الترمس....


الحدث:

 "بائع ترمس يتشاجر مع أحد المارة بميدان التحرير لخلاف علي ثمن قرطاس ترمس"


رصد:
أحد أعضاء جماعة "احنا اسفين ياريس" يفتعل مشاجرة مع أحد ثوار الميدان من شباب الاخوان-خسائر طفيفة- و ائتلاف شباب الاخوان يتوعد بالرد

التليفزيون المصري و الصحف القومية:
أحداث عنف و شغب....في تركيا!

العربية:
أنباء عن قلاقل في ميدان التحرير صباح أمس

سي ان ان:
معركة ال"ترمس" – السر وراء دخول أحد أعضاء "أنصار مبارك" متخفيا في ثياب بائع ترمس

مرتضي منصور:
بياع الترمس ده أصلا..بيشتغل بياع بليلة بعد الضهر و الواد اللي اتضرب ده سيديهاته كلها عندي!

أحمد سبايدر:
أوكسوم بالله يا شعب انتا ما فاهم حاجة..الترمس ده مدور...زي العين...و العين رمز الماسونية يعني بتاع الترمس ده ماسوني واللي حصل كان بترتيب من وائل غنيم

البرادعي:
لا بد من تشكيل مجلس رئاسي منتخب من شخصيات ذات ثقل سياسي لبحث مسألة باعة الترمس في مصر – الثورة مستمرة

نوارة نجم:
بياع الترمس ال$#%$% ده تبع عمر سليمان و انا حذرتكم مليون مرة

بلال فضل:
ما سأكتبه ليس دفاعا عن باعة الترمس و لكنها شهادة حق , الطرف الثاني للواقعة افتعل المشاجرة لتعكير صفو جو الميدان الثوري

توفيق عكاشة:
بتاع الترمس ده هوان..مزقوق من ساويرس...والترمس ده هتلاقوه متورد من مزارع شركة أوراسكوم ف البلد!..لو قلتلي يا سي البرادعي الترمس بيتعمل ازاي..هنتخبك رئيس جمهورية!!!

هالة سرحان:
من عبأ قرطاس الترمس الأول!!!!

حزب الكنبة:
هو ايه اللي كان نزله من بيتهم يبيع ترمس...وبعدين عربية الترمس كان فيها شوال مقفول بكباسين....حد يشيل شوال بكباسين؟!!!

تويتر:
#trmsBattle beta3 el terms darb tes3a
#trmsBattle
بتاع الترمس ده اخوان انا شفته مربي دقنه و شنبه و لما الادان بيدن بيصلي!
#trmsBattle انتو بتشقو وحدة الصف اتقوا الله
- نلاقي أكتر من نص التويبس يغيرو اساميهم ل "بتاع الترمس"

مكتب الارشاد:
يجب علينا التمسك بالأولويات..الانتخابات أولا!

خالد عبد الله:
يا واد يا ترمس!

ثوار التحرير:
مليونية لتأييد الشاب ضحية اعتدائات بائع الترمس و المطالبة بحقه

مجانين العباسية:
مليونية لتأييد بائع الترمس المظلوم

عمرو مصطفي:
انتا عارف يعني ايه ترمس بالانجليزي...يعني
terms يعني بالعربي مصطلحات..لا ياعدوي..هتلاعبني بالمصطلحات هلاعبك!!!

عصام سلطان:
هذا التفاف علي مطالب الأغلبية و دور مجلس الشعب اصدار القوانين لحماية باعة الترمس و المشترين و ليس اصدار البيانات

"يستمر المزيج بالأعلي في التفاعل مع التقليب باستمرار حتي تحصل علي انشغال ممتاز عن الهدف المستتر من المجلس العسكري حتي ينجح في أداء مهمته ثم تتم فرقعة بالونة الاختبار"
بثينة كامل:
يا جماعة بتاع الترمس اللي كنتو بتسألو عليه علي النت هو "خليل سعيد" و ساكن ف الدويقة

مني الشاذلي:
أأأأأأأأأ عرفنا بنفسك ياعم خليل!!!

فايزة أبو النجا:
ستتم صرف كافة التعويضات لضحايا موقعة الترمس في غضون 48 ساعة...

"تمت لحين حصول موقعة أخري"
"بالسلامة بقي"
31 يناير 2012


تعليقات

  1. جميع الطوائف لم ولن نختلف على تقييمك لها يا ريم !

    ردحذف
  2. مش حوار تقييم...بس دي أرائهم منذ بدء الخليقةّ

    ردحذف
  3. هههههههههههههههههههههههههههههههههههههه

    اثبت مكااااانك علي رأي كايروكي =))

    بوست فعلا تستاهلي تقولي عليه اولاكشي
    امال اللي بعد كدا هتعملي ايييييييييييييه !!

    ردحذف
  4. ههههههههههههههه فقر السنين

    تحفه اوى :)

    ردحذف
  5. ههههههههههههههههههههههههه
    هم يضحك وهم يبكى :D

    جميييييلة اوىىىىى :)))))))

    ردحذف
  6. راااااااااااااااااائع

    شر البلية ما يضحك

    تحياتي لك

    ردحذف

إرسال تعليق

تعليقك يسعدني..يا أفندم!

المشاركات الشائعة