام...المتوسطة.....

لما بتسمع اوكا واورتيجا بتحس بهبوط..ولما بتسمع بيتهوفن بتحس بالغباء...ولما بتسمع أم كلثوم بتنبسط.....

بتحب الفضايح الفنية عشان تثبت لنفسك ان الشهرة والفلوس وحشين، وبتشوف مسلسلات "غادة عبد الرازق" عشان رجليها حلوة...
ومبتتدخرش وسعا انك تشتم "نجلاء بدر" كل فترة والتانية، عشان تثبت لنفسك ان الستات الحلوين دايما شراميط وشمال....

بتشوف برنامج "رامز جلال" عشان تشبع السادية اللي جواك، لما بتشوفه بيعمل مقالب وخوازيق ف زمايله، عشان يعمل فيهم اللي انتا مش قادر تعمله فيهم، ونفس الفنان اللي بتضحك عليه وهو بيصرخ لو شفته ف الشارع هتحضنه وتبوسه وتتصور معاه...

بتحط صور الفريق السيسي علي فيسبوك، وبتشتم ف حكم العسكر ف تويتر، ولو لقيت مظاهرة موقفة الشارع بتسبلهم الدين عادي جدا...

وانتا ف الاوتوبيس بتحاول تهرب م الكومساري، وبترمي شنط زبالة شقتك ف الشارع، وعيالك بيروحو مدارس حكومةلا ادمية، وانتا بتضربهم عشان بيجيبو درجات وحشة..المدرسين بيحطوهالهم عشان "ياخدو دروس"...

مشغل القرآن طول اليوم لكن لا بتسمعه ولا بتعمل بيه، وبتحلف بالطلاق ع الفاضية والمليانة، وبتكدب بكل أريحية...

انتا مديوكر..اتحكم عليك تكون مديوكر طول عمرك..لا ليك عم من البرازيل هتورثه فجأة، ولا اتولدت ف جاردن سيتي....
هتعيش وتموت متوسط...وأحلامك كلها...مقاسها....صغير.....

هلوسة...

محبوس بكلمة سر

انا والليالي السود

وحليم يغني ياليل

ويقول كمان..موعود..

والحظر ساعة مسا...

والدنيا عكاكة

ايه يعني شم الفسا..؟

وانتا البعيد: كاكا...!

وبكل كل القرف...

مكتوب عليا الخرف...

والهلوسة مدرسة...

والضحك فيها عمود...

محبوس بكلمة قضا...

انا والعيون السود....

24 أغسطس 2013

22 أغسطس 2013

تيليفيظيون....

مبارك خرج، والاخوان ف السجن والجيش راكب البلد...رجعنا سنين كتير ورا...
وبما اننا رجعنا لورا، قبل ما نجيب دش ف البيت...ف شركات انتاج الشونج السينيمائية بتقدملكو حصريا برنامج التليفزيون المصري لسنة ألفين وحاجة، والأفلام اللي هتتعرض عليه..والبرامج...

نبدأ من أول السنة:
31 ديسمبر:
 فيلم ليلة ساخنة "نور الشريف ولبلبة بيتفشخو من كل الناس، بس بياخدو شوال الفلوس ف الاخر"

6 يناير:
 قداس عيد الميلاد من الكاتدرائية المرقسية في العباسية – فيلم رحلة العائلة المقدسة "هاني رمزي عامل يوسف النجار".

7 يناير:
 فيلم شفيقة القبطية علي القناة الأولي  - فيلم الراهبة علي القناة التانية "ياشراميط يا انجاس".

