الشعر باخ...


الشعر باخ...
بقي شئ لزج..
و كلام غلس...
نايم ...بطئ..
زي الفراخ..

الشعر باخ...
أو انا اللي بخت
و فجأة دخت...
حصللي انا و روحي..
انتفاخ...!!!

حتي القوافي...
خلاص..مفيش!!!
و بقيت خلاص
مش عارفة أعيش...
و الشعر أصبح ميساويش..
قرشين و نص..
أو تلاتة!!!
قلبي اتملا..
غل و تباتة...
تعبت...
طيب أعمل ايه؟؟
أهرب و أسيب
الدنيا عايمة..
و أضربها زهرة..
أو سباخ...
بالطبع لأ...

بالطبع لأ...
ده شئ غريب...
لأني ف العادي ..
جبانة...
عمري ما حبيت المواجهه
بافتح أنا ف أبواب جهنم...
و أهرب...
ما أسدش أي جبهة.
و العجز عجزني بسلامتو..
أكتب و أقول
حاجات جديدة...
غرقت ف الجخ و قصايدو
و قطامش الشعر الوحيد..
و غرقت ف النت
و عوايدو..
هجم عليا..كسل...بليد...
و رميت حمولي علي القصايد..
و قلبي ده..سخسخ...و سااخ..
و اتجهزت تهمة..ف ثانية...
و قلت ان الشعر باخ!!!!

4 أبريل 2011

تعليقات

المشاركات الشائعة من هذه المدونة

عربية أتاري...

كنوز مدفونة: صياد الطيور - جورج وسوف "الجزء التاني"

نادية الجندي....سور الصين العظيم..!