الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

17 يونيو 2013

حبات المزيكا...

الأغاني الجميلة زي القهوة المظبوطة، لو سمعت اغاني كويسة دماغك هتتظبط...لو سمعت اي حاجة هيجيلك صداع...


انا جايباك هنا ليه؟ جايباك عشان حاجات كتير....عشان اكلمك عن بليغ حمدي وعبد الوهاب ومحمد الموجي وكمال الطويل ...

عن وليد سعد ومحمد ضيا ومحمد يحيي....عن ناس كتير فشخ بيعملو حاجات حلوة فشخ.....عن اغاني جميلة فشخ ومزيكا أفشخ....

زمان عايبت علي واحدة صاحبتي مبتسمعش غير اغاني من التمانينات، كانت محبوسة في الفترة دي مبتخرجش منها، يشاء السميع العليم يا مؤمن اني اتحبس ما بين الستينات والسبعينيات، ف فترة مليانة بلاوي زي ام كلثوم، ووردة، وفايزة، وشادية، ونجاة ونجاح سلام وحليم وناس فشيخة....

بس المعايبة جابت نتيجة عكسية مدايقتنيش...انا "حبيتش الموضوع اوي" ولسه مكملة صراع الحضارات اللي ف دماغي ده...


عبد الوهاب وهو بيغني "هان الود"
مزيكا عبد الوهاب ناشفة، مارشات عسكرية وقرآن، توظيف ممتاز للآلات في محلها وكأنها زي ميزان الدهب، موزونة بالمللي، المزيكا تاخدك تتولك كدة ف حالة مع الأغنية....مين فينا محبش أغنية "انتا عمري" ؟
اسمع لعبد الوهاب:كل ده كان ليه



بليغ حمدي مع عبد الرحيم منصور

مزيكا بليغ حمدي احساس...توحد...وبصمة واحدة فكل الأغاني تقريبا، معرفش تبان لكل الناس ولا لأ، بس بليغ بيتعرف من الطبلة ف اغانيه...انا بعرف الأغاني بتاعته م الطبلة والكورَس...



الموجي وهو بيعزف ف صالون بيتهم :))

الموجي بقي....ياديني....عشان تاخد فكرة وافية عن الموجي ، الموجي ده محتاج كتب تتكتب علي ألحانه....وروعتها...الموجي يعني بالنسبة لي وتريات.....
بي اس: الموجي ملحن رسالة من تحت الماء وقارئة الفنجان لحليم 
      اسمع للموجي غنوتين "اسأل روحك – ام كلثوم" و "أكدب عليك - وردة"



كمال الطويل وزهرية ورد

كمال الطويل...ألحان فشيخة من بابها كدة....كفاية أغنية زي "ليه خلتني أحبك" بتاعة ليلي مراد، عبد الوهاب كان بيلطش منه حاجات، موسيقار ثورة يوليو بحق.

ده كان القديم يا برنس، تعالو بقي ندوس ف الجديد...لكن ف بوست جديد :)

09 يونيو 2013

ترابيزة ودومنة....

يوما ما، دخل علي شقيقي الصغير في لحظة من لحظات الطرب النادرة، وانا أردد أغنية شعبية تقول "هاتلنا ترابيزة ودومنة، واللعب ع المشاريب، وهاتله هو حلبة، وهاتلي شاي بحليب"، نظر لي نظرة ذات معني، ثم قال لي "جبتي الأغنية دي منين؟"
ضحكت ببلاهة واستكملت الغناء....

أنا أصاب بالطرب أيا كان نوع الأغنية، هكذا أنا، حكيم يطربني، مغني شعبي مجهول يطربني، عبد الباسط عبد الصمد وعبد الباسط حمودة يطربانني علي التوازي، كل شئ جميل في هذا الكون يطربني....حتي في الرجال، انا لا أخجل من التعبير عن اعجابي بهذا أو ذاك، كل الجمال هذا يجب أن يطري....

أكثر ما تكره عيني هو القبح، القبح هو الشئ الوحيد الذي يشعرني بالغباء، لا أعلم لماذا، وانا أكتفي بهذا القدر من الفصحي....

شفت من كام يوم فيديو لأحمد التباع بتاع "أهبة" راجل زي العسل، عامل زي الطور، دمه خفيف بشكل، عدت الفيديو ست مرات وكل مرة أضحك ضحك السنين، شوفوه انتو كمان معايا: 


دم أهله خفيف ابن الكلب، المهم يعني ان التدوينة دي ملهاش أول من آخر، وبتتكتب علي أنغام أغنية شعبي أخري هي دي:

اسمعوه بقي....أشوفكو....

شونج..

 
Reem Essam Cairo , Egypt | copyrighted2011 - Reem Essam