25 يناير:
 نقل حي لخطاب السيد الرئيس بمناسبة عيد الشرطة من قاعة المؤتمرات – فيلم حياة أو موت "الدواء فيه سم قاتل"

المولد النبوي:
 نقل حي لخطاب السيد الرئيس وتكريم حافظي القرآن من الشيخ محمد سيد طنطاوي شيخ الأزهر -  فيلم فجر الاسلام "شلت يداي، انها سليمة" - فيلم الشيماء "رويدكم رويدكم"

عيد تحرير سينا:
خطاب السيد الرئيس بمناسبة عيد تحرير سيناء – فيلم العمر لحظة – فيلم الرصاصة لا تزال في جيبي "الرصاصة بتعمل ايه ف جيبك؟"

عيد العمال:
 سهرة خاصة مع فيلم الأيدي الناعمة "وانا اصلي باحب الدوامة..الدوااااامة - خونة"

عيد شم النسيم:
 فيلم أميرة حبي انا "قفّل قفّل قفّل قفّل"

4 مايو "عيد ميلاد حسني مبارك":
 سهرتنا مع فيلم "الناصر صلاح الدين" (ولكنكم تحرقون أغصان الزيتون)

عيد ثورة يوليو:
 رد قلبي "ابن الجنايني بقي ظابط يا انجي"

رمضان:
 مسلسلات قطاع الانتاج تأليف محسن زايد وأسامة أنور عكاشة واخراج يحيي العلمي وأحمد صقر "ياروايح الزمن الجميل،هفهفي"

عيد الفطر:
 نقل لصلاة العيد من مسجد القوات المسلحة في شرم الشيخ - فيلم صعيدي رايح جاي "انتا واكل قطر ف السجق"

5 يونيو"ذكري النكسة":
 فيلم أغنيةعلي الممر "أبكي، أنزف، أمووووت" - فيلم الطريق إلي ايلات "ياريتني كنت معاهم"

15 أغسطس "عيد وفاء النيل":
 فيلم عروس النيل "عودي يا هاميس"

وقفة عيد الأضحي:
 فيلم ظهور الاسلام "أحد أحد" – فجر الاسلام "أصبئت يا حنظلة؟" – هجرة الرسول "فارس، حبيبة"

عيد الأضحي:
نقل حي لصلاة العيد من مسجد آل رشدان – فيلم صعيدي ف الجامعة الأمريكية "الأوبرا احساس يا خلف"

6 أكتوبر "عيد النصر":
فيلم الرصاصة لا تزال ف جيبي "تاني :\" – فيلم العمر لحظة "عشان مصر تعيش، اغلي الناس بتموت" - فيلم حتي آخر العمر - فيلم الوفاء العظيم

أول السنة الهجرية:
 نقل احتفالات رئاسة الجمهورية بالسنة الهجرية الجديدة وتكريم حافظي القرآن – فيلم هجرة الرسول وفجر الاسلام.

عيد القيامة:
 نقل قداس عيد القيامة الإلهي من الكاتدرائية المرقسية في العباسية "اخراج عادل بريقع" – فيلم شفيقة القبطية والراهبة "تاني :/"


أما عن البرنامج الأسبوعي فهو كالتالي: 
كل يوم سبت: برنامج نادي السينما "متناديها انتا" مع د. درية شرف الدين
كل يوم حد:  برنامج تاكسي السهرة تقديم "نهال كمال"
كل يوم اتنين: برنامج هذا المساء مع سمير صبري "لا تعليق"
كل يوم تلات: بانوراما فرنسية مع مرفت فراج
كل يوم أربع: برنامج اخترنا لك تقديم فريال صالح "أعظم عظمات الستات
كل يوم خميس: حفلات "ليالي التليفزيون" الليلة الهربنتين بالتبادل مع حفلات "ليالي أضواء المدينة" – برنامج أوسكار مع سناء منصور
كل يوم جمعة: صلاة الجمعة وبرنامج عالم الحيوان مع محمود سلطان

بس، أراكم أمس..
الشونج







13 أغسطس 2013

هذا الطفل من المريخ



هذا الطفل من المريخ، حذاري من الاقتراب منه، وان اقتربت...ممنوع التصوير..!
كان رامي طفلا عاديا، ككل الأطفال في سنه، يرتاد المدرسة يوميا، يلعب حتي يسقط من التعب، ويلطخ يديه في كل بقعة تنظفها أمه، وتضربه أمه كلما أعدمت فيه الحيلة...لكن تلك الليلة قد أحالته مختلفا...

