الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

30 يناير 2013

شارع مراد...

صورة رأسية لشارع مراد

كن كما تريد...

لا كما يراد..

وسيب كوبري ثروت...

ادخل شارع مراد...

فيه عربية بليلة...

وبنزينة..و زحام...

وفيه أيام طويلة..

وفيه مر و آلام...

وحلة محشي فاضية..

هغرفلك من مفيش...

دنا طباخة و بريمو...

ونفسي ف يوم أعيش...!

البنت بحور غريقة...

غربة..ملهاش طريق..

وسهر و هموم..وضيقة...

وقلب ملان حريق...

الجفوة ف قلبي طارحة...

واتعودت البعاد....

وسبت كوبري ثروت..

ومشيت شارع مراد!

الخميس "18 أكتوبر 2012"

25 يناير 2013

100 علامة إن shong pong هي أغبي واحدة ف مصر - الجزء الثاني.


1-     اني يبقي نفسي أفتح مطعم و مكتبة و سايبر جنب بعض
2-     اني عاوزة أشتري عربية علي الرغم من ان انا أصلا باخاف من السواقة و الكباري و الطرق السريعة
3-     اني أعرف ان طوني قهوجي "مخرج لبناني" سارق كليباته كلها من أفلام أمريكاني استعراضي
4-     اني أضحك بغباوة علي حلقات فريندز و كل الناس اللي حواليا بتستغرب انا باضحك ليه أصلا علي تقل الدم و قلة الأدب دي..=))
5-     اني أبقي قاعدة أذاكر و الأوضة فاضية بس انا متأكدة ان مروان قاعد علي السرير بيكتب أغنية جديدة و كل ما أتدور يكح عشان يكمل كتابة
6-     اني أبقي قاعدة ف الميكروباص و أندمج مع الأغنية و صوتي يعلا و كل الناس تبص علي الهبلة اللي بتغني بصوت عالي
7-     اني أبقي ماشية ف الكلية "بالهيد فون بردو" و حد يقرب مني يلاقيني باغني "انا راجل قوي مش قلة و لا يهمني من ده و لا دي"
8-     ان يبقي مسلسلي المفضل في رمضان "الحاجة زهرة" و البرنامج المفضل هو "بدون رقابة" و الحاجة اللي مش باستحمل أفوتها "فوازير مريام" و اني ما أفتكرش من رمضان نفسو غير "ألبوم مروان خوري اللي مسبتهوش ولا لحظة " و أغاني محمد حماقي اللي كانت مالية الموبايل و خصوصا أغنية متعقد...
9-     ان تبقي أغنيتي المفضلة في وقت م الاوقات بتقول "ضايع مني ازازة المية و موش راضية الطيارة تطير"
10-  اني أغير من واحد شاعر طلع في التليفزيون اسمو "مصطفي ابراهيم"و أرفض أسمعو عشان ميبهتش عليا
11-  اني لما باتكلم جد الناس بتفتكرني باهزر و لما باهزر الناس بتاخد الكلام كلو بجد
12-  اني باغير صورة البروفايل علي الفيس كل تلات تيام و الستاتس كل تلات دقايق
13-  اني أحط ستاتس و مية و عشرين كومنت و انا اللي كاتباهم كلهم
14-  اني أحب الدكتور اللي سحل الدفعة كلها ف الامتحان و يبقي نفسي أطلعلو مكتبو و أشكرو انو هيخليني أشوفو تاني السنة الجاية
15-  اني أبقي شايفة "Winnie the pooh" قليل الأدب عشان موش بيلبس بنطلون
16-  اني أضحك علي افيهات قديمة كنت باكتبها علي الهوامش في كشكول المحاضرات
17-  اني باتدايق من أغنية مروان خوري بيقول فيها "تم النصيب و صارلي عمر ناطر"..طالع بيتجوز ابن المتدايقة و تبقي الأغنية بتدايقني و بردو أحطها علي الموبايل و أسمعها عادي...
18-  ان قناتي المفضلة تبقي "مزيكا و زووم (عشان أغاني تامر) و ميلودي و روتانا (عشان باقي المغنيين)"
19-  اني ميعجبنيش كليب اتصور لأي مغني و تبقي ليا رؤية تانية و أبقي متأكدة ان انا أحسن من المخرج
20-  اني أحزن لرحيل الدكتور مصطفي محمود بأني أقرا كل الكتب اللي مكنتش قريتها و هو عايش..
21-  ان أكتر أغنية بتسمع مع الناس لصابر هي "ع اللي جري" أبقي باكرهها و ان الأغاني اللي باحبها يبقي هو متبري منها...
22-  ان فيه أغنية لصابر كل ما تبتدي أقفلها و أسمع وراها أغنية معينة لخالد سليم و لحد دلوقتي عمري ما عرفت أغنية صابر دي بتقول ايه أصلا
23-  اني أكره أغاني وائل جسار بتاعة "نبيل خلف و وليد سعد و أبقي حاطة الشريط في الريسايكل بين"
24-  اني أكره مرات بلال فضل لمجرد انها مراته
25-  اني أروح ألف حوالين البيت اللي بلال فضل كان ساكن فيه أيام الكلية في شارع المحطة ف الجيزة

