الداخل مفقود...

علي مسئوليتك الشخصية..الداخل مفقود و الخارج مولود......
و انتا حر بقي...و كل عام و أنتم بخير......
سلام....

03 مارس 2011

مفيش داعي....!!!!!

مفيش داعي...

كفاية عليا..أوجاعي

أفتّح ف الدفاتر دي..

و أحرك ف الجبال...تهدي....

و أتخانق...

و أزعل ناس...
 
و أخدلك حقي...بدراعي....

مفيش داعي..

عشان خاطري..

كفاية فات...معاد قطري...

و آديني ف ترسو متعلق..

و باتخانق..

و باتخلق...

و باتعصب علي نفسي...

و يوصللي

بريد يأسي....

و لو داني لايديا الموت...

هاموت...

و أقولها معلشي...

هاصدر..للعذاب وشي...

و أسامح لو تصديني...

و عن حقك

ترديني...

و تاخديني شهيد حقي...

مفيش داعي....

أقولك...

و لا ما أقولهاش...

"بحبك..."

طب ما تسمعيهاش....

و لو حبيتي..

حبيني...

دموع عينك..

هترويني...

و سامحي الحب...

و انسيني...

و لما هاسيبك...

أنساكي..

ياريت. علي طول

تجاوبيني...

تقولي مين بدل قلبي..

علي حرف الهوي...

جابك...

و مين بات الليالي طوال...

و دوب حبه ف عتابك....

و ايه حد الهوي حدي؟؟

و مين حد الغرام...

حدك...

و مين اترجي ف بعادي...

و مين رحتيله..

بيصدك....

و مين طالع علي دراعي..

عشان ينعس علي خدك....

و ليه باكتب انا شعري...

و قلبي بعيد...

و مش حدك؟؟...

قوليلي و بوحي جوايا...

مسير الحب هيردك...

و سامحيني...

يا تمحيني....

و تنضمي لأوجاعي...

عشان أقدر أعيش بعدك...

أعيش؟؟؟

و لا مفيش داعي؟؟؟

23-فبراير 2011-02-24

01 مارس 2011

يا بطة يا بطوطة......."صفحات من تاريخي الأهبل"


و انا واقفة النهاردة عند الفكهاني....بصيت علي التفاح و الموز و البرتقان...

مفيهمش حاجة غير عادية.....
و انا بادور الناحية التانية....
بصيت لقيت وز واقف قدامي...
كانو ست وزات....

بازبهلال عيل صغير عندو خمس سنين شديت أمي من ايدها قلتلها "هو ده وز يا ماما؟؟"
قالتلي "وز ايه يا هبلة..ده بط..انتي مش شايفة منقاره؟؟"
طبعا أختكو لا تفقه شئ ف الفرق بين البط و الوز.....
غير ان البط ابيض..و الوز أسود عشان الشيطان وزها.....
المهم...
أمي واقفة بتحاسب عند الكاشير "ست قاعدة فوق عربية كارو و لابسة جلابية بلدي"
و انا واقفة مبحلقة ف البط.....
عمال يحرك رقبته 720 درجة
و اشي ينضف نفسه من ورا...و اشي ينضف ريشه من قدام...
بس الزغلول الكبير بقي...
لقيت البط بيحرك ديله....
طبعا نص اللي بيقرا هيقوللي "ايه البت الهبلة دي؟؟"
و النص التاني هيقول"و ايه الجديد؟؟"
الجديد ف طريقة تحريك الديل...تكنيك جديد و جامد جدا.....
و لما جيت أمسك البطة من ديلها "زي العيال الصغيرة بردو"
راحت هشتني و كاكت عليا و حركت ديلها....
أمي لسه واقفة بتوزن و تحاسب م الكاشير...."نفس الست فوق الكارو"
و انا واقفة أزبهل من البط...
و أول ما خدنا الشنط و مشينا رحت مزعقة ف الشارع 
"لاحظ ان أي حاجة بين القوسين تصرف عيالي"
رحت مزعقة و قايلة بعلو صوتي...

"و الله البط ده مليان أوبشنات!!!!!"

 
Reem Essam Cairo , Egypt | copyrighted2011 - Reem Essam