رامي في التاسعة من عمره، متوسط القامة بين الأطفال ذوي الطول الفارع ونقيضهم الأقزام، لا يضرب ولا يميل للعنف بأية حال من الأحوال، يشاهد قنوات الرسوم المتحركة بمواعيد ثابتة، ولا يستمع إلا ما تسمعه أمه إياه من أغان، لكن ذلك اليوم، اصطحبه خاله إلي دار السينما، حيث شاهدا سويا فيلما عن الفضائيين وغزوهم للأرض.

الفيلم كان من بطولة أحد الأطفال، الذي يصبح ملك الكوكب في نهاية الأمر، ولسوء الطالع هذا الطفل يشبه رامي كثيرا، التزم رامي الصمت بعد خروجه من دار السينما، وخلد للنوم باكرا وبدون جهد يذكر علي عكس بقية الأيام، وفي اليوم التالي بدأت المشكلة.

استيقظ رامي من نومه طالبا فطورا بالأشعة الفوتونية،وعندما حاولت أمه اقناعه أنها لا فرن للأشعة الفوتونية لديها، رفض تناول الافطار، وبدأ يتحدث كلهجةأبطال الفيلم، ويتعامل بتعال مع أبيه وأمه، وحتي خاله الذي اصطحبه لدار السينما.

كان يتصرف كالملك الطفل، بل أن الفكرة استحوذت عليه تماما وأصبح يحمل معه مسدساته اللعبة ويتعامل معها كأنها مسدسات ليزر حقيقية، ويتظاهر بالموت بعد أن ضربه أحد زملاءه في النادي أثناء لعبهما، تظاهر رامي بالموت لستة ساعات كاملة رقد فيهما دون حراك ودون أن يرمش له جفن، حتي ظنت أمه أنه قد توفي فعلا!

وبما أن رامي يعامل نفسه كملك، فقد علق اللعب حول مقعد مكتبه الصغير، وصار يختبئ من الأعداء في دولابه الصغير، وأحيانا في حوض الاستحمام، وخلف الغسالة الكهربائية.

عانت والدة رامي كثيرا منه، بل وشاركته اللعب في كثير من الأوقات حتي يتسني لها اطعامه وتنظيفه، ويوما ما اهتدت لفكرة ستخلصها للأبد من الفضائيين، أن تصطحبه مرة أخري لدار السينما ليشاهدا فيلما عاديا عن أطفال عاديين، فإذا ما شاهدها رامي عاد إلي صوابه وأنكر حقيقته الفضائية.

لكن الفيلم الذي دخلت والدة رامي لتشاهده في دور العرض هو فيلم "حياة نحلة"....لذا....امتلأ رامي برغبة الطيران...!


عشرة أغسطس 2013

11 أغسطس 2013

ثلاثي أضواء السينما..!

الثلاثي....
هشام ماجد، أحمد فهمي، شيكو...
بالترتيب من الشمال: شيكو - هشام ماجد - أحمد فهمي


من أول خط ف السطر، الناس دي هي كوميديانات جيلنا بلا منازع، هنيدي فاكر نفسه عشرين سنة، محمد سعد فشخنا باللمبي، عادل امام بيمثل من أيام الهكسوس، لكن دول...شكل تاني...

الحقيقة مش عارفة أبدأ منين ولا منين، بس ممكن أبدأ من بدايتهم: رجال لا تعرف المستحيل..

من تتر رجال لا تعرف المستحيل


فيلم رجال لا تعرف المستحيل اتعمل سنة 2001، من قبل ما الانترنت ينتشر في مصر، متصور تقريبا بهاندي كام، حاجة كدة ضايعة، مدته حوالي ساعة وربع أو ساعة ونص، وكله شقلبة من الأول للآخر..