23 يناير 2013

القهوة سادة...





باجري وراكي..
ياتسبقيني
يا أسبقني!
والحلم راكب فرس بيجري..
ياريته يجري..ويلحقني!
جريت ف ايدي...
سر السعادة...
في ميت قنينة..
جرعات زيادة...
بس الطريق من كتر طوله..
كسر قزايزي...كدة بالأكادة...
وعشت أغني واقف بطولي...
وحاولت أعمل شئ بطولي..
يابت انتي...قد ايه تطولي...
بين شوق ولهفة...
بتزيد زيادة...
العمر ماشي..
والرزق جاي...
انا كنت ميت...
مبقتش حي.....
والعين بتلمع...
وفيها ضي...
والعيشة مرة..
والقهوة سادة...

22 يناير 2013

سوسن


زاروني الزنتين

لافيني الشلوتين..

وضميني وراعيني..

لا يمكن تكرهيني..

باحبك اه يا سوسن..

مالك..بتبكي ليه؟

قرفتيني بعروستك..

وقمت انا وبوستك..

وبردو مكفاكيش..

وامتي اسمع سكوتك..

وامتي ف يوم هاعيش...؟

يا بنت الناس يا سوسن..

انا...مسرقتكيش...

عروستك بس هربت..

ونار الدنيا شربت..

خلاص الدنيا خربت..

وراحو الدمعتين...

هتبكي يا بنتي مين؟

ريم
 22 يناير 2013

21 يناير 2013

النتيجة



حط النتيجة علي الحيطة..
من غير ما تقلب...أيامها
وسيبها يوم واتنين...تلقي.
وراها..يشبه قدامها...
تلقي الجلود دي تتشابه
تلقي المصالح..تتشابك..
بس الملل واحد واحد...
والنفس دايما تسأمها...
من كتر ما الشارع ضلمة..
والنفس أمارة..وظالمة...
وباب حبيبي المتقفل...
بقي اعلي من باب الكعبة..
قصتنا دي طويلة..وصعبة..
وحلفت ع الدنيا وماشي..
القصد..كله خلاص ماشي.
اضحكلها جايز تضحك...
ويجوز هتدينا تمامها...
واهو يوم شبه يوم بيعدي...
والعقل جنزر...ومصدي...
واترمل الحلم الوردي...
ورمت هدومها مع جزمها...
ووراها..يشبه قدامها...

ريم
21 يناير 2013

19 يناير 2013

وحشتيني يا بنت الكلب...



يا بكرة امتي انا اشوفها..
واهو انتا...أدري بظروفها...
انا بشتاق...
وبتشاقي...
وقلبي يحن..نتلاقي...

