آخر ورقة من الكشكول....


لما كل حلم فيا
يبقي ألف ألف جيجا
و الرامات يكتر عليها...
انها تشيل اختياري...
لما أسيب الدنيا تولع..
و أبقي زلطة ف قلب سيجا...
يبقي حق الحلم انو..
يبقي بصرة..م البصاري...
الحياة
كوتشينة بايخة...
دور مالوش ف الكون لزوم...
احباطاتِك....خليهالِك...
درس..
ف كتاب العلوم...
خللي درس الرسم ده..
يعلمك..تفاصيل حياتِك....
و لا درسين ف القراءة..
يعوضو...أجمل ما فاتِك...
و لا درس نحو بايخ....
تلقي فيه صوت ذكرياتك....
امسكي التباشيرة
أهيا.....
اكتبي الجدول....جميل....
كل سطر و تحته..فاضي...
زي قلبي...
بس كل مساحة فاضية..
فيها تجري..و تستخبي....
يبقي جدول ضرب جدا...
بس فيه أكبر متاهة...
و تبقي سبورة ف ظاهرها...
بس فيها ألف عاهة....
افتحي الكشكول..
و شوفي الاسم
يطلع اسم مين؟؟
اسمك انتي...؟
ما أعتقدش؟؟
أعمل ايه؟؟
نمت ف الحصة الأخيرة..
طلعت ع الفصل الاخيرة
حتي عين أمي شافتني
وسط كل الناس..
"أخيرة"
و وسط كل اصحابي بابقي...
واحدة بتهرتل...و بس!!!
هو شئ مقصود و لكن..
ف النهاية..
باشوف..و أحس...
يا عزيزي الحب ركز...
و اقرا ف الكشكول..هناك..
أو بمعني تاني...
روّح...
و اقفل الشباك...وراك!!!!!!

11 مارس 2011

تعليقات

المشاركات الشائعة