الفيلم هو محاكاة ساخرة لفيلم الطريق إلي ايلات، حيث بيتم تجميع فريق لتدمير مبني الموساد الاسرائيلي في تل أبيب، لكن الأمر بينتهي بتدمير مبني السفارة المصرية في البلد نفسه، هشام ماجد وأحمد فهمي بيقومو بدور ظباط المخابرات المصرية، بينما شيكو بيقوم بدور الرئيس بتاعهم، مع بعض الوجوه اللي مشفناهاش تاني، وظهور لراندا البحيري وكانت صغيرة جدا في الفيلم ده.
من فيلم "رجال لا تعرف المستحيل"

الفيلم ده علي حد ما سمعت انه فشخ الدنيا ساعتها علي شرايط فيديو، لأنه كان وسيلة الترفيه الوحيدة أياميها، واللي كان عنده فيديو كان برنس –انا كنت منهم- وبعد كدة لقي طريقه علي الانترنت بعد انتشاره في البيوت المصرية.

بداية وزي ما بيتكتب: هشام ماجد وأحمد فهمي هما اللي بيكتبو السكربتات، وأساميهم دايما بتتكتب علي التترات، إلا اني ممكن أقول وضميري مستريح أن شيكو كمان بيشترك ف الحوار معاهم، بس مبيقولوش ع النت ;)

زي ما قريت، الثلاثي أصدقاء من الطفولة، كل واحد فيهم دخل كلية ملهاش اي تسعين دعوة بالسينما،لكن مين قال ان الدراسة ليها دعوة بالحب والهواية؟ الدراسة حمادة والهواية حمادة تاني خالص J

كرد فعل طبيعي للهواية اللي فايعة ومفيش حاجة بتردها، الثلاثي اتلمو علي منتج دماغه ضاربة، وهو كمان اصلا بيشتغل مهندس معادن المنتج ده هومحمد حفظي، وعملو أول فيلم سينيمائي ليهم هو: ورقة شفرة....

أفيش ورقة شفرة














ورقة شفرة اتعمل ف حدود سنة 2007 تقريبا، وحقق أصداء طيبة، وكان مضحك جدا بردو...

المثير للجدل اني معرفتش أحفظ أسامي الثلاثي إلا بعد معاناة جهيدة، وكنت بتلخبط ما بينهم، وباقول علي فههمي شيكو وباقول علي هشام فهمي، وحاجة بالبلا، لحد ما استقريت ان الأبيضاني الحليوة ده هشام ماجد، والأسمراني العسل ده أحمد فهمي، والمتختخ الي يجنن ده شيكو :D

طبعا الموضوع ده حصل بعد حوالي سنتين من اللخبطة والهبل والذي منه، القصد، في نفس الحدود دي أو قبليها، سنة 2006 كان فيه برنامج بارودي اتعرض علي قناة النيل للمنوعات اسمه "أفيش وتشبيه" البرنامج ده من أفشخ الحاجات اللي ممكن تشوفها ف حياتك.
من تتر "أفيش وتشبيه"













أفيش وتشبيه بيعتمد علي المحاكاة الساخرة للأفلام المصرية المشهورة، زي رد قلبي، وتيتو، واصحاب ولا بيزنس، وغيرها، وكلها كانت حاجات فقر، بان فيها جزء كبير من افكار الثلاثي الطاقة والمجنونة، واللي ظهرت بعد كدة ف فيلم زي "سمير وشهير وبهير" لما كان بهير بيصطاد فلاحين، دي اصلا كانت حتة من حلقة "تيتو" لما كان شيكو اللي قايم بدور الظابط بيصطاد فلاحين وبيفطر بيهم :D

محاكاة الثلاثي الساخرة للأفلام من غير ابتذال تخليك تفتكر افيهاتهم عليها، واعتمادهم علي الكومديا والألفاظ اللي تحتمل معنيين، والسخرية من الواقع دي بتميزهم بشكل كبير.