لكن خلاص...
تعبت حنين...
ولا مريم..ولا نرمين..
ولا سارة ولا فراج...
ياقلبي...اطلب الافراج...
كفاية الأسر...والحبسة...
هنطلع ع البوليس كبسة...
وادي الأرقام...ما تمسحها...
وامشي..بدون ما نجرحها..
ونجرح قلبي وياها...
تكحل عيني رؤياها...

ياريت الدنيا دي سابتها...
ياريتني ف يوم انا نسيتها...
ولو كان القدر سفاح...
انا هرميها..بطوبتها...
كفاية تسيبني ف ايديها..
بلاش تعملني معروفها...
يا بكرة كفاية شوق وحنين...
خلاص...
مش عاوزة انا اشوفها....

13 يناير 2013

مشهد أفقي - من الجنة...


جلست وردة علي كرسيها الهزاز تحيك بعض الملابس الصوفية لطفلها المنتظر، وسط فرحة بليغ حمدي، بمولوده الأول الذي سيصل للدنيا بعد انتظار طويل، قطع المشهد حفيف صوت ثوب صباح، التي كانت تتسلل في خفة لتضع اسطوانة راقصة في الجرامافون الجديد الذي اشتراه لها فريد الأطرش من باريس.


دخلت أم كلثوم إلي الغرفة ليقف الجميع مهابة واحتراما، قبلت رأس وردة، وداعبت بليغ ببعض الكلمات، ونادت علي فايزة أحمد، التي جلست في ركن بعيد من الغرفة تقرأ كتابا، لكنها وضعت الكتاب جانبا، لما رأت محمد سلطان حاملا بعض أكياس الفاكهه الطازجة، مازحت أم كلثوم الجميع، وشرب الجميع القهوة.


ساد الصمت في الغرفة لما تسلل إلي أسماعهم صوت عبد الوهاب، كان مندمجا في لحنه الجديد الذي سيقدمه لليلي مراد، التي دخلت وبصحبتها يوسف وهبي، ومن خلفهما علي بدرخان، في ذراعه سعاد حسني، التي جلجلت ضحكتها وملأت المكان.


بدت الغيرة في عيني عبد الحليم حافظ الذي كان يحادث محمد حمزة، وقطع حديثهما الهامس كمال الطويل، الذي أتي بصحبة الموجي، لينهي خلافا طال بينه وبين حليم. ضحك الجميع، وتحلق البعض حول عبد الرحمن الأبنودي، وأمل دنقل اللذين انغمسا في مبارزة شعرية، ثم انفضت المبارزة لصالة أحمد فؤاد نجم، الذي دخل وبصحبته الشيخ إمام، ليسمعا الجميع اللحن الجديد.


ضحكت شادية بشدة لما سمعت منير مراد يقلدها، وبدأت هي بتقليده، ثم قلدت نجاة التي انصرفت غاضبة وسط جلجلات ضحكات سعاد وحليم. ولما دخلت أسمهان الغرفة هرع الجميع لتحيتها، ثم ارتمت في أحضان فريد، الذي انحدرت من عينه دمعه، لامست كتفها العاري، فانتابتها قشعريرة حميمة، وعادت بظهرها للوراء لتصطدم بكرسي وردة الهزاز، فيسقط منها خيط التريكو، الذي تحيك منه بعض الملابس الصوفية ...لطفلها المنتظر...


اقرا الجزء التاني من هنا.

05 يناير 2013

100 علامة إن الشونج بونج أغبي واحدة ف مصر! - الجزء الأول..


