فانتاستيك طور..!!


جلست و انا أذاكر...مش فاهمة حاجة طبعا....أعمل ايه..أعمل ايه....قلت أستنجد بكل الأبطال الخارقين اللي أعرفهم ف حياتي
رحت ندهت عليهم الشهادة لله محدش كدب خبر....
"أصوات تحطم و تكسير أشياء"
زا هلك: أنا جيت..عشان أساعدك أقدر أعمل ايه يا ريم...
ريم:و النبي اتكوم علي جنب يا عم انتا كل ما بتتحرك بتعمل دوشة يعني لو خليتك تعمل أي حاجة هنتمسك علاولة...اركن هنا لحد ما باقي زمايلك ييجيو...
"لقينا واحد داخل طاير من الشباك"
سوبر مان:في خدمتك يا انسة ريم...تؤمري بايه...؟؟
ريم:اركن ياسوبر جنب الهلك استني باقي الناس..
"لقينا واحد داخل يتمرجح م الشباك"
سبايدرمان:حد ندهني؟؟...انا جيت عموما و ده معاد غدا...مين اللي قومني من علي الغدا...
هلك:اترمي هنا يا عم المسبسب بدل ما أضربك بالشبشب و انتا بتتمرجح علي الحيطان كدة
"فجأة أجد في وسط الغرفة كيان غريب معلق أسود اللون نعرف بعد ذلك انه انه بات مان"
"يتشقلب علي قدميه"
باتمان:مين ندهني...مين محتاجني ف جوثام سيتي..
ريم:انتا هنا ف فيصل يا برنس..أرجوك استريح...تشرب ايه؟...
باتمان:عصير وطاويط...
"بعد ذلك نجد عصابة من المتشردين تتسلق علي وجه عمارة ريم و يدخلون الغرفة و هم يصرخون"
"تصرخ ريم فيهم ليصمتو"
ريم:انتو مين و عاوزين ايه..؟؟
"ينفتح الحشد لنجد رجل غريب الشكل يبدو أنه مجنون"
الرجل:كابتن جاك سبارو تحت أمرك يا سيدتي...ركنت السفينة ف أول الشارع و جيت أول ما عرفتي انك مزنوقة فيا....
"نري هلك يجمع المتشردين بيد واحدة و يضعهم إلي جواره"
"نلمح باب الغرفة ينفجر"
ريم:يا سلام...جاي متأخر و بتفجرلي الباب يا سيي هاري..يافرحة فولدمورت بيك...
هاري:اسكتي بقي...انا مزوغ منه بالعافيه ف المترو....ادخل يا رون...تعالي يا هرميوني...يللا يا جيني...و النبي يا جيني صلحي الباب تاني عشان ريم...
"يجلسون جميعا إلي جوار القراصنة و هلك و سوبر مان"
"نسمع صهيل أحد الأحصنة و نراه يجري في الشقة"
"تخرج ريم من الغرفة لتري ما الأمر و اذا به زورو"
ريم:انا قلت ميت مرة..مفيش حصنة ف الشقة و قلت ميت مرة..بلاش شخبطة علي الحيطة بالسيف....انا مطلبتكش..
زورو:بس انا جاي أساعدك....
ريم:يمين بالله لو ما اتلميت انا هاخلي الناس اللي جوة دي تعزف علي قفاك...
"نري باب الشقة ينفجر مرة أخري"
"نلمح رجل أنيق الملابس وسيم الملامح  يرتدي بدلة سهرة يخرج من الدخان"
الرجل:اسمي بوند...جيمس بوند....
ريم: "تتكلم بوله"اهلا يا مستر بوند..انا مش مصدقة عينيا....بجد مش مصدقة..
جيمس:مفيش هيقدر يساعدك غيري....سيبك منهم...
"نلمح العصابة دي كلها خارجة من الأوضة جوة"
"بالترتيب...زي هلك ماشي بيهز الأرض...باتمان...سبايدر مان..ماشي علي الحيطة سوبر مان طاير....جاك سبارو و وراه شوية الحرامية  في الاخر..."