بوستر "سمير وشهير وبهير"

بعد كدة طلع فيلم "سمير وشهير وبهير" الفيلم اللي لزق ف اساميهم وخلي كل الناس تعرفهم بالتلات أسامي دول، الفيلم مقتبس من فكرة فيلم "Back to the future " وشخصية مارتي ماكفلاي، بس متمصرة بمعلمة، وحرفية، والفيلم لحد دلوقت انا باعتبره قمة الأفلام الكوميدية في سنته.

بوستر "بنات العم"

"بنات العم" اتعمل بعد كدة واللي بين جزء طريف جدا من الكوميديا، كل الرجالة بيتحولو لستات في الأفلام، طب ايه اللي هيحصل لما ست تتحول لراجل؟اللي ممكن تتخيله ظهر في الفيلم بالظبط، اللي مليان باللقطات المضحكة اللي بتعتمد علي تقمص الثلاثي لشخصيات البنات اللي اتحولو منهم، خصوصا فهمي، اللي كانت شخصيته رقاصة.



بنات العم ده كان آخرفيلم ليهم في السينما، وفيه فيلم تاني ليهم اسمه "الحرب العالمية التالتة"، واتوقع انه هينزل ع العيد اللي جاي أو أجازة نص السنة بالكتير ومعرفش تفاصيل كتير عنه.

بوستر ل"الرجل العناب"



نيجي بقي لمسلسل "الرجل العناب" مسلسل الرجل العناب اتعرض ف رمضان ده، المسلسل ده كنت بقرا عنه أخبار من سنتين انه كان مشروع فيلم، بس بعد كدة دخل ف تأجيلات ومرة تانية ظهر للنور علي انه مسلسل، تلاتين حلقة من أفشخ الحلقات، شخصيات كاريكاترية بامتياز، وتنميط مختلف عن باقي التنميطات، الظابط اللي بنشوفه رفيع طلع تخين فشخ، والعالم كيوت وقمور، والسوبر هيرو سرسجي ومتخلف.

النقيب تيسير فهمي - متدخلنيش ف تفاصيل يا مدحت








الرجل العناب رغم فقره انتاجيا وبصريا من ناحية الصورة وعرضه علي قناة واحدة، إلا انه حقق معدلات مشاهدة مرتفعة، وف وجهة نظري كان أحسن مسلسل كوميدي، وأحسن من الكبير بتاع أحمد مكي مليون مرة، وكان فيه ابداع واسقاطات جميلة، وشوية كوميديا محصلوش، وبعيد تماما عن الابتذال.

تتميز كوميديا الثلاثي باعتمادها علي تلات حاجات: الافيهات الميتة، وهي القاء الافيهات بدون اي تغيير في تعبيرات الوش، تضمينها في الحوار كأي جملة عادية ،  عدم الاعتماد علي العنصر النسائي إلا بشكل ثانوي –الأمر اختلف في المسلسل "ناتاشا"- ، الألش
هشام ماجد وأحمد فهمي كسيناريستات بقي، كتبو الأفلام التالية: ورقة شفرةبنات العم بوشكاشكدة رضا بيبو وبشير -  اتش دبور...

من العرض الخاص لفيلم "بنات العم"


جايز تختلف أو تتفق مع الثلاثي، وجايز انتا شايف دمهم تقيل أو مبتذلين، بس منقدرش ننكر انهم من أنجح الفنانين الكوميديين في جيلهم، ومنقدرش ننكر الكيميا الفشيخة اللي بينهم، وعن نفسي، انا متوقعش انهم ينفصلو لأنهم بيشتغلو ببال رايق ومش للتجارة، شغلهم بيتعمل بمزاج الهواة لحد دلوقت، ودي حاجة تحسب ليهم مش عليهم.

وفي النهاية باختم مقالتي بكلمة واحدة "ضربت الودع ملقتش ثاحب جدع"

أراكم أمس، 
الشونج

 
Reem Essam Cairo , Egypt | copyrighted2011 - Reem Essam