البتاع ده كتبته سنة 2011 تقريبا في إبريل، وهو عبارة عن 100 نقطة، حبيت أخرع الناس بأول جزء منه، عشان أي حد بيسأل انا غبية ليه وكدة، عشان تبقو عارفين يعني :))))



1-     اعلانات "عشان تعرفوهم روحو شجعوهم" مفهمتهاش إلا بعد ما اتعرضت و خلصت.
2-     نهاية كليب "خبيني" بتاع مصطفي قمر انا مفهمتهوش لحد دلوقتي.
3-     لحد دلوقتي انا مفهمتش ايه المغزي من فيلم "ماتركس".
4-     باحب ألبس الفانلة من فوق الهدوم "الله يخرب بيتك يا عادل يا امام"
5-     فيه أغنية مروان خوري كان بيغنيها في ألبوم ليه نازل من بتاع تلات سنين لسه فاهماها من تلات ساعات وفهمت الكلام بيدل علي ايه.
6-     اغنية اطلع فيي بتاعة كارول سماحة كانت بتقول فيها "لونت عيونك و رسمت شفافك تاتقلي بعدو الحب..بعدك انتا اللي كنت" انا كنت فاكراها هي اللي لونت عيونو مش هو اللي بيدعي انو لسه لساه بتاع زمان
7-     اتفرجت علي فيلم "حدوتة مصرية" أكتر من ست مرات عشان أفهم عاوز يقول ايه.
8-     اني لسه مكتشفة ان كل أغاني مروان خوري شبه بعض و كل أغاني تامر مفهمش واحدة مختلفة عن  التانية و ان تامر عاشور مش بيعمل حاجة ف حياتو غير انو يدي حبيبو بالجزمة بعد كدة يندم علي أم اللي عملو فيه
9-     اني فضلت أتفرج علي حلقة برنامج و اكتشفت ان البرنامج من سنة 2007 بس بعد ما خلص
10-  اني لما أعجب بأغنية أفضل أعيد فيها و أعيد لحد ما أكرهها و اني لما أحب مغني أركز عليه لدرجة تزهق المغني نفسو
11-  اني أبقي باسمع ناس أصلا زي دول "بعرور – جاد شويري – مصطفي كامل – حسن الأسمر – ريكو – حمادة هلال – طارق الشيخ – عبد الباسط حمودة - عمدة "
12-  ان النشيد القومي بتاعي يبقي "مين ده اللي كاره دنيتك و بيشتهي موتك" تتر مسلسل الدالي
13-  ان أتابع مسلسل الدالي بأجزاؤه الأول و التاني و أبقي مترقبة التالت و أتفرج عليه ف رمضانأصلو بيضحك أوي J)
14-  اني لما أيأس من حياتي تبقي أغنيتي المفضلة و شعاري المفضل "اه يانا...تعبانااااااااااااااااااااااااااا"
15-  اني أحاول أقلد هيفاء وهبي و أبقي مقتنعة اني ممكن أبقي زيها ف يوم
16-  اني أحب أحمد عز بتاع الحديد عشان شيك و شعرو ناعم قوي "صباح عقدة النقص"
17-  اني أسمي اللاب بتاعي خميس "عشان الحسد"
18-  اني أحط ستيكر بمبي علي اللاب مع اني لوني المفضل الأزرق
19-  اني أدهن ضوافري "أزرق ميتاليك -  نبيتي – أبيض جير"
20-  اني ألخبط اي لونين من الألوان سابقة الذكر علي بعض
21-  اني باعمل مج شاي كومبو عبارة عن "شاي سادة + شاي أخضر + نعناع + معلقتين سكر"
22-  اني كتبت اتنين و عشرين حاجة لحد دلوقت مع ان العنوان "عشر علامات علي اني غبية جدا"
23-  اني أبقي لسه باعرف واحدة صاحبتي لحد دلوقتي علي الرغم من اني مشفتهاش من أيام ثانوي إلا حوالي سبع مرات ف تمن سنين
24-  اني أول حاجة بافتحها ف الجرنان هي صفحة الفن في المصري اليوم أو الراديو و التليفيزيون في الأخبار و ملحق الفن ف أخبار اليوم
25-  ان حلم حياتي أعمل سايت زي IMDB علي النت بس للأفلام العربي.

02 يناير 2013

أمة من خادمي العملاء....