"ريم تبدأ في الشرح"
ريم:مهمتكم انكم تجيبو ورق امتحان المادة اللي انا هامتحن فيها الامتحان اللي جاي..لأني معرفش أي حاجة عن المادة..
زورو:"نلمح زورو نائما علي حصانه " طب ما تذاكري أسهل....ايه الملل ده...
"نلمح زي هلك يبدأ في الغضب و يتحول مرة أخري ثم يخرج من المكان"
باتمان:بقي انتي جايباني من جوثام سيتي عشان ورقة امتحان..انتي علي كدة عاوزة الجوكر....
سبايدرمان:"يتشقلب علي الحيطان" ما أعطللكيش بقي...باي باي يا قشطة....
ريم:كلكم ندلتم....ماشي...ماشي..
جاك سبارو:انا مندلتش....انا معاكي و هنجيب السفينة..قصدي هنجيب الورقة..
ريم:يعني هو مفضلش غيرك...من قلة الناس العاقلة ف البلد؟؟...
بوند:اخص عليكي يا ريم..و انا رحت فين..أما انتي جايبة العالم الكسر دي....بوند يروح فين؟؟
"نسمع صوت تفجير و رصاص و نلمح رجلا وسيما يتسلل إلي المكان"
الرجل:انا جيت يا انسة ريم و مستعد للمهمة..
ريم:انتا مين؟؟
الرجل: "بشمم و إباء"..أنا...رجل المستحيل..أدهم صبري...

"اذن احنا معانا ف المهمه باتمان و زي هلك و جاك سبارو و زورو و بوند و فوق البيعة أدهم"

ريم:أومال فين هاري و رون و هرميوني؟؟
"نلمح فولدمورت و هو يقتحم المكان و هاري و رون يحاولان محاربته"
هاري:كروشيو..كروشيو..كروشيو يا ابن الكلب...
ريم:"تصرخ" لا يا هاري...إلا اللعنات التي لا تغتفر...
رون:و النبي تسكتي يا حاجة انتي مش عارفة حاجة...
هاري: انتي فاكراني هموتو بتعويذة صعق..دول بقين بنقولهم عشان نحلل اللقمة انما احنا أصلا مش شغالين غير بيهم...كروشيو....افادا كيدافرا...موت يا ابن الكلب بقي..جننت أهلي سبع أجزاء..
"يهرب فولدمورت من المكان و يخرج وراءه كل السحرة"
ريم:و ادي هاري بوتر و اصحابو طارو....يبقي انتو بس الموجودين...مهمتهم تجيبو الامتحان بالحل قبل ما الشمس تطلع عشان ألحق أطل عليه قبل ما أدخل الامتحان..اتفضلو...ربنا معاكو....
"يخرج كل الأبطال الخارقين في الشارع"
باتمان:انا هاستخدم كل التكنولوجيا اللي أعرفها أني أعرف فين بيت الدكتور و أجيب منه ورق الاجابة...
"نلمح باتمان يستعد للركوب في السيارة لكن أحد الأسهم يوقفه  - نلمح جاك سبارو قادما من الخلف"
جاك:مش هتتحرك ثانية لوحدك ف العربية دي..اركبو يا ولاد
"نري في المشهد القراصنة الجربانين قاعدن فوق حجر بعض في العربية و باتمان يبدو عليه القرف"
باتمان:"يصرخ" بس يا جاك يا حبيبي متلعبش ف العدادات....
"جاك لا يزال مصر علي اللعب ف التابلوه"
باتمان:بس يا جاك متلعبش ف حاجة..ينعل أبو دي شغلانة...بس....
"يفرمل باتمان جامد جدا و الكل ينقلب للأمام "
باتمان:العجلة الورانية نامت.انزلو غيروها..
"ينزل القراصنة من عربية باتمان و يهرب هو من دونهم"
باتمان:اه يا بات يا صااااااااااااايع!!!"يضحك و يبدو معجبا بنفسه بشدة"

"نلمح أدهم صبري و جيمس بوند أمام البيت"
أدهم:معلوماتي من قدري بتقول ان الدكتور ده ساكن في شبرا....
"نلمح بوند يمسك كأسا و يصب لنفسه شمبانيا و لا يزال في بدلة السهرة الأنيقة"
بوند:بس انا معلوماتي من المكتب الخامس بتقول انو ساكن ف الرحاب...
أدهم:سؤال بس..هو انتا رايح فرح؟ايه اللبس ده؟؟
بوند:ده تنكر يا نون واحد...تنكر..
أدهم:و أول درس ف التنكر انك تعرف نفسك للناس..انجر يا عم صفرين سبعة انتا ف الليلة السودة دي معاك عربية....؟؟
بوند:أكيد...
"نلمح سيارة من أيام السبعينات كاديلاك قديمة اللي هي سبعين متر دي"
أدهم:بس دي دركسيونها شمال يا نجم؟
بوند:انجليزي يا عم نون واحد..اركب بقي متخنقنيش...
"يتحرك ادهم و بوند من أمام المكان و نري زورو يخرج بالحصان من الأسانسير و يقف في الشارع"
زورو:ريم قالت ان المدرس ساكن في الدقي...اذن..إلي الهرم يا سيريبرو...
"نري الحصان يرفض التحرك و يسقط زورو من عليه"
زورو:تاكس...الهرم يا أسطي..."يكلم الحصان" خليك لوحدك زي الكلب بقي...
الحصان: "يتكلم بلغة الخيول"قالت ف الدقي مش الهرم يا غبي
"نري الحصان يجري خلف التاكسي الذي ركبه زورو"
"سوبر مان ينزل بخفة من أعلي ثم ينظر نحو الاتجاه الذي سيطير فيه"
سوبر:الراجل الدكتور ده لا يمكن يفلت من ايدي...لازم انا اللي أجيب الورقة دي...
"يفرد يده و يستعد للطيران"
"نلمح سوبر مان ينطلق لأعلي و يصطدم في رافعة أسمنت..و يسقط علي الأرض زي البرص المضروب بالشبشب"
"نري زي هلك يقترب منه و يحمله علي كتفه"
زي هلك:"يكلم سوبر مان" و عاملي فيها صايع..و برم.. وانتا أحول أصلا...ده ايه الهم ده يارب..هتيجي منك و لا من بنت المجنونة اللي عاوزة ورقة الاجابات...قوم قوم...
"يجلس زي هلك و سوبرمان علي أحد القهاوي المجاورة"
سوبرمان: "نري رأسه مربوطة بالشاش" وحياتك يا أخويا انا طالع عين أهلي في أم الشغلانة دي...محدش مقتنع اني كبرت..و مصرين اني أستمر..طلبت أطلع معاش مبكر بدل المرة ألف...بس لا حياة لمن تنادي
هلك:اشرب الشاي اشرب..محدش واخد منها حاجة....
"نري زي هلك يرفع جردل مليان شاي علي بقو و يشربو ف بق واحد بنفس واحد"
"في نفس الوقت باتمان و القراصنة يصلون للكلية و نلمح جاك سبارو متشعلق ف العربية و القراصنة لحقو باتمان"
جاك:لولا ان احنا بننقذ السفينة قصدي بنجيب امتحان كنت وريتك شغلك....يللا....
باتمان:اللهم طولك ياروح....يا مصبر الوحش علي الجحش...
"يجرب باتمان في الكلية و نراه يطلق سهما إلي أعلي المبني و يتسلق فيه و نلمح القراصنة متشعلقين في عبايته"
باتمان:يا ولاد الكلب هتوقعوني..اوعو "يحاول باتمان التخلص منهم لكنهم يسقطون جميعا"
جاك:"يقترب من باتمان النائم علي الأرض" ده بينو مات يا ولاد....اعملو اللي عليكو...."يرفع قدم باتمان و يتركها لتسقط" هو فعلا مات...
"القراصنة ينطلقون ف الكلية و بيفتحو كل المدرجات و كل الدواليب و يعبو ف الشنط كل الورق الل بيلاقوه و ف الاخر يكسرو باب الكافيتريا و يقعدو ياكلو من الحاجات اللي جواها"
"في نفس الوقت التاكسي اللي فيه زورو ف شارع الهرم و الشارع واقف و الدنيا زحمة اخر حاجة..."
زورو:"يصفر لسريبرو" انتا ياض...بسس....يا سيربرو...تعالي....
سائق التاكسي: "زورو يقفز من التاكسي" الحساب يا حرامي...
زورو:اطلع علي الدكتور يا سيربرو....
"نلمح سيربرو و زورو أمام مبني مكتوب عليه "(المعهد العالي للدراسات المتطورة )"
زورو: "يدخل المكان بالحصان"..الكونترول اللي هنا فين.؟؟؟
موظف:انتا مين يا كابتن....
زورو:انتا مش عارفني..انا "يحرك السيف بخفة أمام الراجل" انا زورو يا عم الحاج
"نري الرجل علي وجهه حرف الزد بالدماء"
"زورو يسرق كل الأوراق في الكونترول و يضع علامته علي كل ابواب المعهد زي الأهبل"