تسعة من بين كل عشرة إعلانات وظائف تطلب موظفين لخدمة العملاء في مصر!




بناءا علي احصائية أجريتها علي مدي ثلاثة أشهر، وجدت أك تسعة من كل عشرة وظائف تطلب موظفي خدمة عملاء، وهي مهنة محترمة أكن التقدير لمن يعملونها...لكن....دعوني أتكلم قليلا عما يدور في خاطري.

لقد أصبحنا أمة من موظفي خدمة العملاء، كل من أعرف عمل في خدمة العملاء، مرتبات مغرية، وظيفة محترمة، ولقب لطيف تسعد بحمله، لكنني حتما، وفي داخلي أحتقر نفسي لما فكرت أن أمتهنها....لم؟ لسبب بسيط...

درست أربعة أعوام في علوم الكومبيوتر، وتعلمت الكثير في الكلية، وتعلمت أكثر بنفسي، وتفتحت مداركي، وانتبهت حواسي لما هو أبعد، تأثرت بنجوم نابهين في مجال تكنولوجيا المعلومات، ورأيت مفهوم ريادة الأعمال، وكيف أنك ان لم تعمل ما تحب، فلك الحق أن تنشئ وتطارد حلمك الخاص، وأحببت كثيرا كل هذا وتمنيت كل التمني أن أعمل في مجال دراستي، لكن...ينتهي الحال بالكثيرين في مقعد خدمة العملاء، لشركة مثل تي اي ديتا، أو لينك!

لم أدرس لأعمل في هكذا مهنة، لم أضيع أربعة أعوام من عمري، لتنظر لي موظفة  موارد بشرية لا مؤهلات لها سوي بعض اللكنة الانجليزية، والشعر الحرير، لتبدي امتعاضا بلهجتي، ليس ذنبي أنني لم أترب في مدارس لغات منذ الصغر، وليس ذنبي أنه لا مال لدي لأتعلم النطق الصحيح، ولم أدرس أربعة أعوام، لتفضل موظفة ما "لا تستطع فتح حاسبها الشخصي من دون مساعدة جيش" خريج كلية نظرية، كتجارة، وحقوق وآداب، لا أحتقر خريجي الكليات الأخري، لكنني أشعر بالظلم....

كل المعروض خدمة عملاء...لكن من قال أن طموحي هو الرد علي العملاء الغاضبين واعادة اتصالهم بالانترنت مرة أخري؟؟
من قال أن طموحي أن أصبح قردا مدربا يسير علي النص، ويتقاضي أجرا محترما ويعمل عملا من أشد الأعمال إرهاقا ومللا ثم أشعر بالرضا عن نفسي؟

لا أحد...إنها فقط الظروف السيئة، والحظ العكر، الذي يلقي بكل الخريجين، لا تفرقة ولا تمييز بينهم، إلي فرن خدمة العملاء، لينصهر من ينصهر، وليرفض فقط دخول الفرن، العنيد مثلي...

لا أقول أنني لم أتقدم لهذه الوظائف، تقدمت كثيرا، لكنني رأيت كيف يصلني الرفض، مرة تلو الأخري...وينظر لي نظرة غريبة، فحواها أن شهادتي ورقة لا قيمة لها، وأن من لدية لكنة أفضل مني، وأن وأن وأن....تجرعت الأسي مرة تلو الأخري، وسط  استغراب الناس برفضي للتقدم لأية وظيفة من هذا النوع...لايهمني المرتب الضخم، ولا المقعد الوثير، لست قردا مدربا، ولا أحب اتباع النص والسير علي خط، أنا أرفض تعبئة كفاءات خريجين كليتنا في مثل هذا المنصب، ويا دولتنا الموقرة، إن لم تسطيعي توفير وظائف ملائمة، فأرجوك مشكورة، أن تغلقي الكلية، وتقتلي الخريجين..!

الرافضة لخدمة العملاء
ريم

 
Reem Essam Cairo , Egypt | copyrighted2011 - Reem Essam