"بوند و أدهم صبري يقتحمان شقة في شارع شبرا ظنا منهم أنها شقة الدكتور"
"نري أدهم يلف بحركة صاروخية علي كل الموجودين و يكتفهم"
بوند:انطقو....ورقة الاجابات فين....
أدهم:هينطقو ازاي و انا مكتفهم...
"يتمشي بوند بينهم و يختار الست الأجمل و يفكها"
بوند:عشان جلالة الملكة "يقترب من السيدة و يحاول تقبيلها"..."يمنعه أدهم"
أدهم:ايه يا عم احنا جايين في ايه و لا ف ايه..عيب كدة..دي مرات الدكتور....
بوند:احنا لازن نضغط عليهم عشان يعترفو...
أدهم:ايوة احنا نضغط...مش نبوس..و النبي وسع بدل ما أكتفك معاهم...
"نري الدكتور يخرج من غرفة النوم مفزوعا"
بوند:"يصافح الدكتور"اسمي بوند..جيمس بوند..
"نري أدهم يدور كالنحلة حول الدكتور و يكتفه"
أدهم:ورقة الاجابات فين...انطق....
بوند:انطق...بدل ما أفجر المكان..
"يرمي بوند قنبلة في المكان فينفجر و يموت كل الموجودين ما عدا أدهم صبري"
بوند:انتا ازاي ما موتش؟؟
أدهم:دنا رجل المستحيل يا عم صفرين سبعة....علي فكرة انتا غبي... "يصرخ في بوند"انا كنت لسه هاعرف منو الورقة فين يا ابن الهبلة..تصدق انك غبي....."يطلق عليه رصاصتين"
بوند:كدة انتا كرمشت البدلة "نراه يخرج كأس و يصب لنفسه شامبانيا" علي فكرة لو فضلنا نموت ف بعض لبعد بكرة بردو مفيش فايدة..باقولك ايه انا جعت..ما تيجي نضرب أي حاجة؟؟
أدهم:يللا..بلا ورق بلا بتاع بقي....
"يخرج أدهم و بوند من المكان و هما يضحكان"
بوند:بص انا هاعلمك الحيلة بتاعة البدلة و انتا تعرفني ازاي بتكتفهم كلهم ف نفس واحد
"نري أدهم يدور حول بوند كالنحلة"
أدهم: زي كدة؟؟
"نري بوند متكتف."
بوند:تمام كدة.."نري أدهم يبتعد" يا أدهم...يا نون يا واحد...يا أدهم...اه يا ابن ال....
"نري ريم في النهاية تجلس في الصالة منتظرة أن يعود الأبطال"
زورو:"يجري بالحصان في الشقة" هو ده الي انا قدرت أجيبو.. "يرسم حرف الزد علي السجادة" خدي أهو...طلع اللي ف جيبك يا سيربرو....
"تقرأ ريم الأوراق"
ريم:أدعي عليك أقول ايه و انتا فيك كل العبر..جايبلي ورق من معهد تاني يا زورو..قلتلك كلية..و ف الدقي..مش معهد فالهرم...
"يدخل جاك سبارو و خلفه شله القراصنة"
جاك:ريم محدش هيجيبلك الاجابات غيري.هاتو الحاجة يا ولاد...
"نري القراصنة شايلين صناديق زي صناديق الكنز و يفتحونها و اذا بها ملآنة بالشيبسي و الحلويات"
ريم:يا نهار أسود..انتا سرقت الكافيتريا و جيت...إلهي تتجنن كمان و كمان يا جاك يا ابن أم جاك...إلهي يشدوك مع مجانين السرايا الصفرة..إلهي يولعو فيك بجاز..."تنتبه لعدم حضور بقيتهم"..أومال فين باتمان...
جاك:الله يرحمو...كان راجل واطي....
ريم:"تصرخ فيه" موتت باتمان يا أهبل يا ابن الهبلة...طب فين أدهم صبري و بوند
"نري بوند يدخل المكان و هو متكتف يقفز محاولا الوصول"
بوند:أدهم الغبي فجر المكان و معرفناش نوصل لمكان ورقة الاجابة "يجلس بوند و يخرج كأس ليصب لنفسه بعض الشامبانيا"
ريم:"تواصل الصراخ" طب و فين سوبر مان و هلك...
بوند:لسه شايفه بيشد من شيشة تفاح علي القهوة إلي ف أول الشارع..و مراحوش أصلا....
ريم:كدة طب أنا أعمل ايه..ربنا ينتقم منكم.... و لا واحد عرف يجيبلي الاجابات....
"نلمح سبايدر مان ينط من السقف اللي كان متشعبط فيه"
سبايدر مان:كده انتي لازم تذاكري يا قشطة هاهاهاهاي....."يتمرجح سبايدر مان خارج المكان و ينصرف الجميع"
"نلمح رجل أبيض الشعر يدخل إلي المكان و في يده ظرف مغلق"
الرجل:انتي الأنسة ريم ؟؟؟
ريم:ايوة انا.... مين حضرتك...
الرجل:انا جون دارك....
ريم:لا... انتا محمد السبكي....خدني معاك وديني الكلية يا سبكي..
الرجل:تعالي بس..
ريم:"تبكي"رجعني الكلية يا سبكي..خدني معاك يا سبكي
"النهاية"
"فكرة مصطفي اخويا"

24/23 يونيو 2011

تعليقات

  1. انتي ازاي ضحكتيني فشخ كده؟ :D

    ردحذف
  2. انت فصلتيني ضحك، احلي حتة سوبر مان لما بقي زي البرص المضروب ﺑﺎﻟﺸﺒﺸﺐ:)

    ردحذف

إرسال تعليق

تعليقك يسعدني..يا أفندم!

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!